Luki 21

Furuɲa muse la sarika bɔɔreŋɛ

1Isa ka a ɲa lawuli, a ka nafulu banba tigenu yen sarikanu bɔɔla anu be anu sala sarika safeŋɛ butɔ. 2A mɛn ka furuɲa muse fugare do yen, min be nafulu kolo lanma fila sala ɲɔ. 3Wo butɔ, Isa ko: «N ni tɔɲa fɔ wo ye: kɛ furuɲa muse fugare bata sarika bɔɔ ka tanbi anu bɛ la, 4bayi kɛ nafulu banba tigenu bɛ ka donden de bɔɔ anu la nafulu banba la, anu ka a dii sarika la. Kɔnɔ ale kan, a la wo fugariya butɔ, min be a bolo a balue la, a ka a bɛ bɔɔ sarika la.»

Ala batu bon banba la ko

5Wo kɔma, mɔgɛ donu be Ala batu bon banba matɔgɔla anu ko aa a sɔta kuru ɲinmanu la, ale boŋɛ majabufeŋɛnu, minnu diita sarika la, wonu tugun bɛnta koola. Isa ka anu jaabi, a ko: 6«Lun do si naa ke, wo be koenu min lasagaren yan, hali kuru dɔndɔ te to ɲɔgɔn kunma bitugun, a bɛ si laboe le.»

Misalenu

7Anu ka a ɲininka, anu ko: «Karamɔgɔ, wo koenu be mala muntuma le? Ka wo koenu bata wuli kela, fen de si ma a misale la?» 8Isa ka anu jaabi, a ko: «Wo ni mɛnni wo yɛtɛ ma: wo kana sɔn mɔgɔ yo ni wo madakuya. Mɔgɔ siyama si na n tɔgɛ fɛ, a ni a fɔ aa Ala la mɔgɔ masubɛreŋɛ le mu a la, a mɛn ni a fɔ aa Ala la wagate bata ke. Wo kana anu jokki de! 9Wo tini kɛlɛ nun jihade la ko mɔɛ, hali wo ma kilan. A fɛrɛ bele fɔ wo koenu fɔlɔ ni ma, kɔnɔ wo si a taran, dunuya la baŋɛ ma ke betunna.»

10Wo kɔma, a ka a fɔ anu ye, a ko: «Siiɲɔgɔya si to duge butɔ, jamanɛnu si boe ɲɔgɔn ma. 11Dula siyama tɔ, dugu sɛrɛŋɛ belebele si ma, kɔnkɛ anun bandiya koroŋɛnu tugun si don duge la. Ko makilandeŋɛnu anun misali banbanu si yen saŋɛ tɔ.

12Kɔnɔ yannun wo koenu bɛ ni ma, mɔgɛnu si wo jokki anu ni wo bita ka wo ɲagankata. Anu si wo don kawandi ma boŋɛ kuntigenu bolo, ka wo sa geele tɔ. Anu si wo doni kiiti dula mansanu bata, anun jamanɛ tigenu bata. Wo ɲagankata bɛ be wo masɔtɔla nde le la ko sabu la. 13Kɔnɔ wo si ma wo ye fɛrɛ la, wo ni n na ko fɔ ɲɔ. 14Wo ni a sa wo hakkile tɔ, yannun wo wagate ni ke, wo kana sikkɛ wo kunma fɔ koe la. 15Ka a wagate bata ke, nde yɛtɛ si naa hakkilimaya kumanu dii wo ma, wolo mu wo jaguenu hali dɔndɔ te nɔ wo jaabila, anu mɛn te nɔ wo sɔsɔla. 16Hali wo sɔtɔbaganu, anun wo baaba dɔndɛnu, anun wo bareŋɛnu, anun wo kafuɲɔgɛnu, wonu yɛtɛ si wo to mɔgɛnu sagoe tɔ, anu si donu faga wo tɔ. 17Mɔgɛ bɛ si wo kɔn, nde le la ko sabu la. 18Kɔnɔ hali wo kunsigi dɔndɔ te sama. 19Wo wakkilɛ de! Wolo si a ma wo si kise sɔtɔ.»

