Gɔ̃mèjèje be Xoma 31
31
1E sè be Labàn be vi ŋusùwo le gblɔ̃ be: “Yakɔb hlà mia tɔ be ènuwo kpata sɔ wɔ̀ ye tɔ̀, eye to ekèa ji ye ènuwo sù e si.” 2Yakɔb le ŋùku ɖo Labàn ŋuti eye be kpɔ be èkà dodo kè lè yèwo dòmè sã, mu gbà lè ò. 3Tɔhonɔ̀ gblɔ̃ na Yakɔb be: “Trɔ yì ètɔ wòwo be ànyigbã ji lè àpo xòmè mè: mù la nɔ̀ ku wò.” 4Yakɔb na wo yɔ Raxɛ̀l ku Leà na ɛ̀ lè àgblè ji fikè be lè kudo àlɛ̃awo lèa. 5E gblɔ̃ na wo be: “Mù kpɔ be mìa tɔ mu gbà le nɔ̀ ku mù sìgbè sãa nène ò; vɔ̀a ètɔ nyè be Mawu ya lè gbà kudo mù. 6Mìa ya, mì nya be mù sumɔ mìa tɔ ku àpe ŋusɛ̃ kpata. 7Mìa tɔ trɔ mù to e mè, e ɖɔ̀lì àwòbanu nyèwo zè èwo, vɔ̀a Mawu mu na ɛ̀ èmɔ̃ ne bèa crɔ̃ mù ò. 8Ne e ɖè gblɔ̃ be: “Àlɛ̃ ŋuti wùãtã-wùãtãwo ye la nyi èfɛ̃tu wòa”, àlɛ̃awo kpata jìnà èvi ŋuti wùãtã-wùãtã, eye ne e ɖè gblɔ̃ be: “Àlɛ̃ kèwo ŋuti èflì lèawo ye la nyi fɛ̃tu wòa”, àlɛ̃awo kpata jìnà èvi kèwo ŋuti èflì lèa. 9Mawu xɔ̀ mìa tɔ be àlɛ̃ha lè e si eye be sɔ ɛ̀ na mù. 10Vɔ̀, gà kè mè ye èlãwo le lia woa nɔ̀nɔwoa, mù kɔ ŋùkumè yì ji eye lè àvìmè, mù kpɔ gbɔgbɔɛ kèwo ŋuti èflì lèa, kèwo be ŋuti lè wùãtã-wùãtã ku kèwo ɖo èfu hamè-hamèwoa, cɔ̃ èlã-nɔawo ji. 11Mawu be àtikplɔtɔa gblɔ̃ na mù lè àvìmè be: 'Yakɔb'. Mù ɖo e ŋuti be: 'Ènyè ye kè'. 12E yì e ji be: “Kɔ ŋùkumè yì ji ne wòa kpɔ gbɔgbɔɛ kèwo cɔ̃ èlã-nɔawo jia ɖa, èflì, èfu wùãtã-wùãtã ku hamè-hamè lè woa ŋuti, ɖo mù kpɔ ènu kè Labàn wɔ̀ kudo wòa. 13Ènyè ye nyi Mawu kè ŋuti ye wò do àmì èta na èkpe kè wò li ɖo Betɛ̀l-a eye wò fìã àjɔ̀gbè na mù. Fifìa, sitè, jo lè ànyigbã kèa ji ne wòa yì àpo xòmè be ànyigbã ji.” 14Raxɛ̀l ku Leà wo ɖo e ŋuti na ɛ̀ be: “Mi gbà ɖo mamã ɖe kudo ècrɔ̃nu ɖe lè mia tɔ be àxomèa? 15Mu sɔ mi sìgbè àmèjrowo eye be sà mi xɔ̀ miabe ègà ɖù òa? 16Nène ye àdɔ̀kùnɔ̀ kèwo kpata Mawu lɔ lè mia tɔ sia, nyi mia ku miabe èviwo tɔ̀. Eŋuã, wɔ̀ ènu kè Mawu gblɔ̃ na wò a fifì.”
17Yakɔb sitè eye be kplɔ̀ èvia ku èsrɔ̃awo ɖo èsɔkpovènɔ̀wo ji jo. 18E kplɔ̀ yebe èlãwo kpata, eye e sɔ àdɔ̀kùnɔ̀ kèwo keŋu nyi ye tɔ̀, èlãwo nyi èlã kèwo be xɔ̀ lè Aràm be gbàjàjìawo, ne bèa trɔ yì ètɔa Izàk gbɔ lè Kanàn nyigbã ji. 19Labàn yì èfu kpà gbe na yebe àlɛ̃ha wàlɛbɛ kè ye Raxɛ̀l yì fĩ ètɔa Labàn be àti kpàkpawo. 20Yakɔb flù àyè na Aràmtɔ Labàn ne mu gbà nya be yè le ja si jo ò. 21E si jo ku ènu kèwo nyi ye tɔ̀a, e sitè, e sò ètɔ̀a eye e tùtà Gilead be ètowo ji. 22Lè ŋùkèkè ètɔ̃agbèa, wo sìa Labàn be Yakɔb si jo. 23E kplɔ̀ nɔ̀viawo ɖo àsi, jè Yakɔb yomè. E zɔ̃ àzɔ̃lì ŋùkèkè adrɛ̃ eye be yì kè ɖo e ŋuti lè Gilead be ètoawo mè.
