EVASELIO A SOANE 9
9
Fakamauli o he tagata nee tupu kivi
1Nee sio leva Sesu i tana fakalaka ki he tagata nee tupu kivi. 2Nee fai leva e ana tisipulo kia ia te fehui aeni: Pule, ko ai nee agahala, ko te tagata aeni pee ko ana matua, ke tupu kivi ai ia? 3Nee tali leva e Sesu: E mole ko ia pee ko ona matua ae nee agahala, kae ke fakaha te u gaue a te Atua ia ia. 4E tonu ke au fai kei aho te u gaue a ia ae nee ina fekaui mai au; e hau te pouli, ae e mole feala ke gaue ai he tahi. 5I taku kei nofo i te malamanei, ko au ko te malama o te malamanei.
6I te osi o tana palalau aia, nee aanu leva ia ki te kele, pea nee ina fai leva aki tona savai he moi pela. Pea nee ina vali leva aki te moi pela te u mata o te kivi, 7pea nee ina ui leva kia ia: Alu, o maanu i te maanuaga o Siloe (ko tona uhiga: Ko te faifekau). Nee alu leva ia ki ai o maanu, pea nee liliu mai leva ia kua sio lelei. 8Ko ona kau vahaa fale pea mo natou ae nee natou iloi ia i mua ko he tagata kai kolekole, nee natou ui leva: Pe e mole ko ia aena nee nofo lalo o kaikolekole? 9Pea nee ui e ni ihi: Ko ia. Pea ko ihi: Kailoa, kae e fofoga ia pe ia. Pea nee ui e ia totonu: Ko au mooni. 10Nee natou ui leva kia ia: Pe nee ala feafeai ou mata? 11Nee ina tali leva: Ko te tagata ae e higoa ko Sesu nee ina fai he moi pela, o vali aki oku mata, pea nee ina ui mai leva kia au: Alu o maanu i te maanuaga o Siloe. Pea nee au alu ki ai, o maanu, pea nee au sio leva. 12Nee natou ui leva kia ia: Kofea te tagata aia? Nee ina tali leva: E mole au iloi.
13Nee natou taki leva ki te kau faliseo ia ia nee kivi. 14Kae ko he aho sapato aia nee fai ai e Sesu te moi pela, o fakaala ai te u mata o te kivi. 15Nee toe fehui leva e te kau Faliseo kia ia pe nee feala feafeai tana sio. Pea nee ina ui leva kia natou: Nee ina vali he moi pela ki oku mata, pea nee au maanu, pea nee au sio leva. 16I te mea aia, nee ui leva e ni ihi o te kau faliseo: E mole hau te tagata aia mai te Atua, koteuhi e mole ina tauhi te sapato. Kae nee ui leva e ni ihi: Pe e feala feafeai e he tagata agahala tana fai ni milakulo feia? 17Pea nee natou mavetevete leva i ai. Nee natou toe ui leva ki te kivi: Ko koe, kotea tau ui o uhiga mo ia, i tana fakasio ou mata? Nee ina tali leva: Ko he polofeta ia.
18Ne mole tui leva te kau Sutea nee kivi ia, pea kua feala tana sio o kaku ki tanatou aumai ana matua. 19Pea nee natou fehui age leva kia naua, o ui: Pe ko tokolua foha aeni, ae e kolua ui nee tupu kivi? Pe nee feafeai leva tana sio i te lakaga aeni? 20Nee tali leva e ana matua: E ma iloi ko toma foha ia, pea nee tupu kivi ia; 21kae pe e feafeai tana sio i te lakaga aeni, pe ko ai nee ina fakaala ona mata, e mole ma iloi te mea aia. Kotou fehui kia ia totonu, kua lahi ia, e palalau anai ia ki te mea o uhiga mo ia. 22Nee palalau feia leva ona matua koteuhi nee na mataku ki te kau Sutea; he kua tuku e te kau Sutea kapau e fakamooni he tahi kia Sesu ko te Kilisito, e fakamavae anai ia mai te sinakoka. 23Koia nee ui ai leva e ana matua: Kua lahi ia, kotou fakafehui ia ia totonu.
24Nee toe paui leva e te kau faliseo te tagata nee kivi, o ui kia ia: Tuku ki te Atua te kololia; e matou iloi ko te tagata aia ko he tagata agahala. 25Nee ina tali age leva: Kapau ko he tagata agahala ia, e mole au iloi; e au iloi te mea e tahi, nee au kivi pea kua au sio i te lakaga aeni. 26Nee natou ui age leva kia ia: Kotea nee ina fai kia koe? Pe nee feafeai tana fakaala ou mata? 27Nee ina tali leva kia natou: Kua osi i taku fakaha atu kia koutou, pea nee mole kotou fakalogo; kotea e kotou toe fia logo ai ki ai? Pe e kotou loto ke kotou liliu foki ko ana tisipulo? 28Nee natou tauvele leva kia ia, o ui: Ko koe ae ko tana tisipulo; ko matou, ko te u tisipulo matou a Moisese. 29E matou iloi nee palalau te Atua kia Moisese; kae ko ia aeni, e mole matou iloi pe e hau ia mai fea. 30Nee tali age leva e te tagata aena kia natou: E fakapunamauli takotou mole iloi pe e hau ia mai fea; kae nee ina fakaala oku mata. 31E tou iloi e mole tali e te Atua te kau agahala; kae kapau e fakaapaapa he tahi ki te Atua mo ina fai tona finegalo, e tali ia e te Atua. 32Talu mai te kamataaga o te malamanei e heeki pe logo nee fakaala e he tahi te u mata o he tagata nee tupu kivi. 33Kapau nee mole hau te tagata aia mai te Atua, nee mole ina fealagia pe he mea. 34Nee natou tali leva kia ia: Nee ke tupu katoa i te agahala, pea e ke akoi matou! Pea nee natou kapu leva ia.
Toe fakamooni e Sesu tona Atua
35Nee logo leva ia Sesu nee natou kapu ia; pea, i tana felavei mo ia, nee ina ui age leva kia ia: Pe e ke tui ki te Foha o te Atua? 36Nee ina tali leva: Pe e ko ai ia Aliki, ke au tui kia ia? 37Nee ui age leva e Sesu kia ia: Kua ke sio kia ia, pea ko ia aeni e palalau atu kia koe, ko ia. 38Pea nee ina ui leva: E au tui, Aliki. Pea nee atolasio ifo leva ia kia ia.
39Pea nee ui leva e Sesu: Nee au hau ki te malamanei ki he fakamaau ke sio natou e kivi, pea ke liliu o kivi natou e sio. 40Ko ni ihi faliseo nee nonofo mo ia, i tanatou logo ki te u folafola aia, nee natou ui leva kia ia: Pe e matou kivi, mo matou foki? 41Nee tali leva e Sesu kia natou: Kapau nee kotou kivi, pea e mole kotou mau anai he agahala. Kae i te lakaga nei e kotou ui: E matou sio, koia e tologa ai takotou agahala.
Currently Selected:
EVASELIO A SOANE 9: WB2011
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
