Marko 8
8
Yesu ha nimli akpe eywiɛ niyeni
(Mateo 15.32-39)
1Jamɛ a be ɔmɛ a mi ɔ, nihi fuu ba bua a he nya ekohu, nɛ benɛ a nɛ nɔ́ ko nɛ a ye ɔ, Yesu tsɛ e kaseli ɔmɛ kɛ ba e ngɔ nɛ e de mɛ ke: 2“Ye muklii mi ngɛ mi sae ngɛ asafo ɔ he, ejakaa a kɛ mi hi si ligbi etɛ sɔuu nɛ a nɛ nɔ́ ko nɛ a ye. 3Ke i ha a kɛ a mi mi hwɔ je hiɛ ɔ kɛ yaa a wehi a mi ɔ, klibi ma ya po mɛ ngɛ blɔ ɔ nɔ, ejakaa a ti ni komɛ a je hehi kɛ.” 4E kaseli ɔmɛ he nɔ ke: “Jije nɔ ko ma nyɛ ma na abolo ngɛ, ngɛ nga nɛ ɔ nɔ nɛ maa su nimli nɛ ɔmɛ a nya?” 5“E bi mɛ ke: “Abolo nyɛmɛ nyɛ ngɛ?” Nɛ a ke: “Kpaago.”
6Nɛ e fa asafo ɔ ke a hi si ngɛ zugba mi. Kɛkɛ nɛ e kukuɔ abolo kpaago ɔ nɛ e na Mawu si, nɛ e kuɔ mi ngɔ ha e kaseli ɔmɛ konɛ a gba ha asafo ɔ; nɛ a gba ha mɛ. 7A ngɛ lo tsɔwi bɔɔ komɛ hulɔ, nɛ e gbaa nɔ, nɛ e fa ke a gba kɔlɔ ɔ hu ha mɛ. 8Nɛ a ye nɛ a tɔ, nɛ a muɔ bibli nɛ piɛ ɔ kusii kpaago tɔtɔɔtɔ. 9Se nihi nɛ ye ɔ maa pee akpe eywiɛ. Nɛ Yesu wo mɛ blɔ. 10Nɛ amlɔ ɔ, e kɛ e kaseli ɔmɛ sɛ lɛ mi, nɛ a ba Dalmanuta ni ɔmɛ a mi.
Farisifo ɔmɛ bi Yesu okadi ko
(Mateo 16.1-4)
11Kɛkɛ nɛ Farisifo ɔmɛ ba nɛ a kɛ lɛ ba bɔni nya sami. A ngɛ hlae nɛ a ka lɛ, lɔɔ he ɔ a bi lɛ hiɔwe okadi ko. 12Yesu la zanue ngɛ e mumi mi nɛ e ke: “Mɛni he je nɛ kikɛmɛ a yi nɔ bi nɛ ɔmɛ ngɛ okadi hlae? Niinɛ i ngɛ nyɛ dee ke: Ke a ma ha yi nɔ bi nɛ ɔmɛ okadi ko fii!” 13Nɛ e si mɛ nɛ e ya sɛ lɛ mi ekohu nɛ e ho wo ɔ se ya.
Farisifo ɔmɛ a ma sasɛ kɛ Herode ma sasɛ ɔ
(Mateo 16.5-12)
14Kaseli ɔmɛ a hɛ je nɔ nɛ a maa hɛɛ abolo kɛ ma a dɛ; a hɛɛ we eko ngɛ lɛ ɔ mi, kaa ja kake kɛkɛ. 15Yesu bɔ mɛ kɔkɔ ke: “Nyɛɛ hyɛ saminya, Tiɛ nyɛ hɛ nɛ hi nyɛ he nɔ ngɛ Farisifo ɔmɛ a ma sasɛ kɛ Herode ma sasɛ ɔ he!” 16Nɛ a hla mi ngɛ a kpɛti ke: “Be nɛ ɔ abolo nɛ wa hɛɛ we ɔ he je.” 17Nɛ benɛ Yesu na le ɔ, e bi mɛ ke: “Mɛni he je nɛ nyɛ ngɛ susue kaa abolo nɛ nyɛ hɛɛ we ɔ he je? Anɛ nyɛ kɔ we se, nɛ jeha nɛ ɔ hu nyɛ nɛ́ nihi a nya kɛ mwɔɔ? Anɛ kikɛ nyɛ juɛmi gbo? 18Nyɛ ngɛ hɛngmɛ, anɛ nyɛ hyɛ we nɔ, nyɛ ngɛ tue hulɔ, anɛ nyɛ nui nɔ, nɛ nyɛ kai we nɔ́ ko nɔ́ ko lo? 19Benɛ i kuɔ abolo enuɔ ɔ mi ha nimli akpe enuɔ ɔ, bibli kusii nyɛmɛ nyɛ kukuɔ?” A ke: “Nyɔngma kɛ enyɔ.” 20“Nɛ be nɛ i kuɔ kpaago ɔ mi ha nimli akpeywiɛ ɔ hu ɔ nɛɛ, bibli kusii nyɛmɛ nyɛ kukuɔ?” A ke: “Kpaago.” 21Nɛ e bi mɛ ke: “Kɛ pee kɛɛ nɛ nyɛ nɛ nihi a nya kɛ mwɔɔ nɛ ɔ.”
