Jénésis 14
14
Ébaram o/nyii Lôt
1Batu banyii, Otu Amáráfel mú Bábyílon ne Otu Áryak mú Elósa ne Otu Kédolóma mú Élam ne Otu Tyídal mú Gówim 2ba/dim byití edanwa ne batu ḿbé áku batánge, Otu Béra mú Sódom ne Otu Byísha mú Gomóra ne Otu Shína mú Ádima ne Otu Sheméba mú Zébom ne Otu mú Béla, mú o/mû o-bángê e to Zówa. 3Batu ḿbén ashí atánge ba/cibi ne barî, ba-tî basúja ebe kyikit kyibónge ké owo mú Sídim, mú o/firi kántîk baya ḿbé badakó Bukyû. 4Mbé ashí kángkáng ba/mû ké abwô nyí Kédolóma ké aje diǐkpú ne afee, nké ké dyije ńdyí aje diǐkpú ne achât ba/bwom bunwa ne nyǐ. 5Ké dyije ńdyí aje diǐkpú ne anyii, Kédolóma ne batu ḿbé ba/bwom ne nyǐ ké kyikû ba/bê ne basúja ebe ba-kpógê banet ḿbé Réfyam ké Ashítarat-Kanyâm, ba-kpógê banet ḿbé Zúzim ké Hâm, ba-kpógê banet ḿbé Émim ké esí nyí ndege ńdege nyí Kyíryǎtyam 6ne banet ḿbé Hórit ké eku nyí Édom, ba-ró kámbé tete ba-ribi Épáran ké ocím-kyikim-dyikán. 7Ne ba-bwa esim kâng ké Kádyishi. Nkéré ámu, ba/mû ba-kó ng kámú Mmyíshípat. Mbé ba/kpógê kángkáng banet ḿbé ké esí nyí Amálek ba-kpógê to banet ḿbé Ámórit, ḿbé ba/mû ba-kyú u ké Hazázon-Táma.
8-9Ne batu kâng ḿbé Sódom ne Gomóra ne Ádima ne Zébom ne Béla ba-kúng basúja ebe ba-dim byití enwa ne batu ḿbé Élam ne Gówim ne Bábyílon ne Elása ké owo mú Sídim. Batu batánge ba/bwom bunwa ne batu banyii. 10Owo ámu o/mû ne abíng nyí ba/mû ba-sím m kotá, ne ké nkéré mú otu mú Sódom ne mú Gomóra ba/kan ba/fu, mbé ba-chêe ng byití, ba/róng ké abíng ányi. Nké batu ḿbé áku bachât ba/nwa ba-chêe ba-jâ ké eku. 11Batu ámbe banyii ba-kúng kángkáng byěm ḿbyí byi/mû ké Sódom ne Gomóra, cibicibi ne byiryíng ba-dim dyijê. 12Lôt mú wǎn-boné-Ébaram o/mû o-kyú u ké Sódom, ne batu ámbe ba-kám ǎ kâng ba-dim ne nyǐ ne kángkáng byěm emen ḿbyí o/mû ne mbyí.
13Nké onyinchéng obónge o/chêe o-da-sét Ébaram mú onet-Hyíburu kánkyí, mú o/mû o-kyú u fáráng ne byichí-ociring ḿbyí byi/já Mámare, mú o/mû onet-Ámórit. Mámare ne bwǎn-bané emen ḿbé banyinchéng, Éshikol ne Ána ba/mû banet-kyikwáré-Ébaram. 14Ké nkéré mú Ébaram o/jwo ba/fu, baa/kám wǎn-boné emen, o/kó kángkáng bannwa byití ḿbé mbe ké oshê emen, égot-banet ebónge ne bajam batánge esim onyiryiká ne bachât, o-ca ne batu ámbe ashí anyii ké kyikû tete o-ribi Dǎn. 15Ńdyí o/ribi Dǎn, o/kyii basúja emen ké byikim ké byikim, o-kye banet-bushwôn emen bunwa ne buchú, o-kpógê kámbé. O-zóngê ne mbé ké kyikû tete o-ribi Hóba, mú mu ké bushûyû ḿbú Damásákus, 16o-koo kángkáng byěm ḿbyí batu ámbe ba/mû ba/wuri. O-kpî to Lôt mú wǎn-boné emen o-bwa ne nyǐ esim ne byěm emen, cibicibi ne ḿbé banyinyi ne banet bakíri ḿbé ba/mû ba/kám kámbé ké byití.
Otu Mekyízédek o/jware Ébaram
17Ké nkéré mú Ébaram o/bwa esim ké dyikpóge ńdyí o/kpógê Kédolóma ne batu ḿbé áku, otu mú Sódom o/dim o/fu, nyǐ o-da ng ekwárê ne nyǐ ké owo mú Shábe, ba-kó ng to kámú Owo mú Otu. 18Ne Otu Mekyízédek, mú o/mû otu mú Sélim, ne o/mû to nchi kyifen mú Osówo mú kyíbóng kyíbóng, o/bê ne berêt ne bato o-ba-kye Ébaram, 19o-jware ǎ, ne o-raa o/fu, kyi/bát Osówo, mú kyíbóng kyíbóng, mú o/chi bubóng ne esí, ojware Ébaram. 20Kyi/bát banet bakpee Osówo mú kyíbóng kyíbóng, mú o/chi ǒ a-kpógê banet-bushwôn eyên. Ne Ébaram o-kyii byěm ḿbyí o/koo ké byití ké byikit diǐkpú, o-kúng kyikit kyibónge o-kye Otu Mekyízédek.
21Otu mú Sódom o-sét Ébaram o/fu, tî byěm eyên ḿbyí a/koo ké byití, nké kye mě kángkáng banet ejí.
22Ébaram o-faa ǎ o/fu, me n/sem ké ntûntû ké bushú ḿbú Óburúkpâbí, mú mu Osówo mú kyíbóng kyíbóng, mú o/chi bubóng ne esí, 23n/fu, me mm*man etî chwǒm eyên nang kyibónge* nang kaacat-kyídí nang orí-abe*. Eringe nyí aa*kûfu a/fu, me nké n/chi Ébaram o-firi nfang-onet*. 24Me n-koo ng ńkyí banet ejí ba/ryí nké nke. Nké mîng banet-kyikwáré ejí, Ána ne Éshikol ne Mámare ba-kúng kyicê ńkyí ebe.
Currently Selected:
Jénésis 14: BKY
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Published by the Bible Society of Nigeria @ 1985
