MATIU 26
26
Ram tau leo huri vei vagamate i Jisas
1Lune i Jisas mo veve na leo ngerehi mo rovo, nge mo veve lawera nona rorongtagi vena, 2“Nem ilo ve lo tagui bongi gairue a gaganie huri Halegagaliu, ko rain lei i Netui Tangaloi vano ve rain toto vehavehaginie lo gai saroutu.” 3Siu ira muei rugurugu meire tamaragai nora sinobu ram sone bubugi lo valei Kaiavas, a rugurugu lawua, 4ko ram tau leo huri ve rain wiri bibi Jisas lo kalikeli ko rain vei vagamatea. 5Nge ram veve vena, “Hatie lolo gaganie vate vai a sinobu ran vui qalogi.”
Mo vurei Jisas a Betani
6Lune i Jisas mo toga lo valei Saemon a vohavono a Betani, 7a vavine mo ahu vonai lobena mena vurei bonbon lolo vurugi vatu, a gaivoligi u lawua garagara. Lune i Jisas mo gagani, a vavine hi mo lingi na vurei lo ului qatune. 8Nge ira rorongtagi ram lehi na gineu hi ram lologagasi hurie, ram veve vena, “?Huri hava gineu mo linglingi vuroginie? 9Huri vin sogagi leie huri na homu u sao, ko vin bete lai na homu hi lawera mahogi.” 10Nge i Jisas u ilo na nora leo, mo veve vena, “?Huri hava gineu nem vai taturegi na vavine hi? Huri nge u vei na tabana garea laweau. 11Huri ira mahogi ram toga gesegi mei gimiu, nge ineu nain he toga tea gesegi mei gimiu. 12Lune nge mo lingi na vurei ngaha luku, nge mo vaie ve vin vagatai na betuku huri tulegieu. 13A hogo, nam veve lawe gimiu vena, logologo vin ngasagi na Roro Garea hi lolo ure doluegi, vin laqagi huri na gineu hi nge u veie gina ladotaligu hurie.”
I Judas mo ladoutu vena rongo na leoi gai Jisas
14Siu gatagale denire domwagi gairue, a henana i Judas Iskariot, mo vano lobera muei rugurugu, mo veve vena, 15“?Nein bete na hava gineu laweau, tare ve nain lei i Jisas lawe gimiu?” Siu ingere ram valu na homu ngavulu gaitolu a silva ram bete lawea. 16Siu dena tarogi hi i Judas mo tino hikesi na mahogi garea vena rongo na leoi gai Jisas.
I Jisas mo gani na Halegagaliu meire nona rorongtagi
17Lo muei bongi gaganie huri na bereti siaga, ira rorongtagi ram vonai lobei Jisas ram veve vena, “?Gom tarani ve gain vei vagatai na gamu hinagai Halegagaliu lolo?”
18I Jisas mo veve vena, “Nen vano lo togagi venue lobena tangaloi gatagale, ko nen veve lawea vena, ‘A Huhui mo veve vena, A taroku u vonai beno, gain geni na Halegagaliu meire noku rorongtagi lo valemu.’ ” 19Ira rorongtagi ram vai mwere i Jisas u horara, ko ram vai vagatai na Halegagaliu. 20Lolo revirevi i Jisas mo vonai meire rorongtagi domwagi gairue. 21Lune ram toga huri gaganie, i Jisas mo veve vena, “A hogo, nam veve lawe gimiu vena, gatagale den gimiu vin rongo na leoi gaku.” 22Ira rorongtagi ram tau vuigi ve ram romasi garagara, ram huie vatavatahaginire vena, “?Sige ineu, Huqe?” 23I Jisas mo duvi gorora vena, “gatagale den gimiu, gorom hahaga bubugi lolo disi vin rongo na leoi gaku. 24Huri i Netui Tangaloi vin vano, mwere u reve lolo Reve reve Gogona hurie; nge hahagavi huri na tangaloi hi mo siregi i Netui Tangaloi vano! U garea lawe na tangaloi hi huri ve na mese vora vohogi!” 25I Judas, a tangaloi u rongo na leoi gai Jisas, mo veve vena, “?Sige ineu, Huhui?” Ko i Jisas mo veve vena, “Niko gom veve.”
