Marko 14

A so Yesu yi nɔ

(Mateo 26.1-5; Luka 22.1-2; Yohane 11.45-53)

1Benɛ e piɛ ligbi enyɔ nɛ a maa ye Hetsɔmi kɛ Akpiti ligbi ɔ, osɔfo nikɔtɔma amɛ kɛ mlaa tsɔɔli ɔmɛ hla bɔ nɛ a maa pee nɛ a nu Yesu ga mi nɛ a gbe lɛ. 2Se a ke: “Pi ngɛ nyami ligbi ɔ nɔ, konɛ basabasa peemi nɛ ko ba ma a mi.”

A pɔ Yesu nu ngɛ Betania

(Mateo 26.6-13; Yohane 12.1-8)

3Benɛ Yesu ngɛ Betania ngɛ Simon, tsitsɛ ɔ we ɔ mi nɛ e hii si ngɛ niye ni he ɔ, yo ko nɛ hɛɛ alabastro tɔ kɛ e mi nardo nu ngmingmiingmi nɛ he jua wa nitse ɔ ba; nɛ e ywia alabastro tɔ ɔ, nɛ e plɛ nu ɔ ngɔ pue Yesu yi mi. 4Se ni komɛ nɛ ngɛ lejɛ ɔ kɛ mi mi la de a he ke: “Mɛni he je nɛ e puɛ nu ɔ kikɛ nɛ ɔ? 5Ejakaa jinɛ kikɛmɛ a nu nɛ ɔ ɔ, a ma nyɛ maa jua pe cedi lafa etɛ na a kɛ ha ohiafohi!” Nɛ a muklii mi fu lɛ. 6Se Yesu ke: “Nyɛɛ jɔɔ lɛ yɔyɔɔmi! Mɛni he je nɛ nyɛ ngɛ lɛ haoe ɔ? E tsu ni saminyayooyo ha mi. 7Ejakaa ohiafo ɔmɛ ɔ, nyɛɛ kɛ mɛ ngɛ daa, nɛ be tsuaa be nɛ nyɛ suɔ ɔ, nyɛ ma nyɛ mɛ kpakpa maa pee; se imi lɛɛ pi daa nɛ i kɛ nyɛ maa hi si. 8E pee nɔ́ nɛ e ma nyɛ; e sɛ hlami ba pɔ ye nɔmlɔ tso ɔ nu ngɔ to ye pumi. 9Niinɛ, i ngɛ nyɛ dee ke: He tsuaa he nɛ a maa fiɛ Sane Kpakpa a ngɛ, ngɛ je ɔ mi tsuo ɔ, a maa sɛɛ nɔ́ nɛ yo nɛ ɔ pee nɛ ɔ hu kɛ ma kai lɛ.”

Yuda kplɛɛnɔ kaa e maa tsɔɔ Yesu se blɔ

(Mateo 26.14-16; Luka 22.3-6)

10Kɛkɛ nɛ Yuda Iskariot, ni nyɔngma kɛ enyɔ ɔmɛ a ti nɔ kake ɔ, pue nɔ kɛ ho osɔfo nikɔtɔma amɛ a ngɔ ya konɛ e ya tsɔɔ mɛ Yesu se blɔ. 11Se mɛɛ lɛɛ benɛ a nu ɔ, a nya, nɛ a wo lɛ si ke a ma ha lɛ sika. Lɔ ɔ he ɔ, e hla bɔ nɛ e maa pee nɛ e ha a nine nɛ su e nɔ ngɛ be nɛ sa mi.

Yesu kɛ e kaseli ɔmɛ ye Hetsɔmi niyeni ɔ

(Mateo 26.17-25; Luka 22.7-14; 22.21-23; Yohane 13.21-30)

12Akpiti nyami ligbi ɔmɛ a mi kekleekle ligbi ɔ nɔ ɔ, benɛ a ngɛ Hetsɔmi to bi ɔ gbee ɔ, Yesu kaseli ɔmɛ bi lɛ ke: “Jije o suɔ kaa wa ya dla ni ngɔ to ha mo nɛ o ya ye Hetsɔmi ɔ ngɛ?” 13Nɛ e tsɔ e kaseli ɔmɛ a ti ni enyɔ nɛ e de mɛ ke: “Nyɛɛ ya ma a mi, nɛ nyumu ko nɛ tloo nyu kɛ buɛ kɛ nyɛ maa kpe; nyɛɛ nyɛɛ e se; 14nɛ he nɛ e ma ya sɛ ɔ, nyɛ de lejɛ ɔ wetsɛ ɔ ke: ‘Tsɔɔlɔ ɔ ke: Jije nibwɔhi a to he tsu ɔ nɛ i kɛ ye kaseli ɔmɛ maa ye Hetsɔmi ɔ ngɛ mi ɔ ngɛ?’ 15Nɛ e maa tsɔɔ nyɛ hiɔwe asa ngua ko nɛ a wo mi ni nɛ a dla mi; nyɛ dla ni ngɔ to wɔ ngɛ lejɛ ɔ.” 16Nɛ e kaseli ɔmɛ pue nɔ kɛ ho ma a mi ya nɛ a ya na bɔ nɛ e de mɛ ɔ, nɛ a dla Hetsɔmi niye ni ɔ ngɔ to.

