Kîam Kîmenyithania
Kîmenyithania
Riîtwa Kîambîrîria nî kuuga “Kaumo.”
Yuku rîrî rîtagwa Kîambîrîria nîûntû nîrîo rîeejanîte rûgono rwa kûûmbwa kwa nthî na îgûrû, na kaumo ka muntû, na kîambîrîria kîa meeyia na kîa mîthangîko ya ûtûûro bwa nthîgûrû. Ningî yukuune rîrî nî kwîrani ûrîa Mûrungu aambîrîîrie gûkarania na muntû. Yuku rîrî rîa Kîambîrîria rîomba kûgaanua ichunchî biîrî:
1. Gîchunchî kîa mbere nî kuuma gîcigo kîa mbere mwanka gîcigo gîa îkûmi na kîmwe (1-11). Ndeene ya gîchunchî kîu nîku kwîrani rûgono rwa kûûmbwa kwa nthîgûrû, na rûgono rwa ûrîa antû baambîrîîrie gûtûûra nthîgûrûûne. Nîkû kûrî na rûgono rwa Adamu na Hawa na rwa Kaini na Abeli na rwa Noa na ngai ya maburiko na rwa Mûnaara jwa Babeli.
2. Gîchunchî kîa biîrî nî kuuma gîcigo kîa îkûmi na biîrî mwanka gîchigo kîa mîrongo îtaano (12—50). Ndeene ya gîchunchî kîu nîku kwîrani ngono cia antû barîa baambîrîîrie mûgongo jwa Israeli. Wa mbere kîrî antû bau nî Abrahamu, ûrîa waijîkeene nîûntû bwa wîtîkio bwaawe na nîûntû bwa kwathîkîra Mûrungu. Ningî kûrî na ngono cia Isaaka, na Jakubu (kana Israeli), na ataana ba Jakubu îkûmi na baîrî barîa baambîrîîrie mîîrîga îkûmi na îîrî ya Israeli. Ningî rûgono rwa ûmwe wa ataana bau tawe Josefu, nî rweejani na njîra ya mwanya, o amwe na mantû jarîa jaatûmîre Jakubu na ataana bau bangî baawe, amwe na antû ba mîciî yaao, beeta Misri gûtûûra ku.
Kinya këethîra yuku rîrî nî rîeejanîte ngono ciegiî antû, ûntû bûrîa bûnene nkûrûki ya jangî ku nî kûmenyithania mantû jarîa Mûrungu athithîtie. Rîambîrîtie na gûkûûjîîra ûrîa Mûrungu oombîre nthî na îgûrû, rîathiria na ûrîa Mûrungu augîîte atî ageeta na mbere kûmenyeera antû baawe. Kuuma kîambîrîîria kîa yuku rîrî mwanka mûthia jwaarîo, Mûrungu nîwe waarîîrîtue mono. Mûrungu ûrîa ûtuujanagîra, na ûrîa ûkanûkagia eeyia, na ûrîa ûtongagîîria antû baawe na akabateethia, na ûrîa werekanagia ûtûûro bwaao. Yuku rîrî rîaandîkîrwe nîûntû bwa gûtûûria rûgono rwa wîtîkio bwa antû ba Mûrungu ba karaaja, na gûtûma wîtîkio bûu bûtûûra.
Mantû jarîa jarî ku
Kûûmbwa kwa îgûrû na nthî na kûûmbwa kwa muntû 1.1—2.25
Ûrîa meeyia na mîthangîko biaambîrîîrie 3.1-24
Kuuma îgiita rîa Adamu mwanka rîa Noa 4.1—5.32
Noa na ngai ya maburiko 6.1—10.32
Mûnaara jwa Babeli 11.1-9
Kuuma îgiita rîa Shemu mwanka rîa Abramu 11.10-32
Antû barîa baambîrîîrie rûrîîjo rwa wîtîkio: Abrahamu, na Isaaka na Jakubu 12.1—35.29
Nchiarwa cia Esaû 36.1-43
Josefu na ataana ba ng’ina 37.1—45.28
Aisraeli barî Misri 46.1-50
Currently Selected:
Kîam Kîmenyithania: KIMERUBIBLE
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
KIMERU BIBLE WITH DC
©Bible Society of Kenya, 2009, 218