Gɔ̃mèjèje be Xoma 49
49
Yakɔb tu sì na èvia woèvèawo
1Yakɔb yɔ èvia ŋusùawo bɔ̀, gblɔ̃ na wo be:
“Mì bɔ̀ ɖodu ne ma gblɔ̃
ènu kè la va jɔ̀ ɖo mìa jia, na mì.
2Mì bɔ̀ ɖodu eye mì ɖoto mìa Yakɔb be èvi ŋusùwo,
mì ɖoto Izràɛl mìa tɔa be ègbè.
3Èwò Rubɛ̀n, wò nyi èvi nyè cucugbã,
ɖèkajɛ nyè mè vi cucugbã,
ŋusɛ̃ ku èhũ wɔ̀ àdã lè àsi wò.
4Mù gbà gbãgo sìgbè ètɔ̀ kèwo fìɔnà nène ò!
Kè e nyi be wò ji ètɔ wò be èsrɔ̃ Bilhà,
wò pòɖi àba kè ji mù mlɔ̃ a.
5Simeɔ̀n ku Levì, wo nyi nɔ̀viwo.
Woabe ènyà pòpòsèwo nyi èhlɔ̃dãdãwo.
6Nyè mu le yì woabe ènyà lele kpɔwo tèpe ò,
nyè mu ji la kpɔ jìjɔɛ ɖo woabe èdunɔ̀nɔ ŋuti ò,
ɖo lè woabe èjìbibi mèa, wo wù àgbètɔwo,
eye lè woa be gbegble mèa, wo ja ènyì-suwo.
7Kpɛ̃sɛ̃ na woabe àdɔ̀mèze kaɖi kaɖia!
Kudo woabe gigli bàɖàa!
Mù la ma wo lè Yakɔb mè,
mù la kãkã wo ɖo Izràɛl kpata.
8Yudà, èwò ye ètɔvi wòwo la kafu.
Àpo àlɔ̀ la kpɛ̃ lè kɛ̃tɔ wòwo be èhũɖòmè,
ètɔ wò be èviwo la do èta gũ na wò.
9Oò Yudà, jãŋùtavi ye wò nyi,
oò èvi nyè, wò gbɔ̀ so ènutɛ̃trɛ̃ gbe!
E ŋɛ̃ èklò eye e mlɔ̃ ànyi sìgbè jãŋùta-su nène
eye sìgbè jãŋùta-nɔ nènea, àmè kɛ ye la fɔ̃ ɛ̀ ò?
10Èfìɔ be nɔ̀nɔmè mu la klã lè Yudà ŋuti kpɔ ò,
eye èfìɔtikplɔ la nɔ̀ yebe jìjimèviwo si
kaka va ɖo àmè kè ɖo la xɔ̀ ɛ̀,
eye èdùkɔ̃wo ɖo la do bùbu e ŋutia, ji.
11Àmè kè ye do èkà yebe èsɔàkɛtɛ ɖo vɛ̃ti ŋuti
eye be do èkà yebe èsɔàkɛtɛvi ɖo àlɔ̀zɛ̃a ŋutia,
e nyà yebe àwù lè vɛ̃ si mè
eye yebe àwù gãa, lè vɛ̃ kpòwo be èhũ mè.
12Yebe ŋùkuviwo jì cɔ̃ sìgbè vɛ̃si nène
eye yebe àɖuwo ɣe sìgbè ènyìnɔsi nène.
13Zabulɔ̀n la sò àxue ɖo àpùa to.
E ya, la bɔ̀ àpùjihũwo ɖo àgo
eye yebe ànyigbã la kèkè yì Sidɔ̀n gowo ji.
14Isakàr nyi èsɔ àkɛtɛ kpɔ lãmè
kè mlɔ̃ ànyi ɖo èlãkpawo dòmè.
15E kpɔ be jɛ̃gbɔ̃gbɔ̃ nyɔ eye ànyigbã ji cã nyɔ.
E bɔ̀bɔ̀ yebe àbɔtawo ɖo àgbã gɔ̃mè,
e nyɔ ne kluvi be dɔwo wɔ̀wɔ.
16Dàn la ɖo kòjo na yebe dùkɔ̃a
sìgbè Izràɛl be kɔ̀tawo dòmètɔ ɖèka nène.
