Luke 10
10
Yezu udi utuma balongi bende makumi muanda mutekete ne babidi ku mudimu
1Ke Mfumu kusungula balongi bakuabu makumi muanda mutekete ne babidi.#10.1 makumi muanda mutekete ne babidi: mu mikanda mikuabu mbafunde amu ne: makumi muanda mutekete. Uvua ubatuma babidi babidi, bua badianjile kumpala kuende mu bimenga bionsu, ne miaba mikuabu yonsu, bivuaye ne bua kuya. 2Kubambilaye ne:
— Bintu bia kunowa mbivule, kadi banowi mbakese. Nanku lombayi mfumu wa madimi, bua atume banowi bakumbane mu budimi buende. 3Nuye! Ndi nnutuma bu bana ba mikoku munkatshi mua nkashama. 4Kanuangatshi tshibuta tshia makuta, nansha tshia luendu, nansha bisabata. Kanuimanyi mu njila bua kuela muntu muoyi. 5Panudi nubuela mu nzubu, nudianze kuamba ne: “Bupole buikale mu nzubu emu!” 6Pikala muntu wa bupole usombamu, bupole buenu nebushale kudiye. Kadi pikala muntu wa bupole kayimu, bupole buenu nebupingane kunudi. 7Nushale mu nzubu awu, nudie, nunue bianupeshabu. Bualu muena mudimu badi ne bua kumufuta.#10.7 Fuanyikija ne Mat 10.10; 1 Kor 9.14; 1 Tim 5.18. Kanusambi nzubu. 8Panuabuela mu tshimenga, banuakidila, nudiemu bidibu banupa. 9Nujikijile babeedi badimu masama abu. Nubambile ne: “Bukalenga bua Mvidi Mukulu bukadi pabuipi nenu.” 10Kadi nuenu babuele mu tshimenga, bantu babenga kunuakidila, nuendakane mu misesu yatshi, nuambe ne: 11“Tudi tunutuila lupuishi lua mu tshimenga tshienu luvua lubakuate ku makasa.#10.11 Tangila 9.5; Mar 6.11 nediumvuija. Kadi numanye amu ne: Bukalenga bua Mvidi Mukulu bukadi bumane kusemena pabuipi nenu.” 12Ndi nnujadikila ne: dituku didi Mvidi Mukulu ukosa nsambu, kakunyoka bena Sodome,#10.12 Tangila Tshib 19.24-28. mudiye ne bua kunyoka bena tshimenga atshi nansha.
Bimenga bidi bibenga kuitaba Yezu
(Mat 11.20-24)
13Wewe Korazine, udi muena diakabi! Wewe Betsayida, udi muena diakabi! Bualu malu a dikema adibu banuenzela nuenu, bu bobu bawenzele bena Tire ne bena Sidone, bena bimenga ebi bavua mua kusomba panshi musangu umue, kuvuala bilamba bikayapale, kudilaba butu mu mutu, bua kuleja ne: tudi basue kudilengeja.#10.13 Bua kanungu aka kajima, tangila kabidi Mat 11.21 ne diumvuija. 14Dituku didi Mvidi Mukulu ukosa nsambu, kakunyoka Tire ne Sidone bikole, mudiye ne bua kununyoka nuenu nansha. 15Wewe Kefamawume, udi wela meji ne: neubande mu diulu anyi? Nansha kakese! Nebakuele mu kandondu ka bafue.#10.15 Yesh 14.13-15.
16Ke Yezu kuambila kabidi balongi bende ne:
— Muntu udi unuteleja, udi unteleja meme. Muntu udi unubenga, udi umbenga meme. Kadi muntu udi umbenga, udi ubenga ne Tatu uvua muntume.
Balongi makumi muanda mutekete ne babidi badi bapingana
17Balongi makumi muanda mutekete ne babidi#10.17 makumu muanda mutekete ne babidi: mu mikanda mikuabu mbafunde amu ne: makumi muanda mutekete (tangila kan. 1). kupingana kudi Yezu ne disanka divule, bamba ne:
— Mfumu, nansha mikishi mibi mene ivua itumikila diyi dietu, patuvua tuyitumina diyi mu dina diebe!
18Yezu kubandamuna ne:
— Mvua mumone diabolu ukuluka mu diulu bu muele wa mvula. 19Telejayi: mvua munupeshe bumfumu bua nudiate nyoka ne tuminyimynyi,#10.19 Padi kaminyiminyi kasuma muntu, muntu awu udi mua kusama bikole, pamue apa udi mua kufua. ne bua nutshimune bukole buonsu bua muluishi. Kakuena tshintu tshianuenzela bibi. 20Kadi kanusanki nangananga bualu mikishi mibi idi inutumikila. Nusanke amu, bualu mbamane kufunda mena enu mu diulu.
Disanka dia Yezu
(Mat 11.25-27; 13.16-17)
21Diba adi Yezu kuwula ne disanka dia kudi Mueyelu wa Tshijila,#10.21 dia kudi Mueyelu wa Tshijila: mu mikanda mikuabu ya kale, mbafunde amu ne: dia kudi Mueyelu; mu mikuabu: mu lungenyi luende. kuamba ne:
— Tatu, Mfumu wa diulu ne buloba, ndi nkuela tuasakidila, bualu udi mumanyishe bantu bashadile malu, audi musokoke bena meji, ne bantu bavua balonge mikanda. Eyowa, Tatu, ke muuvua musue ne: bienzeke nanku!
