मरकुस 1

यूहन्‍ना बपतिस्मा दिणैबाळै रा प्रचार

(मत्ती 3:1-12; लूका 3:1-18; यूहन्‍ना 1:19-28)

1ऐह सुसमाचार यीशु मसीह रै बारै मन्ज हा। जैडा प्रमात्मैं रा पुत्र हा। 2ठेरी शुरूआत ईयां भूई। जियां कि यशायाह भविष्‍यवक्ता री कताबा मन्ज लिखुरा हा:

“हेर, अऊँ अपणै दूता तेरै अगो भैजदा,

जैस तिजो तांयें रस्ता सुधारना। #मला. 3:1.

3बियावान मन्ज अक्की मणु री हक्का हुणु करदी हिन कि

अपणै मना जो तैयार करा कि तुहै प्रमात्मैं रा स्वागत करी सकन।”

4ऐह दूत यूहन्‍ना थू। सो बियावान जगह मन्ज मणु जो प्रचार करू करदा थू कि तियां जो बपतिस्मा लैणा जरूरी हा ऐह सावित करनै तांई कि तियैं पापा थऊँ मन फिराऊ हा अतै पापा थऊँ माफी पाणै तांयै सो प्रमात्मैं री कनारी फिरी आये हिन। 5पूरै यहूदिया परदेसा रै, अतै यरूशलेम रै रैहणै बाळै कई मणु तैस बलै आये, अतै अपणै अपणै पापा जो मनी करी यरदन नदी मन्ज यूहन्‍नै थऊँ बपतिस्मा लैऊ।

6यूहन्‍ना ऊँटा री ऊना रै कपड़ै लाऊरै भुन्दै अतै अपणी कमर मन्ज चमड़े रा पटका बनी रखदा थू अतै टिड्ड़ी अतै मखीर खान्दा थू,#2 राजा 1:8; मत्ती 3:4. 7अतै ऐह प्रचार करदा थू, “मेरै बाद जैडा ईणैबाळा हा, सो मिन्जो थऊँ भी शक्तिमान हा; अऊँ ऐस लायक भी निईया कि तसेरै जुटै रै तस्मै खोली सकू। 8मैंई तुसिओ पाणी सोगी बपतिस्मा दिता पर तैस तुसिओ पवित्र आत्मा सोगी बपतिस्मा दिणा।”

यीशु रा बपतिस्मा अतै परीक्षा

(मत्ती 3:13-4:11; लूका 3:21-22; 4:1-13)

9तियां दिना मन्ज यीशुऐ गलील जिलै रै नासरत ग्राँ थऊँ ईच्ची करी, यरदन नदी मन्ज यूहन्‍नै थऊँ बपतिस्मा लैऊ। 10अतै जैहणै यीशु बपतिस्मा लेई करी पाणी थऊँ बाहर आ, ता तिनी स्वर्गा जो खुलदै अतै पवित्र आत्मा जो कबूतरा रै रूपा मन्ज अपणै ऊपर इन्दै हेरू। 11अतै स्वर्गा थऊँ ऐह आवाज आई, “तू मेरा प्यारा पुत्र हा, अऊँ तिजो थऊँ खुश हा।”

12ता पवित्र आत्मा तैसिओ तैहणै ही बियावान री कनारी भैजू। 13बियावान मन्ज चाळी दिन तक शैतानै तसेरी परीक्षा करी, सो बियावान रै जानवरा सोगी रैऊ, अतै स्वर्गदूत तसेरी सेवा करदै रैह।

यीशु री सेवा कम्मा री शुरूआत

(मत्ती 4:12-17; लूका 4:14,15)

14यूहन्‍ना रै पकड़ाणै थऊँ बाद यीशुऐ गलील परदेसा जो चली गो अतै तैड़ी प्रमात्मैं रै राज्य रा सुसमाचार प्रचार करू। 15अतै बल्लू, “टैमं पुरा भूच्ची गो हा; अतै प्रमात्मैं रा राज्य नेड़ै चली आ, ठेरैतांये मन फेरा अतै सुसमाचार पर विस्वास करा।”

मछुआरै जो हैदणा

(मत्ती 4:18-22; लूका 5:1-11)

16गलील री झीला रै कनारै हन्डदै-हन्डदै तिनी शमौन अतै तसेरै भाई अन्द्रियास जो झीला मन्ज जाल पान्दै हेरू; क्ओकि सो मच्छुआरै थियै। 17यीशुऐ तियां जो बल्लू, “मेरै सोगी चली पैय्आ; मुँ तुसिओ मणु जो पकडणा अतै तियां जो प्रमात्मैं पिचो चलनै बाळा बणाणा।” 18सो झट अपणै जाला जो छड़ी करी तैस पिचो चली पै।

19कुछ अगो गिच्ची करी तिनी जबदी रै पुत्रा याकूब अतै यूहन्‍ना जो किस्ती पुर जाळा जो सुधारदै हेरू। 20तिनी झट तियां जो हैदु; अतै सो अपणै पिता जबदी जो मजदूरा सोगी किस्ती पुर छड़ी करी तैस पिचो चली पै।

दुष्‍टात्माग्रस्त मणु जो ठीक करना

(लूका 4:31-37)

21यीशु अतै तसेरै चेलै कफरनहूम ग्राँ जो गै, अतै सो विश्रामदिन यहूदी रै सभागार मन्ज गिच्ची करी उपदेश दिणा लगू। 22अतै मणु तसेरै उपदेशा थऊँ हैरान भुएै; क्ओकि सो शास्त्री साईयें ना पर अधिकारी साईयें उपदेश दिन्दा थू। 23तैस टैमैं तंयारै यहूदी रै सभागार मन्ज अक्क मणु थू, जैस मन्ज दुष्‍टात्मा थी। 24सो दुष्‍टात्मा चिल्लाई करी बलणा लगी, “हे यीशु नासरी, असिओ तिजो सितै कै कम? कै तू असिओ खत्म करना आ? अऊँ तिजो जाणदा हा कि तू कुण हा? तू ता प्रमात्मैं रा पवित्र पुत्र हा!”

