MWANDUSO 26
26
Isaka ako Gelali
1Abaho kulawilila nzala iyagwe muisi ija, mbali na ija ikalile kipigiti cha Ablaham. Na Isaka kachola ha Abimeleki mndewa wa Wafilisti ako Gelali. 2MNDEWA kamulawilila Isaka na kamulongela, “Sambiuchole Misili, kala muisi yondanikulongele. 3Kala hano kamba muhenza, nie nowa hamoja na gweye na kukumoteza. Isi zino nokugwelela gweye na lukolo lwako. Nokigoga kilagano kiniilagane na tataako Ablaham. 4Kweli nokumoteza na kulutenda lukolo lwako longezeke luwe kamba nhondo za kuulanga. Na isi zino zose nolugwelela lukolo lwako. Na kubitila lukolo lwako ndewa zose za ulumwengu zomotezwa. 5Nokumoteza kwavija Ablaham kanitegeleza nie na kugagoga malagizo gangu gose na kuzigoga ndagizi zangu zose.”
6Avo Isaka kakala ako Gelali. 7Wambigalo wa isi ija viwamuuzile mbuli za mtwanzi wake, heyo kalonga, “Ino lumbu jangu.” Kwavija kadumba kulonga “Ino mtwanzi wangu,” kwavija kagiza kamba wanhu wa isi ija womkoma na kumsola Lebeka, kwavija Lebeka kakala yanogile ng'hani. 8Isaka viyakalile kuja mkipigiti kitali, Abimeleki mndewa wa Wafilisti kasungulila hasi hadizonzo, kamona Isaka yomkumbatila Lebeka. 9Abimeleki kamgalila usenga Isaka na kulonga, “Kweli ino mtwanzi wako, habali kulonga ino lumbu jako?”
Isaka kamwidika kalonga, “Kwavija nigelegeza kamba nihadanganhike kamba nihalongile ino mtwanzi wangu.”
10Abimeleki kalonga, “Mbuli yaki ino yuututendele? Munhu imwe yahawasile na mtwanzi wako, na gweye uhatubakile tweye tose kilozo kino.” 11Avo Abimeleki kawazuma wanhu wose, yolonga, “Munhu yoyose yondayamtendele gehile munhu ino ama mtwanzi wake, kokomigwa.”
12Isaka kahanda mbeyu muisi ija, na mulao uja kahuna mianza mia ya mbeyu zayahandile, kwavija MNDEWA kammoteza. 13Isaka kawa mgoli, na ugoli wake ugendelela kukula, na kawa mgoli mkulu ng'hani. 14Kakala na madale bwando ga ng'hondolo na ng'ombe, kakala na watumigwa bwando, avo Wafilisti wamonela migongo. 15Avo Wafilisti wagasila gamasima gose gawahimbile watumigwa wa Ablaham tataake Isaka, kipigiti viyakalile mgima.
16Abimeleki kamulongela Isaka, “Uhalawe muisi yetu, kwavija gweye sambi kuna mhiko kubanza tweye.” 17Avo Isaka kasegela hiko, na kwika ng'hambi Mdibonde da Gelali, na kakala hiko. 18Isaka kagahimbula kabili gaja igamasima ga mazi gakalile gahimbigwe mkipigiti cha tataake Ablahamu, kwavija Wafilisti wakala wagasile Ablahamu viyeshile kudanganhika, na kagagwelela matwaga gagaja gayagagwelele tataake.
19Watumigwa wa Isaka wahimba sima mdibonde na wapata mazi gaholile. 20Wachunga ng'hondolo wa haja Gelali wagomba na wachunga ng'hondolo wa Isaka walonga, “Mazi gano getu tweye.” Avo Isaka kadikema sima dija twaga dikemigwa “Ezeki.”#26:20 Mkieblania Ezeki nhegulo yake ngomba.
21Abaho watumigwa wa Isaka wahimba sima da ikabili, na dino vivija wadigombela, Isaka kadikema twaga jake “Sitna.”#26:21Mkieblania Sitna nhegulo yake ngomba. 22Abaho Isaka kachola hanhu hayagwe na kuhimba sima da ikadatu. Sima dino dikala bule ngomba, avo kadigwaa twaga dikemigwa “Lehoboti.”#26:22 Mkieblania Lehoboti nhegulo yake gati. Isaka kalonga, “MNDEWA sambi katugwelela ulegeho wa kukala muisi ino, na tweye tokongezeka.”
23Kulawa haja Isaka kachola Beeli-Sheba. 24Ikilo iija MNDEWA kamulawila Isaka na kumulongela, “Nie iyo Mulungu wa tataako Ablaham. Sambiudumbe, kwavija nie na hamoja na gweye. Nokumoteza na kulutenda lukolo lwako longezeke, sama ya Ablaham mtumigwa wangu.” 25Avo Isaka kazenga kilingo cha kulavila nhosa na kamtambikila MNDEWA haja. Kaiwamba hema yake, na watumigwa wake wahimba sima diyagwe.
Kilagano cha Isaka na Abimeleki
26Zua dimwe Mndewa Abimeleki kulawa Gelali hamoja na Ahuzati mulonga masala wake na Fikoli, mkulu wa asikali zake, wamcholela Isaka. 27Avo Isaka kawauza, “Habali mwiza hano hamwangu kuno mnihila nie, na kumwenu mniwinga?”
28Wamwidika walonga, “Tona kamba MNDEWA ka hamoja na gweye, avo togelegeza twike kiduilo na gweye. Tutende lagano na gweye, 29giladi sambiututende tweye gehile, kamba tweye vitulekile kukutendela gehile. Hatukutendile kinhu kihile. Ila tukutendela ganogile. Nakukuleka uchole mmulegeho, lola sambi MNDEWA viyakumoteze.” 30Avo Isaka kawatendela lusona, na hewo waja na kung'wa hamoja. 31Imitondo ng'hani zua da ikabili waiduilila. Abaho Isaka kawaleka wachole, na hewo wamuleka mmulegeho.
32Zua didija watumigwa wa Isaka weza na kumulongela mbuli za sima diwahimbile, walonga, “Tupata mazi.” 33Avo Isaka kadikema sima dija “Shiba.” Vino vivo wambo da Beeli-Sheba#26:33 Mkieblania Beeli-Sheba nhegulo yake sima da kiduilo ama sima da saba, kwavija Ablaham kaiduila kumgwelela Abimeleki ng'hondolo saba. Simulizi ino yolawa mkitabu cha Mwanduso 21:31. vidipatile twaga jake.
Esau Kosola Watwanzi Wakihenza
34Esau viyavikize milao malongo mane, kasola watwanzi wabili Wahiti, Yudisi mwanage Beeli, na Basemati mwanage Eloni. 35Ila watwanzi wano wa Esau waitenda mioyo ya Isaka na Lebeka kuwa na giogio.
Currently Selected:
MWANDUSO 26: Kizalamo
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Zaramo Bible Translation Project: © 2023 Pioneer Bible Translators
New Testament is a revision of: Zaramo New Testament: © 2020 The Word for the World International and © 2020 Pioneer Bible Translators