22“Tatu wanyi mmumpeshe bintu bionsu. Kakuena muntu udi mumanye Muana, anu Tatu nkayende. Kakuena muntu udi mumanye Tatu, anu Muana nkayende, kabidi ne bantu badi Muana musue kumanyisha Tatuende.”
23Ke Yezu kutangila balongi bende, ubambila bobu nkayabu ne:
— Nuenu nudi bena diakalenga, bualu nudi badimuene malu onsu aa. 24Bualu ndi nnujadikila ne: Bambi ba bungi ne bakalenga ba matunga bavua bajinga kumona binudi numona, kadi kabavua babimone nansha. Bavua bajinga kabidi kumvua binudi numvua, kadi kabavua babiumvue nansha.#10.24 Fuanyikija ne 1 Pet 1.10-12.
Lusumuinu lua muena Samariya wa muoyi muimpe
25Ke mulongeshi wa mikenji kufika kudi Yezu, kumuela lukonku bua kumuteya, wamba ne:
— Mulongeshi, bua kupeta muoyi wa kashidi, ngenze tshinyi?
26Yezu kumuela kabidi lukonku ne:
— Mu mikenji yetu mbafunde tshinyi? Tshiudi ubalamu ntshinyi?
27Muntu awu kumuandamuna ne:
— “Nanga Maweja-Nangila Mvidi Mukulu webe muebe muonsu, ne muoyi webe mujima, ne bukole buebe buonsu, kabidi ne lungenyi luebe luonsu. Nanga kabidi mukuebe muudi mudinange wewe mene.#10.27 Diel 6.5; Lev 19.18.”
28Ke Yezu kumuambila ne:
— Udi muandamune bimpe. Enza nanku, newikale ne muoyi.#10.28 Fuanyikija ne Lev 18.5.
29Kadi mulongeshi wa mikenji uvua musue kuleja Yezu ne: lukonku luanyi luvua pa bualu. Ke kuebejaye Yezu ne:
— Mukuetu nnganyi?
30Ke Yezu kumuelela lusumuinu elu ne:
— Kuvua muntu ufuma ku Yerushalayime, upueka ku Yeriko. Bivi kumuluisha, kumuvula bilamba bua kuiba bivuaye nabi, kumutuuta, kumushiya panshi mufue tshipuka. 31Kuvua mutuangaji upueka mu mpukapuka ne njila awu. Kumonaye muntu awu, kusesukaye, kuya. 32Muena Levi momumue kufika muaba awu, kusemena pabuipi. Umona amu muntu awu, kusesukaye, kuya. 33Kadi muena Samariya kampanda uvua upitshila mu njila awu. Kufikaye muaba uvua muntu awu. Umumona, luse kumukuata bikole. 34Kuyaye kudiye. Kuelaye mafuta ne nwinyo mu mputa yende,#10.34 mafuta ne nwinyo: ke manga avua bantu bangata mu tshikondu atshi: bua kutuyisha disama (ne mafuta), ne bua kusukula mputa (ne nwinyo). Fuanyikija ne Yesh 1.6. kusuika. Pashishekumutekaye pa nyama wende, kumufila ku nzubu wa tshilala benyi, bua bamulamemu mu dina diende. 35Butshia kupeshaye muena nzubu wa tshilala benyi nkanu ibidi ya tshiamu tshitoke tshia mushinga mukole, umuambila ne: “Ukube muntu ewu bimpe, bamuondape. Makuta onsu awikala mutule mapite pa mutu, meme nenkupingajilewu pangapingena apa.”
36Ke Yezu kumukonka ne:
— Udi wamba bishi? Ku basatu aba muntu uvua muleje mudiye mukuende wa uvuabu baluisha kudi bivi aba nnganyi?
37Mulongeshi wa mikenji kuandamuna Yezu ne:
— Anu muntu uvua mumuambuluishe awu.
Ke Yezu kumuambila ne:
— Uye, wenze amu nanku.
Yezu mu nzubu mua Marte ne Mariya
38Yezu ne balongi bende kutungunuka ne luendu. Ke Yezu kubuela mu musoku kampanda. Mukaji, dina diende Marte, kumuakidila kuende. 39Mukaji awu uvua ne muanabu, diende Mariya. Ke Mariya kuya kusomba ku makasa a Mfumu, uteleja bivuaye ulongesha.#10.39 Marte ne Mariya: tangila Yow 11.1; 12.1-3. 40Marte uvua usumpakana amu ne midimu ya bungi ya ku nzubu. Kuyaye kudi Yezu, umuambila ne:
— Mfumu, padi muanetu wa bakaji undekela midimu yonsu nkayanyi, kabiena bikutonda anyi? Umuambile bua angambuluishe!
41Mfumu kumuandamuna ne:
— Marte, Marte, udi ulubakana, utata bua malu a bungi. 42Kadi kudi bualu bumuepele bunudi nukengela. Mariya mmusungule tshidi tshipite buimpe, tshidibu kabayi mua kumunyenga.
Bible avec Livres Deutérocanoniques en Tshiluba © Société Biblique de la R. D. Congo, 1996
