Gɔ̃mèjèje be Xoma 35
35
So Sikɛ̀m yì Mamrè
1Mawu gblɔ̃ na Yakɔb be: “Sitè ne wòa yì Betɛ̀l nyigbã ji eye sò àxue ɖo funu. Li vɔsakpe ɖo funu na Mawu kè ze ɖo ji wò, wàlɛbɛ kè wò le si lè fòfo wò Esaò be ŋùkɔ̀a.” 2Yakɔb gblɔ̃ na yebe àxuedo a ku àmè kèwo keŋu kpàsà ɛ̀ do a be: “Mì ɖè àmèjrowo be vòdu kèwo lè mìa dòmèa jo. Mì kɔ̀ mìa ɖokoewo ŋuti eye mìa ɖɔ̀lì mìabe àwùwo. 3Mì sitè kplà! Mì na mia yì Betɛ̀l eye mù la li vɔsakpe ɖèka na Mawu kè sè àpe ègbè lè àkpɔ̃ ɖɔɖɔ be gàmèa. E nɔ̀ ku mù lè èmɔ̃a ji àfi kè mù zɔ̃ toa.” 4Wo lɔ àmèjro be vòdu kèwo lè woabe àlɔ̀wo mèa ku ètomè gàvi kèwo lè èto na woa na Yakɔb; eye e kù èdo ɖo Tèrebĩti kè lè Sikɛ̀m gbɔa gɔ̃mè, lɔ wo kɔ̀ ɖo e mè, eye e tu èdoa. 5Wo jo lè funua eye Mawu sɔ vɔ̃vɔ̃ jiŋɔ do dùkɔ̃ kèwo lè funuawo dòmè: àmè ɖekpe mu sɔ èhuã jè Yakɔb be ŋusùviawo yomè ò. 6Yakɔb va yì ɖo Luz be èdù kè lè Kanàn nyigbã jia mè, wo gbà yɔna ɛ̀ be Betɛ̀l, e ye ku àmè kèwo keŋu kplɔ̀ ɛ̀ do a. 7Lè funua, e li vɔsakpe ɖèka eye e yɔ tèpe kèa be “Ɛl Betɛ̀l” ɖo funua ye Mawu ze ɖo e ji lè wàlɛbɛ kè be le si na fòfoa. 8Dèborà, nyɔ̃nù kè na ànɔ Rebekà vifɛ̃mèa ku eye wo ɖì ì lè Betɛ̀l, ɖo àti gãa kè Yakɔb yɔ be “Àvi be àti gãa” gɔ̃mè. 9Mawu gbà ze ɖo Yakɔb ji wàlɛbɛ kè be trɔ gbɔ̀ so Aràm be gbàjàji, kè lè Mèzòpòtamìa eye Mawu tu sì na Yakɔb. 10Mawu gblɔ̃ na ɛ̀ be: “Àpo nyikɔ ye nyi Yakɔb. Wo mu la gbà yɔ wò be Yakɔb ke ò, vɔ̀a Izràɛl ye la nyi àpo nyikɔ.” Eye be yɔ yebe nyikɔ be Izràɛl. 11Mawu gblɔ̃ na ɛ̀ be: “Mù nyi Mawu sɛ̃ŋu. Wò la jì ne wòa sùgbɔ; dùkɔ̃ ku dùkɔ̃wo be ha la to so èwò mè eye èfìɔwo la jɔ̀ so èwò mè. 12Ànyigbã kè mù sɔ na Abràham ku Izàk-a, mù sɔ le na wò; ànyigbã kèa la nyi àpo jìjimèviwo tɔ̀.” 13Mawu jo lè e gbɔ yì jiŋùkusi boo lè àfi kè be pò nupo kudo è lèa. 14Yakɔb li ŋùɖo-kpe ɖo àfi kè Mawu pò nupo kudo è lèa, ŋùɖo kpe kè ji be pòɖɛ̀ lè, gbà kɔ̀ àmì ɖoa. 15Yakɔb yɔ àfi kè Mawu pò nupo kudo è lèa be Betɛ̀l. 16Wo jo lè Betɛ̀l. E gbà kpɔ̀tɔ̀ ŋutɔ ne woa ɖo Efratà wàlɛbɛ kè Raxɛ̀l jì èvia; eye yebe èvijìjia sɛ̃ŋu. 17Vɔ̀, ekè yebe èvijìjia sɛ̃ŋua, èvijìtɔa gblɔ̃ na ɛ̀ be: “Mù gbà vɔ̃ ò, ɖo wò ɖo ŋusùvi ɖèka kpe è.” 18Lè yebe èhlìnùnu mèa, gbɔ̀xue be la kua, e yɔ ɛ̀ be Bɛn-Onì, kè gɔ̃mè nyi èfũlò-vi, vɔ̀a ètɔa yɔ ɛ̀ be Bɛnyamìn, kè gɔ̃mè nyi ɖùsimè-vi. 19Raxɛ̀l ku eye wo ɖì ì lè Efratà be èmɔ̃a ji, kè gɔ̃mè nyi Bɛtlɛhɛ̀m. 20Yakɔb li ŋùɖo kpe ɖo yebe èyɔ̀doa ji: e ye nyi Raxɛ̀l be èyɔ̀do be ŋùɖokpe kè gbà lè egbèa. 21Izràɛl jo lè funua eye e tù yebe gòxɔa ɖo Migdàl-Edɛ̀r godo. 22Vɔ̀, kè Izràɛl gbà kpɔ̀tɔ̀ lè àgo ŋua jia, Rubɛ̀n yì dɔ̃ ku Bilhà, ètɔa be èsrɔ̃wo dòmètɔ ɖèka, eye Izràɛl sè ènyà kèa.
Yakɔb be vi ŋusùwo be hɛ̃hlɛ̃ nyi woèvè. 23Leà be èvi ŋusùwo nyi: Rubɛ̀n, Yakɔb be vi ŋusù cucugbãa, Simeɔ̀n, Levì, Yudà, Isakàr ku Zabulɔ̀n. 24Raxɛ̀l be èvi ŋusùwo nyi: Yosɛ̀f ku Bɛnyamìn. 25Bilhà kè nyi Raxɛ̀l be sumɔ̃via be èvi ŋusùwo nyi: Dàn ku Neftalì. 26Zilpà kè nyi Leà be sumɔ̃via be èvi ŋusùwo nyi: Gad ku Àsɛr. Woawo ye nyi Yakɔb be ŋusùvi kèwo wo jì lè Aràm be gbàjàjia. 27Yakɔb va ɖo ètɔa Izàk gbɔ lè Mamrè, Kìriat-Arbà be èto, kè wo gbà yɔna be Hebrɔ̀n, àfi kè Abràham ku Izàk, wo nɔ̀ kpɔa. 28Izàk be àgbènɔ̀zãa kpata nyi èpè èkà ènè takpo (180); 29Izàk jo gbɔ̃gbɔ̃a ɖɛ, e ku eye e yì mlɔ̃ ye tɔ̀wo gbɔ, lè yebe àmègã kuku ku àgbènɔ̀zã fuu mè. Èviawo Esaò ku Yakɔb wo ɖì ì.
Currently Selected:
Gɔ̃mèjèje be Xoma 35: GEN
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Mina Bible © Bible Society of Togo, 2014.