Ko fɔlɔfɔlɛ 8
8
Banbaraŋɛ ban tuma
1Wo kɔma, Ala hinnɛta Nuha la, anun burun butɔ subenu, anun kolofeŋɛnu minnu be a bolo kulun banba butɔ. Ala ka fɔɲɛ labɔɔ je kunma, je fɔlɔta majigila. 2Duge tɔ ji bata bonda da tagunta, anun sankole tɔ ji bata bonda. Sangi je kaata. 3Je tota majigila duge kunma donden donden. Tele kɛmɛ tele bi loolu latanbireŋɛ, je fɔlɔta madɔgɔyala. 4Wo butɔ, a kari wɔrɔwila tele tan nun wɔrɔwila luŋɛ, kulun banba nata sigi Arara duge tɔ, kɔnkɛ do kunma. 5Je tota madɔgɔyala han a keta saŋɛ kari tanɲɔgɛ ma. Wo kare tele fɔlɛ, kɔnkɛnu kuŋɛnu bɔɔta.
6Tele bi naani la tanbireŋɛ, Nuha ka wundare min ɲiɲa kulun banba sɔngɔ, a ka a laka. 7A ka kaaka do boloka. Wo bɔɔta a tota tagala a ni saagi han je ni bala duge kunma. 8Nuha mɛn ka gabue boloka, a ni a fɛlɛ ka je bata fɔlɔ majigila duge kunma. 9Gabue bɔɔta, kɔnɔ a ma sigidula sɔtɔ. A saagita Nuha ma kulun banba butɔ, bayi je be duge bɛ kunma betunna. Nuha ka a bole labɔɔ a ka gabue bita a ka a ladon kulun banba butɔ. 10Nuha ka a to han tele wɔrɔwila tanbita. A mɛn ka gabue boloka, a bɔɔta kulun banba butɔ. 11Wura la, gabue mɛn tasaagita Nuha ma, oliwiye yanba kutaŋɛ be a da la. Nuha ka a lɔn wolo la je bata fɔlɔ majigila duge kunma. 12A ka a to han tele wɔrɔwila mɛn ta tanbita, a mɛn ka gabue boloka. Gabue tagata kɔnɔ a ma tasaagi Nuha ma bitugun.
13Nuha la sɔtɛ to keta san kɛmɛ wɔɔrɔ nun san dɔndɔ, kari dɔndɔ tele dɔndɔ la, je balata duge kunma. Nuha to ka kuluŋɛ kunma laka, a ka kɛnɛ yen, duge kunma bɛ be balaren. 14Kari fila tele mugan nun wɔrɔwila to tanbita, duge balata ken.
15Wo butɔ, Ala ka a fɔ Nuha ye: 16«Wo bɔɔ kulun banba butɔ, ile nun i la muse, anun i la den kayireŋɛnu, anun i la den kayireŋɛnu la musenu. 17I ni nilama bɔnsɛ bɛ labɔɔ minnu be i bolo, kondeŋɛnu yo, subenu yo, bubufeŋɛnu yo, alako anu ni jiidi, anu ni siya, anu ni duge lafa.» 18Wo butɔ, Nuha bɔɔta kulun banba butɔ anun a la den kayireŋɛnu, anun a la muse, anun a la den kayireŋɛnu la musenu. 19Nilama bɛ bɔɔta. Subenu yo, bubufeŋɛnu yo, kondeŋɛnu yo, bɛ bɔɔta kulun banba butɔ anun a bɔnsɛ la.
20Wo kɔma, Nuha ka sarika bintandula ɲiɲa, a ka Alatala batu. A ka subu ladagɛreŋɛ mɔɔle bɛ jigan dɔndɔ dɔndɔ anun konden ladagɛreŋɛ, a ka a bɔɔ sarika bintannɛŋɛ la.#8:20 Bayi fɔlɛ tɔ sarika donu be bintanna le. 21Wo sarika kuɲɛ diyata Alatala ye. A ka a hanige, a ko: «N te duge barikɛ bɔɔ bitugun adamadeŋɛ la ko la. Tɔɲa le, n ka a lɔn ka bɔɔ anu denden tɛmuɛ, anu la mira be tabɛnden ko koron ma le ma. Kɔnɔ n te sɔn nilamanu bɛ halagila bitugun iko n bɔɔren a mala ki min na.
22Fanni dunuya be mɛla,
sugenu ki tɛmuɛ,
anun a tɛgɛ tɛmuɛ,
kima anun wuyeŋɛ,
telema anun sama,
tele anun sue,
n te wo bɔɔ a tɔ bitugun
han dunuya ni ban.»
Currently Selected:
Ko fɔlɔfɔlɛ 8: MOG
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
