लूका 5

यीशु रै पैहलै चेलै

(मत्ती 4:18-22; मरकुस 1:16-20)

1यीशु जैहणै गलील झीला रै कण्ड़ै खडूरा थू, ता मणु री बड़ी भारी भीड़ तसेरै चौं कनारी खडी करी प्रमात्मैं रा बचन हुणना लगुरी थी, ता ऐसा भुआ कि, 2यीशु री नजर तैहा झीला रै कण्ड़ै खडूरी दूँ किस्ती पुर पैई जिंआं थऊँ मच्‍छवारै ओसी करी अपणै जाला धोऊ करदै थियै। 3ता यीशु अक्की किस्ती पुर चड़ी गो, जैड़ी कि शमौन नां रै अक्की मणु री थी, तैसिओ बलणा लगू, “किस्ती जो कण्ड़ै थऊँ थोड़ा जिन्‍ना अगो लेई चल।” ता सो तैहा किस्ती पुर चड़ी करी तियां मणु जो बचन हुणाणा लगू। 4जैहणै सो भिड़ा जो बचन हुणाई बैहु ता तिनी शमौना जो बल्लू “किस्ती जो डूगी आळी री कनारी लेई चल अतै मच्छी पकड़णै जो जाल फैंक।”

5ता शमौने तैसिओ जवाव दिता, “हे मेरै गुरू अहै पूरी रात मेहनत करदै रै पर कख भी पल्लै ना पेयू, पर चलो जे तुहै बलदै ता अऊँ जाल फैंकदा”

6जैहणै तिन्यै अपणै जाल फैंकै ता मती भारी मच्छी तंयारै जाला मन्ज फसी आई अतै तंयारै जाल छकी चलै। 7ता ऐह हेरी करी तियैं अपणै संगी-साथिओ जेङै होरी किस्ती पुर थियै सिनका लाई के हैदणा लगै कि इन्दी मदद करा। फिरी तंयारी दोनों किस्ती मच्छी सितै ऐतनी भरी गई कि ईयां लगा कि अबै डूबी गाणी।

8ऐह हेरी करी शमौन जैसेरा नां पतरस भी थू, यीशु रै पैरै पैऊ अतै बलणा लगू, “हे गुरू तुहै ऐठी थऊँ चली गच्छा क्ओकि अऊँ अक्क पापी मणु हा।” 9तिनी इन्या ठेरै तांयें बल्लू क्ओकि तैसिओ अतै तसेरै साथिओ ऐतनी भारी मच्छी पकडी के बड़ी हैरानगी भूई। 10जबदी रै पुत्रा याकूब अतै यूहन्‍ना जो जैड़ै तसेरै सोगी थियै ऐह हेरी करी हैरानगी भूई। तैहणै यीशु शमौना सितै बलणा लगू, “डर मत, हुण, मेरै पिचो चली अईआ, मुँ तुसिओ मणु जो पकडणा अतै तियां जो प्रमात्मैं पिचो चलनै बाळा बणाणा।”

11ऐह सब हुणी करी तियैं किस्ती कनारै पुर लेई अन्दी अतै सब कुछ छड़ी करी यीशु पिचो चली पै।

कोढ़ी जो ठीक करना

(मत्ती 8:1-4; मरकुस 1:40-45)

12फिरी अक्की नगरा मन्ज यीशु री मुलाकात अक्की कोढ़ी सोगी भूई, जैसिओ बडा भारी कोढ़ थू, सो यीशु अगो घुटनै रै भारै बही करी तैस सोगी प्रार्थना करना लगू, “हे प्रभु, अगर तुहै चाहन ता मिन्जो ठीक करी सकदै।” 13यीशुऐ तसेरै नेड़ै ईच्ची करी तैसिओ छुऊँ, अतै बल्लू अऊँ चाहन्दा कि तू ठीक भूच्ची गच्छा ता सो तैहणै ही कोढ़ थऊँ ठीक भूच्ची गो। 14तैत थऊँ बाद यीशुऐ तैसिओ बल्लू, “जैड़ा कुछ तिजो सोगी भुआ तैतिओ कसिओ मत दसदा। सिधा अपणै याजका जो गिच्ची करी दस अतै जैड़ा ठीक भूणै पुर मूसा री व्यवस्था अनुसार चढ़ावा हा तैतिओ चढ़ा, कि तियां जो तेरै ठीक भूणै रा पता लगा।”#लैव्य. 14:2-32. 15पर यीशु रै कम्मा री चर्चा फैलदी गई, फिरी भिड़ा री भीड़ बीमारी थऊँ ठीक भूणै अतै तसेरी गल्ला हुणना तैस बलै ईणा लगी। 16पर यीशु तियां थऊँ दूर गिच्ची करी बणा मन्ज प्रार्थना करदा थू।

अधरंगी जो ठीक करना

(मत्ती 9:1-8; मरकुस 2:1-12)

17अक्क दिन ईयां भूआ कि यीशु मणु जो बचन हुणाणा लगुरा थू, ता तैठी फरीसी धर्मगुरू, अतै शास्त्री भी बैहुरै थियै। सो गलील अतै यहूदिया रै हर शहरा, ग्राँ अतै यरूशलेम थऊँ छुरै थियै। अतै बीमारा जो ठीक करनै री सामर्थ यीशु मन्ज थी। 18ता तैठी कुछ मणु अक्की अधरंगी जो मन्जै पुर चुक्की करी लेई आये, सो तैसिओ यीशु वलै अन्दरा जो निणै रा पा तोपणा लगै। 19पर तैठी भीड़ ऐतनी थी कि अन्दर “तिल फैंकणै री जगह” भी ना थी ता सो मणु तैस छपरा जो चड़ी गै अतै छपरा रै हैळा जो घेरना लगै; अतै जैहणै तियैं हैळ घेरी दितै ता सो मणु खाट समेत रस्सी पाई करी यीशु बलै थलै पुजाई दिता।

