Luka 2

Yesu fɔmi

(Mateo 1.18-25)

1Jamɛ a be ɔ mi ɔ, e ba mi kaa hiɔngɔ ko je Kaisare Augusto ngɔ ba ke a kane je ɔ tsuo nɛ a ngma. 2Enɛ ɔ ji kekleekle nɔ kanemi nɛ ba nɔ be mi nɛ Kirenio ngɛ amlaalo yee ngɛ Siria a. 3Nɛ nɔ tsuaa nɔ ho lɛ nitse e ma mi ya konɛ a ya ngma e biɛ.

4Lɔ ɔ he ɔ Yosef hu je Nazaret ma a mi ngɛ Galilea, nɛ e ya Betlehem nɛ ji David ma nɛ ngɛ Yudea a mi, ejakaa e je David we kɛ e weku ɔ mi, 5konɛ a ngma lɛ kɛ Maria, e yo nɛ e bi e si nɛ e mi wa a biɛ. 6Benɛ a ngɛ lejɛ ɔ, e fɔmi be ba su. 7Nɛ pe fɔ bi nyumu, e kekleekle bi ɔ, nɛ e ngɔ bo ngɔ blaa lɛ, nɛ e ngɔ lɛ ngɔ fɔ lohwehi a niye ni nɔ mi, ejakaa a nɛ blɔ ngɛ nibwɔhi a to he ɔ.

Tohyɛli ɔmɛ kɛ bɔfo ɔmɛ

8To hyɛli komɛ ngɛ nga a nɔ ngɛ lejɛ ɔ ni ɔmɛ a mi nɔuu nɛ ngɛ nyɔ fɔe kɛ ngɛ a tohi a he bue nyɔ mi. 9Nɛ oʼɛ, Nyɔmtsɛ ɔ bɔfo ko ba da a kasa nya, nɛ Nyɔmtsɛ ɔ hɛ mi nyami kpɛ bɔle mɛ, nɛ a ye gbeye wawɛɛ. 10Nɛ bɔfo ɔ de mɛ ke: “Nyɛ ko ye gbeye; ejakaa oʼɛ, ma sɛɛ bua jɔmi sane kpetekpleenyɛ nɛ ji ma tsuo nɔ ɔ ha nyɛ, 11kaa mwɔ nɛ ɔ a fɔ yi wami helɔ nɛ ji Kristo, Nyɔmtsɛ ɔ, ngɔ ha nyɛ ngɛ David ma a mi. 12Nɛ enɛ ɔ maa pee okadi ha nyɛ; Nyɛ maa na bimwɔyo ɔ nɛ a kɛ bo blaa e he nɛ e hwɔɔ si ngɛ lohwehi a niye ni nɔ mi.”

13Nɛ tlukaa a, hiɔwe ta ngua ba piɛ bɔfo ɔ he, nɛ a je Mawu yi de ke:

14“Hɛ mi nyami ha Mawu ngɛ hiɔwe lokoo,

Nɛ he jɔmi nɛ ba zugba a nɔ

Ha nihi nɛ sa e hɛ mi.”

15Nɛ e ba mi kaa benɛ bɔfo ɔmɛ je a ngɔ kɛ ho hiɔwe ya a, to hyɛli ɔmɛ de a he ke: “Nyɛ ha waa ho Betlehem ya koo, nɛ wa ya hyɛ sane nɛ ba nɛ Nyɔmtsɛ ɔ je tsɔɔ wɔ nɛ ɔ.” 16Nɛ a ho nɔuu nɛ a ya na Maria kɛ Yosef kɛ bimwɔyo ɔ nɛ hwɔɔ si ngɛ lohwehi a niye ni nɔ mi. 17Nɛ benɛ a ya na lɛ ɔ, a jaje sane nɛ a sɛɛ ngɔ ha mɛ ngɛ jokuɛ ɔ he ɔ ngɔ tsɔɔ mɛ. 18Nɛ nihi tsuo nɛ nu ɔ hɛ mi pee mɛ yaa ngɛ nɔ́ nɛ to hyɛli ɔmɛ sɛɛ ha mɛ ɔ he. 19Se Maria kɛ kikɛmɛ a munyu nɛ ɔmɛ tsuo to nɛ e susuu he ngɛ e tsui mi. 20Nɛ to hyɛli ɔmɛ kpale a se nɛ a wo Mawu hɛ mi nyami, nɛ a je e yi ngɛ nihi tsuo kulaa nɛ a nu nɛ a na a he, kaa bɔ nɛ a sɛɛ ngɔ ha mɛ ɔ.

