मत्ती 16
16
स्वर्गीय नशाणी री मांग
(मरकुस 8:11-13; लूका 12:54-56)
1फरीसी अतै सदूकि तैस बलै ईच्ची करी तैसिओ परखणा लगै तिनी बल्लू, “असिओ स्वर्गा रा कोई चमत्कार दस।”
2यीशुऐ भिड़ा सितै बल्लू, “जैहणै सँझ भुन्दी हा ता तुहै बलदै हिन जे, मौसम खरा रैहणा, क्ओकि अम्बर लाल हा, 3अतै भ्यागा, अज तूफान ईणा, क्ओकि अम्बर लाल अतै ड़रावना हा। तुहै अम्बरा रै वदलाव जो पछैन्दै हिन, पर टैमां रै चिन्ह जो ना पछैन्दै? 4दुष्ट अतै विस्वास ना करनै बाळै मणु चमत्कार हेरना चाहन्दै हिन, पर योना रै चमत्कार जो छड़ी होर कोई चमत्कार ना दसणा हा।”
फिरी सो तियां जो छड़ी करी चली गो।
फरीसी अतै सदूकि री शिक्षा रा खमीर
(मरकुस 8:14-21)
5अतै चेलै पार गान्दै टैमैं रोटी लैणा भुली गै थियै। 6यीशुऐ तियां सितै बल्लू, हेरा; “फरीसी अतै सदूकि रै खमीरा थऊँ चौकनै रेय्आ।”
“ठेरा अर्थ ऐह हा कि तुहै तंयारी गलत शिक्षा थऊँ बची करी रेय्आ।” 7सो अप्पू मन्ज कणैणा लगै कि, “ऐह ठेरै तांयें बल्लू करदा कि अहै रोटी ना अन्दी।”
8पर यीशुऐ ऐह जाणी करी बल्लू, “हे विस्वासा मन्ज कमजोर मणुओ, तुहै कजो अप्पू मन्ज ऐह विचार करू करदै हिन कि असु बलै रोटी निय्आ? 9कै तुहै हालि तिकर ना समझै कि याद निय्आ कि जैहणै पँज हजार मणु तांयें पँज रोटी थी ता तुहै कतूणैं टोकरै चुकै थियै? 10अतै चंऊर हजार मणु तांयें सत रोटी थी ता तुहै कैतनी टोकरी चुकी? 11तुहै कजो ना समझदै कि मैंई तूसु सितै रोटी रै बारै मन्ज ना बल्लू थू पर ऐह कि तुहै फरीसी अतै सदूकि रै खमीरा थऊँ चौकनै रेय्आ?”
12ता तंयारी समझा मन्ज आ कि तिनी रोटी रै खमीरा रै बारै मन्ज ना पर फरीसी अतै सदूकि री शिक्षा थऊँ चौकनै रैहणै जो बलुरा थू।
पतरसा रा यीशु जो मसीह स्वीकार करना
(मरकुस 8:27-30; लूका 9:18-21)
13जैहणै यीशु कैसरिया फिलिप्पी रै शहरा मन्ज आ ता चेलै थऊँ पुछणा लगा; “मणु रा पुत्र कुण हा? मणु कै बलदै हिन?”
14तिन्यै बल्लू, “कुछ बलदै हिन कि यूहन्ना बपतिस्मा दिणैबाळै, कुछ एलिय्याह कुछ यिर्मयाह अतै कुछ बलदै हिन भविष्यवक्ता थऊँ कोई अक्क हा।”
15तिनी तियां सितै बल्लू, “पर तुहै कै बलदै हिन? अऊँ कुण हा?” 16शमौन पतरस बलणा लगा, “तुहै जिन्दै प्रमात्मैं रा पुत्र मसीह हिन।”
17यीशुऐ तैस सोगी बल्लू, “हे शमौन, योना रै पुत्र, तू धन्य हा, क्ओकि मांस अतै खूने ऐह तिजो ना दसु, पर मेरै पितै जैडा स्वर्गा मन्ज हा तसेरै कारण ऐह गल्ल तिजो पुर प्रकट भूई। 18अऊँ तिजो सितै ऐह भी बलदा हा कि तू पतरस#16:18 पतरस रा यूनानी भाषा मन्ज मतलब हा चट्टान हा अतै ऐसा ही चट्टाना पुर मुँ अपणी कलीसिया बणाणिआ, अतै मौत री शक्ति भी तिजो पुर हाबी ना भूणी। 19मुँ तिजो स्वर्गा रै राज्य री कुंजी दिणी, अतै जैडा कुछ तुद धरती पुर बनणा सो स्वर्गा मन्ज बनिणा, अतै जे कुछ तुद धरती पुर खोलणा सो स्वर्गा मन्ज खुलणा।”
20ता तिनी चेलै जो चेतावनी दिती कि सो कसी सोगी ना बलन कि अऊँ मसीह हा।
अपणी मौती रै बारै मन्ज यीशु री भविष्यवाणी
(मरकुस 8:31-33; लूका 9:22)
21तैस टैमां थऊँ यीशु मसीह अपणै चेलै जो दसणा लगा कि “जरूरी हा कि अऊँ यरूशलेम जो गच्छू अतै स्याणै, प्रधान याजका अतै शास्त्री थऊँ मता दुख साऊं अतै मारया गच्छू अतै त्रियै दिन जी भूच्छुं।”
22ऐह हुणी करी पतरस तैसिओ अलग लेई गो अतै ऐह बली करी झिड़कणा लगु “हे प्रभु, प्रमात्मां ऐसा ना करा! तूसु पुर कदी ऐसा ना भोआ!”
23यीशुऐ पतरस सोगी बल्लू, “हे पतरस शैतान जियां चाहन्दा तियां मिन्जो सोगी मत बल्ल अतै प्रमात्मैं री योजना मन्ज रूकावट मत बण। तू प्रमात्मैं री गल्ला पुर ना, पर मणु री गल्ला पुर मन लगांदा हा।”
यीशु पिचो चलनै रा मतलब
(मरकुस 8:34; 9:1; लूका 9:23-27)
24ता यीशुऐ अपणै चेलै सोगी बल्लू, “अगर कोई मेरै पिचो ईणा चाह ता अपणै आपा रा इन्कार करा अतै अपणा क्रूस चुकी करी मेरै पिचो चला। 25क्ओकि जैडा कोई अपणा प्राण बचाणा चाह तैस सो खोई दिणै, पर जैस कसी मेरै तांयें अपणै प्राण दिणै, तैस सो पाणै। 26अगर मणु सब कुछ जैडा तसेरी इच्छा हा पाई लेय्आ अतै अपणै प्राणा जो खोई देय्आ ता तठेरा कै फायदा? अतै मणु अपणै प्राणा रै बदलै कै दिणा? 27क्ओकि मणु रा पुत्र अपणै स्वर्गदूता सोगी पिता री महिमा करदा ईणैबाळा हा। ता तैस सबी मणु जो तसेरै कम्मा रै अनुसार प्रतिफल दिणा। 28अऊँ तूसु सोगी सच बलदा कि ऐड़ी खडुरै मन्ज कुछ, जैहणै तक मणु रै पुत्रा जो तसेरै राज्य मन्ज इन्दा ना हेरी लैन, तैहणै तक तियां ना मरना।”
Currently Selected:
मत्ती 16: GBKNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
This work is licensed under Creative Commons Attribution-ShareAlike 4.0 License.