San Marcos 3
3
Iin tia̱a kúꞌvi̱ küvi sántaka̱a̱‑ra̱ ntaꞌá‑ra̱
(Mt. 12:9-14; Lc. 6:6-11)
1Ta ni̱ki̱ꞌvi tuku Jesús ini veꞌe ñu̱ꞌu nu̱ú ntákiꞌin táꞌan na̱ ñuu, ikán íyo iin tia̱a tia̱ kúꞌvi̱, ra̱ küvi sántaka̱a̱ iin ntaꞌá. 2Ta xi̱ntiaa na̱ fariséo Jesús, ña̱ ná kuni‑na̱ átu sántuva̱ꞌa‑Ña̱ míí ra̱ tia̱a ikán ki̱í sáto̱, ña̱ kúú ki̱í ntákiꞌin nteé, ña̱ ná kuvi chika̱a̱ kua̱chi‑na̱‑Ña̱. 3Ta ka̱chi‑Ña̱ saá xíꞌin míí ra̱ tia̱a kúꞌvi̱ ntaꞌá ikán:
―Kuntichi, ra naꞌa mǎꞌñu yóꞌo.
4Ra nta̱ka̱túꞌun Jesús na̱ ntée ikán, káchi‑Ña̱ saá:
―¿Ntáa kúú ña̱ núná nu̱ú‑yó kasa‑yó ki̱í sáto̱? ¿ña̱ va̱ꞌa á ña̱ väꞌa? ¿sáka̱ku‑yó iin na̱ yuví á kaꞌní‑yó iin‑na̱?
Suu ki̱nto̱o tâxín yuꞌú ntiꞌi míí na̱ yuví ikán. 5Saá ra, nta̱kue̱ꞌe̱ ini Jesús xi̱toꞌni‑Ña̱ nu̱ú ntiꞌi na̱ ntée ikán, ta ku̱suchí ini‑Ña̱ xa̱ꞌá ña̱ ntakú ini‑na̱, ta ka̱chi‑Ña̱ saá xíꞌin míí ra̱ tia̱a kúꞌvi̱ ntaꞌá ikán:
―Sántaka̱a̱ ntaꞌá‑ún.
Sa̱ntaka̱a̱‑ra̱ ntaꞌá‑ra̱, ra ntu̱va̱ꞌa‑ña̱. 6Ra tá ni̱ta̱ni̱ na̱ fariséo, nti̱ku̱n nta̱túꞌun táꞌan‑na̱ xíꞌin na̱ ntíku̱n réy Herodes ña̱ na̱xa koo kaꞌní‑na̱ Jesús.
Sána̱ꞌa̱ Jesús ra sántuva̱ꞌa‑Ña̱ na̱ yuví yuꞌú már
7Ta Jesús xíꞌin na̱ sákuaꞌa nu̱ú‑Ña̱, kua̱ꞌa̱n‑na̱ yuꞌú már, ta kua̱ꞌá nta̱a̱ na̱ yuví Galilea ni̱nti̱ku̱n‑na̱‑Ña̱. Saá tu na̱ Judea, 8na̱ Jerusalén, na̱ Idumea, na̱ iinka xiyo itia Jordán, na̱ ntée yachin Tiro xíꞌin Sidón, ra tá ku̱nta̱a̱ ini ntikuíi‑na̱ xa̱ꞌá ña̱ va̱ꞌa kíxa‑Ña̱, ki̱xa̱a̱‑na̱ nu̱ú‑Ña̱. 9Ta ka̱chi Jesús xíꞌin na̱ sákuaꞌa nu̱ú‑Ña̱ ña̱ ná koo tu̱ꞌva iin várko, tá ku̱va ná kütiáꞌni náꞌa na̱ yuví nu̱ú‑Ña̱, 10chi kua̱ꞌá na̱ kúꞌvi̱ sa̱ntuva̱ꞌa‑Ña̱, xa̱ꞌá ña̱ ikán kúú‑ña̱ kua̱ꞌá ka na̱ kúꞌvi̱ ki̱xa̱a̱ nu̱ú‑Ña̱ ná tutu̱vi ntaꞌá‑na̱‑Ña̱. 11Tá xíni ta̱chí u̱ꞌvi̱ Ña̱, ntákantee‑ña̱ nu̱ú‑Ña̱, ta káchi‑ña̱ saá xíꞌin‑Ña̱:
―¡Yóꞌo̱ kúú Se̱ꞌe Ntióxi̱!
