लुका 5

पैहलै च़ेल्लै शादणैं

(मत्ती 4:18-22; मरकुस 1:16-20)

1ज़ांऊं लोग परमेशरे बैणा शुणदै तेऊ फेर चुटी पल़ा तै, ईशू त गन्नेसरत समुंदरे बाढै खल़्हुअ द और इहअ हुअ कि; 2तेऊ भाल़ी समुंदरे बाढै दूई किश्ती खल़्हुई दी और तिंयां माह्छ़ली ढाकणैं आल़ै तै किश्ती का होथी करै लागै दै माह्छ़ली ढाकणें ज़ाल़ा धोंदै।

3तिन्नां किश्ती मांझ़ै बेठअ ईशू एकी किश्ती दी ज़ुंण शमौन नांओंए माह्छ़ली ढाकणैं आल़े ती। संघा बोलअ ईशू शमौन पतरसा लै इहअ कि एसा किश्ती निंऊं बाढै का धख पाणीं मांझ़ा लै और तेखअ लागअ तेसा किश्ती प्रैंदा का तिन्नां लोगा लै शिक्षा दैंदअ।

4ज़ांऊं सह लोगा लै शिक्षा दैई मुक्कअ ता तेखअ बोलअ तेऊ शमौना लै, “किश्ती निंऊं मांझ़ै ज़ेही ज़िधी पाणीं खास्सअ डुघअ आसा और माह्छ़ली ढाकणा लै पाआ आपणअ ज़ाल़।”

5शमौनै बोलअ ईशू लै, “हे गूरू, हाम्हैं की सारी राची बडी भारी मैन्थ पर हाम्हां निं किछ़ बी भेटअ! पर तेरै बोलै लणअ हाम्हां ज़ाल़ पाई।” 6तेखअ तिन्नैं ज़िहअ बोलअ तिहअ ई किअ और तिन्नें ज़ाल़ा दी शाची बडी भारी खास्सी माह्छ़ली और तिन्नें ज़ाल़ च़ाल्लै धेहल़ुई।

7तेखअ शादै तिन्नैं आपणैं होर साथी बी ज़ाल़ा खिंच़दै ज़ुंण दुजी किश्ती दी तै। तिन्नैं भरी दूई किश्ती एही कि किश्ती बी च़ाल्ली पाणीं दी डुबी।

8एता भाल़ी पल़अ शमौन पतरस ईशूए च़रणैं संघा लागअ इहअ बोलदअ, “हे प्रभू! हुंह आसा पापी मणछ मुंह सेटा का डेऊ दूर।” 9किल्हैकि एतरी माह्छ़ली ढाकणा लै हूऐ तिंयां सोभ ज़ण्हैं रहैन 10तिहअ ई जबदीए शोहरू याकूब और युहन्ना ज़ुंण शमौने साथी तै; तिंयां बी हुऐ रहैन।

तेखअ बोलअ ईशू शमौना लै, “डरै निं आथी, आझ़ तैणीं तै तम्हैं माह्छ़ली कठा करदै, पर आझ़ा पोर्ही बणांणैं तम्हां मणछ कठा करी करै मेरै च़ेल्लै।” 11तिन्नैं आणी किश्ती समुंदरे बाढा लै और सोभ गल्ला छ़ाडी करै लागै तेऊ संघै हांढदै।

कोल़्हे बमारी आल़अ ठीक करनअ

(मत्ती 4:1-4; मरकुस 1:40-45)

12ज़ांऊं ईशू एकी नगरी त, तिधी आअ एक कोल़्हे बमारी आल़अ मणछ और तेऊ टेक्कअ ईशू भाल़ी करै तेऊ सेटा माथअ और संघा की एही अरज़, “हे प्रभू, ज़ै तूह च़ाहे, तै सका तूह मुंह ठीक करी।”

