Jénesii̱s 32
32
Bi̱ tsꞌén Jakoo̱b katsanguiyaa̱ chji̱ni̱e̱ꞌén Esau̱ ntsꞌi̱e̱
1Kó Jakoo̱b kijí ra ndi̱ya̱á, kó ki̱a̱ jatjokjaá jó ndítsjiee̱ Néná. 2Kó kjiꞌa nga Jakoo̱b kamábe kui ndítsjiee̱, bi̱ katsó: «Ngui̱ndie nínga tsꞌénkjaꞌyá Néná boá kꞌi̱e̱e̱». Kuíni kui ngu̱i̱ndiee̱ «Jó ngu̱i̱ndie nínga niꞌankjaꞌyá» ítꞌa jaꞌén.
3-4Jaskan nguije kamá kui nii̱, Jakoo̱b katsanguiyaa̱ já chji̱ni̱e̱ꞌén Esau̱ ntsꞌi̱e̱, kui xi tikón ki̱a̱ nangui Endoo̱n. Kó kuí já chji̱ni̱e̱ꞌeén kiꞌmíyá cha̱n cha̱a̱n nga bi̱ ka̱tso̱o̱ Esauu̱:
«Nda̱ ntsꞌie ji Jakoo̱b boá xi katsanguiyajne̱ nga kꞌuiyájne̱ ji nga je tikónnda kui xikoó tsi mosóo, kó tsꞌéntsáyaá jí nga ki̱a̱ kisꞌijña nínga tikón tsini Labaa̱n. 5Kó nga je tjiín cho̱yojo, ko̱jo bórroó, ko̱jo cho̱tsa̱nga̱ ko̱jo moso̱ xi ínchjín ko̱jo xi xi̱ꞌin. Kó kuí boá xi katsanguiyajne̱ tsi̱ꞌe̱ nga kꞌuiyájne̱ ji nga si̱ꞌinjo̱ꞌo ji nga kji̱ndi̱boákoón kuí».
6Kó kui já chji̱ni̱e̱ꞌeén nga kjindiboáꞌoyá nguiní nínga tikón Jakoo̱b, bi̱ katsoó: «Jè tsanguínjne̱, kó kandokjo̱a̱jojne̱ ntsꞌie, kó ki̱a̱ tji̱e̱nguijne̱, kuí má bo̱a̱ xi tsꞌéndibakjaꞌá yíndi̱ya̱á, kó nijón úchán já xíꞌin tji̱e̱njo».
7Kósꞌe̱ Jakoo̱b achichí katsakjónní, kó nda̱ kamaá, kósꞌe̱ jó tjín katsꞌén xota̱ xi tjimájo̱ ko̱jo ngayeje cho̱ xi tjiín, kó jó ndié katsꞌénkꞌíndo, 8ngatꞌa̱ bi̱ tsꞌén katsꞌénkjó: «Tsi Esauu̱ kji̱ndi̱boá, kó tsi skjánjo̱ xtín xota̱ xi síndo ngo kui ngu̱i̱ndiee̱, ka̱márií ko̱nga xtín xí síndo xi ingo ndieé». 9Kósꞌe̱ Jakoo̱b bi̱ katsó nga tsíchji̱a̱a̱ Néná:
«Ji Ne xi tsi̱ꞌe̱ na̱ꞌmindyiboana Abraa̱n ko̱jo na̱ꞌmina Isaa̱, Jí boá xi bo̱a̱ kasení nga kji̱ndi̱boáꞌoyá nguiñá an nanguina ko̱jo nínga síndo xota̱na, kó nga ji xi ko̱sike̱jení. 10Achichí nda niꞌínje̱ní, nda tsi tsoboájínna nga ko̱sike̱jení, ngatꞌa̱ an boá xi moso̱ tse̱, kjiꞌa nga jaꞌatio an ndejé Jordaa̱n, jmí ni kisꞌiejínna ngasꞌe̱, ta̱ ngo tsí yánisié tsaꞌa an, kó ngotꞌe̱ ꞌne̱ ngaskande jó tjín xota̱ ko̱jo cho̱ xi síndona. 11-12Jí boá xi bo̱a̱ kasení nga nda ko̱e̱je̱na, kó nga xota̱ tji̱e̱na kjín ka̱ma xikó maá tsomí xí tjín tꞌa ndáchíkoón, nga nde maxki̱jínná. ¡Ngotꞌe̱ ꞌne̱ xín ti̱ꞌinkjeꞌe ji ni xi ndajín xi mejeén sa̱ꞌínjo̱na ntsꞌié án Esauu̱! Ngatꞌa̱ tsakjon an nga kji̱ndi̱boá kó sa̱ꞌínkjiéjne̱ ngayejejne̱».
