मरकुस 6

नासरत नगरी ईशूओ अदर नांईं करनअ

(मत्ती 13:53-58; लुका 4:16-30)

1कफरनहूम नगरी का नाठअ ईशू आपणैं घर नासरत नगरी लै और तेऊए च़ेल्लै बी नाठै तेऊ संघा। 2तिधी लागअ बशैघे धैल़ी ईशू आराधना कोठी दी शिक्षा दैंदअ।

बडै भारी लोग हुऐ तेऊए गल्ला शूणीं रहैन, तिंयां लागै इहअ बोलदै,

“एऊ ईंयां गल्ला किधा का शिखल़ी? अह कुंण ज़िहअ ज्ञैन आसा ज़ुंण सिधअ एऊ लै आसा दैनअ द? ता हेरे; अह भाल़ किहै-किहै च़मत्कारे काम करा! 3एऊ बछ़ैणा हाम्हैं सोभै! अह कै सह ई मिस्त्री निं आथी ज़ुंण मरिअमो शोहरू आसा? याकूब, योसेस, यहूदा, और शमौनो आसा अह ज़ेठअ भाई और एऊए बैहणी कै हाम्हां मांझ़ै निं रहंदी?” इना गल्ला पिछ़ू निं तिन्नैं सह मनअ आथी।

4ईशू बोलअ तिन्नां लै, “परमेशरे गूरो हआ होरी सोभी ज़ैगा अदर पर आपणैं देशै, रिश्तैदारा और टबरा मांझ़ै निं तेऊओ अदर हंदअ।” 5ईशू निं तिधी किछ़ै खास्सै च़मत्कारे काम किऐ, तेऊ किऐ तिधी सिधै थोल़ै ज़िहै बमारा दी आपणैं हाथा करै छ़ुंईं राम्बल़ै।

6ईशू हुई एसा गल्ले रहैनी कि तिन्नैं निं विश्वास किअ!

बारा च़ेल्लै छ़ाडणैं

(मत्ती 10:5-15; लुका 9:1-6)

ईशू रहअ आपणैं च़ेल्लै संघै नगरी और गराऊंऐं हांढी शिक्षा दैंदअ लागी। 7तेखअ शादै एकी धैल़ी ईशू आपणैं बारा च़ेल्लै आप्पू सेटा लै और तेऊ छ़ाडै तिंयां दूई-दूई करै नगरी गराऊंऐं और तिन्नां लै दैनअ भूता काढणेंओ हक।

8संघा दैनअ तिन्नां लै इहअ हुकम, “बाता हांढणा लै शोठै का सुआई निं आप्पू संघा किछ़ पाई, नां रोटी, नां झ़ोल़ी नां ढबैओ थैलू। 9खूरै बान्हां पोलल़ै और दूई कुर्तै बी निं संघा निंईं।”

10होर बोलअ तेऊ तिन्नां लै इहअ, “ज़ै तम्हां कुंण आपणैं घरा लै पाहुंणैं शादे, ता तम्हैं डेओऐ तेऊ घरा लै और रोटी खाई सुत्तै तेऊ ई घरै ज़ेभै तैणीं तम्हैं तेसा नगरी का बागै निं डेओए।

11 “ज़िधी लोग तम्हां नांईं मनें और थारी गल्ला नांईं शुणें, तैहा ज़ैगा ठुल़्हकै आपणैं खूरा का धूल़अ पोर्ही, ताकि तिन्नां लै गवाही होए कि तिन्नैं निं थारअ सुआगत किअ।”

12ईशूए च़ेल्लै बी नाठै और तिन्नैं बी किअ इहअ प्रच़ार कि मन बदल़ा और पाप करनअ छ़ाडा। 13संघा काढै तिन्नैं कई मणछा का भूत पोर्ही और कई बमार लोगा लै मल़अ प्राथणां करी तेल और तिंयां किऐ ठीक।

युहन्ना डुबकी दैणैं आल़े हत्या

(मत्ती 14:1-12; लुका 9:7-9)

14ईशूए बारै लागअ हर ज़ैगा थोघ और ईंयां गल्ला पुजी हेरोदेस राज़ै सेटा बी कई लोग बोला तै इहअ, “युहन्ना डुबकी दैणैं आल़अ हुअ मरी करै ज़िऊंदअ, तैहीता तेऊ का ईंयां शगती और च़मत्कारे काम हआ प्रगट।”