13ईशू लाअ तेऊ दी हाथ और तेऊ लै बोलअ, “हुंह च़ाहा इहअ ई” तेखअ बोलअ तेऊ, “कोल़्हे बमारी का हअ ठीक” और सह हुअ तेभी ठीक।

14तेखअ बोलअ ईशू तेऊ लै, “हेरे, एसा गल्ला निं होरी कोही का खोज़ी। हाँ, परोहिता सेटा डेऊई एछ आप्पू रहैऊई और कोल़्हे बमारी का शुचै हणें बारै ज़ुंण बधान परमेशरे गूर मुसा आसा खोज़अ द तेऊ साबै दै भैंट। ताकि तिंयां भाल़े कि तूह गअ कोल़्हे बमारी का शुचअ हई।” (लेबी बधान 14:2-32)

15पर ईशूए बारै गल्ला पुजी सारै दी कई ज़ैगा और लोगे छ़ुंड लागै एछदै ईशूए गल्ला शुणदै और बमारी का ठीक हंदै। 16पर ईशू डेओआ त कांगनरांगी ज़ैगा लै तिन्नां का दूर प्राथणां करदअ।

दरंगे बमारी आल़अ बमार ठीक करनअ

(मत्ती 9:1-8; मरकुस 2:1-12)

17एकी धैल़ै हुअ इहअ कि ईशू त शिक्षा दैंदअ लागअ द और फरीसी और शास्त्री बी तै तिधी बेठै दै, ज़ुंण गलील लाक्कै और यहूदा लाक्कै का हर गराऊंआं का और येरुशलेम नगरी का आसा तै आऐ दै। बमारी का ठीक करना लै ती परमेशरे शगती तेऊ संघै ई।

18तिधी आणअ लोगै एक दरंगे बमारी आल़अ और तिन्नैं आणअ सह बछ़ाऊणैं प्रैंदै च़की। तिंयां लागै ईशू सेटा भितरा लै डेऊणा लै बाता लोल़ै कि तेऊ मरीज़ा ईशूए मुंहां सेटा निंए।

19तिधी दुआरा सेटा तै बडै भारी खास्सै लोग कठा हुऐ दै। तिधी निं सिऊंणी सहरना लै बी ज़ैगा ती। तिन्नैं बी सोठी एक तरकीब और तिन्नैं पेच़अ तेऊ घरो छ़ाप्पर तैहा सिधा का ज़ेथ हेठै ईशू त बेठअ द। ज़ेथ दी सह दरंगो मरीज़ सताऊअ द त, सह बछ़ाऊणअ छ़ड़ाऊअ तिन्नैं छ़ाप्परा बाती च़ऊ कूणैं राशी बान्हीं करै उंधै ईशूए मुंहां सेटा लै। 20ईशू बोलअ तिन्नें विश्वासा भाल़ी तेऊ दरंगे मरीज़ा लै, “हे साथी तेरै पाप हुऐ माफ।”

21तेखअ लागै शास्त्री और फरीसी पंथे लोग हठल़दै, “अह कुंण आसा? अह ता परमेशरे कदर बी निं करदअ? परमेशरा छ़ाडी होर कुंण सका पाप माफ करी?”

22ईशू हेरी तिन्नें मनें गल्ला भुझ़ी और तिन्नां लै बोलअ, “तम्हैं आपणैं मनैं किल्है आसा लागै दै हठल़दै? 23सान गल्ल किज़ै आसा, एऊ दरंगे मरीज़ा लै इहअ बोल़णअ कि तेरै पाप हुऐ माफ, या एऊ लै इहअ बोल़णअ कि ‘उझ़ू हांढदअ फिरदअ लाग?’ 24ज़िहअ करै तम्हां का थोघ लागे कि मुंह मणछे शोहरू लै आसा पृथूई दी पाप माफ करनैओ हक।” तेखअ बोलअ ईशू तेऊ दरंगे मरीज़ा लै, “हुंह बोला ताल्है, उझ़ू आपणैं एऊ बछ़ाऊणैं च़क संघा डेऊ आपणैं घरा लै।” 25सह मरीज़ उझ़ुअ तेभी सोभी सम्हनै खल़अ और सह नाठअ आपणैं बछ़ाऊणैं च़की परमेशरे ज़ै-ज़ैकारा करदी घरा लै। 26एसा गल्ला भाल़ी हुऐ सोभ लोग रहैन और सोभ लागै परमेशरे ज़ै-ज़ैकारा करदै और कई लागै डरै मारै बोलदै, “आझ़ भाल़ी हाम्हैं नुआहरी गल्ल।”

