Jénesii̱s 49
49
Bi̱ tsꞌén katsꞌénchikonñé Jakoo̱b ndií
1Kó Jakoo̱b tsíchji̱a̱a̱ ngayeje ndií tsi̱ꞌe̱ nga ka̱matikó, ngatꞌa̱ kamámejeén ka̱tso̱yaa̱ ni xi sꞌe̱ ka̱ma nga kjo̱chó ni̱xtjin, kó bi̱ katsoó:
2«Jún xi ndína jún, ja̱bíchonjnúꞌun,
ndiboá ndaꞌyájnúꞌun ni xi xiyajnúꞌun.
3»Ji Rubee̱n, jí boá xi ndína xi xchá,
jí boá xi ndí tjónna,
jí boá xi akake nga kamá an na̱ꞌmi,
jí boá xi tjón yandikoón,
jí boá xi ꞌniú tjiín ngaꞌniú.
4Ta̱nga ji ꞌniú ndajínkjiꞌi ni xi kiniꞌínje̱ní,
ngatꞌa̱ katsjajnije̱ ji
ngo chjo̱ónna.
Kuíni nga nguiti̱ jíjín xi tjón ka̱ma ji,
ngatꞌa̱ ji xikónií ndáchíkoón,
nga májín foxioó.
5»Simeo̱n ko̱jo Lebi̱, jún xí xikónií cho̱ tamá xi ꞌbé nguindie kꞌijñáján,
nga ngatsjé ni̱xtjin kjánjo̱xchanná.
6Mejénjínna ki̱a̱ kotíjñajojnúꞌun
ko̱jo tsi ki̱a̱ kjótsoꞌbájo̱jnúꞌun,
ngatꞌa̱ kjiꞌa nga katsꞌénxchán,
katsꞌénkꞌién xota̱ ko̱jo katsꞌénxi̱ nga katsꞌénkꞌién cho̱yojo toro̱.
7¡Ngatꞌíko̱jonii̱ kjo̱a̱tamaá!
¡Ngatꞌíko̱jonii̱ kjo̱a̱xcha̱án!
Án boá xi sa̱ꞌin an nga xota̱ tji̱e̱e̱ stso̱joboa
ngayeje na̱xi̱ńdá Israee̱l.
8»Kó jí Judáa̱, jí boá xi si̱ꞌíi̱n kondra̱ tse̱,
kó ntsꞌie ji sku̱i̱e̱ ndikoón,
kó ngaskande ku̱i̱ndyiańña má nguindyikin ji.
9Jí boá xi xikoó ngo xandi̱je̱ tamá,
xi nguije katsꞌeén nga iskjinie cho̱ xi kasakoo̱
kósꞌe̱ fojña tꞌananguii̱,
kó ꞌyá xí ka̱maa̱ sa̱ꞌínxtií ji.
10Ngatsjé ni̱xtjin kꞌuijñá ngu̱i̱ya ndse̱ ji
yánisié xi ko̱tixomeni ji,
ngaskande tsí nga kjo̱e̱ꞌe kui re xi ja̱koxi̱i̱,
kui xi ko̱tíxoma ngayeje nga̱sondiee̱.
11-12Kui xi ꞌniú iní ngase ndyi̱ko̱n xikoó binoo̱,
kó ṉꞌni̱u̱ tiboa ngase xikoó tsjeén.
Kui xi ku̱i̱ꞌítaꞌniú ndí bórró xíꞌiín
ńꞌniú xí nda ngasee̱ ńꞌniuú yátostsi̱je̱é,
kó nde kjo̱a̱ꞌáxínjín ńjñoo̱
nga tsie jín sa̱ꞌínndándiní xikó maá tsi ndejé xi bino̱.
13»Kó jí Sabuloo̱n
tꞌa ndáchíkoón ku̱i̱ndyin ji,
kó ki̱a̱ tꞌa ndáchíkoón ka̱ma ngu̱i̱ndie nínga kjo̱chó ngayeje tjotso yiꞌii̱,
kó ngaskande nangui Sidoo̱n ka̱ma tsindioó ngu̱i̱ndie xi tse̱.
14»Kó jí Isakaa̱r,
achichí ꞌniú jí xikoó ngo bórró,
xi jó ngu̱i̱ndie nínga kjién cho̱ tsꞌénkjaꞌyá.
15Kjiꞌa nga xche̱ ji nga tꞌananguíi̱
nda ko̱jo tsjáchon ka̱ma tsi̱ꞌe̱ nga si̱ꞌankjaꞌyá,
chjiéngá tsja kꞌuieé nga si̱ꞌinjo̱ꞌo ji,
nga si̱ꞌin ji xá xí tsꞌén ngo moso̱.
16»Kó jí Ndaa̱n,
jí boá xi kixi̱ ko̱tixomée̱ na̱xi̱ńdáa̱,
ngatꞌa̱ ki̱a̱ ndokjo̱e̱ ji ngo xtín xota̱ xi chji̱a̱ni Israee̱l.
17Jí boá xi xikoó ngo ye̱
xi tsꞌénkoya tꞌa ndi̱ya̱á,
kui xi nga kjiniee̱ se ndi̱je̱e̱,
ka̱márií kꞌo̱ka nga̱xto̱n nda̱ xi tjísoón ndi̱je̱e̱.
18»¡Ji Ne tsa̱ꞌa̱n, to̱kó tsꞌénkoya an kjo̱a̱bosíko̱jóo̱ ki!
