मत्ती 20

अंगूरे बगिच़ै दी काम करनै आल़ै मणछे कथ्या

1 “स्वर्गो राज़ आसा एकी इहै घर मालका ज़िहअ सह निखल़अ दोती दोथी च़फै लै कि सह आपणैं अंगूरे बगिच़ै दी मज़दूर कामां करदै मज़दूर लाई सके। 2संघा छ़ाडै तेऊ मज़दूर इहअ खोज़ी करै कि पूरी धैल़ीए केतरी मज़दूरी भेटणीं, तेते साबै बगिच़ै लै कामां करदै।

3 “तेखअ भाल़ै एकी पहरा बाद तेऊ च़फै कई होर बी रित्तै खल़्हुऐ दै। 4तेऊ बोलअ तिन्नां लै बी, ‘डेओआ, तम्हैं बी करा मेरै अंगूरे बगिच़ै दी काम। ज़ुंण मुंह मेरै दिलै ठीक लागे तेऊ साबै दैंऊं हुंह तम्हां धैल़ीए मज़दूरी। तिंयां बी नाठै बगिच़ै दी कामां करदै।’ 5तेखअ तेऊ दुजै और चिऊथै पहरा नेल़ बी किअ तिहअ ई।

6 “खिरी च़ाल्ली ती सान्ह पल़ी ता तेऊ भाल़ै होर मज़दूर बी रित्तै खल़्हुऐ दै। तेऊ बोलअ तिन्नां लै बी ‘तम्हैं किल्है आसा इधी सारी धैल़ी रित्तै खल़्हुऐ दै?’ तिन्नैं बोलअ इहअ कि ‘हाम्हां निस्सी किधी बी मज़दूरी खटणा लै भेटी।’

7 “तेऊ बोलअ, ‘तम्हैं बी करा मेरै अंगूरे बगिच़ै दी काम।’

8 “तेखअ बोलअ तेऊ धैल़अ उडी करै आपणैं भढारी लै इहअ, ‘सोभी कामां करनै आल़ै शाद और पिछ़लै का पैहलै तैणीं दैऐ सोभी लै बराबर मज़दूरी।’ 9ता ज़ांऊं तिंयां सोभ कामां आल़ै आऐ, ता खिरी ज़ुंण उडै बी कामां करदै आऐ तै तिन्नां बी भेटी पूरी धैल़ीए होरी बराबर मज़दूरी। 10ज़ुंण दोती पैहलै आऐ तै तिन्नैं ज़ाणअ इहअ कि हाम्हां भेटणीं इना होरी का खास्सी धैल़ी पर तिन्नां बी भेटी पूरी धैल़ीए तेतरी ई मज़दूरी ज़ुंण तिन्नां संघै बाहिदअ त हुअ द।

11 “ज़ांऊं तिन्नां मज़दूरी भेटी ता तिंयां हुऐ तेऊ मालका का नराज़ और तेऊ लै लागै इहअ बोलदै कि 12‘ज़ुंण ईंयां खिरी उडै आऐ तै इनै ता सिधअ एकी कहरै किअ काम! पर तंऐं दैनी इना लै हाम्हां बराबर मज़दूरी! ज़ुंणी सारी धैल़ी बोझ़अ च़कअ और चटाक धुपैओ जाम्ह ज़िरअ?’

13 “तेऊ दैनअ तिन्नां मांझ़ै एकी लै ज़बाब, ‘भाल़ भाई, मंऐं निं ताह संघै किछ़ै ज़ुल्म किअ, ज़ेऊ साबै तूह दोती कामां करना लै राज़ी हुअ त तेतरी मज़दूरी ता ताल्है पूरी दैनी? 14ज़ुंण तेरअ आसा तेऊ च़क, संघा लाग हांढदअ। अह आसा मेरी मरज़ी कि ज़ेतरअ मंऐं ताल्है दैनअ तेतरअ दैणअ मुंह इना होरी लै बी ज़ुंण ताखा पिछ़ू आसा आऐ दै। 15अह आसा मेरी मरज़ी कि हुंह आपणैं ढबै संघै ज़िहअ च़ाहूं तिहअ करूं? ज़ै हुंह भलअ आसा, तै तूह किल्है आसा तेता बूरी आछी भाल़अ लागअ द?’