15ता कई होरी लोगै बोलअ इहअ बी, “अह आसा एलियाह।” पर कोई लोगै बोलअ इहअ, “अह आसा आजू हणैं आल़ी गल्ला प्रगट करनै आल़अ; या तिन्नां परमेशरे गूरा मांझ़ै कोई एक ज़ण्हअ।”

16हेरोदेस राज़ै बोलअ इना गल्ला शूणीं करै इहअ, “ज़ुंण युहन्ना डुबकी दैणैं आल़अ मंऐं मारी पाअ त, मेरै खैलै हुअ सह ई ज़िऊंदअ।”

17ईंयां गल्ला हुई ती एही कि ज़धू युहन्ना ज़िऊंदअ त ता हेरोदेस राज़ै किअ आपणैं भाई फिलिप्पुसे ज़िऊंदी ज़िता तेऊए लाल़ी हेरोदियासा संघै नज़ायज़ बैह।

18युहन्ना बोलअ त हेरोदेस राज़ै लै इहअ, “आपणैं भाईए ज़िऊंदी ज़िता तेऊए लाल़ी डाही करै किअ तंऐं पाप।” हेरोदेस राज़ै छ़ाडै युहन्ना ढाकणा लै सपाही और सह पाअ कैद खानै दी। (लेबी बधान 18:16; 20:21) 19एता पिछ़ू डाहा ती हेरोदियास युहन्ना संघै ज़ीद और सह च़ाहा ती तेऊ किहअ करै मारनअ; पर इहअ निं हई सकअ।

20किल्हैकि हेरोदेस राज़ै लागा ती युहन्ना का डौर किल्हैकि तेऊ का आसा त थोघ कि युहन्ना आसा धर्मीं और पबित्र मर्ध। सह करा त तेऊए हेर सभाल़ बी और तेऊ लागा ती तेऊए गल्ला शूणीं डौर पर तैबी बी हआ त सह तेऊए गल्ला शुणना लै खुशी।

21ता ज़ेऊ मोक्कै लोल़ी हेरोदियास लागी दी आसा ती; सह मोक्कअ भेटअ तेसा तेभै ज़ांऊं हेरोदेस राज़ै आपणीं ज़ल्म धैल़ी दी आपणैं प्रधाना, सैनापति और गलील लाक्के बडै-बडै लोगा लै भोज़ दैनअ।

22ता हेरोदियासे शोहरी आई भितरा लै, और आपणअ नाच़ रहैऊई करै किऐ हेरोदेस और तेऊ संघै बेठै दै सोभ खुश, तेसा का खुश हई करै बोलअ राज़ै तेसा शोहरी लै, “तूह ज़ुंण बी मुखा मांगे, मुंह दैणअ ताल्है खुशी-खुशी।” 23होर ता होर राज़ै दैनी सोभी सम्हनै तेसा लै ज़बान कि, “ज़ुंण बी तूह मुखा मांगे सह लाअ मंऐं ताल्है दैई; इधी तैणीं कि, ज़ै तूह मुखा आधअ राज़ बी मांगे; तेता बी दैंऊं हुंह ताल्है।” (एस्तेर 5:3,6; 7:2)

24सह शोहरी नाठी बागै आपणीं आम्मां सेटा पुछ़दी, “हुंह किज़ै मांगूं?”

तेसरी आम्मां बोलअ तेसा लै, “युहन्ना डुबकी दैणैं आल़ैओ मूंड मांग।”

25सह आई तेभी राज़ै सेटा भितरा लै और तेसा बोलअ राज़ै लै, “हुंह च़ाहा कि तूह दै मुल्है एभी युहन्ना डुबकी दैणैं आल़ैओ मूंड काटी थाल़ा भितरी आणी।”

26एसा गल्ला शूणीं करै हुअ राज़अ बडअ भारी दुखी पर तिधी बेठै दै सोभी पाहुंणैं बी शूणीं तेऊए तिंयां गल्ला और तेता लै निं सह हुधणअ च़ाहंदअ त। 27इहअ करै दैनअ राज़ै बी तेभी आपणैं सपाही लै हुकम कि डेओआ, तेऊओ मूंड आणा काटी करै एभी।

