Burqesun 7

Oç̌ala xenen ç̌axpsun

1 Q'ončuğon Noya pine: «Vi külfətəl ext'i gəminə baki; oç̌ali ç̌oyel bakala amdarxoy boş saycə hunen Bez piyes düzgün ak'eśi. 2Gəminə bağat'an Bezi və̌x uksuna icaza tadi, halal hesabbakala heyvanxoxunal hərt'uxun vǔğ çüt, yəni sa ərkəy, sa dişi, vaxun ext'a. Bezi və̌x uksuna icaza nu tadi, haram hesabbakala heyvanxoxun isə hərt'uxun sa çüt ext'a. 3Q'uşurxoxunal hərt'uxun vǔğ çüt, yəni sa šumak' q'a sa dadal, ext'a. Barta kot'oğoy śil maq'an əfçibaki. 4Zu t'etər booz ki, vǔğ ğinaxun oşa q'ırx ği-q'ırx üşe ağala eğale, oç̌ali ç̌oyel Bezi yaratmişi k'ə bunesa əfçibakale». 5Noyenal bitova Buxačuğon içu pi k'inək' bine.

6Oç̌ala xenen ç̌axk'at'an Noye ǔqbaç̌ yəşe buy. 7Xenen içoğo maq'an taşeri pi, şot'in iz çuğo, ğarmoğo saal ğarmoğoy çupuxxoval ext'i izi düzbi gəminəne baśi. #7:7 Mat'. 24:38-39; Luk'. 17:27 8-9Buxačuğon içu tapşurbi k'inək', şot'in gəminə bağat'an halal q'a haram heyvanxoxun, göynul purk'ala q'uşurxoxun, oç̌ali loxol xoreğala heyvanxoxunal bitot'uxun çüt-çüt exedi, hərt'uxun sa ərkəy, sa dişi.

10Vǔğ ğinaxun oşa oç̌ala xenen ç̌axpsane burqi. 11Noye ǔqbaç̌ yəş baki t'e useni p'ə̌mci xaşe vǔğes's'emci ğine oç̌ali oq'a bakala xeyure posp'i c'eri, göyurxoy q'a oç̌ali ǰomone ə̌meśi, 12oç̌ali loxolal q'ırx ği-q'ırx üşe biq'i lağala ağalane hari.

13Oç̌ala xenen ç̌axp'i t'e ğinene Noyen iz çuğo, izi ğar Şema, Xama, Yafet'a saal xib bina ext'i gəminə laśi. 14Gəminə lağat'an şot'in içuxun sagala oç̌ali loxol tarak'ala q'a xoreğala heyvanxoy bito cürəxun saal göynul purpes bakala q'a purpes nu bakala q'uşurxoxunal bitot'uxun exedi. 15-16Noyen Buxačuğon içu tapşurbi k'inək' oç̌ali ç̌oye iz boş nəfəs taśi eğala k'ə bunesa bitot'uxun çüt-çüte ext'i - sa ərkəy, sa dişi. Şorox gəminə bat'unśi, Buxačuğonal gəmin ç̌omo şot'oğoy bač'anexun but'ek'i.

17Oç̌ala düz q'ırx ği xenene ç̌axp'i. Oç̌ali ç̌oyel xe gelebaksunen gəmi ěqesane burqi, 18hariyal t'emane baki ki, gəmi lap alloy ěqeśi xene ç̌oyel manedi. 19Hari buybaki xene kiyexun oç̌ali ç̌oyel bakala buruxmuğoy bul tene ak'esay. 20Xene oq'ane mandey şorox bito, ən alloy buruxmoğoxun hələ sa q'os's'e ə̌mal alloye ěqeśey xe. 21Oç̌ali ç̌oyel iz boş elmux bakala k'ə bunesa - q'uşurxo, k'ojin q'a ə̌qnə heyvanxo, xoreğala heyvanxo saal amdarxoy bito k'as'eśi. 22İz boş nəfəs taśi eğala k'ə bunesa, oç̌ali loxol bakalt'oğoy bito k'as'eśi baredi. 23K'ə bunesa bito - amdarxo, oç̌ali loxol tarak'ala q'a xoreğala heyvanxo, q'uşurxo! Nə sa dənə amdar, nəəl sa dənə heyvan tene mandi. Saycə Noy q'a şot'oxun sagala gəminə baśiyoroxe dirist' mandi. 24Düz sabaç̌ əlli ğiyal oç̌ali loxol bakala xe tene zap'eśi.

Currently Selected:

Burqesun 7: udi

ማድመቅ

Copy