मत्ती शादणअ

(मत्ती 9:9-13; मरकुस 2:13-17)

27तेखअ नाठअ ईशू बागा लै और लेबी नांओं एक कारै गराहणै आल़अ मणछ भाल़अ थल़्ही दी बेठअ द और तेऊ लै बोलअ, “मुंह पिछ़ू एछ” 28सह बी लागअ सोभ गल्ला छ़ाडी ईशू पिछ़ू हांढदअ।

29तेऊ लेबी बणांअ आपणैं घरै ईशू लै खाणां-पिणां लै और ईशू संघै बेठै कारै गराहणै आल़ै बाखा बी कई लोग रोटी खांदै, तेथ तै बडै भारी लोग। 30फरीसी और शास्त्री लागै ईशूए च़ेल्लै लै तान्हैं दैंदै, “तम्हैं कारै गराहणै आल़ै ज़िहै पापी मणछा संघै किल्है खाआ-पिआ?”

31ईशू दैनअ तिन्नां लै ज़बाब, “बैईद निं भलै-च़ांगै मणछा लै हंदअ पर सह हआ बमारा लै ज़रूरी। 32हुंह निं तिन्नां लै आथी आअ द ज़ुंण आप्पू धर्मीं समझ़ा! पर हुंह आसा पापी मणछे मना बदल़णें तैणीं शधाणूं आअ द।”

ब्रत करनैओ सुआल

(मत्ती 9:14-17; मरकुस 2:18-22)

33एकी धैल़ै हुअ इहअ कि कई लोग लागै ईशू का इहअ पुछ़दै, “युहन्ने च़ेल्लै करा ब्रत और प्राथणां और फरीसी लोगे च़ेल्लै बी करा तिहअ ई। पर तेरै च़ेल्लै किल्है हआ धैल़ खांदै-पिंदै लागै दै?” 34ईशू दैनअ तिन्नां लै ज़बाब, “ज़ेभै तैणीं लाल़अ बरातू संघै रहा, तेभै निं तिंयां ब्रत करदै। 35एक बगत एछणअ इहअ बी कि लाल़अ करनअ तिन्नां का ज़ुदअ और तेभै करनअ तिन्नां ब्रत।”

36तेखअ खोज़ी ईशू तिन्नां का एक होर कथ्या, “आपणैं नऊंऐं झिकल़ैओ शाटअ निं पराणैं झिकल़ै दी कोहै लांदअ। किल्हैकि सह निं पराणैं दी ज़ोल़ खांदअ। 37नां कुंण नऊंअ अंगूरो रस पराणैं खाल्हल़ै दी भरदअ। नांईं ता नऊंअ अंगूरो रस पोछणअ खाल्हल़ै फाल़ी करै बागै। अंगूरो रस और तिंयां खाल्हल़ै हआ इहअ करै दुहै गल्ला बरैबाद। 38पर नऊंअ अंगूरो रस लागा नऊंऐं खाल्हल़ै दी भरनअ। 39पराणअ अंगूरो रस झुटी करै निं कोहै नऊंअ अंगूरो रस च़ाहंदअ किल्हैकि तेऊ का हआ थोघ कि पराणअ हआ बधिया।”

Currently Selected:

लुका 5: OSJNT

ማድመቅ

Copy