Gɔ̃mèjèje be Xoma 14
14
Abràm, èfìɔwo ku Mɛlkisedɛk
1Vɔ̀a, Sinèa be èfìɔ Àmàràfɛ̀l be hùenua, Àriɔk Èlazàr be èfìɔ, Kedòr-Laomà Elàm be èfìɔ ku Tidèal Gòim be èfìɔ 2wo wɔ̀ àhùa ku Berà Sodɔ̀m be èfìɔ, kudo Bìrasà Gòmɔrà be èfìɔ, gbàkudo Sìneav Admà be èfìɔ, ku Semebɛr Sevàim be èfìɔ kudo Belà Soà be èfìɔawo. 3Ekèawo kpata ɖo la bɔ̀ lè Sidìm be bàlìa mè lè àpù vejè kpàa kè wo yɔna be àpù 'kukua' be tèpe. 4Wo sumɔ Kèdor-Laomà èpè woèvè, vɔ̀a lè èpè woètɔ̃gɔ̃a mèa, wo sitè ɖo e ŋuti. 5Lè èpè woènègɔ̃a mèa, Kèdor-Laomà va ku èfìɔ kèwo bɔ̀ ɖo e ŋutia. Wo ɖù Rèfayitètɔwo ji lè Àsàtarotè-kàrànaim, Zùzitètɔwo ji lè Ham, Èmitètɔwo ji lè Sawè-kìrìataim, 6Hòritètɔwo ji lè woabe ètoa ji so Sèir kaka va ɖo Ɛ̀l-Paràm kè gogo zògbè jia. 7E yomè a, wo trɔ yì Eiŋ-Mìsapàt lɔ̀ge lè Kadɛ̀s, wo gbã Àmàlɛktɔ kèwo lè Hàsasɔ̀m-Tamàa ŋutɔ cã. 8E na be Sodɔ̀m be èfìɔa sitè kplà jè ŋùkɔ̀, eye Gòmɔrà, Admà, Sèvoìm kudo Belà so Soàr be èfìɔwo bɔ̀ ɖo ŋuti. Wo wɔ̀ ɖoɖo sɔ wɔ̀ àhùa ku wo lè Sidìm be bàlìa mè, 9sitè ɖo Kèdora-Laomà Elàm be èfìɔ, Tidèal Gòim be èfìɔ, Àmeàrafɛ̀l Sìneàr be èfìɔ, Àriɔk Èlazàr be èfìɔ ŋuti: èfìɔ ènè sitè ɖo àtɔ̃ ŋuti. 10Sidìm be bàlìa mè kpata nyi àŋɔ̀ vudowo ɖèɖe; lè woabe sisi mèa, Sodɔ̀m ku Gòmɔrà be èfìɔawo jè àŋɔ̀ vudoawo mè, eye àmè kpɔ̀tɛawo si yì èto ji. 11Wo lɔ Sodɔ̀m ku Gòmɔrà be àdɔ̀kùnuwo, woabe ènuɖùɖuwo kpata eye wo jo. 12Wo le Lɔt, Abràm be àtàviyɔvia ku yebe àdɔ̀kùnuwo kpata eye wo jo. Lɔt sò àxue ɖo Sodɔ̀m nyigbã ji.
13Eye, àmè si àhùa ɖe va ɖè ènyà a na Abràm Hebrùvi a, kè kpɔ̀tɔ̀ lè Namirè be lokòtiwo dòmè, ekè wo yɔna be Àmoritètɔ, Èsokɔ̀l ku Anɛ̀r be nɔ̀vi ŋusù; wo nyi Abràm be xlɔ̃wo. 14Ekè e sè ènyà be wo le yè nɔ̀vi zè ɖèkaa, e bɔ̀ yebe sumɔ̃vi èkà adrɛ̃ takpo ci woènyi, kèwo wo jì lè ye ŋutɔ be àxomèa. E nyà wo kaka va ɖo Dàn. 15E ma yebe àmèawo ne bèa xa kɛ̃tɔawo lè èzã mè. E wɔ̀ àhùa ku wo, ɖù woa ji, nyà wo kaka yì ɖo Havà kè lè Dàmaskò be èvègoa. 16E trɔ xɔ̀ àdɔ̀kùnuwo kpata gbɔ̀. E kplɔ̀ nɔ̀via Lɔt ku yebe àdɔ̀kùnuwo kudo yebe dùkɔ̃a cã gbɔ.
17Sodɔ̀m be èfìɔ to yì Sawɛ̀ be bàlìa mè, ekè wo yɔna be èfìɔ be bàlìa, ne bèa yì dogò Abràm kè yì ɖù èfìɔ Kèdora-Laomà ku èfìɔ kèwo kplɔ̀ ɛ̀ doawo ji lè àhùa gbe ji trɔ gbãnà.
18Mɛlkisedɛk, Salɛ̀m be èfìɔa ye na kpɔ̃nɔ ku vɛ̃. E nyi Mawu èji-hũitɔa be hũbonɔ, 19eye e tu sì na Abràm gblɔ̃ be: “Sìtuɖèɖe e nyi na Abràm to Mawu èji-hũitɔa ji, ekè ɖo jiŋùkusi ku ànyigbã! 20Sìtuɖèɖe ye nyi Mawu èji-hũitɔ̀ kè ɖè 'èkɛ̃tɔ wòwo' do àsi mè na wòa!” Abràm na ɛ̀ ènu kè lè e sia be àkpa èwogɔ̃a.
21Sodɔ̀m be èfìɔa gblɔ̃ na Abràm be: “Sɔ àmèawo na mù, eye wòa trɔ sɔ àdɔ̀kùnɔ̀awo.” 22Abràm ɖo e ŋuti na ɛ̀ be: “Mù kɔ àlɔ̀ nyè ɖoɖa Tɔhonɔ̀a, Mawu èji-hũitɔ kè ɖo jiŋùkusi ku ànyigbã: 23èkà kui-ɖèka cã, àfɔ̀kpa be èkà ɖekpe ŋutɔ cã! Mù le kã ɖo e ji na wò be nyè mu la sɔ ènu ɖekpe kè nyi tɔ̀ wò ò. Ne mù gbà va gblɔ̃ be ènyè ye na Abràm ɖo àdɔ̀kùnuwo. 24Ènu ɖekpe mu kã mù ò, sɔ wu ɖèkajɛ nyèwo be ènuɖùɖu; ku àmè kèwo kplɔ̀ mù do a: Anɛ̀r, Èsokɔ̀l kudo Namrè ŋutia, wo ŋutɔ wo la xɔ̀ woa tɔ̀.”
Currently Selected:
Gɔ̃mèjèje be Xoma 14: GEN
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Mina Bible © Bible Society of Togo, 2014.