EVASELIO A SOANE 5
5
Fakamauli o te palalisia i Peteseta
1Hili te mea aia, nee i ai leva he aho lahi o te kau Sutea, pea nee hake leva ia Sesu ki Selusalemi.
2Pea nee i ai i Selusalemi, o ovi ki te matapa o te u ovi, he maanuaga nee higoa i te fakahepeleo ko Peteseta, pea nee kogafale nima. 3Pea nee takoto i lalo o te u kogafale aena he kau mahaki kaugamalie, he u kivi, he u hape, he u palalisia, pea nee natou talitali ki te tapohu o te vai; 4koteuhi nee tau hifo mai he aselo ki te maanuaga, o tapohu i te vai; pea ko ae e uluaki hifo ki ai i te osi o tana tapohu e mauli i tona mahaki.
5Nee nofo i ai he tagata nee mahaki talu maia tau e tolugofulu ma valu. 6Ko Sesu, i tana sio ki tana takoto, pea mo tana iloi nee nofo mahaki ia talu mai fualoa, nee ina ui leva kia ia: Pe e ke loto ke ke mauli? 7Nee tali leva e te tagata mahaki kia ia: Aliki, e mole au mau he tahi ke ina ave au ki te maanuaga moka tapohui te vai: Pea i te lolotoga o taku hifo ki ai, e hifo he tahi o mua ia au. 8Nee ui leva e Sesu kia ia: Tuu ki oluga, too tou palepale, o haele. 9I te lakaga pe aena, nee mauli leva te tagata; nee ina too leva tona palepale, pea nee haele leva ia.
10Ko he aho sapato aia. Nee ui leva e te kau Sutea kia ia ae nee fakamauli: E ko te sapato, e mole gafua kia koe ke ke amo tou palepale. 11Nee ina tali leva kia natou: Ko ia ae nee ina fakamauli au, nee ina ui mai kia au: Too tou palepale, pea ke haele! 12Nee natou fehui leva kia ia: Ko ai te tagata ae nee ina ui atu kia koe: Too tou palepale, pea ke haele? 13Kae nee mole iloi e ia ae nee fakamauli pe ko ai ia; he kua puli Sesu mai te hahai ae nee nonofo i te kogamea aia. 14Talu mai ai, nee toe mau leva ia e Sesu i te fale tapu, pea nee ina ui age leva kia ia: Koeni kua ke mauli; aua naa ke toe agahala, koteuhi naa hoko kia koe he mea e kovi age. 15Nee alu leva te tagata aia, o fakaha ki te hahai Sutea, ko Sesu ae nee ina fakamauli ia. 16Ko te tupuaga leva aia o tanatou fakafihi kia Sesu, uhi ko tana fai te u mea aena i te aho o te sapato.
Fakaha e Sesu tona tatau mo te Tamai
17Kae nee tali leva e Sesu kia natou: O kaku mai ki te aho nei e gaue taku Tamai; mo au foki, e au gaue. 18Uhi ko te mea aia, nee toe asilisili faiga te kau Sutea ke tamatei ia, o mole gata pe ko tana maumaui te sapato, kae uhi tafito ko tana tala ko te Atua ko tana Tamai, o ina fakatatau ia ki te Atua.