A gaganie revirevi nona Huqe
26Lune ingere ram gagani, i Jisas mo lai na bereti, mo tataro vevegarea goroe, mo vise vurivurie, mo bete lawera rorongtagi, mo veve vena, “Nen laie, nen ganie, hingaha a betuku. 27Siu nge mo lai na laha, mo vevegareagi God, mo bete lawera, mo veve vena, “Gimiu doluegi nen inu ngaha, 28huri hingaha a daiku, mo hale huri na tangaloi sao, vena vai siagagi na varatau noi God huri ve na ladovohogi na galegaleasi. 29Nam veve lawe gimiu vena, nain he inu te taligu dena nubui mwasi vaen vin dadari a bongi ngehi nain inue garaqa mei gimiu lolo mwasoana garaqa hi Tamaku mo ratahigi lolona.” 30Siu ingere ram huri na ahi, ram vano sulo Vusi Oliv.
I Jisas mo veve tare huri ve i Bita vin tahae
31Siu i Jisas mo veve lawera vena, “Gimiu doluegi nein taturegi hurieu lolo bongi ngaha, huri u reve tau lo Reve reve Gogona vena:
‘Ineu nain wehi na leogoro
ko a sibsib talo burigi rain vano tereteregi.’
32Nge lune nain maraga taligu, nain vano gitomuegi gimiu a Kalili.”
33Nge i Bita mo duvi goroe vena, “Tare ve ingere doluegi rain taturegi hurigo, ineu na he taturegi te hurigo vohogi!”
34Ko i Jisas mo veve lawea vena, “A hogo, nam veve lawego vena, lolo bongi ngaha, a toa vin he tarere te tau, nge iniko goin tahau vagatolu.”
35I Bita mo duvi goroe vena, “Tare ve dori mate bulu, nain he tahago tea.” Ko ira rorongtagi doluegi ram veve mwerehi.
I Jisas mo tataro a Ketsemeni
36Siu i Jisas meire nona rorongtagi ram vonai lolo ute mo waregi ve Ketsemeni, ko i Jisas mo veve lawera vena, “Nen toga tahingaha, lune nain tutu vano tahi, nain tataro.” 37Nge mo lai Bita meire netui Sebedi gairue. Nge mo tauvuigi mo vonosie gina rongogagarasi, 38ko mo veve lawera vena, “A tamateku mo kuieu mo kakarani ve nain mate. Gimiu gaitolu nen toga tahingaha, nen rada goro meieu.” 39Nge mo dige beragi, mo sisiqeu hivo mo taigi na nagona talo tano, ko mo tataro mo veve vena, “Mama, tare ve gu vei lei, gon lai vohogi na laha ngaha denieu. Nge hatie noku tarani, nge a nomu na lai.” 40Siu nge mo tudori gorora rorongtagi, mo haqera ram maturu, ko mo veve lawe i Bita vena, “?Nge he rada goro lai tea huri na aho gatagale meieu? 41Nen rada goro, nen tataro, vate vai nem soi lolo kalikeli. A tamategi mo tarani, nge a vihigogi mo wiriwiri.”
42Ko nge mo vano, mo tataro taligu vagatuegi vena, “Mama, tare ve goin he lai vohogi na laha ngaha tea denieu, nge nain inue, a nomu tarani vin lei.”
43Siu nge mo tudori taligu lobera rorongtagi, mo haqera ram maturu, huri a matara mo huegi. 44I Jisas mo sireginire taligu, mo vano mo tataro taligu vagatoligi, mo veve na leo mwerehi u vevera tomue. 45Siu nge mo vonai lobera rorongtagi, mo veve lawera vena, “?Nem maturu teu, nem mabusurigi? A tarogi mo vonai kakarani ko i Netui Tangaloi vin sireginie lo limara galegaleasi. 46Nen maraga, da vano. Leo, i rongo na leoi gaku mo kakarani!”
Mo rongo na leoi gai Jisas ko mo wiri bibie
47Lune nge mo laqa mosigei, i Judas, gatagale denire domwagi gairue, mo vonai mena sinobu u sao, ram hako bue ko a ruqi, ram vonai denire muei rugurugu meire tamaragai nora sinobu. 48I rongo na leoi gana u lei na gigilegi lawera, mo veve vena, “I gineu nain sungunie, ngeie hi. Nen wiri bibie!” 49I Judas mo vano tuturedu lobei Jisas mo veve vena, “Garea, Huhui,” ko mo sungunie. 50I Jisas mo veve lawea vena, “Buluana, gon vai na gineu hi gom vonai hurie.” Siu ram dadari lobei Jisas, ram haga vano lune, ram wiri bibie. 51Ko leo, gatagale den ngaraha mei Jisas mo dange na nona bue, mo tai vano lo tangaloi tabanagi noi rugurugu lawua, ko mo tai sue na qerona. 52Ko i Jisas mo duvi goroe vena, “Gon tau na nomu bue taligu lolo tantanogi. Huri irahine ram hakovi na bue rain mate gina bue. 53?Gimiu nge he ilo tea ve nain ware lai Tamaku ve vin buluieu, ko siserigi nge vin hora na buri engsel u sao den hangavulu domwagi gairue laweau? 54?Ne tare ve nain vei mwerehi, vin vagahorongi na Reve reve Gogona wuraha, ram veve ve vin eno mwerehi? 55Lo tarogi hi i Jisas mo veve lawera sinobu vena, “?Gimiu nem vonai mena bue ko a ruqi ve nein wiri bibieu, mwere huri ve ineu i uebalu? Vataha bongi nau toga lo Sara Gogona, nau huhui, nge ne he wiri bibieu tea. 56Nge mo vai mwerehi ve a Reve reve Gogona nora tangaloi veve rarai vin eno lune.” Siu ira nona rorongtagi doluegi ram sireginie, ram toa vohogi.
