Éksondo̱ 5
5
Bi̱ tsꞌén jachó Moisee̱ ko̱jo Aaroo̱n nguindyi̱ko̱n nda̱ ree̱ nangui Ejipto̱
1Moisee̱ ko̱jo Aaroo̱n jaskan nguije tsíchji̱a̱jo xota̱ Israee̱l, kijíkoón nda̱ ree̱ nangui Ejipto̱, kó bi̱ katsoó:
—Ne xi tsi̱ꞌe̱ xota̱ Israee̱l ngo én katsanguiyaa̱ ji nda̱ re, kó bi̱ tsó: Teꞌéndiée̱ nga kjo̱tjo xota̱ na̱xi̱ńdána tsi̱ꞌe̱ nga sa̱ꞌínna ngo sꞌué ki̱a̱ nangui kixií.
2Ta̱nga nda̱ ree̱ bi̱ katsó:
—Kó ꞌyání bo̱a̱ kui Nee̱. Kó ánní nga an kuintꞌieꞌén kóo̱n. ¡Ngojín nee̱ xota̱ Israee̱l xi be an, kó ti̱ nde tsjandiejín an nga kjo̱tjojnú!
3Kó bi̱ katsó Moisee̱ ko̱jo Aaroo̱n:
—Kuí boá xi Nejne̱ kó jè jéꞌe kasikójo̱jne̱. Chjiéngá konguínjne̱ nangui kixií, ngo ngu̱i̱ndie xi ján ni̱xtjin mána nga monguin ndsa̱ko, kó ki̱a̱ boá nínga si̱ꞌankꞌasꞌienjne̱ kjo̱a̱tjó Nejne̱. Tsi bo̱a̱jín si̱ꞌanjne̱, ta̱ chaja tsí ngo chiꞌin sa̱nguíyájne̱ ko̱jo tsi ki̱a̱ sa̱ꞌínkjiensónjne̱ ngu̱i̱jii̱n kjo̱a̱xchaán.
4-5Kósꞌe̱ nda̱ ree̱ nangui Ejiptoo̱ bi̱ katsoó:
—¡Tasá tanguínni̱ꞌanxá rajnú! ¡Ngatꞌa̱ achichí má xota̱ xi ndyi̱ꞌbíndomasien xaá ta̱ngatꞌanii̱ jún!
6Kó ti̱ kui ni̱xtjin nda̱ ree̱ tsíchji̱a̱jo já Ejipto̱ xi síndotjoón ko̱jo já xí kamá nguito̱ko̱o̱ xota̱ Israee̱l, kó bi̱ katsoó:
7Nguiti̱ boeꞌéjínjnúu̱ ndi̱ji̱ xi sa̱ꞌíndajo̱ ńdie kachján xota̱ Israee̱l xikó ndyi̱niꞌánjo̱jnú, ta̱sá kuí ngatjíkjaꞌáꞌyá kuí ndi̱ji̱i̱. 8Ta̱nga chjiéngá ꞌniú kꞌuijñájnúu̱ nga to̱kó bo̱a̱ kjiꞌi ńdie kachján sa̱ꞌínda, jmí tsi chiboa ngase. Xota̱ tsiꞌé boá kui xota̱ Israee̱l, kjo̱a̱a̱ nga jmíjín ngasee̱ xá, kuíni nga ndyi̱kjandáyá nga bo̱a̱ ndyi̱tsó nga ko̱e̱ꞌéndiéjne̱ nga nangui kixií ko̱e̱je̱ tsꞌendíkón Nee̱. 9ꞌNiú ti̱ꞌánjnúu̱ tsi̱ꞌe̱ nga ꞌniú ngase sa̱ꞌínxá, ki̱a̱ ka̱maa̱ nga sa̱ꞌínsénjiín én ndisó xi ndyi̱chji̱a̱ Moisee̱ ko̱jo Aaroo̱n.
10Kó kui já Ejipto̱ xi síndotjoón ko̱jo nguito̱ko̱o̱ xota̱ Israee̱l tsíchji̱a̱jo xota̱ Israee̱l, kó bi̱ katsoó:
«Nda̱ ree̱ jè katsjákjo̱a̱ nga nguiti̱ jmí ndi̱ji̱ ko̱e̱ꞌéjínxójne̱ jún xi si̱ꞌandajo̱jnú ńdie kachjaán, 11jún xó konguíndyi̱sejnú ko̱jo konguínchja̱ꞌáꞌyájnú ndi̱ji̱i̱, ta̱nga ta̱kó bo̱a̱ xó kjiꞌi ńdie kachján si̱ꞌandajnú».
