मरकुस 8
8
च़ऊ हज़ारा लोगा का रोटी खैऊंणी
(मत्ती 15:32-39)
1एकी बारी आऐ भी बडै भारी खास्सै लोग ईशू सेटा लै, संघा हुऐ तिंयां तेऊ फेर कठा। ज़ांऊं तिधी तिन्नां तेतरै लोगा का खाणां लै किछ़ै बच़अ,
ईशू शादै आपणैं च़ेल्लै आप्पू सेटा लै संघा बोलअ तिन्नां लै, 2“मुंह लागी इना लोगे बडी भारी झींण। किल्हैकि ईंयां आसा मुंह संघै चिई धैल़ी ओर्ही। ऐबै निं इना का खाणां लै बी किछ़ै बच़अ। 3इना मांझ़ै आसा कई दूरा-दूरा का आऐ दै, ज़ै हुंह इना भुखै घरा लै छ़ाडूं, ता ईंयां रहणैं बाता पल़ी।”
4ईशूए च़ेल्लै बोलअ तेऊ लै, “इधी दूर बणैं किधा का लाई हाम्हैं एतरी रोटी आणी कि ईंयां एतरै लोग रज़े।”
5ईशू पुछ़अ तिन्नां का, “तम्हां का केतरी रोटी आसा?”
तिन्नैं बोलअ, “सात”।
6तेखअ बोलअ ईशू तिन्नां च़ेल्लै लै इहअ कि इना लोगा बशैल़ा धरनीं घेहल़ी दी। ईशू तिंयां सात रोटी ढाकी और परमेशरो शूकर करी करै चोल़ी।
तेखअ रहअ आपणैं च़ेल्लै हाथै दैंदअ लागी, ता च़ेल्लै लागै लोगा लै घेहल़ी बांडदै। 7तिन्नां सेटा ती धख ज़ेही होछ़ी माह्छ़ली बी; ईशू शूकर करी करै तिन्नां माह्छ़ली बी बोलअ बांडणां लै।
8खाई करै रज़ै तिंयां सोभ लोग, ता च़ेल्लै भरै पिछ़ू बच़ी दी रोटीए सात च़ठै। 9तिधी खाणैं आल़ै लोग तै कोई च़ार हज़ार मर्ध ई मर्ध, संघा छ़ाडै ईशू तिंयां सोभ घरा लै। 10तेखअ नाठअ सह तेभी किश्ती दी बेशी करै आपणैं च़ेल्लै संघै दलमनूता नांओंए लाक्कै लै।
स्वर्गो नछ़ैण मांगणअ
(मत्ती 16:1-4)
11तिधी आऐ फरीसी और शास्त्री ता तिंयां लागै तेऊ संघा इहै हठल़दै और तेऊ परखणैं तैणीं इहअ बोलदै कि, ज़ै तूह हाम्हां सेटा लै परमेशरै आसा छ़ाडअ द, तै रहैऊ हाम्हां का सरगै कोई नछ़ैण।
12तेऊ बोलअ आपणीं आत्मां दी लाम्मअ शाह काढी करै तिन्नां लै, “एऊ ज़मानें लोग किल्है लोल़ा नछ़ैण? हुंह खोज़ा तम्हां का सत्त कि एऊ ज़मानें लोगा निं कोई बी नछ़ैण भेटणअ।” 13तेखअ नाठअ सह तिन्नां छ़ाडी आपणैं च़ेल्लै संघै किश्ती दी बेशी करै गलील समुंदरा पार।
फरीसी लोगो और हेरोदेस राज़ैओ सज़ेल़अ
(मत्ती 16:5-12)
14ईशूए च़ेल्लै बिसरूऐ रोटी आप्पू संघा निंणै और किश्ती दी आसा ती तिन्नां का एक्कै रोटी, 15तेऊ बोलअ तिन्नां लै चतैनगी दैई, “हेरे, फरीसी लोगे और हेरोदेस राज़े सज़ेल़ै का रहै दूर।”
16तिंयां लागै आप्पू मांझ़ै सोठदै और इहअ बोलदै, “हाम्हां का निं सोभी लै रोटी आथी तै आसा अह लागअ द हाम्हां लै एही गल्ला बोलदअ।”
17ईशू हेरी तिन्नें मनें गल्ल भुझ़ी और तेऊ तिन्नां लै बोलअ, “तम्हैं आप्पू मांझ़ै इहअ किल्है सोठा कि हाम्हां सेटा निं रोटी आथी? कै तम्हां अज़ी बी थोघ निं लागअ और अज़ी बी निं समझ़ै आथी? थारअ मन कै काठअ हुअ? 18कै तम्हां आछी करै बी निं शुझदअ, और कान हंदी बी निं शुण्हदअ? तम्हां किछ़ै गल्ला निं रही आद?
19 “ज़ेभै मंऐं पांज़ा हज़ारा मणछा लै रोटी चोल़ी करै दैनी ती ता तम्हैं पिछ़ू बच़ी दी रोटीए केतरै च़ठै च़कै तै?”
तिन्नैं बोलअ “बारा च़ठै”
20“और ज़धू मंऐं च़ार हज़ार मणछा लै सात रोटी चोल़ी करै दैनी ती, ता तम्हैं पिछ़ू बच़ी दी रोटीए केतरै च़ठै च़कै तै भरी करै?”
तिन्नैं बोलअ, “सात च़ठै।”
21तैबै तेऊ तिन्नां का बोलअ, “तम्हैं कै अज़ी बी निं समझ़ै?”
