EFETIKILO 11
11
1Oluali luosi lua kala lelimi limosi lupopi umosi. 2Noke, eci va ilukila kutundilo oco va sanga etapi kofeka ya Sinare kuenje va tungako. 3Va livangula pokati omunu lukuavo, vati, Enjui, tu tungi atisolo, tu a kanguli ciwa londalu, Kuenje atisolo aco a linga ovawe avo, ohala yaco ekokoto. 4Ovo va linga vati, Enjui, tu litungili imbo; tu tungivo ombonge, utue wayo u pitile kilu; tu kemãlisa onduko yetu sanga tu sandokaila kuosi kilu lieve. 5Yehova yu wa loka oku vanja imbo omãla vomanu va tunga, lombonge yaco. 6Yehova yu wa linga hati, Ota, epata eli limosi, elimi limuamue va kuete pokati kavo vosi; leci efetikilo ño liovina va laika oku linga; cilo ka va tokoka vali cimue va panga oku linga. 7Enjui, tu lokiliko, tu pongoluisi elimi liavo, oco ka va ka liyeve vali omunu lokuavo. 8Oco Yehova wa va sandola; va sandokaila kuosi kilu lieve; kuenje va sandokaila kuosi kilu lieve; kuenje va liwekako oku tunga imbo. 9Oco ombonge yaco va yi luka Bavele, momo oko Yehova a tengisila alimi olofeka viosi, kuenje Yehova wa va sandowaila kuosi kilu lieve.
10Alo o-o apata a Semi. Anyamo avali kovaso yetande, eci Semi a kala locita canyamo, oco wa cita Aripasade. 11Eci a cita Aripasade eye Semi wa kala vali lomuenyo ovita vitãlo kanyamo kuenje wa cita cita omãla valume lomãla vakãi.
12Eci Aripasade wa kala lakui atatu kanyamo kanyamo atãlo oco wa cita Sela. 13Eci a cita Sela eye Aripasade wa kala vali lomuenyo ovita vikuãla kanyamo kanyamo atatu kuenje wa cita cita omãla valume lomãla vakãi.
14Eci Sela a kala lakui atatu kanyamo oco wa cita Heveru. 15Eci a cita Heveru eye Sela wa kala vali lomuenyo ovita vikuãla kanyamo kanyamo atatu kuenje wa cita cita omãla valume lomãla vakãi.
16Eci Heveru a kala lakui atatu kanyamo kanyamo akuãla oco wa cita Pelegi. 17Eci a ka cita Pelegi eye Heveru wa kala vali lomuenyo ovita vikuãla kanyamo kanyamo akuĩ atatu, yu wa cita cita omãla valume lomãla vakãi.
18Eci Pelegi a kala lakui atatu kanyamo kuenje wa cita Reu. 19Eci a ka cita Reu eye Pelegi wa kala vali lomuenyo ovita vivali kanyamo kanyamo ecea, yu wa cita cita omãla valume lomãla vakãi.
20Eci Reu a kala lakui atatu kanyamo kanyamo avali oco wa cita Seruki. 21Eci a ka cita Seruki eye Reu wa kala vali lomuenyo ovita vivali kanyamo kanyamo epanduvali, yu wa cita cita omãla valume lomãla vakãi.
22Eci Seruki a kala lakui atatu kanyamo oco wa cita Nahore. 23Eci a ka cita Nahore eye Seruki wa kala vali lomuenyo ovita vivali kanyamo, yu wa cita cita omãla valume lomãla vakãi.
24Nahore wa kala lakui avali kanyamo kanyamo ecea kuenje wa cita Terahi. 25Eci a cita Terahi eye Nahore wa kala vali lomuenyo ocita lekui kanyamo kanyamo ecea kuenje wa cita cita omãla valume lomãla vakãi.
26Terahi wa kala lakui epanduvali kanyamo kuenje wa cita Avirama, Nahore, la Harane.
27Alo o-o apata a Terahi. Terahi wa cita Avirama, Nahore, la Harane; Harane wa cita Lote. 28Eye Harane wa fila kovaso a isiaye Terahi vofeka vo citila, vo Uri ko Kaldea. 29Avirama la Nahore va kuẽla akãi; onduko yukãi wa Avirama, Sarai; onduko yukãi wa Nahore, Milika, omõla a Harane, isia ya Milika, isia ya Yisika. 30Sarai wa kala osiule; omõla ka kuete.
31Terahi yu wa enda lomõlaye Avirama, la Lote, omõla a Harane, onekulu yaye, kuenda Sara ndatembo yaye, ukãi womõlaye Avirama; wa tunda lavo vo Uri kofeka yava Kaldea, oku enda kofeka ya Kanana, kuenje veya ko Harane haiko va tunga. 32Oloneke viosi via Terahi ovita vivali kanyamo kanyamo atãlo; leye Terahi wa fila ko Harane.
Currently Selected:
EFETIKILO 11: EMB63
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Umbundu Bible © United Bible Societies, 1963.
