Banɔkpɛkpɛ Axɔ̃ɛ 3
3
Petro Akɔ Kɛkpata Lɔ Gã
1Kiwui tinikpo Petro nɛ̀ Yohanes baavɛ Akaavũɔ mɛ, nɛ kibeɛ gɛ bekulu Owusoso Akaa-gɛenu kemuze ɛɖa tɛta mɛ ana. 2Anyɛ teli gɛenu kɛkpatà odenɔ yɛmɔbèɛ, banɔ teli alɔkɔ yɛ ededzu akaa buvũɔ niedulũɔ gɛ bekulu asɛ Kedulũ Gbangbã, ɛkɛlɛ bedzu yɛ kibe nyia bepɛ ebisi bagɛ bavɛ Owusoso Akaavũɔ mɛ bɔdɔ̃. 3Gɛ amɔ Petro nɛ̀ Yohanes gɛ bavɛ editsoku Akaavũɔ mɛɛ, ebisi balɛ asɛ tɛ bakɔɛ ehoeyi. 4Petro nɛ̀ Yohanes belu awɔ̃ eɖii, kɛlɛ Petro etseɖe yɛasɛ, “Ɖi bɔlɔ!” 5Kliso anyɛ etsyina yɛamɛ akpɛ balɛ ɔkɔ, pɛ eɖi kidzo mɛ asɛ babà kɔyɛ kɛdɔ̃ tili.
6Kɛlɛ Petro etseɖe yɛasɛ, “Sikãfufú nɛ̀ sikã ama mahɔɛ pɛ ɛbakɔ wɔ, pɔ kɛgɛ lɛ mahɔɛ mɛba kɔwɔ. Nɛ Yesu Kristo Nazareteyiɛ nɛinyeɛ mɛɛ, lɔgã.” 7Gɛ Petro anyana yɛŋã ahɔɛɛ, aplɛnii pɛ alɔ, odunũ ɔlɛ koɔ, yɛtsɛɖɛ nɛ̀ bɔtsɛɖɛkɔ̀ mɛ gagalĩ. 8Etso epoele nɛ yɛtsɛɖɛ nabha kɛlɛ akpàa gã. Kɛlɛ atɔnɔ alɛ avɛ Owusoso Akaavũɔ shu pɛ aagã, pɛ etsopoele pɛ akpɛ Owusoso Akaa nɛinyè nɛitití. 9Gɛ banunɔ nyɔ̃ɔ amɔɛ gɛ agãfala pɛ akpɛ Owusoso Akaa nɛinye nɛ kititiɛ, 10babakà asɛ yɛedzi anyɛ gɛ azazã kedulũɔ gɛ beekulu asɛ kedulũ Gbangbã pɛ ezebisi bɔdɔ̃, kɛlɛ kɛbhɛtɛ balɛibi nɛ kɛgɛ ba yɛabha shu.
Petro Aɖɔ Kaɖɔ Ɔkɔ Banɔɛzaa
11Kibeɛ gɛ anyɛ gɛ ezebisi bɔdɔ̃ atanyanã Petro nɛ̀ Yohanesiɛ, kɛbhɛtɛ banɔ nɔ petee ibi, kɛlɛ balɛ petee bu tsɛtsɛɖɛ mɛ avɛ balɛ ɔbha, nɛ ɛkɛlɛ gɛ beekulu asɛ, “Salomo Kagba mɛ.” 12Gɛ Petro amɔ kibui ɛlɛ, ebisi balɛ asɛ, “Israelanɛ, kiɖe sopɛ kibui ɛlɛ bhɛtɛ wɔnɔɛ bi ana? Kiɖe sopɛ noyelè bɔlɔ ana asɛ onupɛ bɔlɔ ahɔɛ ohumi alo Owusoso Akaa mɛ tɛzazã so pɛ kɛkpatà ɛlɛ gã dza?” 13Abraham, Isak nɛ̀ Yakob balɛ Owusoso Akaa, bɔlɔ ashuĩ alɛ Owusoso Akaa yɛadalɛ yɛaxɔ̃ɛdɛ Yesu shu. Pɔ wɔnɔ xɔnɔ ɔlɔkɔɛ ɔkpɛ ahɔɛ asɛ beyii kɛlɛ nɔɖɔ nɛ Pilato yɛamɛ asɛ notinyi yɛ, pɔ yɛ xɔnɔ apɛ asɛ tɛ ashɛnɛ ahɔɛ nɛ yɛishu flogo. 