Genese 4
4
1KE Adamu ame khana âiân jia Eva; me ame erkin dut me hnöku Kaina, ke haingen, ka habe, Oge hia but kap at ûnyi ga Iehova. 2Ke e ame hnokoâ hmetu jia Abela a keiny. Haba Abela, me, at tuö mamoe, ke haba Kaina, me, at belökâ kânâ. 3Ke hwaban ke ta je bong, haba Kaina ame hom ke troban kânâ hnân hut kö Iehova. 4Ke haba Abela, e ame hom ûnyi hnyi hna hat mamoe je lakon a bân me je meno ae pipikhenya. Ke Iehova ame oûnyihnathu Abela me anyin hut: 5kʼ ame ca oûnyihnathu Kaina me anyin hut. Me Kaina ame hmönyin gan hmâ, me khöt ut hnyimakan. 6Haba Iehova ame ha kö Kaina, ka habe, Ieû gam u me hmönyâm? kʼ ame khöt hnyimâkâm geû? 7U je ne ânyâ so, hawa adre me ca he ka köp u? ke u ka ca ânyâ so, awe, ame bate-tot hulö hnyi hwanuma: kʼ ame ke ka e hmelâm weny, ke u ma he ka musö e. 8Ke Kaina ame thumetu Abela a keiny. Ke tiga ödru hnyi ta hnyei haba Kaina ame tot kö Abela a keiny, me hlingâ. 9Ke Iehova ame ha kö Kaina, ka habe, Ewa Abela a kem? Ke e ame thu, ka habe, E ca khanö nya: hawa, inya at tuö keik? 10Ke e ame ha, ka habe, Ieû e u je ânyâ? ame tönge könya ifucin dren kem ûnyi hnyi kânâ. 11Ke walang ang u je hnaûha-ngö but ûnyi ge kânâ, waleji a memang ut me cem dren kem ûnyi hnyi hnyamâm; 12u ka belökâ kânâ, ame ca he hmetu ka ohwenyingâ gânâ; ke u ma he bi u ka at baû, me at he monu eang hmeledrany. 13Ke haingö Kaina ko Iehova, ka habe, E gan hmâ hwaban könya ke ca khanö nya he ka hok hnyokâ. 14Wâ bi u je hia but obö nya hnyi bong ang ûnyi hnyi hon kânâ: ke oge me he ka iyong ut hnyimâkâm; ke oge me he bi nya ka at baû me he monu eang hmelen; wale mʼ adre me he ka hlingö nya hnen tavat hia adre me he ka ō nya. 15Haba Iehova ame ha kâu, ka habe, Anyin a wale, haba at ame he ka hlingö Kaina, me, adre me he ka ibi oseven bi hwaban hmetu kâu, Ke haba Iehova ame bi hatö Kaina, wâ e nye hlingâ hnen ke at ame he ka wâ e.
16Ke Kaina ame he but ûheny hnyi hnyimakö Iehova, me laba hnyi hnyei Noda, Edena ke e deiö. 17Ke Kaina ame khana thö âiân; me e ame erkin dut me hnöku Enoka: ke e ame otilâ ke taun, me hwenyi ien taun, hoton ien nokon, jia Enoka. 18Ke Enoka ame hnöku Irada: ke Irada ame hnöku Mehujaela: ke Mehujaela ame hnöku Methusaela: ke Methusaela ame hnöku Lameka. 19Haba Lameka ame hok lo momo; Ada ien ke at, ke Zila ien ke at. 20Ke Ada ame hnöku Jabala: e kamen tavat adre laba hnyi je uma mano, me tren meno. 21Haba ien keiny, me, Jubala: e kamen tavat hia adre khenen hom kitara me utköwi. 22Ke haba Zila, me e ame hnöku Tubala-kaina, at ame op ta je ûnyi hia a bras me fao hnân subâ: ke haba Naama hani Tubala-kaina. 23Ke haingö Lameka ka li âiân, ka habe,
Ada me Zila lö, löng ju hok hofuc;
Öbu laöiö Lameka lö, tevelöng ju ifucik:
Anyin oge hia but hlingâ at, oge aatö gan,
Ke hidröu, anyin a e ame okongu nya:
24Adre ne he ka oseven bihwaban ga Kaina, A we, sevente seven ga Lameka bi.
25Ke Adamu ame khana hmetu âiân; me e ame hnokoâ da, me hwenyi ien Setha: anyin a haingen, A hia but Khong ham könya ke mâtrân hwabö Abela; anyin a hia but Kaina hlingâ. 26Ke haba Setha, adre hnokoâ nokon ke da; ke e ame hwenyi ien Enosa: wale ûen ame bi hwân tavat he ka hawâ iö Iehova.
Currently Selected:
Genese 4: IAAI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
maintained by the British and Foreign Bible Society
