San Mateo 4

Nu xxegüiha runna dhi yiena Jesús

(Mr. 1:12-13; Lc. 4:1-13)

1Nianna uchetteba Espíritu gue Tata Do Iyyabaaha Jesús lo ttu yu bisi, qui un nu xxegüiha dhi yiena Benniha. 2Dequide chi bette ubina lheꞌe Jesús chua (40) sá nna chua ela nna bisía utunie. 3Nu xxegüiha nna ubigattebana rána Benniha:

—Gansi gualínlu ancalu xiꞌin Tata Do Iyyabaaha, gus ca iyya-ni eyacacana ttaxtila.

4Jesús becabie gueni re na:

—Lo ca sitsi gue Tata Do Iyyabaaha rá: “Läga sunru len ttaxtila aca ban ca benni, sinuqui lacana aca bancana leni iyába ca tisa rinne Tata Do Iyyabaaha.”#4:4 Deuteronomio 8:3

5Laniala nna uche nu xxegüiha Jesús lheꞌe yiesi anca leꞌaha, delába Jerusalén. Nía belhopina Benniha axta atta yadharu gue iqui yotuha. 6Nianna rána Benniha:

—Gansi gualí ancalu xiꞌini Tata Do Iyyabaaha, binna sanga axta lireeha, cumu lo ca sitsi gue Tata Do Iyyabaaha gaꞌana rá:

Tata Do Iyyabaaha idhelhe ca ingeli guee qui uyúcabi lu.

Ca ingeliha nna güilhenbacabi lu qui bittu icheculu len ca iyya-na.#4:6 Salmo 91:11-12

7Jesús becabie gueni re:

—Gaꞌanaguaba lo ca sitsi gue Tata Do Iyyabaaha: “Bittu cuꞌubialu Tata Do Iyyabaaha Benni bananie lu.”#4:7 Deuteronomio 6:16

8Nu xxegüiha nna uchettebana Benniha axta iqui ttu iꞌiya yadharu. Nía beleꞌenna Benniha iyába ca yiesi xxeni seꞌe yies lo yu-ni, nu gaꞌana tsee te guecani lhe. 9Nianna atti rá nu xxegüiha Benniha:

—Iyába unná utea guelu, gansi lu udú xibilu loa, cuequi xenlu neti lhe.

10Jesús becabie re na:

—Unreha güia, nu xxegüi, cumu lo ca yitsi gue Tata Do Iyyabaaha rá: “Suntteba lo Tata Do Iyyabaaha Benni bananie lu udú xibilu, suntteba Ben-na ixuuri lo sina guee lhe.”#4:10 Deuteronomio 6:13

11Laniala güequi chiba nu xxegüiha. Nianna bisíntteba ca ingeli betecabi nu beasin Jesús.

Jesús riduloe rixxiꞌe ca tisa gue Tata Do Iyyabaaha

(Mr. 1:14-15; Lc. 4:14-15)

12Atti chi bina Jesús lisiyyaba te Juan biꞌini rugadi indaha, bequittebe besine lo yu te láni Galilea. 13Ttiaca lärga udoe lheꞌesi Nazaret, lheꞌesi Capernaum nu re roꞌo indattooha liba udoe. Lheꞌes-ni nua rena roꞌo yu gue Zabulón lhe gue Neftalí lhe. 14Anía liba uca nna qui guaxxína ca tisa utixxiꞌa profeta Isaías atti rábi:

15Ca benni seꞌe lo yu gue Zabulón lhe gue Neftalí lhe

ca nu seꞌe roꞌo neda nu dia daca roꞌo indattoo-na,

daca attu ladu gue yoo Jordán-na,

delába ca benni seꞌe lo yu te láni Galilea atta seꞌe ixeru ca benni bittu anca benni Israel.

16Lacana nua ancacana attiba ca benni seꞌe lheꞌe atta anca chulha.

Nnanna nna chi biláquinna ttu xieni xeni.#4:15-16 Isaías 9:1-2

Xieniha benniha udanie gue ca benni seꞌe atta ruxunnina guecani gatticana.

17Desdeba lania nna udulo Jesús utixxiꞌenie ca benni seꞌe nía re cana:

—Gualodú xiyyanle, gualodaxxutte neda gue Tata Do Iyyabaaha, cumu chi daa ribiga isía sá innabia Benniha.

Jesús uxie ttapa ca benni yuꞌu güedaxxu belha

(Mr. 1:16-20; Lc. 5:1-11)

18Atti dia Jesús yuꞌe neda roꞌo indattoo gue Galilea, nía bilánie irupa betsiba Simón biꞌini teeguaba lábi Pedro, lenbi Andrés. Ca biꞌiniha nna yuꞌucabi güedelha yexxa lheꞌe indattooha cumu irupabacabi ancacabi benni rudaxxu belha. 19Jesús ráttebe cabi:

—Gualtá gualetteno neti. Neti nna unia acale nu gaxi benni qui udaxxucana neda gue Tata Do Iyyabaaha.

20Snaba lania nna bocaꞌan bixxicabi ca yexxa guecabiha nía. Nianna diattebacabi len Jesús.

21A saroꞌogarba ude nna bedeláttebanie a chupa ca benni: Jacobo lenbi betsibi Juan, ca xiꞌini biꞌini lá Zebedeo. Lacabi nna siacabi lencabi tata guecabiha lo barco guecabiha reoncabi atta chi bisú gue ca yexxa ca nu rixuincabi rudaxxucabi belha. Nianna uxtteba Jesús ca biꞌiniha. 22Ca biꞌiniha nna níaba bocaꞌancabi barcoha, tata guecabiha lhe atti diattebacabi len Jesús.

Jesús reonie ca benni rani, ruleꞌenie ca benni lhe

(Lc. 6:17-19)

23Itúba Galilea güequi Jesús ruleꞌenie ca benni lheꞌe ca yoꞌo atta rudheti ca benni Israel ca tisa gue Tata Do Iyyabaaha, rixxiꞌanie ca benni ca tisa tsee gue gaxasná rinnabia Tata Do Iyyabaaha lhe reonie ca benni yuꞌu iyáloba isagüe cuerpu guecani lhe. 24Iyába ca benni seꞌe itúba lo yu gue Siria binacana gue nu runi Jesús. Nianna uchettebacana iyába ca benni rani guecaniha lo Benniha: Ca benni yuꞌu ixeloba isagüe lhe ca benni yuꞌu be xxegüi lheꞌe cuerpu guecani lhe ca benni retti xuecani lhe ca benni bittu ritá niꞌa nácani lhe. Iyába ca unnuha beonie. 25Ixeru ca benni denocana Benniha: ca benni beaca lascani ca lheꞌesi seꞌe lo yu gue Galilea lhe ca benni seꞌe lheꞌe yiesi Jerusalén lhe ca benni seꞌe lheꞌe adírba ca lheꞌesi seꞌe lo yu gue Judea lhe ca benni seꞌe lheꞌe ca lheꞌesi seꞌe lo yu nu te láni Decápolis lhe ca benni seꞌe lheꞌe adírba ca lheꞌesi seꞌe attu ladu gue yoo Jordán lhe.

Currently Selected:

San Mateo 4: zaq

ማድመቅ

Copy