Luka 6

Hejɔɔmi ligbi ɔ he sane

(Mateo 12.1-8; Marko 2.23-28)

1Hejɔɔmi Ligbi ko nɔ ɔ, Yesu ya gu blɛfo ngmɔhi a mi nɛ e kaseli ɔmɛ sake blɛfo tso mumu ɔ nɛ a hlue nɛ a kpe. 2Farisifo ɔmɛ ekomɛ bi mɛ ke: “Mɛni he je nyɛ ngɛ nɔ́ nɛ e dɛ blɔ kaa a peɔ ngɛ Hejɔɔmi Ligbi ɔ nɔ pee nɛ ɔ?” 3Nɛ Yesu ha mɛ heto ke: “Anɛ nyɛ kane we nɔ nɛ David pee, benɛ hwɔ ye lɛ kɛ nihi nɛ piɛ e he ɔ, 4bɔ nɛ e sɛ Mawu we ɔ nɛ e ya kukuɔ abolo nɛ a kɛ maa Mawu hɛ mi nɛ e dɛ blɔ kaa a yeɔ kaa ja osɔfo ɔmɛ kɛkɛ ɔ, nɛ e ye nɛ e kɛ e ko ha nihi nɛ piɛ e he ɔ hulɔ ɔ?” 5Nɛ e de mɛ ke: “Hejɔɔmi Ligbi ɔ tete nyɔmtsɛ ji Nɔmlɔ Bi ɔ nɛ.”

Nyumu nɛ nine kake gbo ɔ

(Mateo 12.9-14; Marko 3.1-6)

6Jeha nɔ, Hejɔɔmi Ligbi kpa ko hu nɔ ɔ, Yesu ya kpe he ɔ nɛ e ya tsɔɔ ni. Nɛ nyumu ko ngɛ lejɛ ɔ nɛ e hiɛ ɔ nine gbo. 7Se Mlaatsɔɔli ɔmɛ kɛ Farisifo ɔmɛ huɔ lɛ kaa e ma tsa hiɔ ngɛ Hejɔɔmi Ligbi ɔ nɔ lo, konɛ a na nɔ́ ko nɛ a da nɔ kɛ ya po e nyɛ. 8Se Yesu le a susumi ɔmɛ nɛ e de nyumu nɛ nine gbo ɔ ke: “Tee si ba da kpɛti!” Nɛ e te si ba da si. 9Kɛkɛ nɛ Yesu de mɛ ke: “Ma bi nyɛ nɔ́ ko; anɛ e da blɔ ngɛ Hejɔɔmi Ligbi ɔ nɔ kaa a peɔ kpakpa loo yayami, kaa a heɔ nɔ yiwami loo a kpataa e hɛ mi?” 10Nɛ e hyɛ mɛ tsuo a hɛ mi kɛ kpe, nɛ e de nyumu ɔ ke: “Kpa o nine ɔ mi!” E pee ja, nɛ a tsa e nine ɔ. 11Se mɛɛ lɛɛ a gli nɛ a bɔni Yesu he ga tomi bɔ nɛ a maa pee lɛ ha.

Yesu hla bɔfohi nyɔngma kɛ enyɔ

(Mateo 10.1-4; Marko 3.13-19)

12Jeha nɛ ɔ, e ba mi ngɛ jamɛ a be ɔmi kaa Yesu pue nɔ kɛ ho yoku ɔ nɔ ya nɛ e ya sɔle, nɛ e fɔ nyɔ kɛ sɔle kɛ tsɛ Mawu. 13Nɛ benɛ je na a, e tsɛ e kaseli ɔmɛ kɛ ba e ngɔ nɛ e hla a kpɛti ni nyɔngma kɛ enyɔ, ninɛmɛ nɛ e tsɛ mɛ bɔfohi hulɔ ɔ: 14Simon nɔ nɛ e wo lɛ Petro hulɔ ɔ, kɛ e nyɛmi Andrea; Yakobo kɛ Yohane, Filipo kɛ Bartolomeo; 15Mateo kɛ Toma; Yakobo, Alfeo bi ɔ, kɛ Simon, nɔ nɛ a tsɛɛ Zelote (Hɛdɔlɔ) ɔ; 16Yuda, Yakobo nyɛmi ɔ, kɛ Yuda Iskariot, nɔ nɛ ba plɛ seblɔtsɔɔlɔ ɔ.

Yesu tsɔɔ ni nɛ e tsa nihi

(Mateo 4.23-25)

17Nɛ Yesu kɛ mɛ kple si kɛ ba, nɛ a ba da he ko gbajaa kɛ e kaseli asafo ɔ, kɛ nihi fuu nɛ je Yudea tsuo kɛ Yerusalem kɛ Tiro kɛ Zidon wo nya ma amɛ a mi nɛ ma lɛ tue bumi kɛ a hiɔhi a tsami ɔ, 18kɛ nihi nɛ mumi yayamihi ngɛ mɛ haoe ɔ, nɛ e tsa mɛ. 19Nɛ asafo mluku ɔ tsuo ngɛ hlae nɛ a ta e he, ejakaa hewami ngɛ e mi jee kɛ ngɛ mɛ tsuo tsae.

