YOHANES 4
4
He Samaria mene Yesus emberek wene ane isukwa wene
1A'nogo hilingiti lagaukwama, it afuni nen he, mel isukwa: ”It afuni inebe endebat hak Yohanes agoromi asuogeluk awe a'ma wagunem ima pelaginabi'logo meneat he, it ekhe inebe hokhorogoat Yesus agoromi asuogeluk awe a'ma wagunem ima pelaginabi'logo,” iluk ugunem, at Yesus nen he, ”Wene andi, it ap Farisi mene inesanggo holha higi,” iluk elu agaikhe. 2A'nogo isukwa andi re, at Yesus ebe nen he, ima pelaginafi lagaikhe lek. We, at agoromi ane wanhi lagaukwa mene omanogo nen ima pelaginafi lagaukwa meneat isukwa. 3A'nogo ugunem, ”Inesanggo holha o,” iluk, Yesus elu agaikhesik he, at o Yudea herakfisaluk o Galilea ambotkwe lagai wesigeluk lagai wagaikhe.
4A'nogo lagai waga logolik kwe hunogo kwe lek. We, o Samaria kweat lagi wesu higit agaikhemo lagai wagaikhe. 5Lagai waga logolik, o Samaria o sili ekhe enu Sikhar horokhogo kuogeluk kweang ekhe ap Yakub en attagat amlogo Yusuf wogetikheba andoma lagai wagaikhe.#Kej. 33:19; Yos. 24:32 6O lingge tulem jam 12 oba lagai wagaikhesik, at Yesus kwe nen warek andi nen he, i ap Yakub agai mogwe habuli'mo hinati lagaukwaba andi hu'lagaikhesik welagaikhe. 7-8At andoma hurek werek kwelek, agoromi ane wanhi lagaukwa mene omanogo sumburu onggo paluogeluk o sili hokhoma andoma kwisukwama, at he Samaria mene ekhe i hinasigeluk wulibi wagaikhe. Wulibi wagaikhemo, Yesus nen he, mel yagatikhe: ”Nerei e. An i ekhe hinagaisogo wo'nom o,” iluk kino yagatikhemo, 9It afuni Yahudi mene o Samaria mene inom weak welagaukwa andi nen he, at he Samaria mene a'nogo nen at Yesus mel yagatikhe: ”Hat ap Yahudi mene. Nen, an he Samaria meneat he, nenahalok, i hina'nom, iluk kino yaganeten,” iluk yagatikhemo,#Ezr. 4:1-5; Neh. 4:1-2 10at Yesus nen he, mel yagatikhe: ”Allah obabut fano nen weat onggo lek wogisasikherek mene andi inom, nen an nen, i ekhe hinagaisogo wo'nom iluk kino yagaheti andi, nebe inom, futnobagailenma re, haren i ekhe kino yaganetunem, an nen i inelugerinaferek mene eberogoat wokhe'le o,” iluk yagatikhe. 11A'nogo yagatikhemo re, at he a'nogo nen he mel yagatikhe: ”Noe. Hat hagaiwak lek. Nen, i yi walek ma'limaat hilingi'mo. Haren i inelugerinaferek mene andi, koma mene hinagaisogo wo'nesigilugen egen. 12I yi nit ninomba kain Yakub en habulhikhesik, at ebe inom, againafuri inom, anggo inom, ninggi lagaukwasigen, nit hobuk ninggi logouwageluk wo'nisasikhe mene andi, hat hendawimo nen he, At ebe elo'lek hak. Nen, an enek he, nebe kain, anggegendigen egen a? iluk yagatikhe. 13A'nogo yagatikhemo, at Yesus nen he, mel yagatikhe: ”It afuni yi mene nogoin halok he, hobuk i nele asigin meneat he, 14i An nen wogisamo nunggu halok he, it inendawimo nen i elesi hangge fuluk-fuluk palogo wulifu mondok logogin andi nen he, ineluk mondok logolik, it hobuk i nele aga logogun mondok lego,” iluk yagatikhe. 15A'nogo yagatikhemo, at he a'nogo nen he, mel yagatikhe: ”Noe. An i nele nen i yi hinasi wagi'lek logoigen he, i haren egen andi wo'nom o,” iluk kino yagatikhe.
