लुका 3

युहन्ना डुबकी दैणैं आल़ैओ समाद

(मत्ती 3:1-12; मरकुस 1:1-8; युहन्ना 1:1-28)

1तिबरिउस माहा राज़े राज़ा दी पंद्रुई साला दी त पुंतिउस पिलातुस यहूदा लाक्कैओ राजपाल। तधू त हेरोदेस तेसा राईसीए च़ऊ लाक्कै मांझ़ै#3:1 च़ऊ लाक्कै मांझ़ै रोम राज़ा दी ज़ांऊं महान हेरोदेस राज़अ मूंअ और तेऊए तै च़ार शोहरू और तेऊओ राज़ बांढुअ आजू तेऊए शोहरू लै च़ऊ बाखा पर तेऊए चअन शोहरू करा तै तिन्नां लाक्कै दी राज़। च़ौथै शोहरुए बारै निं इधी आथी लिखअ द। गलील लाक्कैओ राज़अ और तेऊओ भाई फिलिप्पुस त इतूरैईआ और तरखोनिसिस इना दुही लाक्कैओ राज़अ। अबिलेना लाक्कै दी त लिसानियास राज़अ। 2तधू तै हन्ना और काईफा माहा परोहिते पदबी दी। तिन्नां ई धैल़ै की परमेशरै जकरयाहे शोहरू युहन्ना संघै गल्ला-बाता ज़धू सह दूर उज़ल़ ज़ैगा दी रहा त। 3युहन्ना लागअ जरदण नदी नेल़ सारै लाक्कै दी लोगा लै प्रच़ारा करदअ कि सह आसा त इहअ प्रच़ार करदअ लागअ द कि आपणअ मन बदल़ा और पाप करनअ छ़ाडा ताकि परमेशर तम्हां माफ करे और पाणीं दी लआ डुबकी। 4ज़िहअ परमेशरे गूरै याशायाह बोलै दै बैणे कताबा दी आसा लिखअ द कि

“उज़ल़ ज़ैगा दी आसा लागअ द एक हाक्का लांदअ कि प्रभू लै बणांआ बात

तेऊए बात करा आज़री।

5हरेक नाल़ खोहल़ भरनै और सोभ धारा-धारठी पाणीं ढोल़ी गोधै; कुंगल़ी बाता करनी सिधी।

ज़ुंण उछ़टअ-निहंटअ आसा

सह बणांणी च़कोर बात।

6परमेशरा करनअ उद्धार सोभ मणछा लै प्रगट।”

7लोगे छ़ुंड ई छ़ुंड एछा तै तेऊ सेटा लै डुबकी लंदै और सह बोला त तिन्नां का इहअ, “तम्हैं लोग आसा झ़रीली दानुईंए शोहरू ज़िहै! तम्हां का कोही निं खोज़अ कि ज़ुंण तम्हैं पाप किऐ परमेशरा दैणीं तम्हां सोभी लै तेते सज़ा? इहअ निं सोठा कि तम्हैं जाणैं तेऊ का बच़ी?” 8इहै काम ता करा ज़ेता करै थोघ लागे कि तम्हैं हेरअ पाप करनअ छ़ाडी और आपणैं-आपणैं मनैं निं इहअ सोठा कि हाम्हैं आसा आबरामे खांनदानी का, तै निं हाम्हां लै परमेशरा सज़ा दैणीं। हुंह बोला तम्हां का इहअ कि परमेशर सका इना पात्थरा का बी आबरामा लै लुआद पैईदा करी। 9परमेशर आसा तम्हां लै सज़ा दैणें ताका बेठअ द ज़िहअ एक मणछ राम्बल़ै फल़ नांईं दैणैं आल़ै बूटा ज़लैल़ै संघी गोधी का पेच़ा, तिहै ई पाणै तेऊ बी तिंयां सारै बूट गोधी का पेच़ी करै आगी जैंदरी।

10तेखअ लोगै युहन्ना का पुछ़अ कि तै हाम्हां किज़ै लागणअ करनअ?

