Luki 5
5
Isa la talibi fɔlɛnu
1Lun do, Isa be sɔren Genesarɛti ba dala, jama nata a lamilin han anu ka a kɛtɛn, Ala la kuma mɔɛ koe la. 2A ka kuluŋɛ banba fila yen sigiren ba dala, yɛgɛ bitalanu bata yɛlɛ min tɔ, anu be anu la jalanu lakola. 3A jigita wo kuluŋɛnu dɔndɔ butɔ, min mu Simɔn tɛŋɛ la. A ka Simɔn madiya a ni kuluŋɛ bɔɔ barafue tɔ, a ni a majigi donden. Wo kɔma, a sigita kuluŋɛ butɔ, a tota jama kawandila.
4A to ka kawande ban, a ka a fɔ Simɔn ye, a ko: «Kuluŋɛ doni kandula luggɛreŋɛ tɔ, wo ni wo la jalanu sa je tɔ, yɛgɛ bita koe la.» 5Simɔn ka a jaabi, a ko: «N marige, mɔ ka sue bɛ ban katala yan de, mɔ ma fenfen bita. Kɔnɔ ile to bata kuma n si jala sa le je tɔ.» 6Anu to ka a sa, anu ka yɛgɛ siyama bita, han anu la jalanu dita farala. 7Anu kafuɲɔgɛ minnu be kuluŋɛ doe tɔ, anu ka anu bole makati wonu ma, anu ni na anu dɛman. Wonu nata, anu ka wo kulun fila lafa yɛgɛ la han anu dita dulala. 8Simɔn Piyɛri to ka wo koe yen, a boeta Isa kɛn kɔtɔ, a ko: «Ee Marige, i matuntun n na, bayi junubutɔɛ le mu n na.» 9A ka a fɔ le, bayi wo yɛgɛ siyama bita koe bata a yigitɛgɛ anun minnu be a kɛnna, han anu bata kilan. 10Simɔn Piyɛri kafuɲɔgɛnu, minnu mu Sebede la den kayireŋɛnu la, Yaguba nun Yaya, wonu tugun kaabɛta. Awa, Isa ka a fɔ Simɔn ye: «I kana kilan. Bi kɔma, i te yɛgɛ bita bitugun, i be naala mɔgɛnu le bitala alako anu ni sɔ n kɔma.» 11Anu ka kuluŋɛnu layɛlɛ kɛnɛ tɔ, anu ka koe bɛ boloka, anu sɔta Isa kɔma.
Baliwulentɔɛ do lasaniyan koe
12Isa be saa dɔndɔ tɔ lun do, kaye do be ɲɔ, baliwuleŋɛ be a bale bɛ ma. A to ka Isa yen, a ka a tindɛ sɔ duge ma, a ka a madiya, a ko: «N marige, ka i sɔnta, i si nɔ n nasaniyanna.#5:12 Taureta Musa, kitabu sabaɲɔgɛ, sora 13 nun 14 fɛlɛ.» 13Isa ka a bole lafonti a ka a maga a la, a ko: «N bata sɔn. I ni saniyan.» Baliwuleŋɛ ka a boloka ɲɔ kisanna. 14Wo kɔma, Isa ka a yamɔri a kana wo koe fɔ mɔgɔ yo ye. A ka a fɔ a ye: «Taga i bale yita sarika lakela la. I ni sarika bɔɔ i la saniyaŋɛ la ko la, iko annabi Musa ka yamɔre sa ki min na. Wo si ma seede la mɔgɛnu ye.»
15Isa la ko kibare tota malansanna dula bɛ tɔ, a tanbita a fɔlɔnɛŋɛ la. Jama banba be madɛnna a kulɛ lamɔɛdula, anun anu la bandenu lakendeyadula. 16Kɔnɔ ale dun be a mabɔɔla, a be tagala janfue butɔ Ala matarandula.
Mɔgɔ mabɛndeŋɛ lakendeya koe
17Lun do, Isa be mɔgɛnu kawandila. Farisinu anun sariya karamɔgɛnu be sigiren ɲɔ. Wonu be naren bɔɔla Galile duge anun Darisalamu anun Juda duge saa lanmanu tɔɛ bɛ tɔ. Marige Alatala sɛnbɛ be Isa ma a ni mɔgɛnu lakendeya. 18Wo tɛmuɛ le, mɔgɛ donu nata kayi mabɛndeŋɛ do fɛ jala tɔ. Anu katata a ladon koe la, anu ni a sa Isa kɛn kɔtɔ. 19Kɔnɔ jama be siyaren koola, anu ma fɛrɛ sɔtɔ a ladon koe la. Wo butɔ, anu yɛlɛta boŋɛ kanna, anu ka dula do lawuli. Anu ka mɔgɔ mabɛndeŋɛ nun a la jala lajigi wo fota la han anu tagata a sa Isa kɛn kɔtɔ jama tɛma. 20Isa to ka anu la dɛnkɛnɛya yen, a ka a fɔ: «Kayi, i la junubenu bata kafari.»