Ira Kansel ta Judia ram vevegi Jisas
57Siu ngaraha rau wiri bibi i Jisas ram vano meie sulo valei Kaiavas i rugurugu lawua, ko ira huhui talo Leo hora noi Mosis meire tamaragai ram sone bubugi aie. 58I Bita mo hurire mala vagahao denire ko mo ahu lolo ara noi rugurugu lawua, ko nge mo toga hivo meire tangaloi, ve vin leo vurugegi na gineu hi vin rovo. 59Ira muei rugurugu ko ira Kansel doluegi ram hikesi na tangaloi ve rain tawei kalikeli huri Jisas huri ve rain vei vagamatea; 60ko ra he haqera tea, nge a tangaloi u sao ram vonai ve rain tawei kalikeli hurie. Vagasigi a tangaloi gairue rom vonai rom veve vena, 61“A tangaloi ngaha u veve vena, ‘Nain tala vohogi lei na vale gogona noi God ko lo rani gaitolu nain vutue wagineu.’ ” 62Ko i rugurugu lawua mo maraga mo veve lawe Jisas vena, “?Go he duvi tea? ?A hava gineu ngere ram veve vovohigo ginie?” 63Nge i Jisas mo toga rorongo. I rugurugu lawua mo veve lawea vena, “Nau ware na henai God i maso, gon veve huri lawe gamai ve iniko ngaha I Kraes i Netui God.” 64I Jisas mo duvi goroe vena, “Niko gom veve. Ko nam veve lawe gimiu doluegi ve den hibagataha ‘nein lehi i Netui Tangaloi vin toga lo matuei Gineu managi, vin vonai lo dodo talo mahava.’ ” 65Siu i rugurugu lawua mo dare na luqana, mo veve vena, “Nge mo laqa asiesi. Da he tarani tea ira tangaloi ve rain veve vovohie vage. Leo, neu rongo na nona leo asi. 66?Nem lado wuraha?” Ngere ram duvi vena, “Nge u tatarise ve vin mate.” 67Siu ram lodosi na nagona, ram tutugie; ko ingere ram rabasie 68ram veve vena, “Iniko i Kraes! Gon tige ve ihine mo tutuhigo!”
I Bita mo tahi i Jisas
69Nge i Bita mo toga varea tavala ara, ko gatagale denire taqalugu a tangaloi tabanagi noi rugurugu lawua mo vonai lobena mo veve vena, “Iniko vage mei Jisas ta Kalili.” 70Nge i Bita mo tahae lo nagora doluegi mo veve vena, “Na he ilo tea a hava gineu gom veve.” 71Siu nge mo mwalue mo vano lo matai ara, ko a taqalugu wagineu mo lehie mo veve lawera tangaloi aiehi vena, “Ngeie hi mei Jisas ta Nasaret.” 72Nge i Bita mo tahae taligu mo haharigi mo veve vena, “Na he ilo na tangaloi hi tea.” 73He ribi tea ingere ram labe kakarani ram vonai ram veve lawe i Bita vena, “A hogo, iniko vage gatagale meire, a vevenagi gam rongo hogosigo lo roroi leomu.” 74Siu i Bita mo tau vuigi mo haharigi, mo veve vena, “Na he ilo na tangaloi hi tea.” Ko siserigi a toa mo tarere. 75Ko i Bita mo lado haqe na leoi Jisas u veve tau lawea vena, “A toa vin he tarere te tau, nge iniko goin tahau vagatolu.” Ko nge mo mwalue mo ngara.
Currently Selected:
MATIU 26: HNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Bible Society of the South Pacific, 2013