A wo Yesu biɛ

21Nɛ benɛ ligbi kpaanyɔ su nɛ a maa po jokuɛ ɔ, a wo lɛ Yesu, kaa bɔ nɛ bɔfo ɔ wo lɛ momo loko a ngɔ e hɔ ɔ.

A ngɔ Yesu ngɔ tsɔɔ ngɛ sɔlemi we ɔ

22Nɛ benɛ a gbe he tsukɔmi ligbi ɔmɛ a nya ngɛ Mose Mlaa a nya a, a kɛ Yesu ya Yerusalem konɛ a kɛ lɛ ya tsɔɔ Nyɔmtsɛ ɔ, 23kaa bɔ nɛ a ngma ngɛ Nyɔmtsɛ ɔ Mlaa a mi ke: “Nyumu tsuaa nyumu nɛ bliɔ muklii nya a, a ma tsɛ lɛ klɔuklɔu ha Nyɔmtsɛ ɔ.” 24Nɛ a ya sã bɔ, kaa bɔ nɛ a de ngɛ Nyɔmtsɛ ɔ Mlaa a mi ke: “Lahuɛhi enyɔ loo beleku lahuɛ tsɔwi enyɔ.”

25Jeha nɛ ɔ nyumu ko ngɛ Yerusalem nɛ a tsɛɛ lɛ Simeon; nɛ lɛ nyumu ɔ dalɔ ji lɛ nɛ e yee Mawu gbeye; e ngɛ Israel bua jɔmi ɔ blɔ hyɛe, nɛ Mumi Klɔuklɔu ngɛ e nɔ. 26Nɛ Mumi Klɔuklɔu ɔ je kpo tsɔɔ lɛ ke e be gboe ja e na Nyɔmtsɛ ɔ Kristo ɔ lolo. 27Nɛ Mumi ɔ kpaka lɛ kɛ ba sɔlemi we ɔ. Nɛ benɛ jokuɛ Yesu fɔli ɔmɛ kɛ lɛ ba konɛ a ba tsu bɔ nɛ ji Mlaa a blɔ nya ngɔ ha lɛ ɔ, 28kɛkɛ nɛ e he lɛ ngɔ fɔ e kɔni bɔkɔ mi, nɛ e gbaa Mawu nɛ e ke:

29“Jeha nɛ ɔ, Nyɔmtsɛ, ha o wenyumu nɛ ya,

Ngɛ o munyu ɔ nya ngɛ he jɔmi mi.

30Ejakaa ye hɛngmɛ na o yi wami hemi ɔ”

31Nɔ́ nɛ o dla ngɔ ma ma tsuo hɛ mi,

32La nɛ ma bli majemajeli ɔmɛ a hɛ

Nɛ maa wo o ma Israel hɛ mi nyami ɔ,

33Nɛ Yesu tsɛ kɛ e nyɛ nya kpɛ a he ngɛ nihi nɛ a de ngɛ e he ɔ he. 34Nɛ Simeon gbaa mɛ nɛ e de e nyɛ Maria ke: “Oʼɛ, a kɛ bi nɛ ɔ da si ha nihi fuu a si gbeemi kɛ a si temi ngɛ Israel, kɛ okadi nɛ a maa tu munyu nɔ si, 35nɛ mo nitse hu, ha maa gbɔ o tsui mi; konɛ a je tsuihi fuu a susumihi kpo.”