17Dàn la nyi èdã lè èmɔ̃a ji,
lè èmɔ̃ via jia, e la nyi jàkpàtà kè la ɖù èsɔa be àfɔ̀ gɔ̃mè
eye èsɔ kùtɔa la gɛ̃, sɔ èkpomè tù ànyi.
18Lè àpo hlùɛ̃gã mèa, Oò Tɔhonɔ̀ mù lè ŋùɖo mè!
19Na Gad, àmèwo la nɔ̀ àjòha mè na ɛ̀
eye e ya la ɖè wo ɖo ènu.
20Èlã doàmìwo la so Àsɛr na ènuɖùɖu
eye e la nɔ wɔ̀ èfìɔwo be kekè.
21Nɛftalì nyi vòvo be àvũgbɛ
kè nana nuku nyuɛ̃woa.
22Yosɛ̀f nyi àti do àmà vi,
àti do àmà vi kè lè ètɔ̀ toa
eye yebe àlɔ̀zɛ̃wo fla èkpa jè e godo.
23Wo ji ènyà lè e ŋuti, wo wɔ̀ àjrè ku do è,
àŋùtidàtɔwo wɔ̀ àhùa ku do è,
24vɔ̀a, e likè goŋu lè ŋùkɔ̀ na wo
eye yebe àbɔ ku àlɔ̀wo wɔ̀ àvũ.
To Yakɔb be àbɔ sɛ̃sɛ̃a ji,
to Izràɛl be èkpe kè le nyi kplɔ̀tɔa be nyikɔ ji.
25Ètɔ wò Ɛl ne hlùɛ̃ wò gã,
Mawu ŋusɛ̃kpatatɔa ne tu sì na wò!
Jiŋùkusi be sìtuwo,
ànyigbã gɔ̃mè be sìtuwo,
ànɔwo kpata be sìtuwo
26ètɔ wò be sìtu kèwo wu gã gbèɖegbè-tɔwo be sìtuwo,
ènu jro àmè kèwo so ètokɔ̃ɛwo mèa.
Woa kpata ne kɔ̀ ɖo Yosɛ̀f be èta ji,
kɔ̀ ɖo àmè kè wo ɖo àsi èta na lè ètɔviawo dòmèa ji.
27Bɛnyamìn nyi gbète trɛ̃ ènu, ŋùdekɛ̃nyɛ̃a e gbà kpɔ̀tɔ̀ le ɖù ènu eye lè fìɛ̃sia e mã àmɔ̀nyɔ̀nu a.”
28Izràɛl be kɔ̀ta woèvè ye lè. Eye ènyà kèawo ye woa tɔa gblɔ̃ na wo wàlɛbɛ kè be tu sì na wo eye be gblɔ̃ sìtu-nya na wo ɖèka-ɖèkaa.
Yakɔb be ku
29E yomè a, e do ègbè àsi na wo gblɔ̃ be: “Mù la trɔ yì tɔgbe nyèwo gbɔ. Mì yì ɖì mù ɖo ètɔ nyèwo gbɔ, lè àkpãdo kè lè Hitìtɔ Efrɔ̀n be àgblèa mè, 30lè àkpãdo kè lè Màkpelà be àgblè kè kpãŋùkɔ̀ Màmrà kè lè Kanàn nyigbã jia mè, àgblè kè ye Abràham plè lè Efrɔ̀n Hitìtɔ si eye be sɔ wɔ̀ àmèɖìpe a. 31Funua ye Abràham ɖì èsrɔ̃a Sarà ɖo, funua ye wo ɖì Izàk ku èsrɔ̃a Rebekà ɖo, funua ke ye mù ɖì Leà ɖo. 32Wo plè àgblèa ku àkpãdo kè lè e mèa lè Hɛtì be èvi ŋusùwo si.” 33Wàlɛbɛ kè Yakɔb sɔ ègbèawo do àsi na èvia ŋusùawo vɔ̀a, e sɔ yebe àfɔ̀wo dà ɖo àba a ji, e jo gbɔ̃gbɔ̃a ɖɛ eye e yì tɔgbeawo gbɔ.
Currently Selected:
Gɔ̃mèjèje be Xoma 49: GEN
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Mina Bible © Bible Society of Togo, 2014.