Jénesii̱s 38
38
Bi̱ kamaá Judáa̱ ko̱jo na̱ Tamaa̱r
1Kui ni̱xtjinján Judáa̱ jatjoxíntꞌaa nínga síndo já ntsꞌi̱e̱, kó ki̱a̱ kijí nangui Andulaa̱n nínga tikón ngo nda̱ xi nda yaꞌa xi Iraa̱ kiꞌmí kó ki̱a̱ kisꞌijña. 2Kó ki̱a̱ Judáa̱ kamábe tsa̱kji̱ín ngo nda̱ Kanaa̱n xi Súa̱ kiꞌmí, kó ixánjo̱ kui naa̱. Nguije jaꞌa ni̱xtjin, 3kui naa̱ tsaꞌa ngo ndí, kó katsen kui ndií. Kó Judáa̱, Ee̱r ítꞌa jaꞌén.
4-5Ngui̱chí sájín, chjo̱ón Judáa̱ ngui jó ndí kisꞌiee̱, kó ngo xi Onaa̱n ítꞌa jaꞌén, kó xi ingoo̱ Selaa̱ ítꞌa jaꞌén, kui ndí xí jetꞌaa̱ nangui Kesii̱b katsen.
6Jaskan Judáa̱ tsanguii̱ chjo̱on ndí tjoón kui xi ꞌmí Ee̱r, kó ngo na̱ xi ꞌmí Tamaa̱r katsꞌénkixanjo̱. 7Ta̱nga Néná tsjájín kamaá ni xi katsꞌén Ee̱r, kó Néná nguiti̱ katsjandiéjiín nga kisꞌijña ngase nga̱sondie.
8Kósꞌe̱ Judáa̱ bi̱ katsoó Onaa̱n: «Tsjajnije̱ ji chjo̱ón ntsꞌie, kó ti̱xenje̱, ti̱ꞌinkjatjosén ji ni xi tsoboaá nga chja̱ ji, ki̱a̱ ka̱maa̱ nga ngatꞌaa̱ ji nga kꞌuieé xota̱ tji̱e̱ ntsꞌie ji».
9Kó nga kamábe Onaa̱n nga kuijín tsi̱ꞌe̱ ka̱ma ndí xí kꞌuieé xo̱ngo̱ó, kjiꞌa nga kisꞌiejo̱ kui xota̱chjo̱on, katsjandiéjiín yojoo̱#38:9 Ni xi chji̱a̱ xo̱jo̱n eén Néná kꞌi̱e̱e̱, kjo̱a̱a̱ nga kui nda̱ xi ꞌmí Onaa̱n kamámejénjín xoó, nga ndí xi kꞌuieé kui ko̱jo kui naa̱ nga tsi̱ꞌe̱ ntsꞌi̱e̱ ka̱ma, kó xín xó iskjitjón ndáxójmaá yojo ndikoón. nga ndí ko̱a̱ꞌa̱ kui naa̱, ngatꞌa̱ kamámejénjiín nga ngatꞌaa̱ kui nga kꞌuieé xota̱ tji̱e̱ ntsꞌi̱e̱ xi kꞌiee̱n. 10Kó tsjájín kamaá Néná ni xi katsꞌén kui nda̱a̱, kó nguiti̱ katsjandiéjiín nga kisꞌijña ngase nga̱sondie.
11Kósꞌe̱ Judáa̱, tsíchji̱a̱jo kja̱ndaa̱ nga bo̱a̱ katsoó nga kꞌuijñákꞌán ra, kó nga ndiꞌaa̱ na̱ꞌmíi̱ kꞌuijñá ra ngaskande nga ka̱maxchá ndií Judáa̱ xi ꞌmí Selaa̱. Bo̱a̱kjíꞌí ni xi katsoó, ngatꞌa̱ katsꞌénkjó nga tsi ta̱ bo̱a̱ tsꞌén ko̱ya ndií xi̱ꞌba̱ nga, xikótsꞌen jesón xi ngasee̱. Kó kuíni nga na̱ Tamaa̱r kijí ndiꞌaa̱ na̱ꞌmii̱, kó ki̱a̱ kisꞌijña.