12Ta xáꞌntia Jesús chiñu nu̱ú ta̱chí u̱ꞌvi̱ ña̱ ná käꞌa̱n‑ña̱ yoo kúú míí Jesús.
Ntáka̱xin Jesús u̱xi̱ u̱vi̱ na̱ sákuaꞌa nu̱ú‑Ña̱
(Mt. 10:1-4; Lc. 6:12-16)
13Tá nti̱ꞌi, nta̱a Jesús yukú, ta ka̱na‑Ña̱ na̱ kúni̱ mií‑Ña̱, ta ni̱xa̱a̱‑na̱ nu̱ú‑Ña̱. 14Ta nta̱ka̱xin‑Ña̱ u̱xi̱ u̱vi̱‑na̱ tá ku̱va ná kaka tuun‑na̱ xíꞌin‑Ña̱, ta ta̱xi‑Ña̱ chiñu ntaꞌá‑na̱ ná ntakani‑na̱ tu̱ꞌun‑Ña̱, 15ra saá tu ná kuvi [sántuva̱ꞌa‑na̱ na̱ kúꞌvi̱,] ra tavá‑na̱ ta̱chí u̱ꞌvi̱. 16Na̱ yóꞌo kúú míí u̱xi̱ u̱vi̱ na̱ nta̱ka̱xin‑Ña̱: Simón tia̱ chi̱ka̱a̱‑Ña̱ ki̱ví Pedro; 17tia̱ Jacobo xíꞌin ñani‑ra̱ Juan, na̱ se̱ꞌe Zebedeo, na̱ ni̱ka̱ꞌa̱n‑Ña̱ “Boanerges” xíꞌin, ña̱ kúni̱ kachi “Se̱ꞌe ña̱ ntáꞌyu̱ sa̱ví”; 18tia̱ Andrés, tia̱ Felipe, tia̱ Bartolomé, tia̱ Mateo, tia̱ Tomás, tia̱ Jacobo, se̱ꞌe Alfeo; tia̱ Tadeo, tia̱ Simón ra̱ cananísta, 19xíꞌin ra̱ Judas Iscariote, tia̱ ntaxǐko Jesús nu̱ú ntíꞌi.
Chíka̱a̱ kua̱chi‑na̱ Jesús ña̱ ntáka̱a̱ ta̱chí u̱ꞌvi̱ ini‑Ña̱
(Mt. 12:22-32; Lc. 11:14-23; 12:10)
20Ta ki̱xa̱a̱ Jesús iin veꞌe, ta nta̱kiꞌin táꞌan tuku na̱ yuví kua̱ꞌá, ra nta̱a̱ köníkuvi kuxi‑Ña̱ xíꞌin na̱ sákuaꞌa nu̱ú‑Ña̱. 21Tá xi̱ni so̱ꞌo na̱ veꞌe‑Ña̱ xa̱ꞌá ña̱ kíxa‑Ña̱, ra nta̱ntukún‑na̱‑Ña̱, ña̱ ná nu̱ꞌu̱‑Ña̱ xíꞌin‑na̱, chi ka̱ꞌán‑na̱ ña̱ sána kúú‑Ña̱.
22Ta na̱ sána̱ꞌa̱ léy Ntióxi̱ ña̱ nta̱koo Moisés na̱ ke̱e Jerusalén, ka̱chi‑na̱ saá xa̱ꞌá‑Ña̱:
―Beelzebú, rí kúchêe nu̱ú ta̱chí u̱ꞌvi̱, ntáka̱a̱ ini‑ra̱, ra xa̱ꞌá rí ikán va tává‑ra̱ ta̱chí u̱ꞌvi̱.
