APOSTOLO MAGA 6
6
1Ma naaleatia maga wanogoe, ragi waina tea vasapiseikiana maga eu do disu po laapa, natauruuruana sikai e pakilina m̃aleoputo kakada, tea ni Yudea maga waina eu pasa pae Hellas eu dauruuru dip̃a tea maga waina eu pasa pae Heberu, nalakena nagoroi malepu adeada maga eu pei tea leo kalauana nasuasuaana ni sara naaleatia. 2Go tea rualima sikai tamate dua eu soso taua ni tea vasapiseikiana maga umai punusi ra, po naga, E da p̃ia mau naga kinami auga toropusi navasaana ki Sup̃e ega madoko, po magi wede maga suasua. 3Nalakena tea wanogoe, tai maga, kuga tum̃amu leo matadoa m̃elu dua ki mu naatam̃oli larua, waina eu pei tea noasokisokiana, waina eu pura ki Naatana go ki namanumatuaana, waina auga lawo ki da dap̃au nawosiana waia. 4Ma kinami auga wo doko mau doko natapasavasaana go nasuasuaana ni navasaana. 5Go taua mamau eu dogo m̃ata ki navasaana wanogoe: go eu matadoa Stefano, naatam̃oli sikai waina e pura ki nasaralomauana go ki Naatana Tapu, go Filipo, go Prokoro, go Nikanor, go Timon, go Parmena, go Nikolao proseluto sikai ni Antiokia: 6waina eu lawo ki da narae ni apostolo maga: go ragi waina eu dapasavasa sua, eu pusake nam̃elearuda maga ara.
7Go navasaana ki Sup̃e e disu po p̃arua; go naveveana ni tea vasapiseikiana maga e disu p̃arua po laapa sa Yerusalem, go taua warua ni tea viri maga eu dogo paratiki nasarolomauana.
8Go Stefano, waina e pura ki nasaup̃iaana go nakasuaana, e mari tea ni namagaana warua maga go navaivaiana maga m̃aleoputo ni narei. 9Ma tea ni nasum̃a ni nasaisaiana waina e pei tea sosoana ki nasum̃a ni nasaisaiana ki tea Libertini maga seara kakada eu duleana, nara ma tea ni Kurene seara kakada, go tea ni Alexandria seara kakada, go tea ni Kilikia go Asia seara kakada, po pululu ki Stefano. 10Go eu mari sa lawodugoro namanumatuaana go Naatana waina e pasa asa. 11Ragi wanogoe eu dautau naatam̃oli seara waina eu naga, Au dogoe epasa navasaana sa dip̃a Moses go Sup̃e. 12Go eu pasadie narei, go tea matua maga, go tea midiri maga, po umai pa paratiki nia, po pua soki a, po piragi a paki nasaisaiana ni navasap̃otaeana, 13po mari tea noasokisoki sorosoro seara eu lawodu, waina eu naga, Naatam̃oli waia e da makoto ki nia mau, ma e do pasa navasaana maga dip̃a tokora tapu waia, go nawotaeana: 14nalakena au po dogoe enoa, naga Yesu ni Nasareth waia ega wo dakai tokora waia, po doa natomariana maga waina Moses e dua gida ara. 15Go tea maga mamau puti waina eu doko nasaisaiana ni navasap̃otaeana, eu leosoki a, po punusi naraena e dakiusi narae ni agelo sikai.
Currently Selected:
APOSTOLO MAGA 6: NTB
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Bible Society of the South Pacific