12Nguije jaꞌa ni̱xtjin tichaa̱n kꞌien chjo̱ón Judáa̱. Kó Judáa̱ nguije kisꞌijñaxa̱ꞌya̱a̱ chjo̱ón, kijí nangui Timnaa̱t nínga síndo já xí botie tsja̱a̱ cho̱tsa̱nga̱ xi tsi̱ꞌe̱, kó kijíjo̱ Iraa̱, nda̱ Andulaa̱n xi nda tsaꞌa.
13Kó tjín xí kijítsáyaá na̱ Tamaa̱r nga chiꞌyaá nangui Timnaa̱t tsꞌénfí nga tsa̱nga̱a̱ cho̱tsa̱nga̱a̱ tsꞌénfíkjaꞌá. 14Kósꞌe̱ jaꞌáxín ńjño xa̱ꞌya̱ xi yajá, kó ngo ńjño xo̱ꞌba̱ íꞌmá kje̱n tsi̱ꞌe̱ nga jmíjín xi sku̱i̱e̱ ꞌyá kuí bo̱a̱, kósꞌe̱ ki̱a̱ kisꞌijña nga̱ntjo̱a̱a̱ na̱xi̱ńdá Enaii̱n, ki̱a̱ tꞌa ndi̱ya xi fí nangui Timnaa̱t, ngatꞌa̱ kamákjiín nga Selaa̱ je kamáxchá ta̱nga kiniꞌánkixanjo̱jín kuí.
15-16Nga kamábe Judáa̱ kui naa̱, kamákjínjiín tsi kja̱ndaa̱ xi̱ꞌba̱, katsꞌénkjó nga na̱ masien boá, kó kijíkón tiñaa̱, kó bi̱ katsoó:
—Ji, a ka̱ma kjojñajo̱ chií.
Kósꞌe̱ kui naa̱ bi̱ katsó:
—Tsi jo̱o̱n xiaán, mí ni xi ko̱e̱ꞌéní tsi̱ꞌe̱ nga tsjandié an nga tsjajníje̱ní.
17Ngo ndií ndí tindso̱ xi síndona sanguiyaa —katsó kui nda̱a̱.
—Ka̱ma —katsó kui naa̱—, ta̱nga ngo ni xi tse̱ tꞌíjñinguiní tsi̱ꞌe̱ nga skuie an nga kꞌuíchjíní.
18—Kó, mí ni xi mejeén kꞌuijñaá —katsó Judáa̱.
—Mejénna kꞌuijñíní seyoo̱ ko̱jo ńchjón xí tjítꞌa, ko̱jo yánisié xi titsjayindse̱ —katsó kui naa̱.
Kó Judáa̱ jo̱ꞌo katsó ni xi kiꞌmií, kósꞌe̱ kisꞌiejo̱ kui naa̱, kó kui naa̱ tsaꞌa ndí. 19Jaskan nguije kijí Judáa̱ jastjíe̱n na̱ Tamaa̱r kósꞌe̱ kijí, kó jaꞌáxín ńjño xo̱ꞌba̱ xi kjiꞌma kje̱n kó tsajá nguiní ńjño xa̱ꞌya̱a̱.
20Ngui̱chí sájín Judáa̱ katsanguiyajo̱ kui ndí tindsoo̱ kui nda̱ xi ꞌmí Iraa̱, nda̱ xi nda tsaꞌa, tsi̱ꞌe̱ nga sa̱ꞌínkꞌasꞌiee̱n kui naa̱ ni xi íjñangui, ta̱nga kui nda̱a̱ nguiti̱ kasakojiín kui naa̱ nínga kisꞌijña má ra. 21Kósꞌe̱ asíyaá já xí chji̱a̱ni kui ngu̱i̱ndiee̱ nga bi̱ katsoó:
—Ñá tikón kui na̱ masien xi ꞌbíjñá tꞌa ndi̱ya̱á nangui Enaii̱n.