बैतसैदा नगरी एक कांणअ ठीक करनअ
22तेखअ आऐ तिंयां बैतसैदा नगरी दी; ता लोगै आणअ एक कांणअ मणछ तेऊ सेटा लै और तिन्नैं की तेऊ का अरज़ कि एऊ छ़ुंह।
23तेऊ निंयं सह कांणअ मणछ हाथा का ढाकी करै नगरी का बागा लै और तेऊए आछी दी थूक लाई हाथ डाहै, और तेऊ का पुछ़अ, “ऐबै लागअ ताखा शुझदअ ऐ?” 24तेऊ मणछै बोलअ आछी घुआल़ी करै, “मुखा लागै लोग शुझदै पर राम्बल़अ निस्सअ शुझुई तिंयां शुझिआ मुखा ज़िहै मुंह फेर आसा डाल़ बूट लागै दै हांढदै।”
25तेखअ लाऐ भी ईशू तेऊए आछी दी हाथ और कांणै का लागअ राम्बल़अ शुझदअ और सह हुअ ज़ाथी राम्बल़अ। 26ईशू छ़ाडअ सह इहअ बोली करै घरा लै, “एसा नगरी दी निं बापस डेऊई।”
पतरसो ईशू लै “मसीहा” बोल़णअ
(मत्ती 16:13-20; लुका 9:18-21)
27बैतसैदा नगरी का नाठै ईशू और तेऊए च़ेल्लै कैसरिया लाक्कै और फिलिप्पी नगरी नेल़ गराऊंआं लै, बाता हांढदी पुछ़अ तेऊ आपणैं च़ेल्लै का इहअ, “लोग मुल्है किज़ै बोला कि हुंह कुंण आसा?”
28तिन्नैं बोलअ इहअ, “कई लोग बोला ताल्है कि तूह आसा युहन्ना डुबकी दैणैं आल़अ; पर कई लोग बोला ताल्है एलियाह गूर और कई बोला ताल्है इहअ कि अह आसा परमेशरे गूरा मांझ़ै ई कोई एक।”
29तेऊ पुछ़अ तिन्नां का, “तम्हैं किज़ै बोला? हुंह कुंण आसा?”
पतरसै बोलअ, “तूह आसा मसीहा।”
30ईशू बोलअ तिन्नां लै कि हेरे धैन डाहै मेरै बारै एसा गल्ला निं कोही का खोज़ी।
आपणीं मौते बारै ईशूओ पैहलै ई खोज़णअ
(मत्ती 16:21-23; लुका 9:22)
31तेखअ लागअ सह तिन्नां का एही गल्ला समझ़ाऊंदअ कि मुंह मणछे शोहरू लै आसा ज़रूरी की हुंह बडै भारी दुख ज़िरे और मुखियै, बडै परोहित और शास्त्री मुंह नकाम्मअ समझ़ी करै मारी पाए, संघा हुंह चिऊथै धैल़ै ज़िऊंदअ होए।
32ईंयां गल्ला खोज़ी तेऊ तिन्नां का साफ-साफ। एसा गल्ला लै निंयं पतरसै सह ज़ुदअ ज़िहअ और सह लागअ तेऊ लै इहअ बोलदअ कि “ताह निं लागा इहअ बोल़णअ मसीहा निं मरी सकदअ।”
33पर ईशू पिछ़ू फिरी करै आपणैं च़ेल्लै बाखा भाल़अ और पतरसा लै झ़ाहल़ काढी करै बोलअ, “राख्स, मुंह सम्हनै का हट दूर। किल्हैकि तूह लाआ परमेशरे गल्ला छ़ाडी मणछे गल्ला दी मन।”
ईशू पिछ़ू हांढणेंओ मतलब
(मत्ती 16:24-28; लुका 9:23-27)
34ईशू शादै तिंयां लोग और आपणैं च़ेल्लै, सोभै ज़ण्हैं आप्पू सेटा लै। तेऊ बोलअ तिन्नां लै, “ज़ुंण बी मेरअ च़ेल्लअ हणअ च़ाहे, सह निं तिन्नां गल्ला करी सकदअ ज़ुंण तेऊओ दिल च़ाहा। तेऊ लागणअ अपराधी ज़िहअ दाह-दुख ज़िरी मेरी तैणीं मरना लै बी तैर रहणअ।
35 “किल्हैकि ज़ुंण बी एसा पृथूई दी आपणीं ज़िन्दगी बच़ाऊंणी च़ाहे, सह करा परमेशरा संघै सदा रहणैं आल़ी ज़िन्दगी बरैबाद, पर ज़ुंण मेरै खुशीए समादा और मुंह दी विश्वास करनै पिछ़ू आपणैं प्राण दैए, तेऊ भेटणीं परमेशरा संघै सदा लै ज़िन्दगी।
36 “ज़ै कुंण मणछ सारै संसारा आपणैं बशै करी करै सेठ बणें पर आपणैं प्राण बरैबाद पाए ता तेऊ किज़ै फाईदअ हणअ? 37एसा गल्ले बारै सोठा कि मणछा लै आपणीं ज़ानीं का ज़ादै किम्मती किज़ै आसा?
38 “ज़ै तम्हैं मुंह आपणअ प्रभू मनणै और मेरी शिक्षा मनणै का इहअ एसा डरै हुधिए कि एऊ ज़मानें पापी और कंज़रै लोगा करनअ थारअ सुहांग, तै हुधणअ तेभै मुंह मणछे शोहरू बी कि तम्हैं निं मेरै च़ेल्लै आथी ज़ेभै हुंह आपणैं पबित्र स्वर्ग दूता संघै पृथूई दी फिरी एछणअ। तेभै भाल़णअ सोभी मेरअ प्रतप ज़िहअ मेरै बाप्पूओ आसा।”
Currently Selected:
मरकुस 8: OSJNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
This work is licensed under Creative Commons Attribution-ShareAlike 4.0 License.