23Tá nti̱ꞌi ka̱na Jesús na̱, ra nta̱kani‑Ña̱ nu̱ú‑na̱ xíꞌin tu̱ꞌun ña̱ táxi ku̱va, káchi‑Ña̱ saá:
―¿Á kuvi tavá ti̱miáꞌá mií‑rí kěꞌe? 24Átu na̱ yuví iin ñuu ná ntata̱ꞌví‑na̱, ra kani táꞌan xíꞌin táꞌan‑na̱, küvi kuntee‑na̱. 25Ta átu iin na̱ veꞌe ná ntata̱ꞌví‑na̱, ra kani táꞌan xíꞌin táꞌan‑na̱, küvi kuntee‑na̱. 26Ta átu míí ti̱miáꞌá ná kani táꞌan‑rí xíꞌin ña̱ ntíku̱n‑rí, ra küvi koo‑rí, chi ntiꞌi nteé‑rí.
27 ’Nii iin‑na̱ küvi ki̱ꞌvi veꞌe iin tia̱a ntakú ntukuíꞌná‑na̱ ña̱ꞌa‑ra̱, átu xina ka ná kätún‑na̱‑ra̱, chi saá ví kúú‑ña̱ kuvi ntukuíꞌná‑na̱ ña̱ꞌa veꞌe‑ra̱.
28 ’Ña̱ nta̱a̱ ná ka̱ꞌa̱n‑i̱ xíꞌin‑ntó: kukáꞌnu ini Ntióxi̱ xa̱ꞌá kua̱chi, ntikuíi ña̱ ná kasa iin na̱ yuví xíꞌin ntikuíi tu̱ꞌun väꞌa ná ka̱ꞌa̱n‑na̱ xa̱ꞌá‑Ña̱. 29Suu ntáa‑na̱ ná ka̱ꞌa̱n väꞌa xa̱ꞌá Espíri̱tu̱ I̱í Ntióxi̱, ra kükáꞌnu ini Ntióxi̱ xa̱ꞌá kua̱chi ikán ntiꞌi saá tiémpo, chi iin saá kuiso va‑na̱‑ña̱.
30Ña̱ yóꞌo kúú ña̱ ni̱ka̱ꞌa̱n Jesús, chi ka̱chi‑na̱ saá: “Ta̱chí u̱ꞌvi̱ ntáka̱a̱ ini‑ra̱”.
¿Yoo kúú nána Jesús xíꞌin ñani‑Ña̱?
(Mt. 12:46-50; Lc. 8:19-21)
31Ta ni̱xa̱a̱ nána Jesús xíꞌin na̱ ñani‑Ña̱, ta ki̱nto̱o‑na̱ chí kěꞌe, ra ta̱chíñu‑na̱ chiñu ña̱ ná kixi‑Ña̱ nu̱ú‑na̱. 32Ta íntúꞌú‑Ña̱ mǎꞌñu na̱ yuví kua̱ꞌá, ta ni̱xa̱a̱ chiñu nu̱ú‑Ña̱:
―Nána‑ún xíꞌin na̱ ñani‑ún íyo‑na̱ chí kěꞌe, ta ntúkún‑na̱ yóꞌo̱.
33Ta nta̱kuiin‑Ña̱, káchi‑Ña̱ saá xíꞌin‑na̱:
―¿Yoo kúú nána‑i̱, ra yoo kúú na̱ ñani‑yu̱?
34Ta xi̱toꞌni‑Ña̱ nu̱ú ntikuíi na̱ ntée ikán, káchi‑Ña̱ saá:
―Na̱ ntée yóꞌo kúú nána‑i̱ xíꞌin na̱ ñani‑yu̱, 35chi ntikuíi na̱ kántíxa ña̱ kúni̱ Ntióxi̱, na̱ ikán kúú ñani‑i̱ xíꞌin ku̱ꞌva‑i̱ xíꞌin nána‑i̱.
Currently Selected:
San Marcos 3: jmx
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© (Active), Wycliffe Bible Translators, Inc. All rights reserved.
