मत्ती 22

बैहा री धामा रा उदाहरण

(लूका 14:15-24)

1यीशु फिरी तियां सोगी उदाहरण मन्ज कणैणा लगा, 2“स्वर्गा रा राज्य तैस राजै साईयें हा, जिनी अपणै पुत्रा रा बैह करू। 3अतै अपणै नौकरा जो भैजु कि नियून्दुरूरै मणु जो बैह री धामा तांयें हैदी लैईन; पर तिन्यै ईणा ना चाऊ।”

4फिरी तिनी अपणै नौकरा जो ऐह बली करी भैजु कि, “नियून्दुरूरै मणु जो बला, ‘अऊँ धाम तैयार करी बैहुरा, मैंई तूसु तांई खरा खरा मांस अतै सब कुछ तैयार करूआ; बैहा री धामा मन्ज अईआ।’ ”

5पर सो मणु अणहुणा करीके चली गै कोई अपणी बगड़ी जो, कोई अपणै व्यपार जो। 6होर मणु जैड़ै बची गै तिन्यै सो नौकर पकड़ै अतै तंयारी बेईज्ती करी अतै सो मारी दितै 7ता राजा जो गुस्सा आ, अतै तिनी अपणी सेना भैजी करी तियां हत्यारै रा नाश करू, अतै तंयारै नगरा जो फूकी दिता।

8ता राजै अपणै नौकरा सितै बल्लू, “बैहा री धाम ता तैयार हा पर नियून्दुरूरै मणु ता ऐस लायक ना हिन। 9ठेरैतांये सब जगह मन्ज गच्छा अतै जैतणै मणु तुसिओ मुळन, सबी जो बैह तांयें लेई अईआ।” 10ता तिन्यै नौकरै सबी जगह गिच्ची करी कै भलै, कै बुरै, जैतणै भी मुळै, सबिजो कठेरू, अतै बैहा रा घर परौणै सितै भरी गो।

11“जैहणै राजा परौणै जो हेरना अन्दर आ, ता तिनी तैड़ी अक्की मणु जो हेरू, जिनी सो ओढण ना लाऊरै थियै जैड़ै राजै पैहननै जो बलुरा थू। 12राजै तैस थऊँ पूछु, ‘हे मित्रा; तैंई सो ओढण कजो ना लाऊरै जैड़ै मैंई लाणै जो दितुरै थियै?’ तसेरा मुँह बन्द भूच्ची गो। 13ता राजै नौकरा सितै बल्लू, ‘सेरै हत्थ पैर बन्‍नी करी बाहर नैहरै मन्ज फैंकी देय्आ, जैड़ी रूणा अतै दन्द पीणा भूणा।’ 14क्ओकि हैदुरै ता मतै हिन पर चुणुरै थोड़ै हिन।”

कैसर राजा जो कर दिणा

(मरकुस 12:13-17; लूका 20:20-26)

15ता फरीसी अप्पू मन्ज ऐह सोचणा लगै कि ऐसिओ कस तरीकै गल्ला मन्ज फसान। 16ता तिन्यै अपणै चेलै हेरोदेस रै गुट रै मणु सोगी ऐह कणैणै तांयें भैजै कि, “हे गुरू, अहै जाणदै कि तुहै सचै हिन, अतै प्रमात्मैं री बत्ता जो सच्चाई सोगी दसदै हिन 17ठेरैतांये असिओ दस्सा की तुहै कै सोचदै हिन? कैसर जो कर दिणा ठीक हा कि ना?” 18यीशु तंयारै मना री जाणी करी बल्लू, “हे कपटिओ, मिन्जो कजो परखु करदै हिन? 19अक्क दीनार मिन्जो दस्सा।” ता सो तैस वलै अक्क दीनार लेई आये। 20तिनी तियां थऊँ पूछु, “ऐह छाप अतै नां कसेरा हा?” 21तिन्यै तैस सोगी बल्लू, “कैसर रा।” ता यीशुऐ बल्लू, “जैडा कैसर रा हा, सो कैसर जो; अतै जैडा प्रमात्मैं रा हा, सो प्रमात्मैं जो देय्आ।” 22ऐह हुणी करी तियां जो हैरानी भूई, अतै तैसिओ छड़ी करी चली गै।

मरनै थऊँ बाद दोबारा जीणा अतै बैह

(मरकुस 12:18-27; लूका 20:27-40)