Ɖèkawɔ̀wɔ lè Labàn ku Yakɔb dòmè
24Mawu va ji Aràmtɔ Labàn kpɔ zã mè lè èdrɔ̃ mè, gblɔ̃ na ɛ̀ be: “Kpɔ ɖokoe wò ji ne mù gbà gblɔ̃ ènyà ɖekpe ŋutɔ na Yakɔb ò.” 25Labàn yì kè ɖo Yakɔb ŋuti lè ètoa mè àfi kè be li yebe gòxɔa ɖoa; Labàn ku nɔ̀viawo cã li woabe gòxɔawo ɖo Gilead be ètoawo ji. 26Labàn gblɔ̃ na Yakɔb be: “Nukɛ ye nyi ekèa wò wɔ̀ ò! Wò flù àyè na mù eye wò kplɔ̀ èvi nyè nyɔ̃nùawo jo sìgbè àhùalewo nène. 27Nukɛ ŋuti wò wla àpo sìsi eye kè wò la sìa mù a, wò jo blè mù ò? Mù la kè tàsi wò la ɖo wò ku èhàwo lè jìjɔɛ mè, nɔ pò àsihũvi kudo kàsãŋùgu! 28Wò mu na mù fã èvi nyè nyɔ̃nùawo ku woabe èviwo ò. Funua, wò wɔ̀ ènu bàɖà 29eye mù ɖo ŋusɛ̃ la wɔ̀ ènu vuɛ̃ ku wò. Vɔ̀a, mìa tɔ be Mawu gblɔ̃ na mù èzã mè be: “Kpɔ ɖokoe wò ji ne mù gbà gblɔ̃ ènyà ɖekpe ŋutɔ na Yakɔb ò!” 30Fifìa, ekè wò jo, ɖo ètɔ wò be àxue le jro wòa ɖe, nukɛ ŋuti wò fĩ vòdu nyèwo ɖo ò?” 31Yakɔb ɖo e ŋuti na Labàn be: “Ɖo mù vɔ̃ eye mù kpɔ be wò la xɔ̀ èvi wò nyɔ̃nùawo lè àsi nyè. 32Àmè kè gbɔ ye wò la kpɔ vòdu wòwo lèa, la gũ yebe àgbè. Lè nɔ̀vi nyèwo be ŋùkɔ̀a, do jèsìdo ènu kè nyi tɔ̀ wòa eye ne wòa sɔ ɛ̀.” Yakɔb mu nya be Raxɛ̀l ye fĩ vòduawo ò. 33Labàn ɖo Yakɔb be gòxɔa mè, e yomè a e yì Leà tɔ̀a mè, e yomè a e yì sumɔ̃vi nyɔ̃nù èvèawo cã be gòxɔwo mè, eye mu kpɔ ènu ɖekpe ò. E to lè Leà be gòxɔa mè yì Raxɛ̀l tɔ̀a mè. 34Raxɛ̀l sɔ vòduawo dà ɖo èsɔkpovènɔ̀ be àgbãsɔnua be gɔ̃mè. E nɔ̀ e ji eye Labàn kãkã gòxɔa kpata mè, mu kpɔ ènu ɖekpe ò. 35Eye e gblɔ̃ na ètɔa be: “Ne àpetɔ nyè mu gbà bijì do mù ne nyè mu teŋu sitè lè ŋùku mè na wò ò, ɖo mù lè àsiɖoànyi mè.” Labàn sã gòxɔa mè, vòdu ɖekpe mà kpɔ. 36Yakɔb bijì eye be hɛ̃ ènyà ku Labàn veveɖe: E do àpa gblɔ̃ be: “Fikɛ àgɔ̀jèje nyèa ɖe? Fikɛ àgɔ̀jènu kè wò kpɔ lè gbɔ nyèa ɖe? 37Ekè wò kãkã ènu nyèwo mèa, wò kpɔ àpo ènu ɖe a? Ɖè wo to lè nɔ̀vi nyèwo ku nɔ̀vi wòwo be ŋùkɔ̀, eye ne woa sò ènyà lè mia dòmè! 38E wɔ̀ èpè èwì ye mù nɔ̀ gbɔ wò, eye gbèɖe àlɛ̃nɔ wò, àlo ègbɔnɔ wò ɖe be èfu mu gɛ̃ kpɔ ò! Nyè mu wù ègbɔ wò ɖe ɖù kpɔ ò. 39Nyè mu sɔ èlã ɖù kpɔ̀tɛ ɖe va na wò kpɔ ò, ɖo mù tuna yebe èfɛ̃a! Mù tuna àlɛ̃ kè wo fĩ dɔ̃ŋùkusu àlo èzã cã be èfɛ̃ na wò! 40Dɔ̃ŋùkusu ɖùnà mù lè ŋùkèkè, eye àvìvɔ wɔ̀nà mù lè èzã mè, eye àlɔ̃ mu sɔ̃na mù ò! 41E wɔ̀ èpè èwì ye mù nɔ̀ àpo àxomè, mù wɔ̀ èdɔ na wò èpè woènè sɔ ɖè èvi wò nyɔ̃nù èvèawo, èpè àdɛ̃ ne àpo àlɛ̃ha! Zè èwo ye wò trɔ àpe àwòbanuawo! 