28सपाही बी नाठै और थाल़ा भितरी दैनअ युहन्ना डुबकी दैणैं आल़ैओ मूंड काटी करै तेसा शोहरी लै आणी और तेसा शोहरी निंयं सह आपणीं आम्मां लै। 29इहअ शूणीं करै आऐ युहन्ने च़ेल्लै और तेऊए ल्हास निंईं करै डाही तिन्नैं सह घोरी दाबी।

ईशूए च़ेल्लेओ बापस फिरनअ और ईशूओ कांगनरांगै डेऊणअ

(मत्ती 14:13,14; लुका 9:10)

30बारा शधाणूं हुऐ सोभ ईशू सेटा कठा और ज़िहअ-ज़िहअ तिन्नैं किअ और ज़िहअ लोगा का सखाऊअ त; तिन्नैं खोज़ी तेऊ सेटा पुजी करै तिंयां सारी गल्ला बाढै।

31ईशू बोलअ तिन्नां लै, “हाम्हां डेऊणअ किधी कांगनरांगी ज़ैगा लै थोल़ी घल़ी करनअ राआम।” किल्हैकि तिधी रहा तै बडै भारी लोग एछदै लागी और तिन्नां निं रोटी खाणेंओ बगत बी भेटदअ त।

32तेखअ नाठै तिंयां किश्ती दी बेशी करै एकी कांगनरांगी ज़ैगा लै।

पांज़ा हज़ारा मर्धा का रोटी खैऊंणी

(मत्ती 14:15-21; लुका 9:11-17; युहन्ना 6:1-14)

33लोगै हेरै तिंयां डेऊंदै भाल़ी और बछ़ैणीं, ता लोग ठुर्है पिछ़ू आपणीं ज़ांघा हांढी और तिंयां गऐ तेसा ज़ैगा पैहलै पुजी ज़िधा लै ईशू और तेऊए च़ेल्लै पुजै। 34ईशू तिधी पुजी करै किश्ती का होथअ और तिधी आऐ बडै भारी खास्सै लोग और ईशू फिरी तिन्नां भाल़ी झींण। किल्हैकि तिंयां तै एही भेडा ज़िहै ज़हा फुआल कोहै निं हंदअ। तेखअ लागअ ईशू कई गल्ले शिक्षा दैंदअ। (2 इतिहास 18:16; 1 राज़ा 22:17)

35ज़ांऊं सान्ह च़ाल्ली पल़ी ता तेऊए च़ेल्लै आऐ तेऊ सेटा लै और तिंयां लागै इहअ बोलदै, “अह आसा बडी कराहणीं ज़ैगा, ता धैल़अ बी गअ उडी। 36इना लोगा लै बोल घरा डेऊणा लै ताकि ओरी-पोरी गराऊंऐं डेऊई करै ईंयां आप्पू लै खाणैं-पिणैंओ इंतज़ाम करी सके।”

37पर ईशू बोलअ तिन्नां लै, “तम्हैं दैआ इना लै खाणां लै।”

तिन्नैं बोलअ ईशू लै, “हाम्हां कै इना सोभी लै दूई शौआ च़ंदीए सिक्कै दैई करै लाई रोटी आणी लई और तेखअ खैऊंणी?”

38ईशू बोलअ तिन्नां लै, “डेओआ, और भाल़णीं दैआ हेरुं तम्हां सेटा केतरी रोटी आसा?”

तिन्नैं भाल़ी करै बोलअ, “हाम्हां का आसा सिधी पांज़ रोटी, और दूई माह्छ़ली।”

39तेखअ बोलअ ईशू तिन्नां लै, “सोभी बशैल़ा धरनीं हरी घाहा प्रैंदै घेहल़ी दी।” 40तिंयां सोभ बेठै शौ-शौ और पज़ाह-पज़ाह करै एकी-एकी घेहल़ी दी।

41ईशू ढाकी तिंयां पांज़ रोटी और दूई माह्छ़ली हाथै और सरगा बाखा लै भाल़ी किअ परमेशरो शूकर। तेखअ लागअ रोटी चोल़ी-चोल़ी करै च़ेल्लै का दैंदअ और तिंयां लागै लोगा लै बांडदै, और तिंयां दूई माह्छ़ली बी दैनी सोभी लै बांडी करै।