23तैस दिन सदूकि जैड़ै बलदै हिन मरूरै रा दोबारा जीणा हा हि ना, तैस वलै आये अतै तैस थऊँ पूछु, 24“हे गुरू, मूसा बलदा थू कि अगर कोई मणु बिना सन्तान मरी गच्छा, ता तसेरा भाई तसेरी घरावाळी सोगी बैह करीके अपणै भाई तांयें वंश पैदा करा। 25अबै असु वलै सत भाई थियै; पैहला बैह करीके मरी गो, अतै औलाद ना भूणै री वजह थऊँ अपणी घरावाळी जो अपणै भाई तांयें छड़ी गो। 26ऐस तरीकै दूये अतै त्रियै भी करू, अतै सत भाई तक ईयांईं ही भूआ। 27सबी थऊँ बाद सो जनानी भी मरी गई। 28ता दोबारा जीणै थऊँ बाद सो तियां सत मन्ज कसेरी घरावाळी भुणीआ? क्ओकि सो ता सबी री घरावाळी रैई चुकुरी थी।” 29यीशुऐ तियां जो जवाव दिता, “तुहै पवित्रग्रन्थ अतै प्रमात्मैं री सामर्थ ना जाणदै; ऐसा वजह थऊँ तुहै भूला मन्ज पैऊरै। 30क्ओकि दोबारा जीणै थऊँ बाद तियां ना ता बैह करनै अतै ना बैहा तांयें सो दिणै हिन पर स्वर्गा मन्ज प्रमात्मैं रै स्वर्गदूता बराबर भूणै। 31पर मरूरै थऊँ दोबारा जीणै रै बारै मन्ज तुहै ऐह बचन ना पढुरा, जैडा प्रमात्मैं तूसु सोगी बलुरा 32‘अऊँ अब्राहम रा प्रमात्मां, अतै इसहाक रा प्रमात्मां, अतै याकूब रा प्रमात्मां हा’? सो मरूरै रा ना पर जिन्दै रा प्रमात्मां हा।”

33ऐह हुणी करी सब मणु तसेरै उपदेशा थऊँ हैरान भुएै।

सबी थऊँ बड़ी आज्ञा

(मरकुस 12:28-34; लूका 10:25-28)

34जैहणै फरीसीये हुणु कि यीशुऐ सदूकि रा मुँह बन्द करी दिता, ता सो किटठी गै। 35ता तियां मन्ज अक्क शास्त्री तैसिओ परखणै तांयें तैस थऊँ पुछणा लगा, 36“हे गुरू, व्यवस्था मन्ज कुण जिन्‍ना हूक्म बड़ा हा?” 37यीशुऐ तैस सोगी बल्लू, “तू प्रमात्मैं अपणै प्रभु सोगी अपणै पूरै मना अतै पूरै प्राणा सोगी अतै अक्ला सोगी प्‍यार कर। 38तसेरा सबी थऊँ बड़ा हूक्म ऐह ही हा। 39अतै अक्क होर भी ऐह हा कि तू अपणै पड़ेही सोगी अप्पू साईयें प्रेम रख। 40ऐह ही दोई हूक्म पूरी व्यवस्था अतै भविष्‍यवक्ता रा आधार हा।”

मसीह कसेरा पुत्र हा?

(मरकुस 12:35-37; लूका 20:41-44)

41जैहणै फरीसी किटठै थियै, ता यीशुऐ तियां थऊँ पूछु, 42“मसीह रै बारै मन्ज तुहै कै सोचदै हिन? सो कसेरा पुत्र हा?” तिन्यै तैस सोगी बल्लू, “दाऊद रा।” 43तिनी तियां थऊँ पूछु, “ता दाऊद आत्मा मन्ज तैसिओ प्रभु कजो बलदा हा? 44‘प्रभुऐ, मेरै प्रभु सोगी बल्लू, मेरै सज्जै कनारी बैह, जैहणै तक कि अऊँ तेरै बैरी जो तेरै अगो झुकाई ना दिच्छु।’ 45भला, जैहणै दाऊद तैसिओ प्रभु बलदा हा, ता सो तसेरा पुत्र किआं भुआ?” 46ऐसा गल्ला रा कोई भी जवाव ना दी सकू। तैस दिन थऊँ बाद फिरी कसी जो तैस थऊँ पुछणै री हिम्मत ना भूई

Currently Selected:

मत्ती 22: GBKNT

ማድመቅ

Copy