11तेऊ दैनअ तिन्नां लै ज़बाब कि ज़हा का दूई कुर्तै आसा सह दैआ एक कुर्तअ तेऊ लै ज़हा का नांईं आथी और ज़हा का रोटी आसा सह बी करा इहअ ई।

12कारै गराहणै आल़ै बी आऐ तेऊ सेटा लै डुबकी लंदै और तेऊ का पुछ़अ कि हे गूरू, हाम्हैं कै करूं?

13तेऊ बोलअ तिन्नां लै, “लोगा का ज़ेतरै कारै लणा लै रोम राज़ै बधान आसा बणांअ द तेता का खास्सअ निं लोगा का लुटी।”

14ता सपाही बी पुछ़अ तेऊ सेटा एछी करै “हाम्हैं कै करूं?”

युहन्ना बोलअ तिन्नां लै, “थोघै बाझ़ी कूट-मार निं कोही लै करी और नां कसा लै झ़ुठअ दोश लाई और आपणीं मज़दूरी दी रहै खुश।”

15सोभी लोगा ती मसीहा एछणें आशा और तिंयां सोभ तै आपणैं-आपणैं मनैं युहन्ने बारै सोठदै लागै दै कि अह ई किनी आसा मसीहा? 16और युहन्ना तिन्नां लै ज़बाब दैनअ, “हुंह ता दैआ तम्हां लै पाणीं दी डुबकी; पर सह आसा एछणैं आल़अ ज़ुंण मुंह बाद एछणैं आल़अ आसा, सह आसा सोभी का महान और इधी तैणीं कि हुंह निं तेऊ सेटा एता जोगी बी आथी कि हुंह तेऊए पोलल़ै खोल्हणैं च़ाकरी करनै आल़अ टैहलू बणीं सकूं। तेऊ दैणअ तम्हां लै पबित्र आत्मां और आगी दी डुबकी। 17तेऊओ शूप आसा तेऊए हाथै, तेऊ करनी आपणैं खहल़े राम्बल़ै करै सफाई और धर्मीं मणछ करनै तेऊ ज़ुदै ज़िहअ ज़िम्मींदार नाज़ खुडी करा कठा, बूरै मणछ पाणै तेऊ भुखलै ज़िहै एही आगी जैंदरी दहई, ज़ुंण आग कधि निं हिशदी आथी।”

18सह रहअ कई शिक्षा दैई करै लोगा समझ़ाऊंदअ लागी और लोगा लै खुशीए समादा खोज़दअ लागी। 19पर युहन्ना नैरअ चौथाई देशो राज़अ हेरोदेस तेऊए भाई फिलिप्पुसे बेटल़ी हेरोदियासा डाहणें पिछ़ू और सोभ बूरै काम ज़ुंण तेऊ राज़ै किऐ तै, तेता लै बोलअ, ईंयां आसा गलत। 20और हेरोदेस राज़ै किअ तेता का बी खास्सअ बूरअ काम कि युहन्ना पाअ कैद खानै दी।

ईशूए पाणीं दी डुबकी

(मत्ती 4:1-11; मरकुस 1:12,13)

21ज़ांऊं सोभी लोगै डुबकी लई ता ईशू बी त डुबकी का बाद प्राथणां करदअ लागअ द। ता तेखअ हुअ इहअ कि हेरा-हेरी खुल्हअ सरग और 22पबित्र आत्मां होथी पालल़ी ज़ेही तेऊ दी और परमेशरै की स्वर्गा का ईशू संघै एही गल्ला, “तूह आसा मेरअ शोहरू ज़हा संघै हुंह खास्सी झ़ूरी करा। हुंह आसा ताखा खुश।”

ईशूओ खांनदान

(मत्ती 1:1-17)