17Nɛ benɛ e su gbɔkuɛ ɔ, e kɛ ni nyɔngma kɛ enyɔ ɔ ho lejɛ ɔ ya. 18Benɛ a hii si nɛ a ngɛ ni yee ɔ, Yesu ke: “I ngɛ nyɛ dee anɔkuale mi ke: Nyɛ ti nɔ kake maa tsɔɔ ye se blɔ — nɔ ɔ kɛ mi ngɛ ni yee.” 19Nɛ e kaseli ɔmɛ hao, nɛ a bi lɛ kakaaka ke: “Imi lo?” 20Se e he nɔ nɛ e de mɛ ke: “Nyɛ ni nyɔngma kɛ enyɔ nɛ ɔmɛ a kpɛti nɔ kake ʼi, nɔ nɛ nine nɛ kɛ ye nine ngɛ kpee ngɛ ka a mi ɔ. 21Nɔmlɔ Bi ɔ ma gbo kaa bɔ nɛ a ngma ngɛ e he ɔ mohu; se musu tloo nɔ nɛ tsɔɔ Nɔmlɔ Bi ɔ se blɔ ɔ! Afani nɛ a na we nɛ a fɔ jamɛ a nɔmlɔ ɔ.”

Nyɔmtsɛ Niyeni ɔ sisitomi

(Mateo 26.26-30; Luka 22.15-20; 1 Korintobi 11.23-25)

22Nɛ benɛ a ngɛ ni yee ɔ, Yesu ngɔ abolo nɛ e jɔɔ nɔ, nɛ e kuɔ mi, nɛ e kɛ ha mɛ nɛ e ke: “Nyɛ hee. Enɔ ji ye nɔmlɔ tso.” 23Nɛ e wo kplu ɔ hu nɛ e na si, nɛ e kɛ ha mɛ, nɛ mɛ tsuo a nu eko. 24Nɛ e de mɛ ke: “Enɛ ɔ ji ye muɔ nɛ ji somi ɔ nɔ nɛ a kɛ puɛ si ngɛ nihi fuu a he ɔ nɛ. 25I ngɛ nyɛ dee anɔkuale mi ke, i be wai nɛ ɔ eko nue hu kɛ yaa su ligbi nɛ ma nu wai he ɔ ngɛ Mawu matsɛ yemi ɔ mi.” 26Nɛ benɛ a la yijemi la ko ɔ, a je kpo kɛ ho Nuoku ɔ nɔ ya.

Yesu gba Petro kuami ngɔ to

(Mateo 26.31-35; Luka 22.31-34; Yohane 13.36-38)

27Nɛ Yesu de e kaseli ɔmɛ ke: “Nyɛ tsuo nyɛ nane ma kpata ejakaa a ngma ke: ‘Ma fia to hyɛlɔ ɔ nɔ, nɛ to ɔmɛ maa gbe fia.’ 28Se ke a tle mi si se ɔ, ma sɛ nyɛ hlami kɛ maa ya Galilea.” 29Se Petro de lɛ ke: “Ke ni ɔmɛ tsuo maa je o he ɔ, imi lɛɛ i be o he jee.” 30Nɛ Yesu de lɛ ke: “I ngɛ mo dee anɔkuale mi ke: “Mwɔnɔ nyɔ nɛ ɔ mi ɔ, kungwɔ be nɔ kpae si enyɔ nɛ o ma kpa ngɛ ye se si etɛ.” 31Se Petro tu munyu kɛ kã pe kekle ɔ ke: “Ke i kɛ mo ma gbo tete ɔ, i be kpae ngɛ o se!” Nɛ mɛ tsuo a de ja nɔuu.

Yesu ya sɔle ngɛ Getsemane

(Mateo 26.36-46; Luka 22.39-46)

32Nɛ a ba he ko nɛ a tsɛɛ lejɛ ɔ Getsemane, nɛ e de e kaseli ɔmɛ ke: “Nyɛɛ hi si ngɛ hiɛ ɔ konɛ ma ya sɔle lolo.” 33Nɛ e ngɔ Petro kɛ Yakobo kɛ Yohane ngɔ piɛ e he, nɛ gbeye nu lɛ nɛ e hao babauu; 34nɛ e de mɛ ke: “Ye klaa ngɛ haoe wawɛɛ kɛ yaa gbenɔ mi po; nyɛɛ hi si ngɛ niɛ ɔ nɛ nyɛɛ fɔ nyɔ!” 35Nɛ e ya e hɛ mi bɔɔ, nɛ e bu si, nɛ e sɔle, konɛ, ke e maa hi ɔ, ngmlɛfia nɛ ɔ nɛ be e he; 36nɛ e ke: “Abba, Tsaatsɛ! O nyɛɔ nihi tsuo peɔ; je kplu nɛ ɔ ngɛ ye nɔ; se kɛ̃ ɔ pi bɔ nɛ i suɔ, se bɔ nɛ o suɔ.”

