EVASELIO A SOANE 14
14
Fakamalohii e Sesu te kau apositolo
1Aua naa hoha okotou loto. Kotou tui ki te Atua, pea kotou tui kia au.
2E lahi te u nofoaga i te fale o taku Tamai. Kana nee mole feia, nee au fakaha atu ia kia koutou. E au alu o teuteui mai he nofoaga kia koutou. 3Pea, ka e au alu anai, pea ke au teuteui anai he nofoaga kia koutou, e au toe hau anai, pea e au too anai koutou mo au, o uhi ko te kogamea e au nofo ai e kotou nofo ai anai. 4E kotou iloi te kogamea e au alu ki ai, pea e kotou iloi mo tona ala.
5Nee ui age leva e Tomasi kia ia: Aliki, e mole matou iloi pe e ke alu ki fea; pe e feafeai anai ke matou iloi tona ala? 6Nee ui age leva e Sesu kia ia: Ko au ko te ala, mo te mooni, pea mo te mauli. E mole he tahi e hau ki te Tamai kae ia au pe.
E tahi te Tamai mo te Alo
7Kapau nee kotou iloi au, pea kua kotou iloi mo taku Tamai. Pea e kamata i te lakaga nei e kotou iloi ia ia, pea kua kotou sio kia ia.
8Nee ui age leva e Filipo kia ia: Aliki, fakaha mai kia matou te Tamai, pea e matou feauga ai. 9Nee ui age leva e Sesu kia ia: Kua fualoa pe taku nofo mo koutou, kae e mole kotou iloi aipe ia au, Filipo! Ko ae kua sio kia au kua sio ia ki te Tamai; pe e feafeai tau ui: Fakaha mai kia matou te Tamai? 10Pe e mole ke tui e au nofo i te Tamai, pea e nofo te Tamai ia au? Ko te u folafola ae e au fakaha atu kia koutou, e mole au fakaha atu natou ia au totonu; kae ko te Tamai, ae e nofo ia au, ko ia ae e ina fai te u gaue aena. 11Kotou tui mai kia au, e au nofo i te Tamai, pea e nofo te Tamai ia au; kotou tui pe o uhi ko te u gaue aena.
12E mooni, e mooni, e au ui atu kia koutou, ko ae e tui kia au, e ina fai anai te u gaue ae e au fai, pea e ina fai anai ni gaue lalahi age, koteuhi e au alu ki te Tamai; 13pea ko te u mea fuli ae e kotou kole anai i toku huafa, e au fai anai natou, o uhi ke fakakololiai te Tamai i te Alo. 14Kapau e kotou kole he mea i toku huafa, e au fai anai ia.
Fakapapau a te Laumalie Maonioni
15Kapau e kotou ofa ia au, kotou fai aku fekau. 16Pea ko au, e au kole anai ki te Tamai, pea e ina foaki atu anai kia koutou he tahi Palakeleto*, o tupu ke nofo ia mo koutou o heegata, 17te Laumalie o te mooni, ae e mole feala ke talitali e te malamanei, koteuhi e mole sio ia kia ia pea e mole ina iloi ia ia; kae ko koutou, e kotou iloi ia ia, koteuhi e nofo ia mo koutou, pea e nofo anai ia ia koutou. 18E mole au tuku paea anai koutou, e au toe hau anai kia koutou. 19Kei toe pe he temi sii, pea e mole toe sio anai te malamanei kia au; kae ko koutou, e kotou sio anai kia au, koteuhi e au mauli, pea e kotou mauli anai mo koutou? 20I te aho aena, e kotou iloi anai e au nofo i taku Tamai, e kotou nofo ia au, pea e au nofo ia koutou. 21Ko ae e ina mau aku fekau pea e ina taupau natou, ko ia aena e ofa ia au. Ko ae e ofa ia au, e ofa anai taku Tamai ia ia, pea e au ofa anai ia ia, pea e au fakaha age anai ia au kia ia.
22Ko Suta, e mole ko te Isekaliote, nee ui age leva kia ia: Aliki, kotea e ke fakaha ai anai ia koe kia matou, kae e kailoa ki te malamanei? 23Nee tali leva e Sesu kia ia: Kapau e ofa he tahi ia au, pea e ina taupau anai taku folafola, pea e ofa anai taku Tamai ia ia; e ma omai anai kia ia, pea e ma fai anai toma nofoaga i tona api. 24Ko ae e mole ofa ia au, e mole ina taupau aku folafola. Pea ko te folafola ae e kotou logo ki ai e mole meia au ia, kae mai te Tamai ae nee ina fekaui mai au.
25Nee au fakaha te u mea aeni kei au nofo mo koutou. 26Kae ko te Palakeleto*, te Laumalie Maonioni, ae e fekaui mai anai e taku Tamai i toku huafa, e ina ako atu anai kia koutou te u mea fuli, pea e ina fakamanatu atu anai kia koutou te u mea fuli nee au fakaha atu kia koutou.
E foaki e Kilisito te tokalelei
27E au tuku atu kia koutou te tokalelei, e au foaki atu kia koutou toku tokalelei. E mole au foaki atu ia kia koutou o hage ko tona foaki e te malamanei. Aua naa hoha okotou loto pe kotou mataku.
28Nee kotou logo nee au fakaha atu kia koutou: E au alu pea e au toe hau kia koutou. Kapau e kotou ofa ia au, e kotou fiafia anai i taku alu ki te Tamai; koteuhi e lahi age te Tamai ia au. 29Pea i te lakaga nei kua au fakaha atu kia koutou te u mea aeni i mua kae e heeki natou hoko mai, koteuhi ka natou hoko mai anai, ke kotou tui. 30E mole au toe palalau fualoa anai mo koutou; koteuhi e hau te pule o te malamanei. Pea e mole ina mau hana mea pe e tahi ia au. 31Kae o uhi ke iloi e te malamanei e au ofa i te Tamai, pea e au fai o mulimuli ki te fekau nee foaki mai e te Tamai kia au, kotou tutuu ki oluga, tou olo la i heni.
Currently Selected:
EVASELIO A SOANE 14: WB2011
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