23ज़ांऊं ईशू आप्पू बी शिक्षा दैंदअ लागअ, ता तेऊए अमर ती कोई तिहा साले ज़िहअ लोग समझ़ा तै, ईशू त युसुफो शोहरू। युसुफो बाप्पू त एली।

24एली त मत्तातो शोहरू, मत्तात त लेबीओ शोहरू और लेबीओ बाप्पू त मलकी। मलकी त यन्ना और यन्ना त युसुफो शोहरू।

25युसुफ त मतियाहो शोहरू। मतियाह आसा त आमोसो शोहरू। आमोस त नहूम और नहूम त अस्ल्याहो शोहरू और सह आसा त नोगहो शोहरू।

26नोगह त मातो और सह आसा त मतियाहो शोहरू। मतियाह त शिमिओ और सह आसा त योसेखो शोहरू। योसेख त योदाहो शोहरू।

27योदाह त युहन्नो शोहरू। युहन्ना त रेसा और सह आसा त जरूबाबिलो शोहरू। जरूबाबिल त शालतिएल और तेऊओ बाप्पू त नेरी। (एज्रा 3:2; नहेमायाह 12:1)

28नेरी त मलकीओ शोहरू। मलकीओ बाप्पू आसा त आदी और सह आसा त कोसामो शोहरू। कोसामो बाप्पू आसा त इलमोदाम और तेऊओ बाप्पू त एर।

29एर त येशूओ और येशूओ बाप्पू त इलाजार।

इलाजार त योरीमो और सह आसा त मत्तातो शोहरू और मत्तातो बाप्पू आसा त लेबी।

30लेबी त शमौनो और शमौन आसा त यहूदो शोहरू। यहूदा त युसुफो शोहरू और युसुफ त योनानो शोहरू। योनान त इल्याकिमो शोहरू।

31इल्याकिम आसा त मलेआह और मलेआह त भिन्नाहो शोहरू। भिन्नाह त मत्तातो और मत्तातो बाप्पू आसा त नातान और सह आसा त दाबेद राज़ैओ शोहरू। (2 शमूएल 5:14)

32राज़अ दाबेद त यिशै और सह आसा त ओबेदो शोहरू। ओबेद त बोअज़ो और बोअज़ आसा त सलमोनो शोहरू और सलमोनो बाप्पू त नहशोन। (रूत 4:20-22)

33नहशोन आसा त अमीनादाबो शोहरू और तेऊओ बाप्पू आसा त अरनी और सह आसा त हिरोनो शोहरू और सह आसा त फिरिसो शोहरू, ता फिरिसो बाप्पू त यहूदा। (1 इतिहास 2:1-14)

34यहूदा आसा त याकूबो शोहरू और याकूबो बाप्पू आसा त इसहाक। इसहाक त आबरामो शोहरू और आबराम आसा त तिरहो शोहरू। तिरहो बाप्पू त नाहोर। (मूल़ 21:3; 25:26; 1 इतिहास 1:28,34)

35नाहोर आसा त सरूग ता सह आसा त रऊओ और रऊ आसा त फिलिगो शोहरू। फिलिग त एबिर और एबिर त शिलोहो शोहरू।

36शिलोह त कनानो और कनान आसा त अरफक्षदो शोहरू। अरफक्षद आसा त शेमो और शेम त नूहो शोहरू। नूहो बाप्पू आसा त लेमेक। (मूल़ 11:10-26; 1 इतिहास 1:24-27)

37लेमेक आसा त मथूशिलोहो और सह आसा त हणोको शोहरू। हणोक आसा त यिरिदो और तेऊओ बाप्पू त महलेल। महलेल आसा त केनानो शोहरू।

38केनान आसा त एनोशो और एनोश आसा त शेतो शोहरू। शेतो बाप्पू त आदम और आदम आसा त परमेशरो शोहरू ज़ुंण परमेशरै सोभी का पैहलै बणांअ। (मूल़ 4:25—5:32; 1 इतिहास 1:1-4)

Currently Selected:

लुका 3: OSJNT

ማድመቅ

Copy