Mateo 17
17
Yesu nɔmlɔ tso su tsake
(Marko 9.2-13; Luka 9.28-36)
1Ligbi ekpa se ɔ, Yesu ngɔ Petro kɛ Yakobo kɛ e nyɛmi Yohane, nɛ e kɛ mɛ ya yoku nɛ ya hiɔwe ko nɔ, mɛ pɛ. 2Nɛ e nɔmlɔ tso su tsake ngɛ a hɛ mi, nɛ e hɛ mi kpɛ kaa pu, nɛ e tade ɔmɛ hiɛ kaa pu la. 3Nɛ oʼɛ, Mose kɛ Elia ba je a he kpo tsɔɔ mɛ, nɛ a kɛ lɛ ngɛ munyu tue. 4Nɛ maa je Petro nya a, e de Yesu ke: “Nyɔmtsɛ, e hi ha wɔ kaa waa hi hiɛ ɔ; ke o suɔ ɔ, ma pee bo tsuhi etɛ ngɛ hiɛ ɔ, o nɔ kake, kɛ Mose nɔ kake, kɛ Elia nɔ kake.” 5Benɛ a ngɛ munyu ɔ tue kɛ mwɔɔ ɔ, oʼɛ, bɔku hleii ko ba ha a nɔ, nɛ oʼɛ, gbi je bɔku ɔ mi de ke: “Nɔ nɛ ɔ ji ye suɔmi bi nɛ i naa e he tsui ɔ nɛ; nyɛɛ bu lɛ tue!” 6Nɛ benɛ e kaseli ɔmɛ nu ɔ, a kɛ a hɛ mi bu si, nɛ a ye gbeye wawɛɛ. 7Nɛ Yesu ba nɛ e ba pɛtɛ a he nɛ e ke: “Nyɛɛ te si, nyɛ ko ye gbeye!” 8Se benɛ a wo a hɛ nɔ ɔ, a nɛ́ nɔ ko kaa ja Yesu nɔ kake pɛ.
9Nɛ benɛ a ngɛ yoku ɔ kplee ɔ Yesu wo mɛ si veveeve ke: “Nyɛ ko sɛɛ ni nami nɛ ɔ ha nɔ ko, ja Nɔmlɔ Bi ɔ te si kɛ je gbeje lolo.” 10Nɛ e kaseli ɔmɛ bi lɛ ke: “Mɛni he je mɔ nɛ mlaa tsɔɔli ɔmɛ deɔ ke, ja Elia ba lolo ɔ?” 11Se Yesu he nɔ nɛ e de mɛ ke: “Elia ma niinɛ, nɛ e maa to nihi tsuo blɔ nɔ ekohu. 12Se i ngɛ nyɛ dee ke, Elia ba mo, nɛ a yo we lɛ, se mohu a pee lɛ nɔ́ tsuaa nɔ́ nɛ a suɔ. Ja nɔuu Nɔmlɔ Bi ɔ hu maa na amanehlu ngɛ a dɛ mi.” 13Kɛkɛ nɛ kaseli ɔmɛ kɔ se kaa Yohane, baptisilɔ ɔ, he munyu e kɛ mɛ ngɛ tue ɔ nɛ.
Yesu tsa jokuɛ nyumuyo ko nɛ mumi yayami ngɛ e mi
(Marko 9.14-29; Luka 9.37-43)
14Nɛ benɛ a su asafo ɔ ngɔ ɔ, nyumu ko ba e ngɔ, nɛ e ba kpla si ngɛ e hɛ mi, 15nɛ e ke: “Nyɔmtsɛ, naa ye bi nyumu ɔ mɔbɔ, se e ngɛ kɔkɔ nue nɛ e ngɛ nɔ nae wawɛɛ; ejakaa bɔɔ kɛ bɔɔ e ya nɔ la mi, nɛ bɔɔ kɛ bɔɔ e ya nɔ nyu mi. 16Nɛ i kɛ lɛ ba o kaseli ɔmɛ a ngɔ, se a nyɛ we lɛ nɛ a tsa.” 17Se Yesu he nɔ nɛ e ke: “Oo yi nɔ bi nɛ he we yi nɛ be a hanɔ! Mɛni be i kɛ nyɛ maa hi si kɛ ya su? Mɛni be nɔuu ma to ye tsui si ha nyɛ kɛ ya su? Nyɛɛ kɛ lɛ nɛ ba ye ngɔ ngɛ hiɛ ɔ.” 18Nɛ Yesu nga e yi, nɛ mumi yayami ɔ je e mi kɛ je kpo, nɛ jokuɛ ɔ he wa lɛ ngɛ jamɛ a ngmlɛfia a nɔ nɔuu.
19Kɛkɛ nɛ Yesu kaseli ɔmɛ ba e ngɔ ngɛ se, nɛ a ke: “Mɛni he je nɛ wɔɔ lɛɛ wa nyɛ we lɛ nɛ waa hia a?” 20Se Yesu de mɛ ke: “Nyɛ hemi kɛ yemi nɛ pi ɔ he je. Ejakaa niinɛ, i ngɛ nyɛ dee ke: Ke nyɛ ngɛ hemi kɛ yemi nɛ ngɛ kaa sinapi wu ɔ, nyɛ ma de yoku nɛ ɔ ke: ‘Hia ngɛ hiɛ ɔ kɛ ya lejɛ ɔ.’ Nɛ e maa hia; nɛ nɔ ko be nɛ nyɛ be nyɛe maa pee. [ 21Se kikɛmɛ a henɔ nɛ ɔ, a nyɛ we lɛ hiami kaa ja sɔlemi kɛ hwɔ hami nya kɛkɛ.”]
Yesu tu e gbenɔ kɛ e sitemi he munyu ekohu
(Marko 9.30-32; Luka 9.43-45)
22Benɛ a ngɛ si kpae ngɛ Galilea a, Yesu de mɛ ke: “A maa ngɔ Nɔmlɔ Bi ɔ ngɔ wo nimli a dɛ mi, 23nɛ a maa gbe lɛ, nɛ ligbi nɛ ji ligbi etɛ ɔ, a ma tle lɛ si.” Nɛ e dɔ mɛ wawɛɛ.
Sɔlemi we ɔ he oniatsumi
24Benɛ a ba Kapernaum ɔ, onia tsuli ɔmɛ ba Petro ngɔ nɛ a ba bi lɛ ke: “Anɛ nyɛ tsɔɔlɔ ɔ ha we jeha onia a lo?” 25E ke: “E hãa.” Nɛ benɛ e ba we mi ɔ, Yesu sɛ hlami bi lɛ ke: “Kɛ o susuu kɛɛ, Simon? Zugba a nɔ matsɛmɛ ɔmɛ ɔ, mɛnɔmɛ a dɛ a heɔ too loo onia ngɛ? Ngɛ mɛ nitsɛmɛ a bimɛ a dɛ aloo ma se tsɛmɛ a dɛ?” 26Petro de lɛ ke: “Ngɛ ma se tsɛmɛ a dɛ.” Yesu de lɛ ke: “Lɛɛ bimɛ ɔmɛ yeɔ a he mɔ. 27Se benɛ pee nɛ wa ko tsɔ a nya a, yaa wo ɔ nya nɛ o ya fɔ gbowe, nɛ kekleekle lo nɛ ma ba mi gbowe ɔ, sa lɛ, nɛ ke o pa e nya mi ɔ, o maa na sika nɛ nya suu yi enyɔ; je nɛ o ngɔ ha mɛ, ha i kɛ mo tsuo.”
Currently Selected:
Mateo 17: DAN77
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Dangme New Testament © United Bible Societies, 1977.
