Mɔl 8
8
Azuyilɛ ne awieleɛ
1Nyamenle arɛle anvi Nowa nee nane nee nyɛmoa ne mɔ mɔɔ Nowa nee bɛ wɔ ɛlɛne ne anu la; ɔmanle anwoma bie vɛlɛle, na azule ne bɔle ɔ bo kɛ ɔsesa. 2Ɔzile nzudenle ne mɔ mɔɔ azɛlɛ bo nzule ne mɔ dua nu bu azɛlɛ ye azo la, ɔmanle maanle nu dele na ezule ne gyakyile ɛdɔlɛ. 3Akee nzule ne sesanle ngyikyi ngyikyi, na ɔkali kenle ɛya ko abulanlu la, ɛnee yesesa kpalɛ. 4Na siane nsuu ne anu, kenle ne mɔɔ tɔ zolɛ bulu nee nsuu la, ɛlɛne ne ranwenle Arelalate awoka ne mɔ ko azo. 5Nzule ne hɔle zolɛ sesanle, na ɔkadwu siane bulu ne kenle ne mɔɔ lumua la azo la, ɛnee awoka ne mɔ ati ɛvindevinde.
6Ɛhye anzi kenle abulanla ne azo, Nowa dukuele ɛlɛne ne nvɛnzɛlɛ ne mɔ ko, 7na ɔzoanle kɔkɔsɛlɛ. Kɔkɔsɛlɛ dule hɔle na yeanzia yeamba; ɔdule ɔkpɔsale ɔbɔle ahɔnlɔma toonwo ɔhɔkpulale mekɛ mɔɔ nzule ne wiele sesa bɔkɔɔ la. 8Eza Nowa zoanle abubule ɔdaye noko kɛ ɔhɔnlea saa nzule ne ɛsesa a; 9na abubule ne annyia ɛleka andɛnla, ɔluakɛ ɛnee nzule dɔɔnwo tɛbɔ aze. Ɔziale ɔhɔle ɛlɛne ne anwo, na Nowa dendenle ɔ sa hyele ye vale ye hɔle ɛlɛne ne anu. 10Nowa hendɛle kenle nsuu bieko na ɔzoanle abubule ne bieko. 11Ye nɔsolɛ nu, abubule ne ziale rale; ɔkara la ɔlɛ ɔlivi nya amolɛ ɔ nloa anu. Ɛhye manle Nowa nwunle kɛ nzule ne ɛwie sesa. 12Eza Nowa hendɛle kenle nsuu na ɔzoanle abubule ne bieko; ɛnɛ ɛdeɛ, abubule ne anzia amba.
13Nowa lile ɛvolɛ ɛya nsia ɛvolɛ ko la, kenle ne mɔɔ lumua siane ko ne anyunlu la, ɛnee nzule ne ɛwie sesa bɔkɔɔ. Nowa kpale ɛlɛne ne aze, ɔnleanle maanle nu na ɔnwunle kɛ akee azɛlɛ nwo ɛyɛ resee. 14Siane nwiɔ ne anu kenle ne mɔɔ tɔ zolɛ abulanwiɔ nee nsuu la ɛnee akee azɛlɛ nwo ɛyɛ resee kpalɛ.
15Na Nyamenle zele Nowa kɛ, 16“Ɛ nee ɛ ye nee ɛ mra nee bɛ mraalɛ ne mɔ bɛvi ɛlɛne ne anu bɛdwu aze. 17Fa debie biala mɔɔ ɛnwomenle wɔ ye nu la finde: nloma, nane nee debie biala mɔɔ twenle ɔ nwo aze la, amaa bɛanyia adenle bɛalɔ, bɛadɛlɛ azɛlɛ ye azo amuala.” 18Yemɔti Nowa nee ɔ ye nee ɔ mra nee bɛ mraalɛ ne mɔ vi ɛlɛne ne anu dwule aze. 19Bɛvindele nane nee nloma ne mɔ amuala, nee debie biala mɔɔ twenle ɔ nwo aze la, ko biala nee ye ɛsaso hɔle ye ekpunli ekpunli.
Nowa bɔ azu
20Nowa zile azukponle manle Ɛdɛnkɛma. Akee ɔhyele nane nee nloma ne mɔ mɔɔ anwo te la biala anu ko, ɔhunle bɛ na ɔyelale bɛ ɔbɔle azu wɔ azukponle ne azo ɔmanle Nyamenle. 21Nowa azu ne zɔle Ɛdɛnkɛma anye, na ɔzele kɛ, “Ɔvi ɛnɛ mɔɔ kɔ la menrɛdoa sonla nyɛleɛ menrɛmaa munzule mɔɔ le zɛhae la ɛnrɛha azɛlɛ ye bieko; menrɛzɛkye ewiade abɔdeɛ muala, kɛmɔ meyɛ la bieko. Meze kɛ sonla yemɔ, ye ngakula nu amuala ɛnee ye adwenle nee ye ahonle nu le bile. 22Noko suzuamgba ala mɔɔ ewiade tɛbɔ ɛkɛ la, bɛkɛlua, bɛkɛbu. Mekɛ biala maanle nu babɔ wuluwulu yɛɛ ɛyɛlɛ bara, wawaa nee fɔsɛlɛ bara, yɛɛ bɛkɛnyia alehyenlɛ nee aledwolɛ.”
Bible in Nzema © Bible Society of Ghana, 1998.