Darisalamu tiɲa koe

20«Ka wo ka a yen sɔɔrenu be Darisalamu saa lamilinna lun min na, wo tɛmuɛ wo si a lɔn saa tiɲa tɛmuɛ bata ke. 21Wo tɛmuɛ, minnu be Juda duge tɔ, wonu ni bori ka taga kɔnkɛnu tɔ. Minnu be Darisalamu saa tɔ, wonu ni bɔɔ ɲɔ. Minnu be ɲagama butɔ, wonu kana don saa tɔ. 22Ala la jihadi luŋɛ le mu wo lun, wo butɔ fenfen be sɛbɛren, wo bɛ ni kamali. 23Wo tɛmuɛ, ɲagankata be buuma musenu ye anun minnu be den na suse tɔ, bayi kɛ duge si gbaloe sɔtɔ le a banba la, Ala si a la dumɛ labɔɔ a la jama ma. 24Faŋɛ da si donu faga. Anu si donu bita kɛlɛ butɔ ka anu doni dunuya jamanɛ bɛ tɔ. Wo tɛmuɛ, sii gbɛtɛnu si don Darisalamu ka ɲɔ tiɲa feu, han sii gbɛtɛnu la wagate tini kamali tɛmuɛ min tɔ.»

Isa mɛn tana koe

25«Misalenu si yen tele nun kare nun loolenu ma. Duge tɔ tugun, jamanɛnu mɔgɛnu juse si bɔɔ le, anu si kilan de mɔrɔŋɛnu girinba kulɛ la. 26Mɔgɛnu tini anu mira koe minnu si naa ma dunuya, anu si kilan han anu ni ketun, bayi hali saŋɛ butɔ feŋɛnu si lamaga. 27Wo tɛmuɛ le, anu si nde Adamadeŋɛ yen tanala luuture be n namilinden, anun sɛnbɛ banba anun nɔɔra fɛ. 28Ka wo koenu bata fɔlɔ mala, wo ni sɔ wo ni limaniya, wo ni wo ɲa sɔ saŋɛ la, bayi wo boloka wagate bata ke.»

29Wo kɔma Isa ka misale do fɔ anu ye, a ko: «Wo toore lɔgɛ fɛlɛ, anun lɔgɛ bɛ. 30Wo tini a yen anu be nɛlunna, wo be a lɔnna le kisanna ka a fɔla sɛttɔɛ bata ban kela. 31Wole tugun ɲɔgɔnna le. Ka wo ka yen wo koenu be mala wagate min tɔ, wo ni a lɔn ka a fɔla Ala la mansabaya bata ke. 32N ni tɔɲa fɔ wo ye: wo koe tini be mala, wo si a taran, bi jamanɛ mɔgɛnu bɛ ma ban fagala. 33Lun do si naa ke, saŋɛ nun duge la ko si ban feu. Kɔnɔ n na kumanu kan te ban abada!

34Awa, wo ni wo yɛtɛ mɛnni: wo kana to minfeŋɛ banba minna, wo ni siisi, han wo sondoŋɛ ni dese; wo kana kɔntɔfili dunuya sigi ɲa la, alako wo luŋɛ kana wo latɛrɛnna. 35Wo luŋɛ si na le iko jala, a ni dusu mɔgɛ bɛ kunma minnu be sigiren duge bɛ tɔ. 36Wo ni to kinnɔgɔbaliya tɔ, wo ni to Ala mataraŋɛ tɔ tɛmuɛ bɛ, alako wo ni nɔ kisila koe bɛ ma, minnu be naala kela. Wo butɔ, wo te malu nde Adamadeŋɛ ɲala.»

37Tele tɔ, Isa telenta mɔgɛnu kawandila Ala batu bon banba butɔ. Sue tini don, a ni bɔɔ a ni taga ki kɔnkɛ tɔ, min tɔgɔ Jayitunu kɔnkɛ. 38Mɔgɛ bɛ ni kɛnɛ sorila a dula Ala batu bon banba butɔ, anu ni anu tolomasɔ a la.

Currently Selected:

Luki 21: MOG

ማድመቅ

Copy