Éksondo̱ 7

1Kósꞌe̱ Néná bi̱ katsoó Moisee̱:

—Nguindyi̱ko̱n nda̱ ree̱ jí boá xi kꞌuin jí ngajona, ta̱nga ntsꞌie ji Aaroo̱n, kuí boá xi ku̱i̱chji̱a̱ ngajo tse̱. 2Jí boá xi kꞌuiyée̱ Aaroo̱n ngayeje ni xi xiaán ji, kó Aaroo̱n boá xi ku̱i̱chji̱a̱jo nda̱ ree̱, tsi̱ꞌe̱ nga tsja̱ndieé nga kjo̱tjo xota̱ Israee̱l ki̱a̱ nangui Ejiptoo̱. 3-5Sa̱ꞌínsénjínjnú nda̱ ree̱, kó tsja̱ndiéjín nga kjo̱tjojnú, ngatꞌa̱ ti̱ ánní bo̱a̱ xi sa̱ꞌintajá án ini̱ma̱a̱. Ta̱nga kjín chi̱bo̱a̱ ko̱jo kjo̱a̱ndikón sa̱ꞌin an ki̱a̱ nangui Ejipto̱, kó jaskan sa̱ꞌínkjatjójnú nguijee̱. Ngayeje ngaꞌniúna sa̱ꞌinkjién án nga sa̱ꞌinjée̱ xota̱ Ejiptoo̱, ¡kó án xí sa̱ꞌin an nga kixi̱ ka̱masee̱n ko̱jo nga kꞌoxié an xota̱ Israee̱l, kui xi xota̱ na̱xi̱ńdána, kó xikoó tsi jájún ka̱ma nga kjo̱tjoni kui nanguii̱! ¡Kó kui xota̱ Ejiptoo̱ sku̱i̱e̱ nga án boá xi Nee̱ xota̱ Israee̱l!

6Kó Moisee̱ ko̱jo Aaroo̱n bo̱a̱ má tsꞌén katsꞌénkjatjosón xikótsꞌen atíxomaa̱ Néná nga sa̱ꞌín. 7Ichítié ko̱jo kantié noó Moisee̱, kó ichítié ko̱jo kantié ján noó Aaroo̱n kjiꞌa nga kijíchji̱a̱jo nda̱ ree̱ nangui Ejipto̱.

Bi̱ tsꞌén tsíchji̱a̱jo Moisee̱ ko̱jo Aaroo̱n nda̱ ree̱ nangui Ejiptoo̱

8Kó Néná bi̱ katsoó Moisee̱ ko̱jo Aaroo̱n nga tsíchji̱a̱jo: 9«Kjiꞌa nga ngo kjo̱a̱ndikón ku̱i̱ꞌájnú nda̱ ree̱, ji Moisee̱, bo̱a̱ tꞌíi̱n Aaroo̱n nga ngakjíbé yánisiée̱, kó nga tꞌajmi tꞌananguii̱ kje̱n nda̱ ree̱ tsi̱ꞌe̱ nga ye̱ ka̱ma».

10Kó bo̱a̱ tsꞌén Moisee̱ ko̱jo Aaroo̱n kijíkoón nda̱ ree̱ nangui Ejipto̱. Kó kjiꞌa nga nda̱ ree̱ tsíꞌaá nga ko̱kó ngaꞌniú xí tjiín, kui jaá katsꞌén ni xi katsoó Néná nga sa̱ꞌín. Aaroo̱n tsꞌajmi tꞌanangui yánisieé nguindyi̱ko̱n nda̱ ree̱ ko̱jo mosoo̱, kó kui yánisieé ye̱ kamá.

11Kósꞌe̱ nda̱ ree̱ tsíchji̱a̱a̱ xota̱ chji̱ni̱e̱ ko̱jo tjiꞌe xi kisꞌiee̱, tsi̱ꞌe̱ nga ti̱ bo̱a̱ ti̱ sa̱ꞌín kui jaá nga. 12Nga ngo nga ngo kui jaá tsꞌajmi yánisieé, kó ti̱ ye̱ kamá nga, ta̱nga yánisié xi ye̱e̱ Aaroo̱n katjéjén kui xi tsi̱ꞌe̱ kui jaá. 13Nda tsi kui nii̱ kamá, ti̱ kuí xí nda̱ ree̱ katsꞌéntajá ini̱ma̱a̱, kó katsꞌénsénjiín Aaroo̱n ko̱jo Moisee̱, bo̱a̱ kamá xikó má katsoó Néná nga ka̱ma.

