मरकुस 5

दुष्‍टात्माग्रस्त मणु जो ठीक करना

(मत्ती 8:28-34; लूका 8:26-39)

1यीशु अतै तसेरै चेलै गलील झीला रै पार गिरासेनियों रै परदेस मन्ज पुजै, 2जैहणै सो किस्ती थऊँ ओसै ता तैहणै अक्क मणु कब्रिस्तान री कनारी थऊँ नकैई करी तियां सितै, मुळु जैड़ा दुष्‍टात्मा रै वशा मन्ज थू 3सो कब्रिस्तान मन्ज ही रैहन्दा थू अतै मणु तैसिओ हंगळा सितै बनी रखदै थियै। 4कोई तैसिओ वशा मन्ज ना करी पान्दा थू अतै हंगळा सितै बनणा भी मुसकिल थू क्ओकि सो बार बार हँगला जो त्रोड़ी दिन्दा अतै टुकड़ै-टुकड़ै करी दिन्दा थू। 5सो लगातार रात-दिन कब्रिस्तान अतै फाटा मन्ज लेरा मारदा रैहन्दा अतै अपणै आपा जो पत्थरा सितै घायल करदा रैहन्दा थू।

6सो यीशु जो दूरा थऊँ हेरी करी ही दौड़ी आ अतै अपणै घुटनै रै भारै बही करी तैसिओ प्रणाम करू। 7यीशुऐ तैसा दुष्‍टात्मा जो बल्लू थू, “हे दुष्‍टात्मा, ऐस मणु थऊँ नकैई अई!”#1 राजा 17:18; मत्ती 8:29. 8ता सो मणु जोरा सितै बकी करी बलणा लगा, “हे यीशु, परमप्रधान प्रमात्मैं रै पुत्र, तून्दा मिन्जो सोगी कै कम हा? अऊँ तुसिओ प्रमात्मैं री सौगन्द पान्दा मिन्जो तकलीफ मत दिन्दै।”

9यीशुऐ तैस थऊँ पूछु, “तेरा नां कै हा?” तिनी बल्लू,

“मेरा नां सेना#5:9 सेना रोमी सेना रा सबी थऊँ बड़ा गुट हा जैत मन्ज पँज हजार थऊँ छिया हजार तक सैनिक भुन्दै हिन। तैस तरीकै ही तैस मणु मन्ज ऐतनी दुष्‍टात्मा थी। हा क्ओकि अहै मतै भारी हिन।” 10अतै तैस सोगी बड़ी बिनती करी कि “असिओ ऐस देशा थऊँ बाहर मत भैज।”

11तैड़ी पहाड़ी पुर सूअंरा री गुआली चरू करदी थी। 12दुष्‍टात्मा तैस सितै बिनती करीके बल्लू, “असिओ ईयां सूअंरा मन्ज भैजी दे कि अहै ईयां अन्दर रैहन।” 13यीशुऐ तियां जो हूक्म दिता अतै दुष्‍टात्मा नकैई करी सूअंरा मन्ज चली गई अतै सो गुआली जैड़ी कोई लगभग दोई हजार थी, पागल भूच्ची करी झीला मन्ज गिच्ची पैई अतै डूबी मरी।

14गुआलु ऐह हेरी करी नह्ही गै अतै ग्राँ अतै शहरा मन्ज गिच्ची करी ऐह गल्ला हुणाई, अतै मणु हेरना आये कि कै भुआ हा। 15ता ग्राँ अतै शहरा रै मणुऐ यीशु रै नेड़ै ईच्ची करी तैस मणु हेरू जैस मन्ज दुष्‍टात्मा थी मतलब दुष्‍टात्मा री पूरी सेना थी, कपड़ै लाई करी शान्त बैहुरा हेरू, ता सो मणु ऐह हेरी करी डरी गै। 16हेरनैवाळै तसेरा, जैस मन्ज दुष्‍टात्मा थी अतै सूअंरा रा पुरा हाल तियां जो बली हुणाऊ। 17ता सो अपणै नूकसान जो हेरी करी तैस सोगी बिनती करीके बलणा लगै कि इन्दै इलाकै थऊँ बाहर चली गा।

18जैहणै सो किस्ती पुर चढ़णा लगा ता सो जैस मन्ज दुष्‍टात्मा थी, तैस सोगी बिनती करना लगा, “मिन्जो अपणै सोगी ईणा दे।” 19पर तिनी ईणा ना दिता, अतै तैस सोगी बल्लू, “अपणै घरै गिचीकरी करी अपणै मणु जो दस्स कि तिजो पुर दया करीके प्रभुऐ तिजो तांयें किनै बड़ै कम करै हिन।” 20सो गिचीकरी दिकापुलिस परदेस मन्ज ऐसा गल्ला रा प्रचार करना लगु कि यीशुऐ मिन्जो तांयें किनै बड़ै कम करै हिन; अतै सब मणु हैरानी करदै थियै।

याईर री मरूरी कुल्ळी अतै अक्क रोगी जनानी

(मत्ती 9:18-26; लूका 8:40-56)