Buajɔmi kɛ kɔmɔyemi

(Mateo 5.1-12)

20Kɛkɛ nɛ Yesu plɛ e hɛ ngɔ tsɔɔ e kaseli ɔmɛ nɛ e ke:

“A gbaa nyɛ, ohiafo ɔmɛ;

ejakaa nyɛ nɔ́ ji Mawu matsɛyemi ɔ nɛ.

21“A gbaa nyɛ nihi nɛ hwɔ ngɛ nyɛ yee amlɔ nɛ ɔ;

ejakaa a ma ha nyɛ maa tɔ.

“A gba nyɛ nihi nɛ nyɛ ngɛ ya foe amlɔ nɛ ɔ;

ejakaa nyɛ maa muɔ.

22“A gbaa nyɛ, ke nihi nyɛ nyɛ, nɛ a kɛ nyɛ po tako mi, nɛ a jɛ nyɛ, nɛ a po nyɛ biɛ mi kaa biɛ yaya ngɛ Nɔmlɔ Bi ɔ he ɔ. 23Nyɛ nya ngɛ jamɛ a ligbi ɔ nɔ nɛ nyɛɛ tuu kɛ buajɔmi ejakaa oʼɛ, nyɛ hiɔwo ngɛ hiɔwe; ejakaa ja nɔuu a tsɛmɛ ɔmɛ pee gbali ɔmɛ.

24“Se nyɛ niatsɛmɛ ɔmɛ ɔ, musu tloo nyɛ;

ejaka nyɛ na nyɛ buawomi momo.’

25“Musu tloo nyɛ, nyɛ nihi nɛ nyɛ tɔ amlɔ nɛ ɔ;

ejakaa hwɔ maa ye nyɛ.

Musu tloo nyɛ, nyɛ nihi nɛ nyɛ ngɛ

muɔe amlɔ nɛ ɔ;

ejakaa nyɛ maa ye kɔmɔ nɛ nyɛ

ma fo ya.

26“Musu tloo nyɛ ke nihi tsuo tu nyɛ he munyu kpakpa a, ejakaa ja nɔuu a tsɛmɛ ɔmɛ pee lakpa gbali ɔmɛ!”

Henyɛli a suɔmi

(Mateo 5.38-48; 7.12)

27“Se nyɛ nihi nɛ nyɛ ngɛ tue bue nɛ ɔ, i ngɛ nyɛ dee ke: Nyɛɛ suɔ nyɛ henyɛli; nyɛɛ pee nihi nɛ nyɛɛ nyɛ ɔ kpakpa. 28Nyɛɛ gbaa nihi nɛ gbiɛɛ nyɛ; nyɛɛ sɔle ha nihi nɛ waa nyɛ yi mi. 29Nɔ nɛ ma gba o tue kake mi ma a, plɛ kake ɔ hu ngɔ ha lɛ; nɛ nɔ nɛ ma kpɔ o nɔ bɔ ɔ, koo nyɛ lɛ o gugue tade ɔ hu he. 30Nɔ tsuaa nɔ nɛ baa mo nɔ́ ko ɔ, ha lɛ; nɛ nɔ nɛ ma kpɔ o nihi ɔ, ko bi lɛ hu. 31Nɛ bɔ nɛ nyɛ hlaa kaa nihi nɛ pee ngɔ ha nyɛ ɔ, nyɛ hu nyɛɛ pee ja nɔuu ngɔ ha mɛ.

32“Nɛ ke nyɛ suɔ nihi nɛ suɔ nyɛ ɔ, mɛni sina nyɛ ngɛ? Ejakaa yayami peeli hu suɔ nihi nɛ suɔ mɛ. 33Nɛ ke nyɛ peɔ kpakpa ha nihi nɛ peɔ nyɛ kpakpa a, mɛni sina nyɛ ngɛ? Ejakaa yayami peeli hu peɔ ja nɔuu. 34Nɛ ke nyɛɛ kɛ nihi pa nihi nɛ nyɛ hɛ ngɛ nɔ kaa a ma ha nyɛ ekohu ɔ, mɛni sina nyɛ ngɛ? Ejakaa yayami peeli hu kɛ nihi paa yayami peeli konɛ a na ja bɔ nɔuu. 35Mohu nyɛɛ suɔ nyɛ henyɛli, nɛ nyɛɛ pee kpakpa nɛ nyɛɛ pa nɛ nyɛ ko hyɛ nɔ́ ko blɔ kulaa, nɛ nyɛ hiɔwo maa hiɛ, nɛ nyɛ ma plɛ Hiɔweno ɔ bimɛ, ejakaa e muklii mi jɔɔ haa tlumuhi kɛ nimli yayamihi. 36Nyɛɛ na mɔbɔ, kaa bɔ nɛ Nyɛ Tsɛ ɔ hu naa mɔbɔ ɔ.”

