Matayo 8
8
Yesu yakumuponya u munhu wo wukoma
(Mlk. 1:40-45; Lk. 5:12-16)
1Yesu yali yeza kutima yakulawa mwitunda, imapuga menji ge wanhu, gakamutyatya. 2Baho u munhu yunji mono yali yena wutamwa wo wukoma yakaza, yakamufugamila Yesu, yakatya, “Gwe Muwaha, hono wende kosuma kunghwema.” 3Nayo Yesu yakagolola muwoko wakwe, yakamupamiza, yakatya, “Nyendile wukwemwe.” Hobaho du u munhu yuyo yakakwemwa u wukoma wakwe. 4Yesu yakawa kumutya umunhu yuyo, “Alu, ta wuhulicize, wulece kumulonjela umunhu wo wose ze nghani yiyi, langa wubite wukelajile ko mukohani, wulavye ne cilavya cako, nha vyono yalajiliza Musa, ho wuwakangazize nha vyono wapona.”
Yesu yakumuponya u mwitumami wo muwaha yumonga Mulumi
(Lk. 7:1-10)
5Nayo Yesu lono yenjilaga mwikaya lya Kapelanawumi, u muwaha yunji Mulumi yakamubitila, yakamunena, 6yakutya, “Gwe Muwaha u mwitumami wangu yagonile mu kaya, yena wutamwa wo wunyenyanjice, nayo mutamwa muno muno.” 7Nayo Yesu yakamutya, “Ale nokuza nimuponye.” 8U muwaha yuyo yakamutya Yesu, “Muwaha, ane hamba si nghwiliye, ho agwe wusume kwinjila mu nyumba yangu. Ninga agwe wulonje nghani du, no mwitumami wangu kopona.” 9Hambi, hamba sunga na nene nane mono nili hasi yo wulajilize wa wanji, nha nina wasilikale wono wali hasi yangu. Nghumulonjela ayu “Bita!” nayo yakubita, na yunji nayo nghumutya, “Wuze!” nayo yakuza; u mwitumami wangu nayo nghumutya, “Noza acino! nayo yakunoza.” 10Nayo Yesu yaza kuzihulika zizo, yakezina muno, yakawalonjela iwanhu wono wamutyatyaga, yakatya, “Mbeka nghumulonjelenyi, vyono nghali si namuwona munhu wo wose mu Waisilayeli mono yena u wihuwilo wono winha wuwu. 11Holeka nghumulonjelenyi nha vyono iwanhu wenji wokuza, wakulawa kucilima na kumwezi, nawo wokwikala ha zindigwa mu wutemi wa ku wulanga, wena hamonga na Abulahamu na Isaka, na Yakobo. 12Ninga wawo wono wali wawunojeye uwutemi wuwo, awo wotagwa ku citi kunze, ihanhu hono wowa kulila no kugwezula meno.” 13Hanyuma Yesu yakawa kumulonjela yuyo u muwaha Mulumi yakamutya, “Ale, wubite kukaya, nayo yiweze nha vyono wihuwiye.” No mwitumami wakwe yakapona mwidaha lilyo du.
I wanhu wenji wakuponywa
(Mlk. 1:29-34; Lk. 4:38-41)
14Yesu yakabita ku kaya ya Petelo, na kuko yakamwagana u mukwewe we cicekulu wa Petelo mutamwa mhungo nghali muno muno, yagonile mu citanda. 15Hodu, Yesu yakawa kumupamiza mu muwoko, nayo mhungo yikawa kumuleka, nayo yakawa kwinuka, yakumwitumamila.
16Na lono yali yeza cinyamihe, wamuletela wanhu wenji wono wali wena macisi, nayo, ko wulonje nghani du, yakagawinga gago imacisi. Yakawaponya wanhu wenji nha vivilya, wono wali watamigwe. 17Yakanoza zizo, ho zifisilizwe izinghani azilya zono zalongwa no muwizi Isaya zono yatya,
“U Mwene yawusola u wusocele wetu
Kanyhi yazidinghula ne zinhamwa zetu.”