Yesu tsa hɛyuyuilɔ ko ngɛ Betsaida
22A ba Betsaida, nɛ ni komɛ kɛ hɛyuyuilɔ ko ba e ngɔ nɛ a kpa lɛ pɛɛ konɛ e ta e he. 23Yesu nu hɛyuyuilɔ ɔ nine si nɛ e kɛ lɛ je kɔpe ɔ mi, nɛ e la lada pue e hɛngmɛ ɔmɛ a nɔ, nɛ e ngɔ e ninehi ngɔ pue e nɔ nɛ e bi lɛ ke: “O ngɛ nɔ hyɛe lo?” 24Nyumu ɔ wo e hɛ nɔ nɛ e ke: “I ngɛ nimli hyɛe, se a ngɛ kaa tsohi nɛ ngɛ nyɛɛe.” 25Lɔ ɔ se ɔ, e kpale ngɔ e ninehi ngɔ pue hɛyuyuilɔ ɔ hɛngmɛ ɔmɛ a nɔ ekohu; jeha nɛ ɔ hɛyuyuilɔ ɔ hyɛ nɔ paa, nɛ a tsa lɛ, nɛ e na nɔ tsuaa nɔ faii. 26Kɛkɛ nɛ Yesu je lɛ blɔ nɛ e ho e we mi ya, nɛ e de lɛ ke: “Koo ya kɔpe ɔ mi.”
Petro odase nɛ e ye ngɛ Yesu he
(Mateo 16.13-20; Luka 9.18-21)
27Nɛ Yesu kɛ e kaseli ɔmɛ pue nɔ kɛ ho mahi nɛ ngɛ Kaisaria Filipi ɔ mi ya. E bi mɛ ngɛ blɔ ɔ nɔ ke: “Mɛnɔ nihi deɔ ke i ji?” 28A ha lɛ heto ke: “Yohane Baptisilɔ ɔ; nɛ ni komɛ deɔ ke: Elia; nɛ ni kpa komɛ hu deɔ ke: Gbali ɔmɛ a ti nɔ ko ji mo.” 29Nɛ e bi mɛ ke: “Se nyɛɛ lɛɛ, mɛnɔ nyɛ deɔ ke i ji?” Petro he nɔ nɛ e de lɛ ke: “Mo ji Kristo ɔ nɛ!” 30Yesu wo mɛ si veveeve ke a ko sɛɛ e he sane ha nɔ ko.
Yesu tu e manehlu kɛ e gbenɔ he munyu
(Mateo 16.21-23; Luka 9.22)
31Nɛ e bɔni mɛ tsɔɔmi ke: “Ja Nɔmlɔ Bi ɔ na amanehlu babauu nɛ nikɔtɔma amɛ kɛ osɔfo nikɔtɔma amɛ kɛ mlaa tsɔɔli ɔmɛ kua lɛ, nɛ a gbe lɛ, nɛ ligbi etɛ se ɔ nɛ e te si ekohu.” 32E tu munyu nɛ ɔ faii. Enɔ ha Petro kɛ lɛ ya se nɛ e bɔni lɛ kɔkɔ bɔmi. 33Se benɛ Yesu plɛ e he nɛ e na e kaseli ɔmɛ ɔ, e ka Petro hɛ mi ke: “Jee ye nɔ, Satan, ejakaa o susuu we Mawu nihi a he, se nimli a nihi a he mohu o susuu!”
Hekuami
(Mateo 16.24-28; Luka 9.23-27)
34Nɛ benɛ Yesu tsɛ asafo ɔ kɛ e kaseli ɔmɛ hu kɛ ba e ngɔ ɔ, e de mɛ ke: “Ke nɔ ko suɔ kaa e nyɛɛ ye se ɔ, e kua e he nɛ e wo e seumi tso ɔ nɛ e nyɛɛ ye se. 35Ejakaa nɔ tsuaa nɔ nɛ suɔ kaa e baa e klaa yi ɔ, e maa laa lɛ; se nɔ nɛ laa e kla ngɛ imi kɛ sane kpakpa a he ɔ, e ma he e klaa yi wami. 36Mɛni se nɔmlɔ naa, ke e nine su je ɔ kulaa nɔ nɛ e hɛ mi kpata a? 37Nɔ́ ko be nɛ nɔmlɔ ma ha kɛ kpɔ e wami. 38Nɔ tsuaa nɔ nɛ imi kɛ ye munyu ɔmɛ a he peɔ lɛ zo ngɛ yi nɔ bi gba puɛli kɛ yayami peeli nɛ ɔmɛ a kpɛti ɔ, lɛ hu e he maa pee Nɔmlɔ Bi ɔ zo be mi nɛ e maa ba ngɛ e tsɛ nyami ɔ mi kɛ bɔfo klɔuklɔu ɔmɛ ɔ.
Currently Selected:
Marko 8: DAN77
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Dangme New Testament © United Bible Societies, 1977.