16 “ठीक इहै ई ज़ुंण आजू तै तिंयां हणैं पिछ़ू और ज़ुंण पिछ़ू तै तिंयां हणैं आजू।”

मौत और ज़िऊंदै हणें बारै चिऊथी बारी खोज़णअ

(मरकुस 10:32-34; लुका 18:31-34)

17तेखअ निंयैं ईशू येरुशलेम नगरी लै डेऊंदी बारी आपणैं बारा च़ेल्लै कांगनरांगै और बाता बोलअ तेऊ तिन्नां लै इहअ, 18“भाल़ा, हाम्हैं च़ाल्लै ऐबै येरुशलेम नगरी लै और हुंह मणछो शोहरू दैणअ बडै परोहिते और शास्त्री लोगे हाथै। तिन्नां बणांणअ मौता दैणैं जोगी दोशी। 19तेखअ दैणअ हुंह तिन्नां होरी ज़ातीए हाथै ताकि मेरअ सुहांग-मखौल करी सके और कोल़ै करै च़िके; और क्रूसा दी मारी पाऐ। पर चिऊथै धैल़ै हणअ हुंह ज़िऊंदअ।”

एकी आम्में अरज़

(मरकुस 10:35-45)

20ज़ांऊं जबदीए शोहरू याकूब और युहन्ने आम्मां आई और ईशू सेटा एछी करै माथअ टेक्कअ ता सह लागी तेऊ का किज़ू मांगदी। 21तेऊ बोलअ तेसा लै “तूह किज़ै च़ाहा?” तेसा बोलअ इहअ, “मेरै ईंयां दूई शोहरू लोल़ी तेरै राज़ा दी एक तेरै दैहणीं और बाऊंईं कुछी बेठै।”

22ईशू दैनअ तेसा लै ज़बाब, “तम्हां का निं थोघै कि तम्हैं किज़ै मांगा? ज़ुंण दुखो घुप्पू मुंह झुटणअ तेता कै तम्हैं झुटी सका?” तिन्नैं दैनअ ईशू लै तेभी ज़बाब “हाँ, हाम्हैं सका इहअ करी।”

23ईशू बोलअ तिन्नां लै, “हाँ अह आसा सच्च़ी कि तम्हां हेरनअ मुंह ई ज़िहअ दुखो घुप्पू बी झुटी पर आपणैं दैहणै-बाऊंऐं बशैल़णअ निं मेरअ काम आथी पर ज़हा लै मेरै बाप्पू ज़ुंण ज़ैगा बणांईं आसा हेरी दी, सह आसा तिन्नां लै।”

24इहअ शूणीं करै आई तिन्नां होरी च़ेल्लै तिन्नां दूई भाई लै रोशै। 25ईशू शादै तिंयां आप्पू सेटा लै और तिन्नां लै बोलअ, “तम्हां का आसा एसा गल्लो थोघ कि ज़ुंण होरी ज़ातीए मुखियै हआ, तिंयां करा तिन्नां दी राज़ और तिन्नां मांझ़ै ज़ुंण बडै हआ तिंयां डाहा तिन्नां दी हक।

26 “पर तम्हां मांझ़ै निं इहअ हणअ; पर ज़ुंण बी तम्हां मांझ़ै बडअ हणअ च़ाहे, सह लोल़ी थारअ टैहलू ज़िहअ बणअ। 27ज़ुंण तम्हां मांझ़ै प्रधान हणअ च़ाहे, सह लोल़ी पैहलै तम्हां सोभिओ टैहलू बणअ। 28ज़िहअ कि हुंह मणछो शोहरू निं एते तैणीं आथी आअ द की कुंण मेरी सेऊआ करे। पर हुंह आसा एते तैणीं आअ द कि हुंह होरीए सेऊआ करे और सोभी लोगे छ़ुटकारै लै आपणैं प्राण दैए।”

दूई कांणै मणछ ठीक करनै

(मरकुस 10:46-52; लुका 18:35-43)

29ज़ांऊं तिंयां येरिहो नगरी का बागै निखल़दै ई लागै तै, ता बडै भारी खास्सै लोग आऐ ईशू पिछ़ू। 30ता दूई कांणै तै बाते बाढै बेठै दै। तिन्नैं इहअ शूणीं करै कि ईशू आसा लागअ द एसी बाती डेऊंदअ, ता तिंयां लागै हाक्का लाई बोलदै, “हे प्रभू, दाबेदे लुआद ईशू, हाम्हां लै कर झींण।”

31लोग लागै तिन्नां इहअ बोली नैरदै, “च़ुप्पी रह।”

पर तिंयां लागै होर बी खास्सै लैल़ा लांदै और बोलदै, “हे प्रभू, दाबेदे लुआद ईशू, हाम्हां लै कर झींण।”

32ईशू उझ़ुअ खल़अ और तिंयां शादै आप्पू सेटा लै। तेखअ बोलअ तेऊ तिन्नां लै, “तम्हैं इहअ किज़ै च़ाहा कि हुंह तम्हां लै करूं?”

33तिन्नैं बोलअ ईशू लै, “हे प्रभू; हाम्हैं च़ाहा इहअ कि म्हारी आछी लोल़ी खुल्ही और हाम्हां का लोल़ी शुझदअ लागअ।” 34ईशू फिरी तिन्नें झींण और तिन्नें आछी छ़ुंईं और तिन्नां का लागअ तेभी शुझणअ और तिंयां बी लागै ईशू पिछ़ू हांढदै।

Currently Selected:

मत्ती 20: OSJNT

ማድመቅ

Copy