19Pea nee toe palalau leva ia Sesu kia natou, o ui: E mooni, e mooni, e au ui atu kia koutou, e mole feala ke fai e te Alo he mea ia ia totonu, e ina fai pe te mea e sio ia e fai e te Tamai; pea ko te mea fuli pe e fai e te Tamai, e fai tatau e te Alo. 20Koteuhi e ofa te Tamai ki te Alo, pea e ina fakaha kia ia te u mea fuli pe e ina fai; pea e ina fakaha age anai kia ia he u gaue lalahi age i te u gaue aeni, o tupu ke kotou punamauli ai. 21Koteuhi, o hage pe ko te Tamai e ina fakatuuake te kau mate pea e ina foaki kia natou te mauli, e feia mo te Alo, e ina foaki te mauli ki ae e loto ia ki ai. 22E mole fakamaaui e te Tamai he tahi, kae kua ina foaki te u fakamaau fuli ki te Alo, 23o tupu ke fakaapaapa te tagata fuli ki te Alo o hage ko tanatou fakaapaapa ki te Tamai. Ko ia ae e mole fakaapaapa ki te Alo, e mole fakaapaapa ia ki te Tamai ae nee ina fekaui mai te Alo. 24E mooni, e mooni, e au ui atu kia koutou, ko ae e fakalogo ki taku folafola, pea e tui kia ia ae nee ina fekaui mai au, e ina mau te mauli heegata pea e mole pe fakalaka ia ki te fakamaauaga, kae kua fakalaka ia mai te mate ki te mauli. 25E mooni, e mooni, e au ui atu kia koutou, e hau te hola, pea kua hoko foki ia, e fakalogo anai te hahai mate ki te leo o te Alo o te Atua; pea ko natou nee natou fakalogo anai ki ai e natou mauli anai. 26Koteuhi, o hage ko te Tamai e ina mau te mauli ia ia, pea e feia pe, kua ina foaki ki te Alo ke ina mau te mauli ia ia. 27Kua ina foaki kia ia te pule o te fakamaau, koteuhi ko te Foha ia o te tagata. 28Aua naa kotou punamauli ki te mea aena; koteuhi e hau te hola ae e logo ai anai natou fuli e nonofo i te u tanuma ki tona leo, pea e natou feulufi anai ki tua. 29Ko natou ae nee natou fai te lelei e natou toe tuuake anai ki te mauli, kae ko natou ae nee natou fai te kovi e natou toe tuuake anai ki te fakamaau. 30E mole au fealagia he mea e au totonu: E au fakamaau o fai ki te mea e au logo ki ai; pea e tonu taku fakamaau, koteuhi e mole au kumi toku finegalo, kae ko te finegalo o ia ae nee ina fekaui mai au.
Fakamooni a te Tamai
31Kapau e au fakamooni kia au pe, e mole mooni taku fakamooni. 32E i ai he tahi age e fakamooni kia au, pea e au iloi e mooni te fakamooni e ina fai mai kia au.
Fakamooni a Soane-Patita
33Nee kotou fekaui he telekasio kia Soane, pea nee fakamooni ia ki te mooni. 34Kae kia au, e mole ko he tagata ae e au tali mai ai te fakamooni; kae e au fakaha te mea aeni, o tupu ke kotou mauli. 35Ko Soane nee ko te malama ae e ulo mo malama, pea nee kotou loto ke kotou fakafiafia i he hola i tona malama.
Fakamooni a te u gaue a Sesu
36Ko au, e au mau he fakamooni e lahi age i te fakamooni a Soane; koteuhi ko te u gaue ae nee foaki mai e te Tamai ke au fakakatoa, te u gaue totonu aeni e au fai, e natou fakamooni kia au ko te Tamai ae nee ina fekaui mai au.
Fakamooni a te Tamai
37Pea ko te Tamai ae nee ina fekaui mai au nee fakamooni totonu ia kia au. Nee mole pe kotou logo ki tona leo i he aho, pea nee mole pe koutou sisio ki tona fofoga, 38pea e mole pe nofo tana folafola ia koutou, koteuhi e mole kotou tui kia ia ae nee ina fekaui mai.
Fakamooni a te Tohi tapu
39E kotou hue te Tohi tapu koteuhi e koutou manatu e koutou mau i ai te mauli heegata. Ko te Tohi tapu ae e fakamooni mai kia au. 40Pea e mole kotou fia omai kia au, o tupu ke kotou mau te mauli!
41E mole au tali toku kololia mai te u tagata. 42E au iloi koutou, e mole koutou mau pe ia koutou he ofa ki te Atua. 43Nee au hau i te huafa o taku Tamai, pea e mole kotou tali au: Kapau e hau he tahi i tona higoa totonu, e kotou tali anai ia. 44E feala feafeai anai takotou tui, koutou ae e kotou tali tokotou kololia maia koutou, pea e mole kotou kumi te kololia e hau mai te Atua toko tahi? 45Aua naa kotou manatu ko au e au fakahalai anai koutou ia mua o te Tamai; ko ia ae e ina fakahalai koutou, ko Moisese, ae nee koutou tuku ki ai takotou falala. 46Koteuhi kapau nee kotou tui kia Moisese, pea e kotou tui mai foki kia au, he nee ina tohi o uhiga mo au. 47Kae kapau e mole kotou tui ki tana u tohi, e feafeai anai takotou tui ki aku folafola?
Currently Selected:
EVASELIO A SOANE 5: WB2011
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