42इहअ करै खैऊई सोभी लोगा का रोटी और तिंयां सोभ लोग रज़ै। 43ता बारा च़ठै भर्हुऐ तिन्नां रोटीए ज़ुंण पिछ़ू बच़ी और माह्छ़लीए बी बच़ै कई च़ठै। 44ज़ेतरै ज़ण्हैं रोटी खाई तिंयां तै गिणती दी कोई पांज़ हज़ार मर्ध ई मर्ध। बेटल़ी और माठै निं तिन्नैं गिणैं आथी।

ईशूओ पाणीं प्रैंदै हांढणअ

(मत्ती 14:22-33; युहन्ना 6:15-21)

45तेखअ बोलअ तेभी ईशू आपणैं च़ेल्लै लै किश्ती दी बेशणा लै इहअ कि तम्हैं डेओआ आजू समुंदरा पार बैतसैदा नगरी लै हुंह एछूं इना सोभी लोगा घरा लै छ़ाडणैं का बाद। 46तिन्नां लोगा घरा लै छ़ाडी करै नाठअ ईशू प्राथणां करदअ धारठी प्रैंदा लै।

47ज़ांऊं सान्ह पल़ी ता किश्ती ती समुंदरा मांझ़ै और ईशू त कल्ही समुंदरे बाढै। 48ज़ांऊं तेऊ भाल़अ कि तिंयां च़ेल्लै डरै किश्ती च़लाऊंदी किल्हैकि समुंदरै आअ ढिश बागर इहअ कि; तिंयां आणै हारी मारी।

ता ईशू बी आअ राचकै च़ौथै पहरै समुंदरे पाणीं प्रैंदै च़ेल्लै सेटा लै और तिन्नां का च़ाहा ती ईशू आजू निखल़णअ। 49तिन्नैं च़ेल्लै भाल़अ सह समुंदरे पाणीं प्रैंदै हांढदअ। तिन्नैं सोठअ इहअ कि अह आसा भूत। ता तिन्नैं पाई डरै मारै ज़ोरै-ज़ोरै लैल़ा-पकारा। 50तिंयां सोभै ज़ण्हैं डरै तेऊ भाल़ी करै। पर ईशू की तेभी तिन्नां संघै गल्ला और तिन्नां लै बोलअ, “हैअ डाहा, डरा निं आथी हुंह आसा।”

51ईशू उखल़अ तिन्नें किश्ती दी और ढिश बागर मुक्की तेभी। तिंयां सोभ हुऐ रहैन। 52तिन्नें मन तै एतरै काठै हुऐ दै कि तिंयां निं पांज़ हज़ारा लोगा का रोटी खैऊणेंओ मतलब बी समझ़ै कि ईशू का केतरी शगती आसा।

गन्नेसरत समुंदरे बाढै दाह-खिज़ा आल़ै ठीक करनै

(मत्ती 14:34-36)

53तिंयां सोभ पुजै गलील समुंदरा पार डेऊई करै गन्नेसरत और किश्ती लाई बाढै दी। 54ज़ांऊं तिंयां किश्ती का होथै, ता लोगै हेरअ ईशू तेभी बछ़ैणीं।

55संघा ठुर्है तिंयां लोग ओरी-पोरीए गराऊंआं दी और कई बमार मणछ आणै मांज़ै प्रैंदै च़की। ज़िधी तिन्नां का थोघ लागअ कि ईशू आसा; तिधा लै रहै तिंयां निंदै लागी।

56ता ज़िधी बी ईशू घरै, नगरी, च़ाऐ गराऊंआं दी डेओआ त, लोग निंयां तै बमार मणछ तेऊ सेटा लै।

तिंयां करा तै एही अरज़ कि हे ईशू हाम्हां दै तेरै झिकल़ैओ पाल्लअ छुंहणैं ताकि हाम्हैं इना बमारी का बच़े। ता ज़ेतरै तेऊ छुंआं तै तिंयां छ़ुटै हर बमारी का।

Currently Selected:

मरकुस 6: OSJNT

ማድመቅ

Copy