Nga tie kjo̱a̱botíjé xi katsanguiyaa̱ Néná xota̱ Ejiptoo̱

Kjo̱a̱botíjé xí tjoón: Nga jín kamá ndójoaa̱

14Néná tsíchji̱a̱jo Moisee̱, kó bi̱ katsoó:

Nda̱ ree̱ nangui Ejipto̱ achichí je tajá ini̱ma̱a̱, kó mejénjiín tsja̱ndieé xota̱ na̱xi̱ńdána nga kjo̱tjoni nanguii̱. 15Chjábé jí yánisié xi ye̱ kamaá, kó ndyiojón ta̱jñó nga ko̱e̱je̱ nda̱ ree̱ ndejé Niloo̱, ki̱a̱ tꞌentji̱nguìi̱. 16Kó ki̱a̱ bi̱ tꞌíi̱n:

Kuí Néná kui xi tsi̱ꞌe̱ xota̱ Israee̱l, kui xi katsanguiyakonna ji, bi̱ katsóna nga ꞌna̱xié xójne̱ kui ngu̱i̱ndiee̱, tsi̱ꞌe̱ nga ki̱a̱ nangui kixií si̱ꞌandikónjne̱ Nejne̱. Ta̱nga nga ngaskande ngotꞌe̱ mejénjín xoó niꞌínkjatjosén ji ni xi tsꞌénmíꞌaá, 17ingo xó chi̱bo̱a̱ sa̱nguíyaá tsi̱ꞌe̱ nga xche̱ ji nga kui xi Néná. Kuíni nga kjiꞌa nga kꞌonié an yánisiéna ndójoaa̱ ndejé Niloo̱, jín ka̱ma kui ndójoaa̱. 18Kó ngayeje tji̱o̱ xi tjín ngu̱i̱jin ndójoaa̱, ko̱ya, kó ꞌniú chꞌo je̱n ka̱ma ndójoaa̱ ndejeé nga ngaskande xota̱ Ejiptoo̱ tsꞌe̱ ka̱maa̱ nga kꞌuí.

19Nguije katseꞌée̱ kui eén nda̱ ree̱, bo̱a̱ tꞌíi̱n Aaroo̱n nga ngakjíbé yánisiée̱ kó ngatiejéntie tsja nga̱soón ndejé, xo̱ngà ndántꞌié ko̱jo ngu̱i̱ndio ko̱jo ngayeje ngu̱i̱ndie nínga ndyi̱a̱ ndójoa xi tjín nangui Ejipto̱, tsi̱ꞌe̱ nga jín ka̱ma. ¡Kó ngaskande ni xi yá ko̱jo xi ndi̱jo̱ xi ndyi̱a̱ ndójoaa̱ ti̱ jín ka̱ma nga!

20Kó Moisee̱ ko̱jo Aaroo̱n katsꞌén ngayeje ni xi atíxomaa̱ Néná nga sa̱ꞌín. Aaroo̱n iskjininkꞌa yánisieé nguindyi̱ko̱n nda̱ ree̱ ko̱jo já mosoo̱, kó tsꞌanié ndójoaa̱ ndejé Niloo̱. Kó ti̱kjiꞌa jín kamá ngayeje ndójoaa̱, 21kó jesón tji̱o̱ xi tjín ngu̱i̱jin ndejeé, kó achichí ꞌniú chꞌoje̱n kamá ndójoaa̱, nga ngaskande xota̱ Ejiptoo̱ nguiti̱ kamájín katsꞌe. ¡Kó ngayeje nangui Ejiptoo̱ nga kisꞌie jín!

22-23Kó bo̱a̱ kamá xikó má katsó Néná, achichí tajá kamá ini̱ma̱a̱ nda̱ ree̱. Kó nga já tjiꞌe xi tjín nangui Ejipto̱ ti̱ jín katsꞌén ndójoaa̱ nga, kó tsintꞌiéꞌénjiín Aaroo̱n ko̱jo Moisee̱. Kó nda̱ ree̱ kijí nguiní ndiꞌaa̱. 24Kó xota̱ Ejiptoo̱ kamájín katsꞌe ndójoaa̱ ndejé Niloo̱, kuíni nga ngayeje nga̱ndee̱ ndejeé katsꞌénda ndańchꞌi̱, tsi̱ꞌe̱ nga ka̱maa̱ nga ki̱a̱ kꞌo̱xié ndójoaa̱ xi tsjie. 25Nguije jaꞌa yito ni̱xtjin, Néná tsꞌanié ndójoaa̱ ndejé Niloo̱.

Currently Selected:

Éksondo̱ 7: MAIX

ማድመቅ

Copy