मत्ती 28

ईशूओ मरी करै ज़िऊंदै हणअ

(मरकुस 16:1-10; लुका 24:1-12; युहन्ना 20:1-10)

1बशैघे धैल़ी बाद, हबते पैहली धैल़ी दोती दोथी आई मगदल़ गराऊंए मरिअम और दुजी मरिअम घोरी सेटा ईशू भाल़ी।

2ता हेरा तिधी हुई एक बडी ज़ाज़री, किल्हैकि प्रभूओ एक स्वर्ग दूत सरगा का होथअ, और घोरीए मोहरै दी लाई दी बडी टोल्ह बदल़ी पोर्ही और आप्पू बेठअ तेता प्रैंदै। 3तेऊए झिकल़ै तै शेतै और तेथ त ज़िहअ पाल़अ पल़अ द और च़मकदअ लागअ द और तेऊओ रूप त बिज़ल़ी ज़िहअ। 4तेखअ लागै तेऊए डरै तिंयां पहरी काम्बदै और तिंयां हुऐ ज़िहै मूंऐं दै मणछा ज़िहै।

5स्वर्ग दूतै बोलअ तिन्नां बेटल़ी लै, “तम्हैं निं डरा आथी, मुखा आसा थोघ कि तम्हैं आसा लागी दी ईशू लोल़ी ज़ुंण क्रूसा दी मारअ त। 6सह निं इधी आथी, पर ज़िहअ तेऊ बोलअ त; तिहअ ई हुअ सह ज़िऊंदअ। एछा, एसा ज़ैगा भाल़ा ज़िधी ईशू त डाहअ द। 7तम्हैं करा इहअ एभी डेओआ तेऊए च़ेल्लै का खोज़ै इहअ कि सह हुअ मरी करै ज़िऊंदअ; और हेरे, सह गअ तम्हां का पैहलै गलील लाक्कै लै डेऊई। तिधी हणैं तम्हां तेऊए दर्शण, हेरे, मंऐं हेरअ तम्हां का खोज़ी।”

8तिंयां बेटल़ी लागी डरै काम्बदी पर बडै नंदा दी खुशी-खुशी घोरी सेटा का ठुर्ही घरा लै और च़ेल्लै का समादा खोज़दी। 9तेखअ भेटअ तिन्नां ईशू और तिन्नां संघै की गल्ला-बाता और च़ेल्लै बी टेक्कअ ईशू सेटा एछी करै माथअ। 10तेखअ बोलअ ईशू तिन्नां लै, “डरा निं आथी, मेरै होरी भाई लै बोला कि गलील लाक्कै लै डेओआ, हुंह शुझणअ तिन्नां का तिधी।”

पहरीओ समाद दैणअ

11तिंयां बेटल़ी ती होरी च़ेल्लै सेटा लै समादा खोज़दी डेऊंदी ई लागी दी कि तिन्नां पहरी मांझ़ै नाठै कई ज़ण्हैं नगरी लै तिन्नैं खोज़अ बडै परोहिता का सारी गल्ला। 12तेखअ किअ तिन्नैं मुखियै संघै कठा हई करै जोग, और तिन्नां सपाही लै बोलअ खास्सी च़ंदी रिशपत दैई करै, 13“एसा गल्ला निं कोही का खोज़ी। पर लोगा का बोलै इहअ कि राची तै हाम्हैं सुत्तै दै और तेऊए च़ेल्लै पाई राची सह ल्हास च़ोरी। 14ज़ै थारी अह गल्ल कि तम्हैं आसा तै राची सुत्तै दै पिलातुस मुखिये कानै पुजे, ता तेऊ समझ़ाऊंमै हाम्हैं और तम्हैं बच़ाऊंणै हाम्हां तेऊ खातरै का।” 15ता तिन्नैं ढबै निंयैं और ज़िहअ तिन्नैं बोलअ त तिहअ ई बोलअ तिन्नैं सपाही सोभी का। अह गल्ल आसा आझ़ तैणीं बी यहूदी मांझ़ै सोभी एही ई समझ़ी दी।

ईशूओ शुझणअ और खिरी दैनअ द हुकम

(मरकुस 16:14-18; लुका 24:36-49; युहन्ना 20:19-23; शधाणूं 1:6-8)

16तिंयां गैरा च़ेल्लै नाठै गलील लाक्के तेसा धारा प्रैंदै ज़ुंण ईशू तिन्नां का खोज़अ त। 17तिधी डेऊई भेटअ तिन्नां ईशू और तेऊ सेटा टेक्कअ माथअ। पर कई ज़ण्हैं त अज़ी बी मनैं बैहम कि अह सच्च़ी हुअ भी ज़िऊंदअ! 18ईशू आअ तिन्नां सेटा और बोलअ, “स्वर्ग और पृथूईओ सारअ हक दैनअ मुल्है। 19एता लै डेओआ तम्हैं संसारे सोभी ज़ातीए लोगा सेटा लै और तिन्नां बणांआ मेरै च़ेल्लै। संघा दैआ तिन्नां लै बाप्पू परमेशर, परमेशर शोहरू और परमेशर पबित्र आत्में नांओंऐं डुबकी। 20तिन्नां का सखाऊआ तम्हैं तिन्नां सोभी गल्ला मनणी ज़ुंण मंऐं तम्हां का आसा खोज़ी दी। एसा गल्ला लै रहै तम्हैं निहंचै दी: हुंह आसा संसार खतम हणैं तैणीं सदा तम्हां संघै।”

Currently Selected:

मत्ती 28: OSJNT

ማድመቅ

Copy