Génesis 6
6
Runakuna jutsata rurayanqan
1Kay patsachö runakuna maytsikaman mirayaptinmi warmi tsurinkunapis atska kayarqan. 2Tsaymi Dios Yayapa wamrankuna runakunapa warmi tsurinkuna kuyakuypaqta rikäyarqan. Paykunapitam munayanqanta warminkunapaq akrakuyarqan.#6.2 Kaychö ni versïculu 4-chöpis Diospa wamrankuna pikuna kayanqanpis manam musyakantsu. Talvez kayarqan unay reykuna, angelkuna o Diosman creyikuqkuna. 3Tsaymi Dios Yaya nirqan: <<Runakuna manam imayyaqpis kawayanqatsu. Paykunaqa kay patsachö ushakaqllam kayan. Tsaymi imayyaqpis kawayanqanpa rantin pachak ishkay chunka (120) watallana kawayanqa>>.
4Diospa wamrankunawan runakunapa warmi tsurinkuna täkuyanqan witsaymi jatusaq runakuna kay patsachö kayarqan. Tsay unay runakunam reqishqa alläpa puëdiq kallpasapa kayarqan.#Núm. 13.33.
5 Dios Yayam runakuna alläpa jutsata rurar kawayanqanta rikarqan. Paykunam shonqun munanqannö jutsata rurananllapaq yarpäyaq.#Mat. 24.37; Luc. 17.26; 1Ped. 3.20. 6Tsaymi runata kamanqanpita Dios Yaya alläpa pësakur nirqan: 7<<¿Imapaqraq kay patsachö runata kamarqäpis? Kananqa llapan runakunatam ushakätsishaq. Tsaynöllam llapan wätakunata, lätaypa puriqkunata y päriqkunatapis ushakätsishaq>>.
8Peru Noétam sïqa Dios Yaya llakiparqan.
Arcata Noé ruranqan
9Kaychömi qellqashqa kaykan Noé imanö kawakunqan.
Runakuna jutsata rurar kawayaptinpis Noéqa Dios Yayaman confiakurmi pay munanqannö kawakurqan.#2Ped. 2.5. 10Noépa tsurinkunam kayarqan Sem, Cam y Jafet.
11Dios Yayam rikarqan kay patsachö runakuna alläpa jutsata rurar wañutsinakur kawayanqanta. 12Maytsaychöpis runakuna jutsa rurayllaman umankuna churashqa kaykaqta rikarmi Noéta nirqan: 13<<Kay patsachö llapan runakunatam ushakätsishaq. Paykunam jutsayuq kaykäyan kay patsachö wañutsinakuy kananpaq. Tsaynö kayanqanpitam kay patsachö llapan imaykatapis jankat ushakätsishaq.
14<<Tsaynö kananpaq kaykaptinqa atska cuartuyuq jatunkaray arcata weqiyuq qerupita ruray. Yaku mana yaykunanpaq uchkunkunata jananpa y rurinpa breawan alli lashtanki. 15Tsay arcata ruranki pachak kimsa chunka pitsqa (135) metru larguta. Anchuntana ruranki ishkay chunka ishkay metru pullanta (22.5). Altuntana ruranki chunka kimsa metru pullanta (13.5). 16Tsaynölla ruranki kimsa altusyuqta. Qatanqanpita uraman pullan metruchö ventänata ruranki. Tsaynölla jukaq lädunpa punkuntapis ruranki.
17<<Mantsaypaq diluviu apäkuy tamyatam tamyatsimushaq maytsaytapis yaku tsapanqanyaq. Tsay yakuwanmi maytsaychöpis shinqar llapan wañuyanqa. 18Peru qamwanmi sïqa pactuta rurashaq. Tsaymi arcaman yaykunki warmiki y tsurikikuna warmintin. 19Tsaynölla arcaman yaykatsinki kay patsachö kaykaq tukuyläya wätakunata chinan orquta, qamkuna salvakäyanqaykinö wätakunapis salvakäyänanpaq. 20Qamkunawanmi arcaman yaykuyanqa päriqkuna, chucaru kaq wätakuna, manshu kaq wätakuna y lätaypa puriqkunapis. Cada ünu chinan orqu yaykuyätsun. Tsaynöpam paykunapis ushakäyanqatsu. 21Arca rurinman tukuyläya mikuykunata churayanki mikuyänaykipaq y wätakunapis mikuyänanpaq>>.
22Tsaymi Dios Yaya ninqannölla llapanta Noé rurarqan.#Heb. 11.7.
Currently Selected:
Génesis 6: qxn
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2011, Wycliffe Bible Translators, Inc. All rights reserved.