Wono wanojeye kuwa watyatyi wa Yesu
(Lk. 9:57-62)
18Nayo Yesu yaza kuliwona ilipuga lye wanhu lyamupilima, ho baho yakawalonjela iwejizwa wakwe walowoce ku nhumbi ye lilenga. 19Mwijizi yunji wo Wulajilize yakamubitila Yesu, yakamutya, “Gwe Mwijizi, ane nokutyatya ko kose kono kobita.” 20Ninga Yesu yakamupitula yakamutya, “Imacewe, gena mamwina, ne zindeje nazo zina manhuli, ninga u Mwana wo Munhu, yasina hamba hanhu ho kuceha.” 21Hanyuma munhu yunji nayo wa muli wejizwa wakwe, yakamutya, “Gwe, Muwaha nghukulomba wunghombole namule nghamuzice baba.” 22Ninga Yesu yakamutya, “Agwe wunhyatyaje! Wuwalekaje iwafu wawazice iwafu wawo.”
Yesu yakuyitacila mbeho ne lilenga vinyamale
(Mlk. 54:35-41; Lk. 8:22-25)
23Yesu yakenjila mu ngalawa, ne wejizwa wakwe vikabitana hamonga nayo. 24Ikukunzo yiwaha muno, likawatimila nhinicizo mwilenga, sunga ne mawingo gakawa kwanza kuyigubika ngalawa. Nayo Yesu mwidaha lilyo yali yagonile nhongo. 25Iwejizwa wakamubitila, wakamusinhusa wakutya “Muwaha, wuciponyaje ceza kongomela!” 26Yesu yakawatya “Nye mo wanhu wo wihuwilo wucefu, nhawulenyi mukogopa?” Hodu yakawa kwinuka, yakavita-cila imbeho ne mawingo, navyo vikawa kunyamala twii. 27Iwanhu wakezina muno muno, wakatya, “Alu, nye, munhu wa nhawule yuyu? nhondo sunga ne mbeho ne mawingo, vyose vikumuhulika!”
Yesu yakuwaponya iwanhu Wejete we macisi
(Mlk. 5:1-20; Lk. 8:26-39)
28Yesu yakafika ku nhumbi nzagwe ye lilenga mu yisi ya Wagelaseno, yaketangʼanila kuko na wanhu wejete wono wali wena macisi, wakulawilila ku vitenjelo. Nawo wali wanhu wa kogofya muno muno, hamba hasina munhu wo wose mono yejelelaga kukolela mu nzila yiyo. 29Nawo wakawa kwanza kuzoza wakutya, “Alo cina nghanici nagwe go Mwana wo Mulungu? Alo kuza akuno ho wucigaze na lono icidaha cikali si nafika?”
30Na behi ne hanhu baho, hali holili yitewa lya magubi menji, gadimaga. 31Holeka gago imacisi gakamunena gakutya, “Hono wuciwinje, ale wucikombolaje cinjile mu zingubi azilya.” 32Yesu yakagatya macisi, “Ale, Bitenyi.” Nago gakalawila muli wanhu wawo, gakenjila mu zingubi. Ne litewa lyose lye zingubi likavulumucila he weta, likagwila mwilenga mugati, ne zingubi zose zikafwila mu malenga.
33Iwadimi we zingubi zizo, wakatiziza ku kaya. Nawo wakazilonga zose na zono zawejelela awalya iwanhu wono wali wena macisi. 34Ale, ne wanhu wose wa mwitumbi lilyo, wakalawila, wakamubitila Yesu, nawo wali muwona wakamunena yawuce mu yisi yawo.
Currently Selected:
Matayo 8: GOG91
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Cigogo New Testament © Bible Society of Tanzania, 1991.