21जैहणै यीशु अतै तसेरै चेलै फिरी किस्ती थऊँ पार आये, ता अक्क बड़ी भीड़ तैस बलै इकट्ठी भूच्ची गई। सो झीला रै कनारै ही थू। 22ता यहूदी रै सभागार रा अक्क याईर नां रा सरदार आ, अतै तैस जो हेरी करी तसेरै पैरा पुर पैई गो, 23अतै ऐह बली करी तैस सितै बड़ी बिनती करी, “मेरी हल्की कुल्ळी मरना लगुरी हा; तू ईच्ची करी तैहा पुर हत्थ रख कि सो ठीक भूच्ची करी जिन्दी रेय्आ।” 24ता यीशु अतै तसेरै चेलै तैस सोगी चली पैऊ; अतै बड़ी भीड़ तैस पिचो चली पैई, भीड़ ऐतनी थी कि मणु तैस पुर चड़ी चलुरै थियै।

25अक्क जनानी थी, जेहा जो बारह साला थऊँ खून चलनै री बमारी थी। 26तैहै बड़ै बईद्दा थऊँ भी बडा दुख भोगुरा थू, अपणी सब पूंजी खर्च करनै पुर भी कोई लाभ ना भच्छुरा थू, पर सो होर भी ज्यादा बमार भूच्ची गच्छुरी थी। 27सो यीशु री चर्चा हुणी करी कि सो मणु जो ठीक करदा हा ता भिड़ा मन्ज तसेरै पिचो आई अतै तसेरै कपड़ै रै पल्लै जो छुई लैऊ। 28सो अपणै मनां मन्ज सोचदी थी, “अगर अऊँ तसेरै कपड़ै जो भी छुई लैली ता मुँ ठीक भूच्ची गाणा हा।” 29जैहणै तैहै यीशु रा पल्ला छुऊँ ता तैहणै ही तसारा खून चलना बन्द भूच्ची गो। तैहा जो अपणै शरीरा मन्ज पता लगी गो कि अऊँ ठीक भूच्ची गई हा।

30यीशु जो भी महसुस भूआ कि मिन्जो थऊँ सामर्थ निकळी हा, अतै भिड़ा मन्ज पिचो मुड़ीकरी पूच्छु, “मेरै ओड़णा जो कुणी छुऊँ हा?” 31तसेरै चेलै बल्लू, “तिजो हुजु करदा कि भीड़ ता तिजो पुर चड़ी चलुरी हा, अतै तू बलदा कि कुणी मिन्जो छुऊँ?”

32ता यीशुऐ ऐह हेरनै तांयें कि मिन्जो कुणी छुऊआ, चंऊ कनारी अपणी नजर फेरी। 33ता सो जनानी ऐह जाणी करी कि मेरी किनी भलाई भूई हा, ड़रदी अतै कम्मदी कम्मदी आई, अतै तसेरै पैरै पैई करी तैस सोगी सब हाल सच-सच दसी दिता। 34यीशुऐ तैहा सितै बल्लू, “पुत्री तेरै विस्वासै तिजो ठीक करू हा शान्ती सोगी चली गा अतै अपणी ऐसा बमारी थऊँ बची रैह।”#लूका 8:48.

35यीशु ऐह बल्लू ही करदा थू कि यहूदी सभागार रै सरदार याईर रै घरा थऊँ कुछ मणु ईच्ची करी तैस सितै बलणा लगै, “तेरी कुल्ळी ता मरी गई हा, अबै गुरू जो अपणै घरै ईणै रा कष्‍ट मत दे।”

36जैड़ी गल्ल सो करू करदै थियै, तैहा गल्ला जो यीशुऐ हुणी करी यहूदी रै सभागार रै सरदारा सितै बल्लू, “मत डरा सिर्फ विस्वास रखा।”

37अतै तिनी पतरस, याकूब अतै तसेरै भाई यूहन्‍ना जो छड़ी करी होरी कसी जो अपणै सोगी ना ईणा दिता। 38तैस यहूदी सभागार रै सरदारा रै घरै पुजीकरी तिनी मणु जो रून्दै अतै लेरा पान्दै हेरू। 39ता तिनी अन्दर गिचीकरी तियां सोगी बल्लू, “तुहै हल्ला कजो पाऊरा अतै कजो रोऊ करदै हिन? कुल्ळी मरूरी निईआ, पर सोऊँ करदी हा।” 40सो तसेरी गल्ला हुणी करी हासी उड़ाणा लगै,

पर तिनी सबी जो कड्ड़ी दिता अतै कुल्ळी रै माँ-पिता अतै अपणै तियां त्राई चेलै सोगी अन्दर गो, जैड़ी कुल्ळी पैऊरी थी। 41अतै कुल्ळी रा हत्थ पकड़ी करी तैहा सितै बल्लू, “तलीता कूमी!” जठेरा मतलब हा, “हे कुल्ळी, अऊँ तिजो सितै बलदा, उठ!” 42अतै कुल्ळी झट उूठी करी चलना लगी पैई क्ओकि सो बारह साला री थी। ऐसा गल्ला थऊँ सो बड़ै हैरान भूच्ची गै। 43फिरी तिनी तियां जो टणकाई करी हूक्म दिता कि ऐह गल्ल कसिओ पता ना लगा अतै बल्लू, “ऐसा जो कुछ खाणै जो देआ।”

Currently Selected:

मरकुस 5: GBKNT

ማድመቅ

Copy