25यीशुऐ तैसिओ झिड़की करी बल्लू, “चुप रैह; अतै ऐस मणु थऊँ निकळी गा।” 26ता दुष्‍टात्मा तैसिओ मरोड़ी करी, अतै जोरा सितै चिन्डा मारदी तैस थऊँ निकळी गैई। 27ऐह हेरी करी सबी मणु जो बड़ी हैरानी भूई अतै अप्पू मन्ज गल्ला करना लगै, “ऐह किनी गल्ल हा? ऐह ता कोई नौआ उपदेश हा! ऐह अधिकार अतै सामर्थ सोगी दुष्‍टात्मा जो हूक्म दिन्दा, अतै ऐह दुष्‍टात्मा सेरै हूक्मा जो मन्दी हिन।”

28अतै यीशु रै नां री चर्चा पूरै गलील परदेसा मन्ज फैली गई।

मतै सारै बमारा जो ठीक करना

(मत्ती 8:14-17; लूका 4:38-41)

29सो यहूदी रै सभागार थऊँ नकैई करी याकूब अतै यूहन्‍ना सोगी शमौन अतै अन्द्रियास रै घरै आ। 30शमौन री हहुआ जो बुखार थू, अतै तियैं झट तसारै बारै मन्ज यीशु सितै बल्लू। 31ता तिनी नेड़ै गिच्ची करी तसारा हत्थ पकड़ी करी तैहा जो उठालु; ता तसारा बुखार उतरी गो, अतै सो तसेरी सेवा करना लगी पैई।

32संझा रै टैमैं जैहणै सूरज डूबी गो ता मणु कई बीमारा जो अतै तियां जो जियां मन्ज दुष्‍टात्मा थी, तैस बलै लेई आये। 33अतै पुरा ग्राँ शमौन रै घरा बाहर इकट्ठा भूच्ची गो। 34तिनी मतै जो जैड़ै कई तरह री बीमारी थऊँ दु:खी थियै, ठीक करू, मती सारी दुष्‍टात्मा जो कड्‍डू, अतै दुष्‍टात्मा जो बलणा ना दिता, क्ओकि सो तैसिओ पच्छैन्दी थी।

सुनसान मन्ज प्रार्थना करना

(लूका 4:42-44)

35भ्यागा ही प्रगड़ै मन्ज सो उूठी करी अक्क सुनसान जगह जो गो अतै प्रार्थना करना लगू। 36ता शमौन अतै तसेरै साथी तसेरी तोपा मन्ज गै। 37जैहणै सो मुळु, ता तियैं तैस सोगी बल्लू, “कई मणु तिजो तोपू करदै हिन।”

38यीशुऐ तियां सितै बल्लू, “अईआ; अहै होर कसकि नेड़ै-तेड़ै रै ग्राँ मन्ज गान, कि अऊँ तैड़ी भी प्रचार करी सकू, क्ओकि अऊँ ऐस कमां तांई ही भैजुरा हा।” 39ता सो गलील री कई जगह मन्ज यहूदी रै सभागार मन्ज गिच्ची करी प्रचार करदा अतै दुष्‍टात्मा जो कड़दा रैऊ।

कोढ़ रै रोगी जो ठीक करू

(मत्ती 8:1-4; लूका 5:12-16)

40अक्क कोढ़ी तैस बलै ईच्ची करी घुटनै रै भारै बैही करी तैस सोगी बिनती करना लगा, कि “हे प्रभु अगर तुहै चाहन ता मिन्जो ठीक करी सकदै हिन।”

41यीशुऐ तैस पुर तरस खाई करी हत्था सोगी तैसिओ छुऊँ, अतै बल्लू, “अऊँ चाहन्दा कि तू ठीक भूच्ची गच्छा।” 42अतै तैहणै ही तसेरा कोढ़ ठीक भूच्ची गो। 43यीशुऐ तैसिओ चेतावनी दिकरी झट विदा करू, 44अतै बल्लू, “हेर कसी सोगी कुछ मत बलदा, पर गिचीकरी अपणै याजका जो दस्स। जैडा कुछ मूसा री व्यवस्था मन्ज ठीक भूणै तांयै चढ़ावा दसुरा, तैतिओ गिचीकरी चढ़ा कि समाज पुर तेरी गवाही भोआ कि तू ठीक भूच्ची गो हा।” #लैव्य. 14:1-32.

45पर सो बाहर गिचीकरी ऐसा गल्ला रा बडा प्रचार करना लगा अतै ऐस तरीकै हुणाणा लगा कि यीशु फिरी खुल्लमखुला कसी भी ग्राँ मन्ज ना गिच्ची सकू। सो बाहर बियावान इलाकै मन्ज रैऊ; अतै तैस राज्य रै सब जगह थऊँ मणु तैस बलै इन्दै रैह।

Currently Selected:

मरकुस 1: GBKNT

ማድመቅ

Copy