Kojomi yaya

(Mateo 7.1-5)

37“Nyɛ ko kojo konɛ a ko kojo nyɛ; nyɛ ko bu fɔ, konɛ a ko bu nyɛ fɔ; nyɛ kɛ pa, nɛ a kɛ maa pa nyɛ. 38Nyɛ ha, nɛ a ma ha nyɛ; susumi nɔ́ kpakpa nɛ a nyɛ nɔ nɛ a mimiɛ nɛ e hyi kɛ be nɔ nihi ma ngɔ pue nyɛ tɛ nɔ; ejakaa susumi nɔ́ nɛ nyɛɛ kɛ susuu ɔ, lɔɔ a maa kpale ngɔ susu ha nyɛ.” 39Nɛ Yesu bu mɛ abɛ ko hu ke: “Anɛ hɛyuyuilɔ ma nyɛ tsɔɔ hɛyuyuilɔ blɔ lo? Anɛ pi muɔ mi nɛ mɛ ni enyɔ ɔ tsuo a maa ya nɔ? 40Kaselɔ pa we e tsɔɔlɔ; se nɔ tsuaa nɔ nɛ a tsɔse lɛ kɛ pi si ɔ maa pee kaa e tsɔɔlɔ.

41“Mɛ he je o naa ngu nyafii nɛ ngɛ o nyɛmi hɛngmɛ nɔ ɔ, nɛ plai nɛ ngɛ mo nitse o hɛngmɛ nɔ ɔ lɛɛ o yo we ɔ? 42Kɛ maa pee kɛɛ nɛ o ma nyɛ de o nyɛmi ke: ‘Mami, ha ma je ngu nyafii nɛ ngɛ o hɛngmɛ nɔ ɔ,’ benɛ o nɛ plai nɛ ngɛ mo nitse o hɛngmɛ nɔ ɔ? osatotsɛ, je plai ɔ ngɛ mo nitsɛ o hɛngmɛ nɔ kekle, nɛ lɔ ɔ loko o maa na paa nɛ o je ngu nyafii ɔ ngɛ o nyɛmi ɔ hɛngmɛ nɔ.

Tso kɛ e yiblii

(Mateo 7.16-20; 12.33-35)

43“Ejakaa tso kpakpa ko be nɛ woɔ yiblii yaya, nɛ jeha nɔ hu tso yaya ko hu be nɛ woɔ yiblii kpakpa. 44Ejakaa tso tsuaa tso nitsɛ yiblii a kɛ leɔ lɛ: Ejakaa a la we ngmɔkɔ ngɛ zezlehi a nɔ, nɛ pohu a la we wai yiblii ngɛ mio tsohi a nɔ. 45Nɔmlɔ kpakpa jeɔ nɔ́ kpakpa kɛ jee e tsui mi juetli kpakpa a mi, nɛ nɔmlɔ yayami hu jeɔ nɔ́ yaya kɛ jee e tsui mi juetli yaya a mi, ejakaa nɔ́ nɛ hyi nɔmlɔ tsui kɛ be nɔ ɔ, lɔ ɔ e nya deɔ.”

Tsumali enyɔ ɔ

(Mateo 7.24-27)

46“Se mɛ he je nyɛ tsɛɛ mi: ‘Nyɔmtsɛ, Nyɔmtsɛ,’ nɛ nyɛ pee we nihi nɛ i deɔ ɔ? 47Nɔ tsuaa nɔ nɛ baa ye ngɔ nɛ e nuɔ ye munyu ɔmɛ nɛ e yeɔ nɔ ɔ, ma tsɔɔ nyɛ bɔ nɛ e ngɛ ha: 48E ngɛ kaa nyumu ko nɛ benɛ e maa ma tsu ɔ, e tsua si voo nɛ e to sisi ngɛ tɛ sa nɔ; nɛ benɛ pa hia a, e si tsu ɔ, se e nyɛ we lɛ nɛ e hule, mɛni he je ɔ, a to sisi ngɛ tɛ sa nɔ. 49Se nɔ nɛ nuɔ nɛ e yi nɔ ɔ, e ngɛ kaa nyumu ko nɛ ma tsu ngɛ zugba hɛ mi nɛ a tui sisi; nɛ pa a si lɛ, nɛ amlɔ ɔ e hule, nɛ jamɛ a tsu ɔ hulemi ɔ kle.”

Currently Selected:

Luka 6: DAN77

ማድመቅ

Copy