20यीशुऐ तंयारा विस्वास हेरी करी बल्लू, “हे पुत्र मैंई तेरै पाप माफ करी दितै।” 21ता ऐह हेरी करी फरीसी धर्मगुरू अतै शास्त्री अप्पू मन्ज कणैणा लगै कि, “ऐह कुण हा? जैडा प्रमात्मैं री बुराई करू करदा! प्रमात्मैं जो छड़ी होर कुण हा जैडा पापा जो माफ करी सकदा।”

22यीशुऐ तंयारै मनां री जाणी लेई अतै तियां जो जवाव दिता, “तुहै अपणै मना मन्ज ऐह कजो सोचु करदै हिन? 23कै तुहै ऐह ना जाणदै कि ठीक करनै थऊँ पापा जो माफ करना आसान हा क्ओकि तैतिओ हेरी ना सकदै। पर चंगाई रै कम्मा जो हेरी सकदै हिन कि सो ठीक भूआ कि ना? 24पर ऐह ठेरैतांये हा कि तुसिओ पता लगी गच्छा कि मणु रै पुत्रा जो पापा माफ करनै रा अधिकार हा।” तिनी तैस अधरंगी जो वलु, “अऊँ तिजो बलदा उठ अपणी खाट चुक अतै अपणै घरा जो चली गा” 25सो झट ऊठु अतै तंयारै हेरदै-हेरदै जैस मन्जै पुर सो पेऊरा थू तैसिओ चुआई करी प्रमात्मैं रा गुणगान करदा अपणै घरा जो चली गो। 26ऐह हेरी करी तैठी सब हैरान भूच्ची करी प्रमात्मैं रा गुणगान करना लगै अतै बडै डरा सोगी बलणा लगै कि अज अहै बडा चमत्कार हेरू हा

लेवी नां रै मणु जो चेला बणाणा

(मत्ती 9:9-13; मरकुस 2:13-17)

27ऐत थऊँ वाद यीशु नगरा थऊँ बाहर चली गो ता तैठी अक्क चुंगी लैणै री चौकी थी, ता तैठी यीशुऐ अक्क लेवी नां रै चुंगी लैणैबाळै मणु जो चौकी पुर बैहुरै हेरू। यीशुऐ तैस सोगी वलु, आई मेरा चेला वणी गा। 28ता सो लेवी अपणा सब कुछ छड़ी करी यीशु पिचो चली पैऊँ।

29सो लेवी अपणै घरै अक्क वडी धाम लान्दा अतै तैड़ी चुंगी लैणैबाळै अतै होर भी खासी भीड़ मेहमाना री भुन्दी हा। 30पर शास्त्री जैड़ै फरीसी थियै, यीशु रै चेलै सोगी बुडबुड़ान्दै कि, “तुहै वेईमानी सितै चुंगी लैणैबाळै अतै पापी सोगी कजो खाऊ करदै हिन?”

31ता यीशुऐ तियां जो जवाव दिता, बैईद भलै-चंगै तांयें ना, पर बीमारा तांयें जरूरी भुन्दै। 32अऊँ धर्मी जो ना, पर पापी जो बचाणै तांयें छूरा हा।

ब्रता रै बारै मन्ज सवाल?

(मत्ती 9:14-17; मरकुस 2:18-22)

33ता तैठी जैड़ै धार्मिक नेता थियै तिन्यै यीशु सोगी शिकायत करी कि, “यूहन्‍ना रै चेलै ता व्रत रखदै, प्रार्थना करदै अतै तियां ही फरीसी रै चेलै भी करदै। पर तेरै चेलै ता हमेशा कजो खान्दै-पिन्दै रैहन्दै”?

34यीशुऐ तियां सितै वलु, “जैहणै तक दूल्हा बराती सोगी हा, ता तुहै बराती थऊँ कियां व्रत करवाई सकदै? 35पर सो धैङै ईणै, जैहणै दूल्हा तियां थऊँ अलग करना ता तियां धैङै मन्ज तियां व्रत करनै।”

36यीशुऐ अक्क होर गल्ल हुणाई करी वलु, “कोई भी मणु नोए कपड़ै छकी करी टल्ली पूराणै कपड़ै मन्ज ना लान्दा, क्ओकि नोए छकी गाणा अतै पुराणी टल्ली सितै तैस मेल ना खाणा। 37कोई भी मणु नौआ दाखरस पुराणी खलड़ी मन्ज ना भरदा, क्ओकि नौआ दाखरस तियां खलड़ी जो फाड़ी करी नकैई गाणा, जैत थऊँ खलड़ी भी खराब भूच्ची गाणी। 38नौआ दाखरस नोई खलड़ी मन्ज ही भरना चहिन्दा। 39जैड़ा कोई भी पुराणा दाखरस पिन्दा सो नौआ दाखरस ना पीणा चाहन्दा। सो बलदै पुराणा ही खरा हा।”

Currently Selected:

लूका 5: GBKNT

ማድመቅ

Copy