16A'nogo yagatikhemo at Yesus nen he, mel yagatikhe: ”Hat hagun hemberek yoma wesubagaigen he, wolha lan o,” iluk yagatikhe. 17A'nogo ikhi lagaikhemo, at he a'nogo nen he, ”An nagun lego,” iluk yagatikhemo, at Yesus nen he, mel yagatikhe: ”An nagun lek egen andi eberogoat egen o. 18Hat hagun ekhe wanhik, herakfisigik ekhe wanhik, inebe 5 nen woginafigindigen, yogondak ap ekhe hemberek welagep andi re, hat hagun fuk. It ekhe inagun andi nen he, hat wene eberogoat egen o,” iluk yagatikhe. 19A'nogo fakhogo yagati lagaikhemo, at he a'nogo nen, at mel yagatikhe: ”Eige! Noe, hat hebe re, eberogoat Allah ane yagaisegendek mene higi, iluk arat fut hobagagi o. 20Nen, nit ninambu ninombalagen he, tom yiba logolik Allah fogerati lagaukwa meneat he, hit Yahudi mene nen he, Allah o wele'ma fogerati lagaukwa lek. We, o Yerusalem andomaat fogerasugun o, iluk ikhi lagep andi,” iluk a'nogo yagatikhemo, 21at Yesus nen he, mel yagatikhe ”He yi nerei e. Wene yagahesigin yi eberogoat anggano. O tom yiba inom, o Yerusalem inom, andoma nek Allah fogerati logogun fuk. Hit Allah fogerasugun higit oba, o hobuk ekhe wei igin mene werego. 22Allah nen afuni mondogat telinabigeluk, nit ap Yahudi mene nen wene yagaisoageluk ninayonggo fesikhe andi nen he, nit Yahudi mene nen Allah ebe ninelu mene fogerati lago meneat he, hit enek he, ebe hinonggot meneat fogerati lagep andi o. 23A'nogo Allah fogeratorek meneat he, it afuni nen hobuk Allah fogerati logolik hunogoat negen fogerasugun mene weregaro. At Allah endawimo nen he, An Nareagun en, Allah ebe andi hangge, iluk yagaisugunem higithogo eberogoat fogetnafi logouwak, iluk, anggikherek andi nen he, yogondak ya nen a'nogoat fogerati logogun o. 24Allah ebe re, Areagun mene andi nen he, at fogerasuageluk Areagun inom hundik logolik eberogoat fogerasugun meneat fogerasugun o,” iluk yagatikhe.
25A'nogo yagatikhemo, at he a'nogo nen he, mel yagatikhe: ”Afuni telninabuageluk Allah nen kain enu Kristus andi lakfei wesigin. Lakfei wagunem ebe wesimbik he, yi wene ti wene mondogat nit yaganisikhi logogin iluk an nelu o,” iluk yagatikhe. 26A'nogo yagatikhemo, at Yesus nen he, mel yagatikhe: ”Ap egen andi ebe re, an nemberek wene ane ikhi lago nebe yi aro,” iluk yagatikhe.
27A'nogo ugunem, at Yesus agoromi ane wanhi lagaukwa mene omanogo inambotkwe wulibi wagaukwa hak he, Yesus he a'nogo emberek wene ane ugunem ineilenggen isaluk he, ”Nailo e,” iluk, fogeratukwa meneat he, it omanogo ekhe nen heinok wogisikhi logolik, ”He yi hat nena mene hamolo nen wagen,” iluk igik, ”Yesus. Hat he yi hemberek weneane nenahalok ikhi lagep,” igik, yagaisigi'lek kamo isukwa. 28A'nogo kamo isukwasik werek kwelek, at he a'nogo agaiwak andoma hebisaluk he, fungusek o sili hokhoma kwisikhesik afuni andoma mene wene mel iluk yagaisilik nikhi lagaikhe. 29”Ap ekhe nen an yi hilingitik, ti hilingitik, hilingiti lagi mene mondogat fakhogo mondok yaganete mene ebe andem hak werego. At ebe Kristus Allah nen telninabigeluk lakfei wesigin a'nogoat he a? Hunogoat he a? Hineilenggen hobagaigen we'ni o,” iluk yagaisilik lagaikhe. 30A'nogo yagaisilik lagaikhemo, it afuni omanogo o sili hokhoma andoma herakfuluk wulibi wagaukwasik he, Yesus ebe ha wesuogeluk wagaukwa. 31Ha wesuogeluk oan wagu kwelek, Yesus agoromi ane wanhi lagaukwa mene omanogo nen, at mel yagatukwa: ”Guru noe. Hat sumburu tak nan o,” iluk yagatukwa.
