Toto jo 13
13
1Tɔhonɔ̀ gblɔ̃ na Mosè be: 2“Kɔ̀ ŋùkɔ̀gbevi ɖe sia ɖe ke hũ àdɔ̀ na ènɔa, ŋuti na mù, lè Izràɛlviwo dòmè; lè àgbètɔwo ku èlãhawo dòmèa, tɔ̀ nyè ye wo nyi.” 3Mosè gblɔ̃ na dùkɔ̃a be: “Mì la nɔ ɖo ŋùku ŋùkèkè kèa, ekè ji mì hũ jo lè Ejiptè, àfi kè mì nɔ̀ kluvi be àgbè lèa; ɖo, àlɔ̀ sɛ̃sɛ̃ ye Tɔhonɔ̀ sɔ ɖè mì to lè funua. Mì mu la ɖù èma xuãxuã be kpɔ̃nɔ lè àzã ŋua ji ò. 4Egbè ye mì le hũ jo, èbli yàya be wètri mè. 5Eye wàlɛbɛ kè Tɔhonɔ̀ la kplɔ̀ wo yì ɖo Kanàntɔ, Hitìtɔ, Àmorìtɔ, Hivìtɔ ku Yebusìtɔwo be ànyigbã ji, ànyigbã kè be àtãŋu be kã na ètɔ wòwo be yè la sɔ na woa, èdù kè mè ènyìnɔsi ku ànyisi bɔ lèa, wò la nɔ wɔ̀ èkɔ̀nu kèa, lè wètri kèa mè. 6Ŋùkèkè adrɛ̃ a, wò la ɖù kpɔ̃nɔ àkpiti. Ŋùkèkè adrɛ̃gɔ̃ a la nyi àzã na Tɔhonɔ̀. 7Wo la ɖù kpɔ̃nɔ àkpiti ŋùkèkè adrɛ̃awo. Wo mu la kpɔ èma xuãxuã be kpɔ̃nɔ ò. Wo mu la kpɔ mawɛhũanu lè ànyigbã wòa keŋu ji ò. 8Gbè ŋua gbè wò la sɔ ènufiɔàmè kèa do àsi na èvi wò ŋusùa be: 'Ekèa ŋuti ye Tɔhonɔ̀ wɔ̀ ɖàgbè na mù ekè be kplɔ̀ mù to lè Ejiptè a.' 9Àlɔ̀ sɛ̃sɛ̃ ye Tɔhonɔ̀ sɔ kplɔ̀ wò jo lè Ejiptè: ekèa ye la nyi jèsìdo lè àpo àlɔ̀, ŋùkuɖojinu lè ŋùkuvi wòwo be dòdòmè, ne Tɔhonɔ̀ be èsea, bèa nɔ̀ ènu mè na wò. 10Wò la nɔ zɔ̃ ɖo èse ŋɔ̀ŋlɔ̃ kèa ji, lè yebe àzã gbè, èpè sia èpè.”