Xota̱ Israee̱l bi̱ tsꞌén kijítsáyaá nda̱ ree̱ nga ndajín kjimataꞌin
12Kósꞌe̱ xota̱ Israee̱l kijí ngayeje nangui Ejipto̱, nga kijíkjaꞌaꞌyá ngayeje to̱ko̱ya ndi̱xcho̱ kixí, tsi̱ꞌe̱ nga xikoó tsi ndi̱ji̱ sa̱ꞌín kui xi katseꞌé máraa̱ ngasꞌe̱. 13Kó já Ejipto̱ xi síndotjoón ko̱jo nguito̱ko̱o̱ xota̱ Israee̱l bi̱ katsó: «¡Tsá ti̱ꞌanjnú! Ndyiojón ndyiojón chjiéngá ti̱ bo̱a̱ ti̱ kjiꞌi ńdie kachján si̱ꞌandajnú, xikó kjiꞌi kiniꞌándajnú kjiꞌa nga katseꞌé má rajnú ndi̱ji̱i̱».
14Kó nga kamájiín kui xotaa̱ nga bo̱a̱ kjiꞌi ńdie kachján katsꞌénda, já Ejipto̱ xi síndotjoón tsaꞌon já nguito̱ko̱o̱ xota̱ Israee̱l xi askondá kui jaá, kó bi̱ katsoó: «Jè ján ni̱xtjinnii̱ nga bo̱a̱jín kjiꞌi ńdie kachján ndyi̱niꞌánkꞌasꞌienjnú».
15Kósꞌe̱ já xí síndotjoón xota̱ Israee̱l kijíkoón nda̱ ree̱, kó bi̱ katsoó:
—Ánní nga bo̱a̱ má ta̱ ndajín niꞌínje̱jne̱ ji nda̱ re. 16Xota̱ tse̱ jmí tsi ta̱ ꞌniú tsí ndyi̱tsꞌénjne̱ nga si̱ꞌandajne̱ ńdie kachján, nguiti̱ jmí ndi̱ji̱ tsjájínjne̱, kó ngaskande ndyi̱moꞌonjne̱. Tsi bo̱a̱jín kjiꞌi ńdie kachján xi ndyi̱niꞌánkꞌasꞌienjne̱, xota̱ tse̱ boá xi konnii̱.
17Ta̱nga kui nda̱ ree̱ bi̱ katsó:
—¡Tsiꞌé xi bo̱a̱ konjnú! ¡Xota̱ tsiꞌé boá jún! Kuíni nga ndyi̱chjiáꞌájnúꞌun nga tsjandiéjnúꞌun nga konguínniꞌandikónjnú Nejnú, ta̱nga kjo̱a̱a̱ nga nguiti̱ mejénjínjnú si̱ꞌanxájnú. 18Kuíni nga tanguínni̱ꞌanxá rajnú. Kó nda tsi nguiti̱ jmí ndi̱ji̱ tsjajínjnúꞌun, ti̱ kuí xí bo̱a̱ kjiꞌi ńdie kachján si̱ꞌankꞌasꞌiennijnú.
19Kó kui ni xi katsó nda̱ ree̱, achichí nda̱ kamaá já xí síndotjoón xota̱ Israee̱l, 20kó kuíni nga kjiꞌa nga kamábe Moisee̱ ko̱jo Aaroo̱n, nga síndo ndi̱tsee̱n nga ndyi̱koyaa̱ kui jaá, 21bi̱ katsoó:
—¡Néná ngatsꞌénjéjnú kjo̱a̱a̱ ni ndajín xi kiniꞌánjo̱jnú jún ji̱n! Ngotꞌe̱ ꞌne̱ nda̱ ree̱ ko̱jo xotaa̱ achichí ꞌniú chꞌo ngasee̱ ji̱n ta̱bo̱a̱jiín ngasꞌe̱. ¡Ti̱ júnní bo̱a̱ xi ndyi̱boeꞌéjnú ngo kjo̱a̱ tsi̱ꞌe̱ nga sa̱ꞌínkꞌiénjne̱ nda̱ ree̱!
22Kósꞌe̱ Moisee̱, bi̱ katsoó Néná nga tsíchji̱a̱a̱:
—Ne tsa̱ꞌa̱n, a kuí xá kananguiyéní kꞌi̱e̱e̱. A ta̱ tsi̱ꞌe̱ nga sa̱ꞌinkꞌatio tsí an kjo̱a̱ni̱ma̱ xota̱ na̱xi̱ńdáa̱. 23Ngatꞌa̱ ndeskande koó nga jéꞌe̱ an nangui Ejipto̱, kó nga kijíkóo̱n nda̱ ree̱ nga katsóyaa̱ én xí kananguiye ji, kui nda̱a̱ ngatsjé ni̱xtjin nga ndajín tjitsꞌénjo̱ xota̱ na̱xi̱ńdáa̱, ta̱nga ji, nde kji̱e̱ niꞌíndéjínjne̱.
Currently Selected:
Éksondo̱ 5: MAIX
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014