32A'nogo yagatukwa meneat he, at Yesus nen mel yagaisasikhe: ”Sumburu an mene werek meneat he, ebe ki mene he, hit hinonggoro,” iluk yagaisasikhemo, 33at agoromi ane wanhi lagaukwa mene omanogo nen it-it heinok wanhi logolik he, mel isukwa: ”Afuni nen yi mene ti mene ekhe at noageluk wogosi wagaikhama nen ikhe he a?” iluk isukwa. 34A'nogo isukwama at Yesus nen he, mel yagaisasikhe: ”At an laknobagai wagaikhe mene a'nogo endawimo anggikherek mene higithogo hilingiti lagi andi inom, an hilingisuageluk nayonggo fesikhe mene andi elugun warogo katokhogo hilingisigeluk ikhi lagi andi inom, an namburu re, andi aro. 35Nen, hiren ikhi logolik he, tugi henagan logombigen tugi ekheba halok enggen ugu arat palugun, iluk ikhi lagep meneat he, an nen wene ekhe yagahisak. Yabu enggen awi yagokwe hineilenggen yet hani! Enggen ugu wurik agasik palugun higit agama werego. 36Ebe arat palhu halok he, ap ekhe awi yaterek mene inom, nen, ekhe enggen palherek mene inom, emberek inendawimo inagaiyek hoageluk, yogondak at ekhe enggen pali'logo mene andi onggo helili'logo andi ebe re, enggen palogo andogorogo fagarek hak, afuni ineluk mondok logouwageluk andogorogo fisili'logo andi aro. 37Wene yi re, inane lagokhogo ikhi logolik, at ekhe nen awi yatik, at ekhe nen enggen palhik, agarek iluk ili'lagwi andi eberogo aro. 38It ekhe nen yabu seget hokhorogo hilingita mene, hiren segetlegat enggen palubagaigeluk hinayonggo fuluk lak hinobagagi andi. Iren set kwil-kwalogo ebe weinamet faga mene hiren enggen palhi logobagaigeluk lak hinobagagi o,” iluk yagaisasikhe.
39Nen, at he a'nogo oloba kwisikhesik, wene mel yagaisasikhe: ”At ap andi nen, an yi hilingitik, ti hilingitik, hilingiti lagi mene mondogat fakhogo yaganete,” iluk yagaisilik nikhi lagaikhe andiba, afuni o Samaria mene andoma inebe hokhorogo inendawinggen Yesus oba eberogoat himbiret fesukwa. 40A'nogo eberogoat himbiret fesukwasigen hobuk Yesus oba wulibi wagaukwasik, mel yagatukwa: ”Hat ninom yoma logouwogo,” iluk fakfesukwama, inom andoma inenggi pire welagaukwa. 41Yesus inom andoma logolik, attak inebe endebat hak inendawinggen at oba himbiret fesukwa meneat he, hobuk wene at ebe nen yagaisugunem, inesanggo holhukwasik he, inebe mondok hokhorogo inendawinggen at oba himbiret fesukwasik. 42he a'nogo mel yagatukwa: ”Yogondak nit ninendawinggen at oba himbiret fogo yire, wene haren yaganisegen andiba nek ninendawinggen at oba himbiret fogo fuk. Lego. Athe, at ebe nen wene yaganisugunem ninonggwaregen ninesanggo tomok holhik, afuni kweangma mene mondogat telninaferek mene ebe yi aro, iluk futfuluk ninelu agik, ogo andiba nen ninendawinggen at oba himbiret fogo aro,” iluk yagatukwa.