13Kó Jakoo̱b ki̱a̱ jaꞌaa̱ ni̱xtji̱e̱n kui ngu̱i̱ndiee̱, kó jaꞌájin cho̱ xi tjiín xi ta̱ tsja̱árií Esau̱ ntsꞌi̱e̱, 14iskjíbé jó úchán tindso̱ ínchjín ko̱jo kan tindso̱ xi̱ꞌin, jó úchán cho̱tsa̱nga̱ ínchjín ko̱jo kan cho̱tsa̱nga̱ xi̱ꞌin, 15kantié cho̱toꞌoyitsꞌén ínchjín xi je tjín maá ndí, yichán cho̱yojo ínchjín, tie toro̱, kan bórró ínchjín ko̱jo tie bórró xi̱ꞌin. 16Kó katsjaá já mosoo̱, kja̱ xín kja̱ xín katsꞌénkꞌasꞌiee̱n nga ngo tjín kuí cho̱o̱, kó bo̱a̱ katsoó nga ko̱e̱je̱tjón, kó ta̱nga kjin kjin kꞌuítso̱manii̱ xkjín nga ngo tjín kuí cho̱o̱. 17Kó kuí nda̱ xi katsꞌénkjítjoón, bi̱ katsoó:
«Tsi ji tjón sa̱ko̱ó ntsꞌié án Esauu̱, kó tsi bi̱ ka̱tso̱o̱ nga ko̱síyaá: ꞌYá jií bo̱a̱. Ñá tiꞌmi ji. ꞌYá tsi̱ꞌe̱ cho̱ xi tji̱e̱ntjoón ji. 18Bo̱a̱ tꞌíi̱n nga tsa̱ꞌa̱n boá kuí cho̱o̱, kó án boá xi katsanguiyáa̱, kó bo̱a̱ tꞌíi̱n nga ki̱a̱ tji̱e̱ngui an nga̱xtonjnú».
19Kó Jakoo̱b ti̱ bo̱a̱ ti̱ katsoó moso̱ xi ma joó, ko̱jo xi ma jaán, ko̱jo ngayeje xi tjimájo̱ cho̱o̱, nga bo̱a̱ ka̱tso̱o̱ Esauu̱, kó ngayejee̱ nga ꞌniú katsꞌeén, 20nga bo̱a̱ ka̱tso̱o̱ nga Jakoo̱b nga̱xto̱n kui jaá tsꞌéndibá. Ngatꞌa̱ bi̱ tsꞌén katsꞌénkjó Jakoo̱b: «Sa̱ꞌinkjaꞌajinda má ra an Esauu̱ nga sanguiyáa kui cho̱o̱, ki̱a̱ ka̱maa̱ kjiꞌa nga ska̱jin an kui, jè nda sa̱sieén an.»
21Nguije katsanguiyatjón kui cho̱o̱, Jakoo̱b ki̱a̱ katsꞌénkjaꞌa ni̱xtji̱e̱n nínga síndo ngo ndié xtín xotaa̱.
Bi̱ tsꞌén askjan Jakoo̱b
22-23Kó ti̱ kuii̱ ni̱xtji̱e̱n jastjíe̱n Jakoo̱b, kó kijíjo̱ ngayeje xota̱ ndiꞌaa̱, ko̱jo ngayeje ni xi tjiín, kó jaꞌaxtikjá ndejé Jaboo̱k. 24Kósꞌe̱ kjindiboáꞌoyá soboá nguiní, kó ki̱a̱ askjanjo̱ ngo nda̱ ngaskande nga kisisie̱én. 25Kó kjiꞌa nga kui nda̱a̱ kamájín xi katsꞌeén Jakoo̱b, ngo tji̱ngo̱ yeꞌeé ndáyaá, kó jatjokjo ńdatjatsꞌen Jakoo̱b tji̱e̱nga ndyi̱kján. 26Kósꞌe̱ kui nda̱a̱, bi̱ katsoó Jakoo̱b:
—Ti̱ntjoénní ngatꞌa̱ jè kisisie̱én.
Kó Jakoo̱b bi̱ katsó:
—Tsjuiénjaán, ngaskande nga si̱ꞌinchikonñíní.
27Kó kui nda̱a̱ bi̱ katsó:
—Kó ꞌmií.
Kó nguije Jakoo̱b katsóyaá jaꞌeén, 28kui nda̱a̱ bi̱ katsoó:
—Jè nguiti̱ Jakoo̱bjín kꞌuiín, Israee̱l kꞌuiín ngotꞌe̱, ngatꞌa̱ jè ikixkénje̱ ji Néná ko̱jo xota̱ nga̱sondiee̱, kó kiniꞌíi̱n.
29Kósꞌe̱ Jakoo̱b bi̱ katsoó nga asíyaá:
—Tꞌíyéní jaꞌée̱n ngotꞌe̱.
Kó kuí nda̱a̱ bi̱ katsó:
—¡Jè chjiéngá xche̱ ji jaꞌénna katsaki!
Kósꞌe̱ ki̱a̱ katsꞌénchikonñé Jakoo̱b. 30Kó Jakoo̱b, Penuee̱l, ítꞌa jaꞌén kuí ngu̱i̱ndiee̱, ngatꞌa̱ bi̱ katsó: «Kamábe tíkje̱n tíkje̱n an Néná, kó ta̱kó tikòn an».
31Kó nga jatjo tsꞌueé, jatjo Jakoo̱b kui ngu̱i̱ndiee̱ xi ꞌmí Penuee̱l, kó kijí katsꞌo. 32Kuíni nga ngaskande ngotꞌe̱ xota̱ Israee̱l kjiniejín yojo xi kjijon ńdatjatsꞌen ngo cho̱, ngatꞌa̱ ki̱a̱ boá nínga ikꞌieé Jakoo̱b.
Currently Selected:
Jénesii̱s 32: MAIX
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014