14Nɔɖɔ ɔsɛ nɔotinyi Yesu geɛnu anɔ dadalɛ pɛ nobisi ɔsɛ Pilato ashɛnɛ ahɔɛ nɛ anyɛ gɛeyi anunɔ boŋ shu akɔ wɔnɔ. 15Noyi anɔ nɔ gɛ akɔ banɔ ɛkpaã, pɔ Owusoso Akaa efeke yɛ edenɔ bekpu nɛishi. Bɔzã mɔ kibui ɛlɛ. 16Ɔgana Yesu yɛinye nabha tɛyɛyɛkɛŋã mɛɛ, bakɔ anyɛ alɛ gɛ nonyi pɛ nɔmɔ amɔ ishumɛ gagalĩ. Yesu yɛinyeɛ nɛ̀ yɛabha tɛyɛyɛkɛŋã gɛide koeyi nɛ yɛ mɛɛ, kɛlɛ kɔ anyɛ alɛ ishumɛ gagalĩ kɔɛ asɛ gɛ wɔnɔ petee ɔmɔ ana. 17“Mɛadzya alɛ mɔ, inyi ɔsɛ wɔnɔ nɛ̀ bagɛ baagbanà wɔnɔɔ otinyi flogo pɛ nɔbhɛtɛ. 18Pɔ, kana Owusoso Akaa abhɛtɛ kɛgɛ aɖɔ elúɔ ɔgana yɛebuiɖɔluanɔ nabha gɛ aɖɔ asɛ, yɛ Kristoɔ abamɔ bɔtɔ. 19Klisoɔ, notsyina etúɔ mɛ, tɛ notsyina ɔvɛ Owusoso Akaa ɔkɔ ɔsɛ tɛ beplu wɔnɔ ebui kpa, ɔmɔsɛ kibe ɛlɛ ɛkpã vɔvɔ titsyitsyina badɛ Apaleteɛ ɔkɔ ɔba. 20Sɛ tɛ asɛsɛ Kristoɔ, anɔ gɛ yɛabha batɔɖɔ ahɔɛ akɔ wɔnɔ, gɛenu Yesuɔ. 21Kɛlɛ ɔsɛ tɛ Yesu azã kititiɛ, ɔvɛnɔ sɛ kibeɛ na ɔsɛ tɛ Owusoso Akaa edzinɔ kɛka nyia ka ewoese, asɛ gɛ atɔɖɔ elú abafalanɔ ɔgana yɛebuiɖɔlunɛ gɛ balɛishuɔ dalɛ nabha. 22Ɔmɔsɛ Mose aɖɔ asɛ, ‘Apaleteɛ gɛenu wɔnɔ Owusoso Akaa abakɔ yɛebuiɖɔluanɔ teli ede koeyi nɛ yɛanɔ nɔ̀ mɛ asɛ mɛ ana. Nɔtaatɔ̃ nɛ̀ kɛka nyia ka gɛ aɖɔ etseɖe wɔnɔ. 23Anunɔ gɛ egilũ atɔ̃ nɛ yɛɛ, bebèbu yɛ eyinɔ nɛ yɛ banunɔ nɛishi.’
24“Kibui gbã kinu ɔsɛ, ebuiɖɔluanɔ nɔ pete gɛaɖɔ ebuiɛ elu, odenɔ Samuel abha ɔmana bagɛ baza aɖɔaɖɔ eluɔ petee aɖɔ ebui nɛ obo kanɔ alɛ shu. 25Wɔnɔ onu kaŋãsi eleteɛ ɔkɔ ebuiɖɔluanunɔ nɛ̀ Owusoso Akaa yɛ olugbũnyanyã gɛ anya nɛ̀ wɔnɔ akaalɛ. Etseɖe Abraham asɛ, ‘Gana woeyi mɔmɔ alɛ nabha, bebèyula tutu esi akɔ banunɔ petee nɛ kesiakpa nabha.’ 26Kliso gɛ Owusoso Akaa efeke yɛ yɛaxɔ̃ɛdɛ, akɔ yɛebhoso aba wɔnɔ ɔkɔ tɛ ebeyulà akɔ wɔnɔ ɔganà wɔnɔ ɔmayɛmɛ aka nyia aka titsyitsyina edenɔ yɛ kɛtakpu mɛ gagalĩ edzo nabha.”
Currently Selected:
Banɔkpɛkpɛ Axɔ̃ɛ 3: nyb
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© (Active), Ghana Institute of Linguistics, Literacy and Bible Translation. All rights reserved.