42Ne ètɔ nyè be Mawu, Abràham be Mawu ku Izàk be Mawu kè nyi ènusisia mu nɔ̀ kudo mù òa, wò la kè tàsi mù yì àsigba àlɔ̀gba. Vɔ̀ Mawu kpɔ àlekè wò ɖì ègbɔ mù ɖoa ku àlekè àlɔ̀ nyèwo nana fàa ɖoa; eye lè èzã ɖe mèa e sò ènyà.” 43Labàn ɖo e ŋuti na Yakɔb gblɔ̃ be: “Nyɔ̃nù kèawo nyi èvi nyè nyɔ̃nùwo; ɖèvi ŋusù kèawo nyi èvi nyè ŋusùwo; àlɛ̃ kèawo nyi àlɛ̃ nyèwo, ènu kèawo keŋu kè wò le kpɔa nyi tɔ̀ nyè. Nukɛ mù la wɔ̀ ku èvi nyè nyɔ̃nùwo ò? Na wo egbè, àlo na woabe èvi ŋusù kèwo wo jìa ò? 44Enyɔ, gàmè sù ne mia ɖùzò, ènyè ku wò, eye ne ènutèpekpɔtɔ ne nɔ̀ ènyè kudo èwò dòmè.” 45Yakɔb sɔ èkpe ɖe eye be li ì ɖo funu. 46Yakɔb gblɔ̃ na nɔ̀viawo be: “Mì cã èkpewo bɔ̀”, eye wo cã èkpeawo ye wo bɔ̀ wo ɖo tèpe ɖèka. Wo ɖùnu lè èkpeawo ji. 47Labàn yɔ funua be Yegàr-Sàhadutà, eye Yakɔb yɔ ɛ̀ be Gàlɛd. 48Labàn gblɔ̃ be: “Èkpe kèawo nyi ènutèpekpɔtɔ lè ènyè ku wò dòmè egbè” e ye ŋuti wo yɔ ɛ̀ be Gàlɛd, kè gɔ̃mè ye nyi ènutèpekpɔtɔ be bɔ̀pe. 49Eye ke tɔ̀nà Mispà, ekè ŋuti be gblɔ̃ be: “Tɔhonɔ̀ ne ɖia nyè gbàkudo wò wàlɛbɛ kè mi la jo lè mia nɔ̀nɔwo gbɔa. 50Ne wò le doŋùkpɛ̃ èvi nyè nyɔ̃nùawoa, eye ne wò yì ɖè nyɔ̃nù buwo kpe èvi nyè nyɔ̃nùawoa, ne àmè ɖekpe mu kpɔ wò cã a, nya be Mawu nyi ènutèpekpɔtɔ lè mia dòmè.” 51Labàn gblɔ̃ na Yakɔb be: “Kpɔɖa èkpe bɔ̀ɖodu kèa ye mù dà ɖo ènyè gbàkudo wò dòmè; kpɔ èkpe lili kèa cã. 52Èkpe lili kèa ku èkpe bɔ̀ɖodu kèawo nyi ènutèpekpɔtɔwo. Ènyè ya, mù le tànu be nyè mu la do àta èkpe kèawo va gbɔ wò, wò cã tànu be yè mu la do àta èkpe kèawo va èsɔ̀ nyè ji ò, nènea ke e nyi na èkpe lilia cã, ne bùsu mu gbà va ò. 53Abràham be Mawu ku Nàhɔr be Mawu ne sò jɔ̀jɔɛ lè mia dòmè.” E ye nyi woa tɔ be Mawu. Yakɔb tà ètɔa Izàk be ènusɛ̃sɛ̃a. 54Yakɔb wɔ̀ vɔsa lè ètoa ji. E yɔ nɔ̀viawo va ènuɖùpe; wo ɖùnu eye wo ci ètoa ji dɔ̃.
Currently Selected:
Gɔ̃mèjèje be Xoma 31: GEN
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Mina Bible © Bible Society of Togo, 2014.