At Yesus hobuk o Galilea lagai wagaikhesik ap pemerintah kain mene amlogo ou higitikhe wene
43At Yesus enggi pireba andoma inom welagaukwasik he, o Galilea arat lagai wagaikhe. 44Lagai wagaikhe andi re, at onggwaregen ikhi logolik: Ap Allah ane yagaisagarek mene andi re, inonggwarek inaiba mene inoe inagoren inane agaukhogo yagaisagarek mondok lego, iluk fageat yagaisasikhe meneat he,#Mat. 13:57; Mrk. 6:4; Luk. 4:24 45it afuni o Galilea mene o Yerusalem seni Paskah hilingitunem pisukwasik were'ma, Yesus nen yi mene ti mene hilingitunem ineilenggen hasukwasik andi nen he, at ebe lagai wagunem hai warogo wanhukwa.#Yoh. 2:23
46At Yesus ebe a'nogo hai warogo wanhukwama re, attak at i we agai mene i anggur enggen amusu hilingitikheba o Galilea sili enu Kana a'nogo wagaikhe. Wagaikhesik were'ma, ap kain pemerintah mene ekhe awi o Kapernaum mene, amlogo oba ou hokho welagaikhe.#Yoh. 2:1-11 47Were'ma, afuni nen he, ”Yesus a'nogo o Yudea nen Galilea lagai wagasik werego,” iluk isukwama esanggo holhikhesik oba wagaikhesik he, mel yagatikhe: ”Noe. An namlogo oba ou wa'lasu hak weregen, hat lambik higisi lanogeluk hayonggo wagi o,” iluk yagatikhemo re, 48at Yesus nen he, ap kain a'nogo mel yagatikhe: ”Hit afuni yoma hinobabut he, an nen hit hinelu asuageluk elalin mene ekhe hilingitunem hineilenggen neambik enek he, hinendawinggen noba himbiret fogoin anggikhi lagi. Elalin mene hilingiti'lek halok hinendawinggen noba himbiret fogoin lek hisikhi lagi o,” iluk yagatikhemo. 49Ap kain a'nogo nen yagati logolik he, ”Noe e. An namlogo ebe oan wa'lagi'lek werek kwelek andemat higi'nogen louwogo,” iluk yagatikhemo, 50at Yesus nen he, mel yagatikhe: ”Hamlogo andi arat se asigin. Hobuk he, hambotkwe lan o,” iluk yagatikhemo, ap a'nogo endawimo nen anggikhi logolik he, ”Wene yaganete andi eberogoat yaganete higi,” iluk, endawinggen Yesus oba himbiret fuluk lagaikhe. 51A'nogo endawimo ebe'luk ebekhalem oan lagunem, at amingmingengge mene wene waluk wagaukwa hak inom ambi agaukwasik he, mel yagatukwa: ”Hat hamlogo a'nogo arat fano agama nen wago o,” iluk yagatukwama, 52aren it inoba heinok wogisikhi logolik he, mel isikhe: ”O mo kaba higiren fano aga,” yagaisasikhemo, iren he mel yagatukwa: Hu'mokwe linggene hak jam satu higit oba aganhan a'nogo arat legaga o,” iluk yagatukwama.
53At ap a'nogo endawimo nen ebeti logolik he, hu'mokwe linggene o mo andem higit at Yesus nen he, ”Hamlogo fano asigin o iluk, yaganete higithogo at fano agama,” iluk endawimo ebe'luk lagaikhesik he, at ebe inom, againafuri mondogat inom, inendawinggen Yesus oba himbiret fesukwa. 54At Yesus ebe o Yudea nen Galilea attak lagai wagaikhesik afuni nen ebe futfouwageluk wene elalin mene attak ekhe hilingitikhesik oba nen, hobuk lagai wagaikhesik ekhe hilingitkhe andi.
Currently Selected:
YOHANES 4: inohap
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
