Ko fɔlɔfɔlɛ 6
6
Alatala la nimisa adamadeŋɛ la ko la
1Mɔgɛnu to fɔlɔta siyala duge kunma, anu be den musereŋɛnu sɔtɔla, 2Ala la maleka koroŋɛnu ka anu ɲa sɔ wo den musereŋɛnu la, anu ka a yen wonu bɛnta han. Minnu diyata anu ye, anu ka wonu jigan anu ka anu ma anu la musenu la. 3Wo kɔma, Alatala ka a fɔ: «N ka n na fɔɲɔ balunɛŋɛ ladon mɔgɛnu tɔ, kɔnɔ n te sɔn a ni mɛ anu tɔ bitugun, bayi fenfen ma mɔgɛ la, fɔ bannɛŋɛ. A la simaya bɛ labɛndeŋɛ mu san kɛmɛ san mugan de la.» 4Ala la maleka koroŋɛnu keta mɔgɛnu la den musereŋɛnu ma tɛmuɛ min tɔ, wonu ka deŋɛnu sɔtɔ anu ye. Wo deŋɛnu mata mɔgɔ kayanma la duge kunma. Wagati donu tanbireŋɛ kɔma wonu mata mɔgɔ sɛnbɛmanu la, anu tɔgɛ bɔɔta han.
5Alatala ka a yen, adamadeŋɛ la ko koron ma bata koloya duge kunma. A ka a yen, tɛmuɛ bɛ fenfen bele adamadeŋɛ juse tɔ, fɔ mira koroŋɛ. 6Alatala nimisata adamadeŋɛ da koe la duge kunma. Wo ka a juse tɔɔrɔ han. 7Alatala ka a hanige, a ko: «N ka mɔgɛ minnu da, n si wonu bɛ halagi le anu ni ban duge kunma. Mɔgɛnu yo, bubufeŋɛnu yo, kolofeŋɛnu yo, kondeŋɛnu minnu be kantɔ yo, a bɛ si halagi, bayi n bata nimisa anu da koe la.» 8Kɔnɔ, Nuha kan diyata Alatala ye.
Nuha la kulun banba
9Nuha bɔnsɛ la tarigu le ka. Nuha dɔrɔn de mu mɔgɔ telendeŋɛ la adamadeŋɛnu bɛ tɛma, fenfen bele a la. A be sɔren Ala la kila kɔma. 10A ka den kayiren saba sɔtɔ: Sɛmi, Hima, anun Jafasa. 11Wo tɛmuɛ, ko koroŋɛ be mala dula bɛ tɔ Ala ɲa kɔtɔ duge kunma. Mɔgɛnu bata kanbɛlɛya ɲɔgɔn ma dula bɛ tɔ. 12Ala ka a yen duge bata tiɲa ko koroŋɛ la, bayi mɔgɛ bɛ la wale bata tabɛn ko koron ma le ma, han anu ka a dan natanbi.
13Wo butɔ, Ala ka a fɔ Nuha ye, a ko:
«N bata a hanige adamadeŋɛ bɛ ni halagi n bolo,
bayi kanbɛlɛya bata to anu bolo
han ka duge lafa ko koroŋɛ la.
N be diren anu bɛ tiɲala dunuya.
14Awa, taga lɔgɔ ɲinma fɛlɛ i ni kulun banba banban i fan ye. I ni konkenu to a butɔ. I ni a butɔ nun a kɔma furugu dolo je la. 15A ɲiɲa ɲa le ka: i ni a la kayanya ma nɔngɔn ɲa kɛmɛ saba la, i ni a la yajɛ ma nɔngɔn ɲa bi loolu la, i ni a la towe ma nɔngɔn ɲa bi saba la. 16I ni a kunma mabutin alako nɔngɔn ɲa dɔndɔ ni to a nun kuluŋɛ tɛma. I ni bonda to a sɔngɔ dɔndɔ la. I ni bɛntɛ saba sa a butɔ, do ni to kɔtɔ, do ni to tɛma, do ni to kunma.
17Wo kɔma, n si naa banbaraŋɛ latugu dunuya la. Min bɛ be foofila duge kunma, a bɛ si halagi, nilama min bɛ be saŋɛ kɔtɔ a bɛ si faga. 18Kɔnɔ n bata lahire jigan ile ye n ni i lakisi. I nun i la muse nun i la den kayireŋɛnu si don kɛ kulun banba butɔ anun anu la musenu. 19I ni nilama mɔɔle bɛ fila fila ladon i fɛ kulun banba butɔ, kayi nun musu. Wolo mu wonu si kisi i fɛ. 20Kondeŋɛnu yo, burun butɔ subenu yo, bubufeŋɛnu yo, a bɛ fila fila si na i ma, kayi nun musu, anu ni kisi i fɛ. 21I ni dɔmɛ mɔɔle bɛ jigan i ni a doni i fɛ kulun banba butɔ; wo ni ma i tɛn balue la, anun anu tɛŋɛ.»
22Awa, Nuha ka a ma ɲɔgɔnna le. A ka a bɛ ma, iko Ala ka a yamɔri ki min na.
Currently Selected:
Ko fɔlɔfɔlɛ 6: MOG
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