Kó bi̱ katsó kui jaá:
—Kji̱e̱ ngojín na̱ masien xi ꞌbé kꞌi̱e̱e̱.
22Kósꞌe̱ kui nda̱a̱ kijí nguiní nínga tikón Judáa̱, kó bi̱ katsoó:
—Kasakojínna kui naa̱, kó já xí chji̱a̱ni ki̱a̱a̱ katsóyana nga ngojín xó ínchjín masien kui ngu̱i̱ndiee̱.
23Kó Judáa̱ bi̱ katsó:
—¡Ja̱ ngakjíbé ngayeje kui nii̱! Ta̱nga nga jmíjín xi bo̱a̱ ka̱tso̱ nga tsꞌenkjatjosónjín an ni xi chjiá an. Jè katsanguiyaa ji nga kꞌuínje̱ ji kui ndí tindsoo̱, ta̱nga nguiti̱ kasakojiín kui naa̱.
24Nguije jaꞌa ma ra ján sá, tjín xí bi̱ katsoó Judáa̱:
—Na̱ Tamaa̱r tjín ra xi kisꞌiejo̱ ngatꞌa̱ ndí jè yaꞌa.
Kó Judáa̱ bi̱ katsó:
—ꞌNa̱xiéjnú kui ngu̱i̱ndiee̱ kó tꞌítí tikónjnú.
25Ta̱nga nguije tjíꞌnaxié kui naa̱, ngo én katsanguiyaa̱ chiꞌyaá nga bi̱ katsoó: «Kui xota̱ xi tsi̱ꞌe̱ kui nii̱, kuí boá xi tsi̱ꞌe̱ ndí xí yaꞌa an. Kó bi̱ katsó ngase: Nda tsitsíjìi̱n ꞌyá xí tsi̱ꞌe̱ kui seyoo̱ ko̱jo kui ńchjón xí tjítꞌa ko̱jo kui yánisieé».
26Nguije kamábe Judáa̱ nga kui tsi̱ꞌe̱ ngayeje kuí nii̱, bi̱ katsó:
—Án boá xi konna kjo̱a̱a̱ kui ni xi kamaá, jmí tsi na̱ Tamaa̱r, ngatꞌa̱ án boá xi katsjandiéjín an nga ndína Selaa̱ kisꞌijñajo̱.
Kó Judáa̱ nguinijánjín kisꞌiejo̱ ngase kui naa̱.
27Jaskan nguije jaꞌa ni̱xtjin katsen ndií na̱ Tamaa̱r, kó ndí ꞌni̱o̱ kisꞌiee̱.
28Nga tjítsen ndií, ngo xi tjón tsꞌaxié tsja, kó kui xota̱chjo̱on xí tsꞌénꞌboje̱n ndií ngo ńchjón iní ítꞌa tsja kui ndí xí tjón tsꞌaxié tsjaa, kó bi̱ katsó: «Kuí bí xi̱ꞌbi̱ xi tjón katsen». 29Ta̱nga kui ndií, ti̱ katsanguisꞌien nguiní tsja, kó xi ingoo̱ boá xi tjón katsen, kósꞌe̱ kui xota̱chjo̱on xí tsꞌénꞌboje̱n ndií bi̱ katsó: «Ndi̱ya xí kachjéxꞌé jí» kó Faree̱#38:29 «Faree̱» xi tjón kjíxꞌá ndi̱ya, tsó nga én ebreoo̱. ikítꞌa jaꞌén. 30Jaskan katsen ndí xí ingoo̱ kuí xi ikítꞌa ńchjón iní tsjaa, kó Seraa̱ ikítꞌa jaꞌén.
Currently Selected:
Jénesii̱s 38: MAIX
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014