MATIU 22
22
A gato tavalu huri na hinagai legie
1I Jisas mo veve lawera taligu gina gato tavalu vena: 2“A mwasoana garaqa God mo ratahigi lolona u mwere na tangaloi a ratahigi mo vai na hinaga lawua huri na lagiana noi netune. 3Nge mo hora na nona tangaloi tabanagi ram vano ve rain veve lawera tangaloi u warera tau huri na lagiana ve rain vonai, tau ra he tarani tea ve rain vonai. 4Siu nge mo horara nona tangaloi tabanagi lavasigi taligu, mo veve vena, ‘Nen vano nen veve lawera tangaloi hi nau warera tau vonai vena, “Leo, nau vei vagatai na gaganie u rovo; nau wehi na bulugi ko a natui bulugi u damoe, ko a gineu doluegi u rarai rovo. Nen vonai lolo lagiana!” ’ 5Tau ingere rahe ladomavaginie tea, ram vano lo matahalara, gatagale lolo talune, tuegi lolo nona lalaie, 6ko lavasigi ram wiri bibire tangaloi tabanagi ngerehi, ram wehire, ram ue vagamatera. 7Nge lune i ratahigi mo rono, a lolona mo gagasi huri, mo horara nona tangaloi vuro vano, ram wehi na tangaloi ue balu ngerehi ko ram hure na vanuara. 8Siu nge mo veve lawera nona tangaloi tabanagi vena, ‘A lagiana u rarai beno, nge a tangaloi hi nau warera tau vonai rahe tatarise tea huri. 9Nen vano vataha na turegi lawua ko vataha na tangaloi nein haqera nen warera rain vonai lolo lagiana.’ 10Siu a tangaloi tabanagi ngerehi ram vano vataha na turegi ko ram vile buluteginire hi doluegi ram haqera, rau esi ko rau garea, ko a vale lagiana mo horo gina sinobu. 11“I ratahigi mo vano lolo vale mo lehi na tangaloi hi u warera ko nge mo lehi na tangaloi gatagale he saru na gavui lagiana tea. 12Mo veve lawea vena, ‘?Buluana, gu vonai tangaha wuraha, go he saru na gavui lagiana tea?’ Nge ingeie he veve na hava gineu tea. 13Siu i ratahigi mo veve lawera nona tangaloi tabanagi vena, ‘Nen vau bulutegi na limana ko a karune, nen tuli vohoginie lolo dodogi varea, vin tengi ko vin gesigesigi livona aie.’ ” 14Ko i Jisas mo veve vagasigi vena, “Mo warera u sao, nge mo leo wahera he sao tea.
Ram hui Jisas huri na vilevile takis
15Ira Varise ram mwalue ram tau na nora leo huri ve rain holi Jisas lo leona. 16Siu ram hora lawe Jisas na nora rorongtagi lavasigi ko lavasigi dena burigi noi Herod, ram veve lawea vena, “Huhui, gamai gam ilo ve iniko a hogo, gom huhui na matahalai God hogo: gohe matagu tea gina tangaloi, a vevenagi gohe lado na nagoi tangaloi tea. 17?Gon veve lawe gamai, gom lado mwere hilogo? ?U tatarise mena Leo hora ve dain voli takis lawe na muei ratahigi ta Rom sige hatie?” 18Nge i Jisas mo ilo na nora tau leo asi hi, mo duvi gorora vena, “Gimiu ira kali goro! ?Huri hava gineu nem vai leo ve nein sinau? 19Nen haharagi na homu hi dam voli na takis ginie.” Siu ram bete na vatu lawea, 20ko nge mo huire vena, “?Nunui hine ko a henai hine ngaha?” 21Ram duvi goroe vena, “Noi muei ratahigi.” Siu nge mo veve lawera vena, “Giniehi, nen bete lawe i muei ratahigi a hava gineu noi muei ratahigi, ko lawe God a hava gineu noi God.” 22Lune ingere ram rongo na leo ngehi ram awogi hurie, ko ram sireginie ram vano denie.
Ram hui Jisas huri na maraga taligu dena mateana
23Lo mahoi reni hi tau mosigei ira Sadusi lavasigi ram vonai lobei Jisas. Ngere ram veve ve hatie maraga taligu dena mateana. Ram huie vena: 24“Huhui, i Mosis u veve vena, ‘Tare ve a Tangaloi vin mate, nge netune hatie, i tuana vin lei na maduana, vin hakovi na maresu lawe tuana hi u mate beno.’ 25Siu ira reretehigi ingere gaibitu lobemai. A togagi mo lagi na vavine; siu mo mate, he hako te maresu. Giniehi, nge mo siregi na maduana lawe i tuana. 26Mwerehi i tuana tuegi ko gaitoligi, mo dadari lo gaibitugi. 27Vagasigi a vavine hi mo mate vage. 28?Nge lo maraga taligu nge vin voragi gahorai hine vohogi denire gaibitu? Huri ingere doluegi rau legi meie.” 29I Jisas mo duvi gorora vena: “Gimiu nem lenga, nehe ilo tea na Reve reve Gogona sige a managi noi God. 30Huri lo maraga taligu ingere rain mwere ira engsel ta eulu, ko a mwera ko a vavine rain he lagi tea taligu. 31Nge huri ira mate ve rain maraga taligu, nehe valu na leo tea hi God u veve vena, 32‘Ineu God noi Ebraham, God noi Aesak ko i God noi Jekob.’ Mwerehi nem ilo ve ingeie God nora mwaso, hatie nora mategi.” 33Lune ira sinobu ram rongoe, ram garigi huri na nona leo huhui.
A Leo hora lawua
34Lune ira Varise ram rongo huri ve i Jisas u vaire Sadusi ram toga qatoa, nge ingere ram vonai tabulutegi. 35Gatagale denire, a huhui talo Leo hora noi Mosis, mo vai leo huri vena sine Jisas gina leo huihui. 36Mo hui Jisas mo veve vena, “?Huhui, a Leo hora ngehilogo u lawua liu lo Leo hora noi Mosis?” 37I Jisas mo duvi goroe vena, “Gon tabe na Huqe nomu God gina taqangimu doluegi, ko gina tamatemu doluegi, ko gina domimu doluegi. 38Ngehi a muei Leo hora ko u lawua. 39Ko a Leo hora tuegi mwerehi vage nge ngaha: ‘Gon tabe na tangaloi wagineu mwereigo sibomu.’ 40A Leo hora noi Mosis ko a leo huhui nora tangaloi veve rarai rom labe lo Leo hora gairue ngerehi.”
A huihui huri i Kraes
41Lune ira Varise ram vonai bubugi, i Jisas mo huire vena, 42“?Nem lado wuraha huri i Kraes? Ingeie a duvi hine?”
Ngere ram veve vena, “Ingeie den duvi Devet.” 43I Jisas mo hui vena, “?Huri hava gineu a Vui u vei Devet mo ware i Kraes ve nona Huqe? Huri i Devet mo veve vena,
44‘A Huqe mo veve lawe
na noku Huqe vena:
Gon toga lo matueku,
vin dadari nain teu na nomu tavului vuro
teri lovavai kerumu.’
45?Tare ve i Devet mo ware Kraes ve nona Huqe, nge vin voragi duvi Devet mwerehilogo?” 46Ihine tea he duvi goro i Jisas lai tea gena leo gatagale, ko dena mahogi hi a tangaloi gatagale he huie lai tea huri hava gineu.
Currently Selected:
MATIU 22: HNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Bible Society of the South Pacific, 2013