11“Eye, ne Tɔhonɔ̀ kplɔ̀ wò ɖo Kanàntɔwo be èdù kè be àjɔ̀gbè be fìã na wò ku ètɔ wòwoa, eye ne e sɔ èdùa do àsi na wò vɔ̀a, 12wò la sɔ ènu kèwo keŋu hũ àdɔ̀ na nyɔ̃nù, ènu kèwo keŋu hũ àdɔ̀, lè èlãha kè nyi tɔ̀ wòa dòmè, ekèwo nyi àsuawo na Tɔhonɔ̀. 13Èsɔ-àkɛtɛ be ŋùkɔ̀gbeviwoa, wò la sɔ àlɛ̃, sɔ plè wo; ne wò mu la sɔ àlɛ̃, sɔ ɖɔ̀lì wo ò a, eŋuã, wò la ŋɛ̃ èkɔ̀ na wo. Wò la sɔ àlɛ̃, sɔ ɖɔ̀lì àgbètɔ be ŋùkɔ̀gbevi kèwo nyi tɔ̀ wɔ̀awo. 14Eye, ne èsɔ̀ godoa, èvi wò biɔ wò sè be: 'Nukɛ ŋuti wò le wɔ̀ ènu kèa ɖo ò?' Wò la ɖo e ŋuti na ɛ̀ be: “Àlɔ̀ sɛ̃sɛ̃ ye Tɔhonɔ̀ sɔ ɖè mi jo lè Ejiptè, àfi kè mi nɔ̀ kluvi be àgbè lèa. 15Nyàwo ye be nyi be, ekè Faraɔ̀n mu le lɔ̃ be yè a ɖè àsi lè mia ŋuti, ne mi a jo ò a, Tɔhonɔ̀ wù ŋùkɔ̀gbeviwo keŋu lè Ejiptè be ànyigbã ji. So àgbètɔ be ŋùkɔ̀gbeviwo ji, jè èlãha a be ŋùkɔ̀gbeviwo ji. Ekèa ŋuti ye mì sɔna èvi kè hũ àdɔ̀ na ènɔa kpòa, sanavɔ na Tɔhonɔ̀; vɔ̀a ŋùkɔ̀gbevi nyè ŋusùwo yaa, mù dɔ̀lìnà èta na wo.” 16'Àlɔ̀ sɛ̃sɛ̃ ye Tɔhonɔ̀ sɔ kplɔ̀ mi jo lè Ejiptè.' Ekèa ye la nyi jèsìdo lè àlɔ̀ ŋuti ku jèsìdo lè ŋùkuviwo be dòdòmè na wò.”
Mawu ŋutɔ kplɔ̀ yebe dùkɔ̃a
17Ekè Faraɔ̀n ɖè àsi lè dùkɔ̃a ŋuti, be joa, Filistìtɔwo be èmɔ ye nyi ekè jɔ̀ wua, gãkea, Mawu mu kplɔ̀ wo to e ji ò. Mawu gblɔ̃ na ye ɖokoe be: “Mu jè be ne dùkɔ̃a kpɔ àhùa wɔ̀wɔa, yebe ètamè ne trɔ, ne bèa trɔ gbɔ̀ va Ejiptè ò!” 18Mawu trɔ dùkɔ̃a be àzɔ̃lì to zògbè ji, tùtà plãŋùpòfɛ̃ be àpùa gbɔ. Àhùakɔ̃wo be ɖoɖo nu ye Izràɛlviwo nɔ̀, to lè Ejiptè. 19Mosè sɔ Yosɛ̀f kè kua, be èpuwo, ɖo Yosɛ̀f na Izràɛlviwo fìã àjɔ̀gbè na ɛ̀, wàlɛbɛ kè be gblɔ̃ na wo be: “Mawu mu la dokpò ènyà xɔ̀xɔ ɖo mìa ta ò. Eŋuã, mì la sɔ àpe èpuwo jo lè tèpe kèa, ne mì le joa.”
20Wo jo lè Sukɔ̀t, eye wo ɖo àsàɖa ɖo Etàm, lè zògbè a be ètomè. 21Tɔhonɔ̀ ŋutɔ le zɔ̃ lè ŋùkɔ̀ na wo: Lè ŋùkèkè mèa, E ɖona lilikpo babla be nɔ̀nɔmè, eye be hũnà èmɔ na wo; lè èzã mèa, E ɖona èzò babla be nɔ̀nɔ mè, eye be kɔ̀nà na wo; nènea, wo teŋu zɔ̃nà èzã ku kedè. 22Lè ŋùkèkè mèa, lilikpo bablaa, mu jona lè ŋùkɔ̀ na dùkɔ̃a ò, eye èzò bablaa cã mu jona, lè èzã mè ò.
Currently Selected:
Toto jo 13: GEN
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Mina Bible © Bible Society of Togo, 2014.