37Nɛ e ba ba na mɛ kaa a ngɛ mahɛ hwɔe, nɛ e de Petro ke: “Simon, o ngɛ mahɛ hwɔe? O nyɛ we nyɔ nɛ o fɔ ngmlɛfia kake lo? 38Nyɛɛ fɔ nyɔ nɛ nyɛɛ sɔle, konɛ nyɛ ko sɛ ka mi. Mumi ɔ ngɛ kplɛɛe mohu se he lo ɔ he wɛ́.”

39Nɛ e kpale ho ekohu nɛ e ya sɔle, nɛ e tu jamɛ a munyu ɔ nɔuu. 40Nɛ benɛ e kpale e se kɛ ba ekohu ɔ, e ba na kaa a hwɔ mahɛ, ejakaa nyɔ gbe mɛ, nɛ a li nɔ heto nɛ a ngɛ lɛ hae.

41Nɛ e ba nɔ́ nɛ ji si etɛ, nɛ e de mɛ ke: “Nyɛɛ lɛɛ nyɛ he mi jɔ nyɛ nɛ nyɛ ngɛ mahɛ hwɔe kɛ mwɔɔ nɛ ɔ? E hiɛ! Ngmlɛfia a su, oʼɛ, a ngɛ Nɔmlɔ Bi ɔ ngɔe kɛ ngɛ yayami peeli a dɛ mi woe. 42Nyɛɛ te si nɛ nyɛ ha waa ho, oʼɛ, ye se blɔ tsɔɔlɔ ɔ su si ta!”

Yesu seblɔtsɔɔmi kɛ e numi

(Mateo 26.47-56; Luka 22.47-53; Yohane 18.3-12)

43Benɛ e ngɛ munyu ɔ tue kɛ mwɔɔ ɔ, Yuda, ni nyɔngma kɛ enyɔ ɔmɛ a ti nɔ kake ɔ ba kɛ nihi fuu nɛ je osɔfo nikɔtɔma amɛ kɛ mlaa tsɔɔli ɔmɛ kɛ nikɔtɔma amɛ a ngɔ, nɛ a hɛɛ klaatehi kɛ tsohi. 44Se se blɔ tsɔɔlɔ ɔ to mɛ okadi ko ke: “Nɔ nɛ nya he nɛ ma fiɔ ɔ, lɛ ji nɔ ɔ nɛ; nyɛɛ nu lɛ nɛ nyɛ kpaka lɛ kɛ ho sɔkee.”

45Nɛ benɛ Yuda su si nɔuu pɛ nɛ e ba Yesu ngɔ nɛ e ke: “Rabi!” nɛ e fiɔ e nya he. 46Nɛ a ba pue Yesu nɔ nɛ a nu lɛ. 47Se nihi nɛ daa si ngɛ lejɛ ɔ a ti nɔ kake hia klaate, nɛ e kɛ fia osɔfo nɔkɔtɔma a tsɔlɔ ɔ, nɛ e po e tue. 48Nɛ Yesu wo e nya nɔ nɛ e de mɛ ke: “Imi numi nyɛ ba kɛ klaatehi kɛ tsohi kaa a nuu ojo fialɔ nɛ ɔ? 49Daa nɛ i kɛ nyɛ ngɛ sɔlemi we ɔ nɛ i tsɔɔ nihi a ni ɔ, lɔ ɔ lɛɛ nyɛ nui mi; se benɛ pee nɛ ngmami ɔmɛ nɛ na ba mi he je.” 50Kɛkɛ nɛ e kaseli ɔmɛ tsuo tu fo si lɛ.

51Se niheyo ko nɛ sa kploba ngɛ e mlɛ mi ɔ nyɛɛ e se, nɛ a ka lɛ numi; 52se e si kploba a nɛ e tu fo kɛ e he gu.