21Sariya karamɔgɛnu anun Farisinu fɔlɔta anu mirala, anu ko: «Ɲɔmɔ le kɛ la min be tana kuma fɔla Ala ma? Ɲɔmɔ si nɔ junubenu kafarila ka Ala dɔrɔn ma?» 22Isa to ka anu la mira lɔn, a ka anu jaabi a ka a fɔ anu ye: «Mira mɔle miniman de be wo juse tɔ? 23Kɛ kuma fila miniman sɔnɔyata, a fɔ koe la kɛ kaye ye: ‹I la junubenu bata kafari›, ka wo ma: ‹Ile wuli, i ni tagaman›? 24Awa, n be diren de wo ni a lɔn yamɔre be nde Adamadeŋɛ bolo junubu kafari koe la duge kunma.» Wo butɔ, Isa ka a fɔ mɔgɔ mabɛndeŋɛ ye: «N bata i yamɔri, wuli, i ni i la jala jigan, i ni taga i bata.» 25A wulita anu ɲala kisanna, a ka a la jala jigan, a tagata a bata, a be Ala matɔgɔla. 26Wo butɔ, mɔgɛnu bɛ kaabɛta, anu tota Ala matɔgɔla, anu mɛn kilanta koola, anu tota a fɔla: «Mɔ bata kabanakoenu yen bi!»
Lewi makele koe
27Wo tanbi kɔma, Isa bɔɔta, a ka duuti makelela do yen, a be sigiren duuti makele dula tɔ. A tɔgɔ Lewi. Isa ka a fɔ a ye: «Sɔ n kɔma.» 28Lewi ka koe bɛ boloka ɲɔ, a wulita a sɔta a kɔma. 29A ka muradi banba sa Isa ye a la boŋɛ tɔ. Duuti makelela siyama tugun nata, anun mɔgɔ donu, anu bɛ ka dɔmɔre ma dula dɔndɔ tɔ. 30Farisinu nun anu la sariya karamɔgɛnu ŋunuŋuta Isa la talibenu ma, anu ko: «Wo be dɔmɔre mala, ka je min duuti makelelanu nun junubutɔɛnu fɛ fenna?» 31Isa ka anu jaabi, a ko: «Kendebaganu haju yo bele booribɔla ma, bandibaganu le hajue be a ma. 32N bele lasanbaren mɔgɛnu ma minnu be telenden. N be lasanbaren junubutɔɛnu le ma n ni anu kele, anu ni tuubɛ.»
Súŋɛ́ la ko ɲininkare
33Wo tɛmuɛ, anu ka a fɔ Isa ye: «Yaya la talibenu be sunna tɛmuɛ bɛ, anu be Ala mataranna, Farisinu tɛn talibenu tugun be a mala ɲɔgɔnna. Kɔnɔ i la talibenu kan be dɔmɔre mala, anu be minfeŋɛ minna wagate bɛ.» 34Isa ka anu jaabi, a ko: «Wo si nɔ muradilanu yamɔrila ba, anu ni sun, ka jonba tige be anu tɛma? 35Ade! Kɔnɔ lun do si naa ke, jonba tige tini bɔɔ anu tɛma, anu si sun wo tɛmuɛ le.»
36A ka taale do tugun sa anu ye, a ko: «Mɔgɔ yo te kuta kunte bɔɔ doroki nama la, a ni a kara doroki kɔtɛ ma, ka wo ma, doroki nama bata tiɲa, wo kunte tugun te bɛn doroki kɔtɛ ma. 37A mɛn tugun, mɔgɔ yo te beeri fatima nama sa beeri safeŋɛ kɔtɔma butɔ, ka wo ma, beeri nama si beeri safeŋɛ bula le. Wo tɛmuɛ, beere bɛ bata bɔn, a safeŋɛ tugun bata tiɲa. 38Wolo mu a bɛnta, beeri nama ni sa beeri safeŋɛ nama le butɔ. 39Wo bɛ butɔ, ka mɔgɛ bata dari beeri kɔtɔma minna, beeri nama sɔgɛ te a bita, bayi a be a fɔla le, beeri kɔtɛ le di.»