36Nɛ gbalɔyo ko ngɛ nɛ a tsɛɛ lɛ Hana nɛ ji Fanuel biyo nɛ je Asher weku ɔ mi, nɛ e bwɔ saminya, nɛ e kɛ e huno hi si jeha kpaago kɛ je e yihe mi, 37se jeha nɛ ɔ yalɔ yo ji lɛ, nɛ e ye maa pee jeha nyingmi kpaanyɔ kɛ eywiɛ. E ji sɔlemi we ɔ kulaa, se e jaa Mawu kɛ hwɔ hami kɛ pɛɛ kpami nyɔ kɛ pia. 38Lɛ hu e ba ngɛ jamɛ a ngmlɛfia a mi nɔuu, nɛ e ba je Mawu yi, nɛ e tu jokuɛ ɔ he munyu ngɔ tsɔɔ nihi tsuo nɛ ngɛ Yerusalem kpɔmi ɔ blɔ hyɛe ɔ.

A kpale kɛ ho Nazaret ya

39Nɛ benɛ a gbe ni ɔmɛ tsuo nya ngɛ Nyɔmtsɛ ɔ Mlaa a nya a, a kpale a se kɛ ho Nazaret, mɛ nitsɛmɛ a ma a mi, ya ngɛ Galilea. 40Nɛ jokuɛ ɔ ba wa, nɛ e he wa ngɛ mumi mi, nɛ e hyi tɔ kɛ nile, nɛ Mawu dloomi ngɛ e nɔ.

Yesu ngɛ sɔlemi we ɔ

41Daa jeha a, Yesu fɔli ɔmɛ yaa Yerusalem ya yeɔ Hetsɔmi nyami ligbi ɔ. 42Nɛ benɛ e ye jeha nyɔngma kɛ enyɔ ɔ, a ya Yerusalem kaa bɔ nɛ nyami ligbi ɔ yemi blɔ nya toɔmi ngɛ ɔ. 43Nɛ benɛ a gbe ligbi ɔmɛ a nya nɛ a kpale a se ekohu ɔ, jokuɛ Yesu ɔ kpɛ se ngɛ Yerusalem, nɛ e fɔli ɔmɛ li. 44Se a susu kaa e futu asafo ɔ kɛ ho, nɛ a nyɛɛ ligbi kake blɔ nyɛɛmi ya hia lɛ ngɛ a wekuli kɛ a huɛmɛ ɔmɛ a ngɔ. 45Nɛ benɛ a nɛ́ lɛ ɔ, a kpale a se kɛ ba Yerusalem ekohu ba hia lɛ. 46Nɛ e ba mi kaa ligbi etɛ se ɔ, a ya na lɛ ngɛ sɔlemi we ɔ nɛ e hii si ngɛ tsɔɔli ɔmɛ a kpɛti nɛ e ngɛ mɛ tue bue, nɛ e ngɛ mɛ ni bie. 47Nɛ nihi tsuo nɛ ngɛ lɛ tue bue ɔ nya kpɛ a he ngɛ e ni lemi kɛ e heto nɛ e ngɛ hae ɔmɛ a he. 48Nɛ benɛ a na lɛ ɔ, a nya kpɛ a he; e nyɛ bi lɛ ke: “Ye bi, mɛ he je o pee wɔ kikɛ? Oʼɛ, i kɛ o tsɛ hia mo kɛ hɛdɔ.” 49Nɛ e de mɛ ke: “Mɛ he je nyɛ ngɛ mi hlae? Anɛ nyɛ li kaa e sa kaa ma hi si ngɛ nihi nɛ ji tsaatsɛ nɔ ɔ mi lo?” 50Se mɛɛ lɛɛ a nui munyu nɛ e kɛ mɛ tu ɔ sisi. 51Nɛ e kɛ mɛ pue nɔ kɛ ho Nazaret ya, nɛ e ba e he si ha mɛ. Nɛ e nyɛ ngɔ kikɛmɛ a munyu nɛ ɔmɛ tsuo ngɔ to e tsui mi. 52Nɛ Yesu wa ngɛ ni lemi kɛ nɔmlɔ tso mi, nɛ Mawu kɛ nimli na e he bua jɔmi.

Currently Selected:

Luka 2: DAN77

ማድመቅ

Copy