Yesu ngɛ gua ngua a hɛ mi

(Mateo 26.57-68; Luka 22.54-55; 22.63-71; Yohane 18.13-14; 18.19-24)

53Nɛ a kpaka Yesu kɛ ho osɔfo nɔkɔtɔma a ngɔ ya, nɛ osɔfo nikɔtɔma amɛ kɛ mlaa tsɔɔli ɔmɛ tsuo nya ba kpe si ngɛ e ngɔ. 54Nɛ Petro nyɛɛ e se ngɛ tsitsaa kɛ ya sɛ osɔfo nɔkɔtɔma a mɔ ɔ kpo ɔ kpɛti, nɛ e kɛ we mi sɔmɔli ɔmɛ ya hii si nɛ e ngɛ la hlue. 55Nɛ osɔfo nikɔtɔma amɛ kɛ gua mluku ɔ tsuo hla Yesu he sane ko konɛ a da nɔ kɛ gbe lɛ; se a nɛ́ eko. 56Nihi fuu ye lakpa odase kɛ si lɛ, se a odase ɔmɛ sɔɛ. 57Nɛ ni komɛ te si nɛ a ye lakpa odase kɛ si Yesu ke: 58“Wɔ nitsɛmɛ wa nu nɛ e de ke: ‘Imi lɛɛ ma ku sɔlemi tsu nɛ ɔ nɛ a kɛ nine pee ɔ, nɛ ligbi etɛ mi ɔ ma ma ekpã nɛ pi nine nɛ a kɛ pee.’ ” 59Se lɔ ɔ tete po hu ɔ, a odase ɔmɛ sɔɛ.

60Nɛ osɔfo nɔkɔtɔma a te si dasi ngɛ a kpɛti, nɛ e bi Yesu ke: “O be heto hae lo? Mɛni odase ni nɛ ɔmɛ ngɛ yee kɛ ngɛ mo sie nɛ ɔ?” 61Se e kpɛ we e kuɔ si nɛ e ha we heto. Osɔfo nɔkɔtɔma a kpale bi lɛ ekohu ke: “Mo ji Kristo, nɔ nɛ a gbaa a bi ɔ lo?” 62Nɛ Yesu ke: “Imi, nɛ nyɛ maa na Nɔmlɔ Bi ɔ kaa e hii si ngɛ Ope ɔ hiɛ ɔ nɔ nɛ e ma ngɛ hiɔwe bɔku ɔmɛ a mi.” 63Osɔfo nɔkɔtɔma a hia e tade ɔ nɛ e ke: “Mɛni odasefohi wa kpale ngɛ hlae ekohu? 64Nyɛ nu e musu bɔmi ɔ; kɛ nyɛ susu kɛɛ?” Nɛ mɛ tsuo a bu lɛ fɔ ke e sa gbenɔ. 65Nɛ ni komɛ bɔni lada lami kɛ e nɔ puemi; nɛ a fi e hɛ mi nɛ a hɛɛ lɛ ni, nɛ a de lɛ ke: “Gbaa!” Nɛ we mi sɔmɔli ɔmɛ pue e nɔ kɛ lɛ ma gbami.

Petro kua Yesu

(Mateo 26.69-75; Luka 22.56-62; Yohane 18.15-18; 18.25-27)

66Benɛ Petro ngɛ sisi ɔ ngɛ mɔ ɔ kpɛti ɔ, osɔfo nɔkɔtɔma weyi ɔmɛ a ti nɔ kake ba; 67nɛ benɛ e na Petro nɛ e ngɛ la hlue ɔ, e hyɛ lɛ nɛ e ke: “Tse mo hu o kɛ Yesu Nazareno ɔ lɛ ngɛ?” 68Se e kua nɛ e ke: “I li nɔ́ nɛ o ngɛ dee nɛ ɔ, nɛ i nui sisi tete.” Nɛ e je kpo kɛ ho kue ɔ si ya, kɛkɛ nɛ kungwɔ kpã nɔ. 69Nɛ yiheyo ɔ na lɛ ekohu, nɛ e kpale bɔni ninɛmɛ nɛ daa si ngɛ lejɛ ɔ demi kɛ: “A ti nɔ kake ji nɛ ɔ nɛ!” 70Se Petro kua ekohu. Nɛ pee se bɔɔ ɔ, ninɛmɛ nɛ daa si ngɛ lejɛ ɔ de Petro ekohu ke: “Anɔkuale mi ɔ, a ti nɔ kake ji mo, ejakaa Galileano ji mo.” 71Kɛkɛ nɛ Petro bɔni gbiɛmi kɛ kita kami ke: I li nɔmlɔ nɛ nyɛ ngɛ e he munyu tue nɛ ɔ.” 72Nɛ amlɔ ɔ kungwɔ kpa nɔ nɛ ji si enyɔ; nɛ Petro kai munyu nɛ Yesu de lɛ ɔ ke: “Kungwɔ be nɔ kpae si enyɔ nɛ o ma kpa ngɛ ye se si etɛ” ɔ. Nɛ benɛ e kai ɔ e wo ya.

Currently Selected:

Marko 14: DAN77

ማድመቅ

Copy