19»Kó jí Ngaa̱d, kjín ka̱ma
xota̱ chejé xí skjánjoo̱ ji,
ta̱nga nde sku̱i̱e̱jín kui jaá
ñání nga chjábéníi̱ nga si̱ꞌíi̱n.
20»Kó jí Asee̱r,
achichí ni nda chinie xi kꞌuieé ji,
kó jí boá xi si̱ꞌinde ji ni chinie xi ꞌniú nda ngasee̱,
kui xi kjinie ngo nda̱ re.
21»Kó jí Neftalii̱, tsjaári kjo̱a̱ndeé,
ji xi xikónií ngo ndi̱kꞌijñá chjo̱on xí tsoꞌbá ndé,
ngo cho̱ na̱an xi achichí tsjákón ndií.
22»Kó jí Kosiee̱, jí xí xikónií ngo ndi̱je̱
xi kjimaxchá nínga tjín ndójoa xi tjitjó má.
Chíkji̱ ji, kó ꞌmikijintꞌe ji ngo xó.
23Xota̱ xi ndajín chꞌoo̱ ji,
tsꞌénbosieén yáyojó,
24ta̱nga ji ngatsjé ni̱xtjin nga ꞌniú tikón yáchjónyáa̱,
kó jmí ni̱xtjin mindiyá tjiáa.
¡Ndokꞌóchji̱í kui Ne xi tsi̱ꞌe̱ ngayeje ngaꞌniuú,
kui xi tikóntjoón ko̱jo tsꞌénkoón Israee̱l!
25¡Ndokꞌóchji̱í kui Néná xí tsi̱ꞌe̱ na̱ꞌmíi̱,
kui xi tsꞌénbosikójoo̱ ji!
¡Ndokꞌóchji̱í kui Néná xi ngayeje nii̱ xi maa̱,
ko̱jo kui xi ngatsjé ni̱xtjin tjítsꞌénchikonñeé ji!
¡Kó tsꞌéntsjaá kjo̱a̱niꞌánchikonñeé ndiꞌakꞌajmi xi tikón nkꞌaján!
¡Kó tsꞌéntsjaá kjo̱a̱niꞌánchikonñeé nínga ꞌniú na̱nga̱a̱ ndáchíkoón!
¡Kó tsꞌéntsjaá kjo̱a̱niꞌánchikonñeé na̱an xi tjiín ndí ko̱jo xi ndyi̱tsꞌenkí ndií!
26Na̱ꞌmíi̱ tsie ngase kjo̱a̱niꞌánchikonñé
xi tsꞌéntsjaá ji,
ta̱bo̱a̱jiín kjo̱a̱niꞌánchikonñé xi tsjá ngo na̱xi̱ xi tikón ngatsjé ni̱xtjin.
Tse̱ boá ngayeje kui kjo̱a̱niꞌánchikonñeé,
jí boá xi tsoboaá kui nii̱ ji Kosie̱,
ngatꞌa̱ ngu̱i̱jii̱n já ntsꞌie ji,
jí boá xi ꞌniú yá ndikón ngasee̱.
27»Kó jí Benja̱, jí boá xi xikoó ngo cho̱lobo̱ xi tamá,
kui xi nga ta̱jño̱ó kjinie cho̱ xi katsꞌénkꞌién,
kó nga kamánguixoón tsꞌenkábí ni xi ꞌbonguii̱.»
28Bo̱a̱ tsꞌén katsꞌénchikonñé Jakoo̱b nga tiejó ndií. Nga ngo nga ngo kui jaá xi chji̱a̱ni nga tiejó xota̱ tji̱e̱e̱ Israee̱l, katsjaá kui kjo̱a̱niꞌánchikonñé xi tsoboaá.
Bi̱ tsꞌén kꞌien Jakoo̱b
29-31Nguije katsꞌénchikonñé ndií Jakoo̱b, bi̱ tsꞌén atíxomaa̱:
«Jè ta̱ chiboa tsí chajana nga ko̱ya an, kó mejénna nga ngo kjo̱a̱nda kuíꞌájnúꞌun, nguije ko̱ya án ki̱a̱ tjanijínjnúꞌun nínga kjiyojonijín xota̱ xi xchána. Ki̱a̱ ti̱xa̱ na̱xi̱ xi tikón kꞌijñá xi Abraa̱n tsꞌatsiee̱ Efroo̱n nda̱ xi xota̱ tji̱e̱e̱ Ee̱t chji̱a̱ni, tsi̱ꞌe̱ nga ki̱a̱ ko̱ónijín na̱ Sara̱ chjo̱ón. Ki̱a̱ nínga kjiyojonijín Abraa̱n ko̱jo Isaa̱ ko̱jo na̱ Rebekaa̱, kó ti̱ ki̱a̱ yinijín an na̱ Líaa̱ nga. Kui ti̱xa̱ na̱xi̱i̱ ki̱a̱ tikón nangui Kanaa̱n tꞌa kꞌijñá Makpelaa̱, kje̱n kꞌijñá Mamree̱. 32Kui ngu̱i̱ndiee̱ ko̱jo kui ti̱xa̱ na̱xi̱i̱, xota̱ tji̱e̱e̱ Ee̱t boá xi kitsꞌítsiéjne̱».
33Kó nguije kamaá Jakoo̱b nga atíxomaa̱ ndií, ítikó yojoo̱ nga̱són ṉchaa̱n, sꞌe̱ kꞌien nguijee̱.
Currently Selected:
Jénesii̱s 49: MAIX
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014